Chapter 10
Chapter 9 / Enoch / Chapter 10 Chapter 11

1 ወአሜሃ ፡ ልዑል ፡ ዐቢይ ፡ ወቅዱስ ፡ ተናገረ ፡ ወፈነዎ ፡ ለአርስየላልዩር ፡ ኀበ ፡ ወልደ ፡ ላሜክ ፡ ወይቤሎ ።

2 በሎ ፡ በስመ ፡ ዚአየ ፡ ኅባእ ፡ ርእሰከ ፡ ወአግህድ ፡ ሎቱ ፡ ፍጻሜ ፡ ዘይመጽእ ፡ እስመ ፡ ትትሐጐል ፡ ምድር ፡ ኵላ ፡ ወማየ ፡ አይኅ ፡ ይመጽእ ፡ ሀሎ ፡ ዲበ ፡ ኵላ ፡ ምድር ፡ ወይትኀጐል ፡ ዘሀሎ ፡ ውስቴታ ።

3 ወይእዜኒ ፡ መሀሮ ፡ ከመ ፡ ይንፍጽ ፡ ወይንበር ፡ ዘርኡ ፡ ለኵሉ ፡ ምድር ።

4 ወይቤሎ ፡ ካዕበ ፡ እግዚእ ፡ ለሩፋኤል ፡ እስሮ ፡ ለአዛዝኤል ፡ በእዴሁ ፡ ወእገሪሁ ፡ ወደዮ ፡ ውስተ ፡ ጽልመት ፡ ወአብቅዋ ፡ ለገዳም ፡ እንተ ፡ ሀለወት ፡ በዱዳኤል ፡ ወደዮ ፡ ህየ ።

5 ወደይ ፡ ላዕሌሁ ፡ አዕባነ ፡ ጠዋያተ ፡ ወበሊኃተ ፡ ወክድኖ ፡ ጽልመተ ፡ ወህየ ፡ ይኅድር ፡ ለዓለም ፡ ወክድኖ ፡ ለገጹ ፡ ከመ ፡ ኢይርአይ ፡ ብርሃነ ።

6 ወበዕለት ፡ ዐባይ ፡ እንተ ፡ ኵነኔ ፡ ከመ ፡ ይትፈነው ፡ ውስተ ፡ ዋዕይ ።

7 ወአሕይዋ ፡ ለምድር ፡ እንተ ፡ አማሰኑ ፡ መላእክት ፡ ወሕይወታ ፡ ለምድር ፡ አይድዕ ፡ ከመ ፡ አሐይዋ ፡ ለምድር ፡ ወኢይትኃጐሉ ፡ ኵሎሙ ፡ ውሉደ ፡ ሰብእ ፡ በምሥጢረ ፡ ኵሉ ፡ ዘቀተሉ ፡ ትጉሃን ፡ ወመሀሩ ፡ ለውሉዶሙ ።

8 ወማሰነት ፡ ኵላ ፡ ምድር ፡ በትምህርተ ፡ ግብሩ ፡ ለአዛዝኤል ፡ ወላዕሌሁ ፡ ጸሐፍ ፡ ኵሎ ፡ ኀጢአተ ።

9 ወለገብርኤል ፡ ይቤሎ ፡ እግዚአብሔር ፡ ሑር ፡ ዲቤሆሙ ፡ ለመንዝራን ፡ ወለምኑናን ፡ ወዲበ ፡ ውሉደ ፡ ዘማ ፡ ወአኅጕሎሙ ፡ ለውሉደ ፡ ዘማ ፡ ወለውሉደ ፡ ትጉሃን ፡ እምሰብእ ፡ ወአውፅኦሙ ፡ ወፈንዎሙ ፡ በበይናቲሆሙ ፡ እሙንቱ ፡ ወለሊሆሙ ፡ በቀትል ፡ ይትኀጐሉ ፡ እስመ ፡ ኑኃ ፡ መዋዕል ፡ አልቦሙ ።

10 ወኵሎሙ ፡ ይስእሉከ ፡ ወኢይከውን ፡ ለአበዊሆሙ ፡ በእንቲአሆሙ ፡ እስመ ፡ ይሴፈዉ ፡ ሕይወተ ፡ ዘለዓለም ፡ ወከመ ፡ ይሕየዉ ፡ ፩፩እምኔሆሙ ፡ ፭፻ክራማተ ።

11 ወለሚካኤል ፡ ይቤሎ ፡ እግዚአብሔር ፡ አይድዕ ፡ ለስምያዛ ፡ ወለካልኣን ፡ እለ ፡ ምስሌሁ ፡ እለ ፡ ኀብሩ ፡ ምስለ ፡ አንስት ፡ ከመ ፡ ይማስኑ ፡ ምስሌሆን ፡ በኵሉ ፡ ርኵሰ ፡ ዚአሆን ።

12 ሶበ ፡ ይትራገዙ ፡ ኵሉ ፡ ውሉዶሙ ፡ ወሶበ ፡ ይሬእዩ ፡ ሐጕሎሙ ፡ ለፍቁራኒሆሙ ፡ እስሮሙ ፡ ለ፸ትውልድ ፡ በመትሕተ ፡ አውግረ ፡ ምድር ፡ እስከ ፡ ዕለተ ፡ ኵነኔሆሙ ፡ ወተፍጻሜቶሙ ፡ እስከ ፡ ይትፌጸም ፡ ኵነኔ ፡ ዘለዓለመ ፡ ዓለም ።

13 ወበውእቱ ፡ መዋዕል ፡ ይወስድዎሙ ፡ ውስተ ፡ መትሕተ ፡ እሳት ፡ በፃዕር ፡ ወበቤተ ፡ ሞቅሕ ፡ ይትዓፀዉ ፡ ለዓለመ ፡ ዓለም ።

14 ወሶቤሃ ፡ ይውዒ ፡ ወይማስን ፡ እምይእዜ ፡ ምስሌሆሙ ፡ ኅቡረ ፡ ይትአሰሩ ፡ እስከ ፡ ተፍጻሜተ ፡ ትውልደ ፡ ትውልድ ።

15 ወአኅጕሎሙ ፡ ለኵሎሙ ፡ ነፍሳተ ፡ ተውኔት ፡ ወለውሉዶሙ ፡ ለትጉሃን ፡ እስመ ፡ ገፍዕዎሙ ፡ ለሰብእ ።

16 አኅጕል ፡ ኵሎ ፡ ግፍዐ ፡ እምገጸ ፡ ምድር ፡ ወኵሉ ፡ ምግባር ፡ እኩይ ፡ ይኅልቅ ፡ ወያስተርኢ ፡ ተክለ ፡ ጽድቅ ፡ ወርትዕ ፡ ወይከውን ፡ ለበረከት ፡ ግብር ፤ ጽድቅ ፡ ወርትዕ ፡ ለዓለም ፡ በፍሥሓ ፡ ይተክሉ ።

17 ወይእዜኒ ፡ ኵሎሙ ፡ ጻድቃን ፡ ይገንዩ ፡ ወይከውኑ ፡ ሕያዋነ ፡ እስከ ፡ ይወልዱ ፡ ፲፻ ፡ ወኵሎ ፡ መዋዕለ ፡ ውርዙቶሙ ፡ ወሰንበተ ፡ ዚአሆሙ ፡ ይፌጽሙ ፡ በሰላም ።

18 ወበእማንቱ ፡ መዋዕል ፡ ትትገበር ፡ ኵላ ፡ ምድር ፡ በጽድቅ ፡ ወኵለንታሃ ፡ ትተከል ፡ ዕፀወ ፡ ወትመልዕ ፡ በረከተ ።

19 ወኵሎ ፡ ዕፀወ ፡ ኃሤት ፡ ይተክሉ ፡ ዲቤሃ ፡ ወይተክሉ ፡ ዲቤሃ ፡ እውያነ ፡ ወወይን ፡ ዘይተከል ፡ ዲቤሃ ፡ ይገብር ፡ ፍሬ ፡ ለጽጋብ ፤ ወኵሉ ፡ ዘርእ ፡ ዘይዘራእ ፡ ዲቤሃ ፡ አሐቲ ፡ መስፈርት ፡ ትገብር ፡ እልፈ ፡ ወአሐቲ ፡ መስፈርተ ፡ ኤልያስ ፡ ትገብር ፡ ፲ምክያዳተ ፡ ዘይት ።

20 ወአንተ ፡ አንጽሓ ፡ ለምድር ፡ እምኵሉ ፡ ግፍዕ ፤ ወእምኵሉ ፡ ዐመፃ ፤ ወእምኵሉ ፡ ኀጢአት ፤ ወእምኵሉ ፡ ረሲዕ ፤ ወእምኵሉ ፡ ርኵስ ፡ ዘይትገበር ፡ በዲበ ፡ ምድር ፤ አኅልቆሙ ፡ እምዲበ ፡ ምድር ።

21 ወይኩኑ ፡ ኵሉ ፡ ውሉደ ፡ ሰብእ ፡ ጻድቃነ ፡ ወይኩኑ ፡ ኵሉ ፡ አሕዛብ ፡ ያምልኩ ፡ ወይባርኩ ፡ ኪያየ ፡ ወኵሎሙ ፡ ሊተ ፡ ይሰግዱ ።

22 ወትነጽሕ ፡ ምድር ፡ እምኵሉ ፡ ሙስና ፡ ወእምኵሉ ፡ ኃጢአት ፤ ወእምኵሉ ፡ መቅሠፍት ፤ ወእምኵሉ ፡ ፃዕር ፤ ወኢይደግም ፡ ከመ ፡ እፈኑ ፡ ዲቤሃ ፡ አይኃ ፡ ለትውልደ ፡ ትውልድ ፡ ወእስከ ፡ ለዓለም ።