Chapter 5
Chapter 4 / Enoch / Chapter 5 Chapter 6

1 ጠየቁ ፡ እፎ ፡ ዕፀው ፡ በሐመልማለ ፡ አቍጽል ፡ ይትክደኑ ፡ ወይፈርዩ ፡ ወለብዉ ፡ በእንተ ፡ ኵሉ ፡ ወአእምሩ ፡ በከመ ፡ ገብረ ፡ ለክሙ ፡ እሎንተ ፡ ኵሎሙ ፡ ዘሕያው ፡ ለዓለም ።

2 ወምግባሩ ፡ ቅድሜሁ ፡ ለለዓመት ፡ ዘይከውን ፡ ወኵሉ ፡ ምግባሩ ፡ ይትቀነዩ ፡ ሎቱ ፡ ወኢይትመየጡ ፡ አላ ፡ በከመ ፡ ሠርዐ ፡ አምላክ ፡ ከመዝ ፡ ይትገበር ፡ ኵሉ ።

3 ወርእዩ ፡ እፎ ፡ አብህርት ፡ ወአፍላግ ፡ ኅቡረ ፡ ይፌጽሙ ፡ ግብሮሙ ።

4 ወአንትሙሰ ፡ ኢተዐገሥክሙ ፡ ወኢገበርክሙ ፡ ትእዛዘ ፡ እግዚእ ፡ እላ ፡ ተዐደውክሙ ፡ ወሐመይክሙ ፡ ዓቢያተ ፡ ወድሩካተ ፡ ቃላተ ፡ በአፍ ፡ ርኩስት ፡ ዘዚአክሙ ፡ ላዐለ ፡ ዕበየ ፡ ዚአሁ ፤ ይቡሳነ ፡ ልብ ፡ ኢትከውነክሙ ፡ ሰላም ።

5 ወበእንተዝ ፡ አንትሙ ፡ መዋዕሊክሙ ፡ ትረግሙ ፡ ወዓመታተ ፡ ሕይወትክሙ ፡ ተሐጕሉ ፡ ወይበዝኅ ፡ መርገም ፡ ዘለዓለም ፡ ወኢይከውነክሙ ፡ ሣህል ።

6 በውእቱ ፡ መዋዕል ፡ ትሁቡ ፡ ሰላመ ፡ ዚአክሙ ፡ በርግመት ፡ ዘለዓለም ፡ ለኵሉ ፡ ጻድቃን ፡ ወኪያክሙ ፡ ይረግሙ ፡ ኃጥኣን ፡ ዘልፈ ፡ ወለክሙ ፡ ኅቡረ ፡ ምስለ ፡ ኃጥኣን ።

7 ወለኅሩያንሰ ፡ ይከውን ፡ ብርሃን ፡ ወፍሥሓ ፡ ወሰላም ፡ ወእሙንቱ ፡ ይወርስዋ ፡ ለምድር ፡ ወለክሙሰ ፡ ረሲዓን ፡ ይከውነክሙ ፡ ርግመት ።

8 ወአመሂ ፡ ይትወሀቦሙ ፡ ለኅሩያን ፡ ጥበብ ፡ ወኵሎሙ ፡ እሎንቱ ፡ የሐይዉ ፡ ወኢይደግሙ ፡ አበሳ ፡ ኢበረሲዕ ፡ ወኢበትዕቢት ፡ አላ ፡ ይገንዩ ፡ ዘቦሙ ፡ ጥበብ ፡ ኢይደግሙ ፡ አብሶ ።

9 ወኢይትኴነኑ ፡ ኵሎ ፡ መዋዕለ ፡ ሕይወቶሙ ፡ ወኢይመውቱ ፡ በመቅሠፍት ፡ ወኢበመዓት ፡ አላ ፡ ኍልቈ ፡ መዋዕለ ፡ ሕይወቶሙ ፡ ይፌጽሙ ፡ ወይልህቅ ፡ ሕይወቶሙ ፡ በሰላም ፡ ወዓመታተ ፡ ፍሥሓሆሙ ፡ ይበዝኅ ፡ በሐሤት ፡ ወበሰላም ፡ ዘለዓለም ፡ ውስተ ፡ ኵሉ ፡ መዋዕለ ፡ ሕይወቶሙ ።