72. Concerning the King of Rome [Constantinople]
71. Concerning Mary, the daughter of David / Kebra Nagast / 72. Concerning the King of Rome [Constantinople] 73. Concerning the first judgment of Adrami, King of Rome

፸፪ ፡ በእንተ ፡ ንጉሠ ፡ ሮምሂ ።

 

ወበእንተ ፡ ንጉሠ ፡ ሮምሂ ፡ ንዌጥን ፡ ንንግርክሙ ፡ ዘሰማዕነ ፡ ወዘረከብነ ፡ ጽሑፈ ፡ ዘርኢነ ። መንግሥተ ፡ ሮምሰ ፡ ለያፌት ፡ ወልደ ፡ ኖሕ ፡ ኮነት ፡ ክፍሉ ፡ ወመንግሥቱ ፤ ወእንዘ ፡ ይነብሩ ፡ ገብሩ ፡ አህጉረ ፡ ዐበይተ ፡ ዓሥሩ ፡ ወክልኤ ፡ ወእለ ፡ የዐብያ ፡ አህጕረ ፡ መንግሥቶሙ ፡ ዳርዮስ ፡ ሐነጸ ፡ አንጦክያ ፡ ወዲርስያ ፡ ወባርቶንያ ፡ ወሮምያ ፡ ወይነብሩ ፡ ህየ ፡ እለ ፡ ነግሡ ። ወቍስጥንጥንያ ፡ እምድኅረ ፡ ክርስቶስ ፡ ሐነጸ ፡ ቈስጠንጢኖስ ፡ ንጉሥ ፡ በስሙ ፡ ሶበ ፡ አስተርአዮ ፡ ትእምርተ ፡ መስቀል ፡ በውስተ ፡ ፀብእ ፡ በአምሳለ ፡ ከዋክብት ፡ ጽሑፋን ፡ ውስተ ፡ ሰማይ ፡ ወድኅነሂ ፡ እምእደ ፡ ፀሩ ፤ ወእምአሜሃ ፡ ረሰዩ ፡ ማኅደሮሙ ፡ ህየ ፡ ነገሥተ ፡ ሮም ። ወውእቱ ፡ ዳርዮስ ፡ ኮነ ፡ ዘርኡ ፡ ብዙኀ ፡ ወእምዳርዮስ ፡ እስከ ፡ መዋዕለ ፡ ሰሎሞን ፡ ኮኑ ፡ ፲ወ፰ ፡ ትውልድ ። ወእምዘርአ ፡ ዚአሁ ፡ ተወልደ ፡ ብእሲ ፡ ዘስሙ ፡ ዘንበሬስ ፡ ወገብረ ፡ በጥበብ ፡ መጽሐፈ ፡ አስጠሎባ ፡ ወረሰየ ፡ ከዋክብተ ፡ መዳልወ ፡ ፀሐይ ፤ ወርእየ ፡ ዘደኃሪ ፡ ከመ ፡ ኢትነብር ፡ መንግሥት ፡ ኀቤሆሙ ፡ ለደቂቀ ፡ ያፌት ፡ አላ ፡ ትፈልስ ፡ ኀበ ፡ ዘርአ ፡ ዳዊት ፡ ነገደ ፡ ሴም ። ወሶበ ፡ ርእየ ፡ ከመዝ ፡ ለአከ ፡ ኀበ ፡ ዳዊት ፡ ንጉሥ ፡ ወይቤ ፡ ንሣእአ ፡ ወለትየ ፡ ለወልድከ ፤ ወነሥኣ ፡ ዳዊት ፡ ንጉሥ ፡ ወወሀቦ ፡ ለሰሎሞን ፡ ወልዱ ፤ ወወለደ ፡ እምኔሃ ፡ ወሰመዮ ፡ አድራሚ ። ወሞተ ፡ ውእቱ ፡ ቀዳሚ ፡ ወነግሠ ፡ ባልጠሶር ፡ ዘእምአዝማዲሁ ፡ ወኀጥአ ፡ ተባዕተ ፡ ውሉደ ፡ ዘይነግሥ ፡ ድኅሬሁ ፡ ዲበ ፡ መንበሩ ፤ ወይቀንእ ፡ ከመ ፡ ኢይንግሡ ፡ ድኅሬሁ ፡ ደቂቀ ፡ አቡሁ ። ወለአከ ፡ ኀበ ፡ ሰሎሞን ፡ ንጉሥ ፡ ጽሒፎ ፡ እንዘ ፡ ይብል ፡ ሰላምአ ፡ ለዕበየ ፡ መንግሥትከ ፡ ወለጥበብከ ፡ ክብርት ፤ ወይእዜኒአ ፡ ሀበኒአ ፡ ወልድከአ ፡ ዘኣነግሥአ ፡ ላዕለ ፡ ሀገረ ፡ ሮምያአ ፤ እስመ ፡ አንሰ ፡ ስእንኩአ ፡ ወሊደ ፡ ተባዕት ፡ ዘእንበለ ፡ ፫ ፡ አዋልድ ፡ ወእሁቦ ፡ እምአዋልድየ ፡ ዘፈቀደ ፡ ወእሁቦ ፡ መንበርየ ፡ ወይከውን ፡ ንጉሠ ፡ ውእቱ ፡ ወዘርኡ ፡ እምድኅሬሁ ፡ ውስተ ፡ ሀገረ ፡ ሮምያ ፡ እስከ ፡ ለዓለም ። ወሶበ ፡ አንበባ ፡ ለይእቲ ፡ ክርታስ ፡ ንጉሥ ፡ ሰሎሞን ፡ ኀለየ ፡ እንዘ ፡ ይብል ፡ ለእመ ፡ ከላእክዎ ፡ ወልድየ ፡ ይልእክ ፡ ኀበ ፡ ንጉሠ ፡ ሠረቅ ፡ ወይሁቦ ፡ ወልዶ ፡ ወትበጥል ፡ እንተ ፡ መከርኩ ፤ ወይእዜሰ ፡ እሁቦ ። ወመከረ ፡ ምስለ ፡ መማክርቲሁ ፡ ዘቤተ ፡ እስራኤል ፡ ወይቤሎሙ ፡ እስመ ፡ ወሀብነ ፡ ወልደነ ፡ ወደቂቀነ ፡ ለብሔረ ፡ ኢትዮጵያ ፡ ወኮነ ፡ በህየ ፡ መንግሥት ፡ ለእስራኤል ፤ ወይእዜኒ ፡ ከመ ፡ ይኩን ፡ ለነ ፡ ሣልስ ፡ መንግሥት ፤ ለሀገረ ፡ ሮሜ ፡ ወአነሂ ፡ እፌንዎ ፡ ለአርዳሚስ ፡ ወልድየ ፡ ዘይንእስ ፤ ወአንትሙኒ ፡ ኢታስተአክዩኒ ፡ በእንተ ፡ ዘቀዲሙ ፡ ዘነሣእክዎሙ ፡ ለደቂቅክሙ ፡ እስመ ፡ ይከውን ፡ ብፅዐ ፡ ለእግዚኣብሔር ፡ በእንተ ፡ ዘአእመሩ ፡ ስሞ ፡ ሰብአ ፡ ኢትዮጵያ ፡ ወኮንዎ ፡ ሕዝቦ ፤ ወከማሁ ፡ ሰብአ ፡ ሮምኒ ፡ ለእመ ፡ ወሀብኖሙ ፡ ደቂቅነ ፡ ይከውኑ ፡ ሕዝበ ፡ እግዚኣብሔር ፡ ወለነኒ ፡ ይትወሀብ ፡ ለነ ፡ ስም ፡ በተብህሎ ፡ ወበተሰምዮ ፡ ሕዝበ ፡ እግዚኣብሔር ፤ ነሥኡ ፡ መንግሥተ ፡ ኢትዮጵያ ፡ ወመንግሥተ ፡ ሮምያ ፡ ሕዝበ ፡ እስራኤል ፤ ወሀቡ ፡ ከመ ፡ ቀዳሚ ፡ ደቂቅክሙ ፡ መንእሳነ ፤ ወማእከላውያንሰ ፡ ይቁሙ ፡ ውስተ ፡ ሀገርነ ። ወተንሥኡ ፡ ወመከሩ ፡ ወገብኡ ፡ ወይቤልዎ ፡ ንንግሮ ፡ ለእግዚእነ ፡ ንጉሥ ፡ ዘንተ ፡ ነገረ ፡ ወይግበር ፡ ፈቃዶ ። ወይቤሎሙ ፡ አስምዑኒ ፡ ዘትብሉ ። ወይቤልዎ ፡ ነሣእከ ፡ መላህቅተ ፡ ቤትነ ፡ ወይእዜኒ ፡ ንሣእ ፡ እምእለ ፡ ይቴሐቱ ፡ ደቂቆሙ ፡ መንእሳነ ፤ ወሠምረ ፡ በዝንቱ ፡ ምክር ፡ ወገብረ ፡ ሎሙ ፡ በከመ ፡ ፈቀዱ ፡ ወሤሞ ፡ ለአድራሚ ፡ ወልዱ ፡ ወነሥአ ፡ እምእለ ፡ ይቴሐቱ ፡ መኳንንተ ፡ ቤተ ፡ እስራኤል ፡ ወረከቦ ፡ ዕፅ ፡ በስመ ፡ አቡሁ ፡ ሰሎሞን ፡ ወወሀብዎ ፡ ካህነ ፡ እምነገደ ፡ ሌዋዊያን ፡ ዘስሙ ፡ አኪሚሔል ፡ ወአጽዐንዎ ፡ ዲበ ፡ በቅለ ፡ ንጉሥ ፡ ወይቤልዎ ፡ ባሕ ፡ ሕያው ፡ አበ ፡ ነጋሢ ፤ ወይቤሉ ፡ ኵሉ ፡ ሕዝብ ፡ ርቱዕ ፡ ይደልዎ ። ወቀብእዎ ፡ ቅብአ ፡ መንግሥት ፡ ዕፍረተ ፡ ወአዘዝዎ ፡ ይዕቀብ ፡ ኵሎ ፡ ሕገ ፡ መንግሥት ፡ ወአምሐልዎ ፡ ከመ ፡ ኢያምልክ ፡ ባዕደ ፡ አማልክተ ፡ ዘእንበለ ፡ አምላከ ፡ እስራኤል ፤ ወባረክዎ ፡ በከመ ፡ ባረክዎ ፡ ለዳዊት ፡ እኁሁ ፡ ወትእዛዘኒ ፡ በከመ ፡ አዘዝዎ ፡ ከማሁ ፡ አዘዝዎ ፡ ለአድራሚ ፡ ወአስተፋነውዎ ፡ እስከ ፡ ሐይቀ ፡ ባሕር ፠ ወጸሐፈ ፡ ወለአከ ፡ እንዘ ፡ ይብል ፡ ንጉሥ ፡ ሰሎሞን ፡ ሰላምአ ፡ ለበልጠሶር ፡ ንጉሠ ፡ ሮሜ ፤ ንሣእአ ፡ ወልድየ ፡ አድራሚ ፡ ወሀቦ ፡ ወለተከ ፡ ወአንግሦ ፡ ውስተ ፡ ሀገረ ፡ ሮምያ ፤ እስመ ፡ አፍቀርከ ፡ ንጉሠ ፡ እምዘርአ ፡ ዳዊት ፡ አቡየ ፡ ወአነሂ ፡ ገበርኩ ፡ ፈቃደከ ፡ ወለአኩ ፡ ለከ ፡ ፲ወ፬ ፡ መኳንንቲሁ ፡ በየማኑ ፡ ወበፀጋሙ ፡ እለ ፡ የዐቅቡ ፡ ሕገ ፡ ምስሌሁ ፡ ወይትኤዘዙ ፡ ለከ ፡ በከመ ፡ ፈቀድከ ፠ ወበጽሑ ፡ ህየ ፡ ምስለ ፡ ልኡካነ ፡ ንጉሠ ፡ ሮሜ ፡ ምስለ ፡ ብዙኅ ፡ ክብር ፡ ወኵሉ ፡ ንዋይ ፡ ዘይትፈቀድ ፡ ለብሔረ ፡ ሮሜ ። ወበጽሑ ፡ ሀገረ ፡ ሮሜ ፡ ኀበ ፡ በልጣሶር ፡ ንጉሥ ፡ ወነገርዎ ፡ ኵሎ ፡ ዘለአኮሙ ፡ ወአወፈይዎ ፡ ለወልዱ ። ወተፈሥሐ ፡ ፈድፋደ ፡ በልጣሶር ፡ ወወሀቦ ፡ ወለቶ ፡ እንተ ፡ ትልህቅ ፡ እንተ ፡ ስማ ፡ አድሎንያ ፡ ወገብረ ፡ ዐቢየ ፡ ከብካበ ፡ በከመ ፡ ዕበየ ፡ መንግሥቱ ፡ ወሤሞ ፡ ውስተ ፡ ኵሉ ፡ ሀገረ ፡ ሮምያ ፤ ወባረኮ ፡ ላዕሌሁ ፡ ወተፈሥሐ ፡ ቦቱ ፡ እስመ ፡ ሠናይ ፡ ላሕዩ ፡ ወመንክር ፡ ጥበቢሁ ፡ ወጽኑዕ ፡ ፈድፋደ ፡ በኀይሉ ፠ ወእምዝ ፡ አሐተ ፡ ዕለተ ፡ ፈቀደ ፡ ያመክሮ ፡ በውስተ ፡ ፍትሕ ፡ ሶበ ፡ መጽአ ፡ ኀቤሁ ፡ ባዕለ ፡ ዐጸደ ፡ ወይን ፡ ወከልሐ ፡ ሎቱ ፡ እንዘ ፡ ይብል ፡ እግዚእየ ፡ ተዐደወኒ ፡ ቃልከ ፡ ወአኅለቀ ፡ ዐጸደ ፡ ወይንየ ፡ አርሳኒ ፡ ወልደ ፡ ዮዳድ ፡ በአባግዒሁ ፤ ወነዋ ፡ ውስተ ፡ ቤትየ ፡ አኀዝኩ ፡ አባግዒሁ ፤ ምንተ ፡ ትፈትሕ ፡ ላዕሌየ ። ወመጽአ ፡ ባዕለ ፡ አባግዕኒ ፡ ኀበ ፡ ንጉሥ ፡ ወከልሐ ፡ እንዘ ፡ ይብል ፡ አግብእ ፡ ሊተ ፡ አባግዕየ ፤ እስመ ፡ ይነሥኦን ፡ በእንተ ፡ ዘቦአ ፡ ውስተ ፡ ዐጸደ ፡ ወይኑ ። ወይቤሎሙ ፡ ንጉሥ ፡ ሖሩ ፡ ተዋቀሱ ፡ በኀበ ፡ ንጉሥክሙ ፡ አድራሚ ፡ ወዘይቤለክሙ ፡ ግበሩ ። ወሖሩ ፡ ወተዋቀሱ ፡ በቅድሜሁ ፤ ሐተቶ ፡ ለቀዳማዊ ፡ እንዘ ፡ ይብል ፡ እፎ ፡ በልዐ ፡ አባግዕ ፡ ዐጸደ ፡ ወይን ፤ ቈጽለኑ ፡ ወሚመ ፡ አዕጹቀ ፡ ወሚመ ፡ ቆዐ ፡ ወሚመ ፡ ሥርወ ፡ እምጕንዱ ። አውሥአ ፡ ወይቤሎ ፡ ባዕለ ፡ ዐጸደ ፡ ወይን ፡ በልዐ ፡ አዕጹቂሁ ፡ ምስለ ፡ አዕጹቀ ፡ ቆዑ ፡ ወኢያትረፈ ፡ ዘእንበለ ፡ አሕሩጊሁ ፡ ምስለ ፡ ጕንዱ ። ወካዕበ ፡ ሐተቶ ፡ ለባዕለ ፡ አባግዕ ፡ ወይቤሎ ፡ አማንኑ ፡ ከመዝ ። ወአውሥኦ ፡ ወይቤሎ ፡ ባዕለ ፡ አባግዕ ፡ እግዚእየ ፡ በልዐ ፡ አዕጹቀ ፡ ምስለ ፡ ቍጸሊሁ ። ወአውሥአ ፡ አድራሚ ፡ ወይቤ ፡ ወዝንቱሰ ፡ ይብል ፡ በልዓ ፡ ቆዐ ፤ አማንኑ ፡ ከመዝ ። አውሥአ ፡ ወይቤ ፡ ባዕለ ፡ አባግዕ ፡ አልቦ ፡ እግዚእየ ፡ ዘእንበለ ፡ ይኩን ፡ ቆዐ ፡ ሠርጸ ፡ ጽጌ ፡ በልዐ ፠ ፠ ፠