69. Concerning the Question of Solomon
68. Concerning Mary, Our Lady of Salvation / Kebra Nagast / 69. Concerning the Question of Solomon 70. How Rehoboam reigned

፷፱ ፡ በእንተ ፡ ስእለተ ፡ ሰሎሞን ።

 

ወተመይጠ ፡ ወአንቃዕደወ ፡ ኀበ ፡ መልአክ ፡ ወሰፍሐ ፡ ክልኤሆን ፡ እደዊሁ ፡ ወይቤ ፡ እግዚኦ ፡ ቀርበኑ ፡ ምጽአቱ ፡ ለመድኅን ፡ ዘትቤ ፡ ወሚመ ፡ ርሑቅኑ ። አውሥአ ፡ መልአክ ፡ ወይቤሎ ፡ በ፵ወ፫ ፡ ትውልድ ፡ እምዘመድከ ፡ ወእምዘርእከ ፡ ይመጽእ ፡ ወያድኅነክሙ ፤ ወእስራኤልሰ ፡ ይጸልኡ ፡ መድኀኒቶመ ፡ ወይቀንኡ ፡ ላዕሌሁ ፡ በዘገብረ ፡ ተኣምረ ፡ ወመንክረ ፡ በቅድሜሆሙ ፡ ወይሰቅልዎ ፡ ወይቀትልዎ ፡ ወይትነሣእ ፡ ወያድኅነክሙ ፤ እስመ ፡ መሓሪ ፡ ውእቱ ፡ ለነሳሕያን ፡ ወኄር ፡ ለኅሩያኒሁ ፤ ወናሁ ፡ ነገርኩክሙ ፡ ጥዩቀ ፡ ከመ ፡ ኢየኀድገክሙ ፡ ውስተ ፡ ሲኦል ፡ ለዘመዱ ፡ እስራኤል ፡ እለ ፡ ተጸውረት ፡ ባሕርይ ፡ ኀቤክሙ ። ወዘንተ ፡ ብሂሎ ፡ መልአከ ፡ እግዚኣብሔር ፡ ይቤሎ ፡ ሰላም ፡ ለከ ። ወአውሥአ ፡ ሰሎሞን ፡ ወይቤሎ ፡ ብቍዐኒ ፡ እግዚእየ ፡ አሐተ ፡ እስአለከ ፡ ወኢትትሀየየኒ ፡ ገዓርየ ። ወይቤሎ ፡ በል ፡ ተሰአለኒ ፡ ወአነ ፡ ኣየድዐከ ፡ ዘሰማዕኩ ፡ ወዘርኢኩ ። ወይቤሎ ፡ ሰሎሞን ፡ ባሕቱ ፡ አሐዝን ፡ በእንተ ፡ እስራኤል ፡ ሕዝቡ ፡ እለ ፡ ኀረየ ፡ እምኵሉ ፡ በትረ ፡ ርስቱ ፡ ቀዳሜ ፡ በኵሩ ፤ ትቤለኒ ፡ ይጠፍኡ ፡ እምድኅረ ፡ መጽአ ፡ መድኅን ። ወካዕበ ፡ አውሥኦ ፡ መልአከ ፡ እግዚኣብሔር ፡ ወይቤሎ ፡ እወ ፡ ነገርኩከ ፡ ከመ ፡ ይሰቅልዎ ፡ ለመድኅን ፡ ወሶበ ፡ ከዐዉ ፡ ደሞ ፡ በዲበ ፡ ዕፀ ፡ መስቀል ፡ ይከውኑ ፡ ዝርዋነ ፡ ውስተ ፡ ኵሉ ፡ ዓለም ። ወይቤ ፡ ሰሎሞን ፡ እበክዮሙ ፡ ለሕዝብየ ፤ አሌሎሙ ፡ ለሕዝብየ ፡ እለ ፡ ዘልፈ ፡ ያምዕዑ ፡ ፈጣሪሆሙ ፡ እምቀዳሚ ፡ ወእስከ ፡ ደኃሪ ፡ አነ ፡ ወእለ ፡ እምቅድሜየ ፡ ወኢይደሉ ፡ ከመ ፡ ይምሐሩነ ፡ በእንተ ፡ እከየ ፡ ምግባሪነ ፡ እስመ ፡ ትውልድ ፡ ዘአልብነ ፡ አሚነ ፤ አሌሎሙ ፡ እለ ፡ ይክዕዉ ፡ ደመ ፡ ንጹሐ ፡ ወእለ ፡ ይጠቅሉ ፡ ጻድቀ ፡ ወይትካፈሉ ፡ በርበራቲሁ ፡ ወኢየአምኑ ፡ በቃሉ ፡ ወኢየሐውሩ ፡ በትእዛዙ ፤ ጽኑሕ ፡ ደይኖሙ ፡ ወንቡር ፡ ጌጋዮሙ ፡ ዐቢይ ፡ መቅሠፍቶሙ ፡ ወጽኑሕ ፡ ኀጢአቶሙ ፡ ወኢይሰሪ ፡ ሎሙ ፡ ወያዜክሩ ፡ ኀጢአተ ፡ አበዊሆሙ ፡ እስመ ፡ ምግባሮሙ ፡ ኀጢአት ፡ ወይትሀጐሉ ፡ በዘመከሩ ፡ ለሊሆሙ ፤ ወባሕቱሰ ፡ አሌላ ፡ ለነፍስየ ፡ እስመ ፡ ከበርኩ ፡ አኀስር ፡ በሞትየ ፡ ወተጠበብኩ ፡ በዲበ ፡ ምድር ፡ ወእከውን ፡ ሐመደ ። ምንት ፡ ኅይስናሁ ፡ ለንጉሥ ፡ ለእመ ፡ ኢገብረ ፡ ሠናየ ፡ በዲበ ፡ ምድር ፡ ምስለ ፡ ነዳያን ፤ አሐቲ ፡ ድቀቶሙ ፡ ውስተ ፡ መቃብር ፡ ወአሐቲ ፡ ፍኖቶሙ ፡ ውስተ ፡ መዓምቅት ፤ ምንት ፡ በቍዔትነ ፡ ለሰብእ ፡ እስመ ፡ በከ ፡ ተፈጠርነ ፡ ወእምድኅረ ፡ ንስቲት ፡ ንከውን ፡ ከመዘ ፡ ኢተፈጠርነ ፤ እስመ ፡ ጢስ ፡ እስትንፋስነ ፡ ለእመ ፡ አርመመት ፡ ሕቀ ፡ ተኀልፍ ፡ ነፍስነ ፡ ወቃለ ፡ ቀለምጽጽ ፡ ልብነ ፡ ዘይትሐወስ ፡ ውስተ ፡ ኅሊናነ ፡ እምከመ ፡ ኀለፈት ፡ ንከውን ፡ ሐመደ ፡ ወያስቆርሩነ ፡ ፍቁራኒነ ፡ ወማኅፈርነ ፤ ወአእምሮ ፡ ኅሊናነ ፡ ዘመልዕልተ ፡ ርእስነ ፡ እምከመ ፡ ተክዕወት ፡ ነፍስነ ፡ ንከውን ፡ ዕፄ ፡ ወጺአተ ፤ ወሙቀተ ፡ ሥጋነ ፡ እምከመ ፡ ኀለፈት ፡ ከመ ፡ ወኢምንትኒ ፡ ንከውን ፡ ወከመ ፡ ሳሕወ ፡ ደመና ፡ ነኀልፍ ። ምንተኬ ፡ አብዝኆ ፡ ነቢብኒ ፡ ኢይበቍዕ ፡ ወሥነ ፡ ላሕይኒ ፡ ይትሀጐል ፡ ወጽንዐ ፡ ነገሥትኒ ፡ ይጠፍእ ፡ ወኀይለ ፡ መኳንንትኒ ፡ ይትሀጐል ፡ ወኢይትረከብ ፤ ወኵልነ ፡ ከመ ፡ ጽላሎት ፡ ነኀልፍ ፡ ወእምድኅረ ፡ ኀለፍነ ፡ በሞት ፡ ይትረሳዕ ፡ ስምነ ፡ ወኢይትረከብ ፡ አሠርነ ፤ እምድኅረ ፡ ፫ ፡ ትውልደ ፡ ደቂቅነ ፡ አልቦ ፡ ዘይዜክር ፡ ስምነ ። ወሶቤሃ ፡ አንጸረ ፡ ገጾ ፡ ኀበ ፡ ዮርብዓም ፡ ወልዱ ፡ ወይቤሎ ፡ ወልድየ ፡ ተዐገሳ ፡ ለእኪት ፡ ወግበራ ፡ ለሠናይት ፡ ከመ ፡ ትርከብ ፡ ብዙኀ ፡ መዋዕለ ፡ በዲበ ፡ ምድር ፤ ወኢትስግድ ፡ ለአማልክት ፡ ባዕድ ፡ ወኢታምልኮሙ ፡ አላ ፡ ባሕቱ ፡ እግዚኣብሔር ፡ ፍራህ ፡ ወአክብሮ ፡ ከመ ፡ ትማእ ፡ ፀረከ ፡ ወጸላእተከ ፡ ወበሰማያትኒ ፡ ከመ ፡ ትረስ ፡ ማኅደረ ፡ አበዊከ ፡ ወትረስ ፡ ሕይወተ ፡ ዘለዓለም ። ወይቤ ፡ ጸሐፉ ፡ ሊተ ፡ ውስተ ፡ መጽሐፈ ፡ ጡማር ፡ ወአንብራ ፡ ውስተ ፡ ቀማጥር ። ወይቤሎ ፡ ለሳዶቅ ፡ ካህን ፡ ቅብኦ ፡ ወአንግሦ ፡ ለወልድየ ፤ በከመ ፡ አንገሠኒ ፡ አቡየ ፡ ዳዊት ፡ እግዚእየ ፡ እንዘ ፡ ሕያው ፡ አነሂ ፡ ኣነግሦ ፡ ለወልድየ ፡ ኢዮርብዓም ፡ ወይኩን ፡ ዘርኡ ፡ መድኀኒትየ ፡ ሊተ ፡ ወለአበውየ ፡ እስከ ፡ ለንለም ፡ በከመ ፡ ነገረኒ ፡ መልአከ ፡ እግዚኣብሔር ፠ ፠ ፠