68. Concerning Mary, Our Lady of Salvation
67. Concerning the lamentation of Solomon / Kebra Nagast / 68. Concerning Mary, Our Lady of Salvation 69. Concerning the Question of Solomon

፷፰ ፡ በእንተ ፡ መድኀኒትነ ፡ ማርያም ።

 

ወካዕበ ፡ ይኩንከ ፡ ትእምርተ ፡ ከመ ፡ ይመጽእ ፡ መድኅን ፡ እምዘርእከ ፡ ወከመ ፡ ያድኅንከ ፡ ምስለ ፡ አበዊከ ፡ ወዘርእከ ፡ እምድኅሬከ ፡ በምጽአቱ ። ተፈጥረት ፡ መደኀኒትክሙ ፡ ውስተ ፡ ከርሠ ፡ አዳም ፡ ከመ ፡ ዕንቈ ፡ ባሕርይ ፡ እምቅድመ ፡ ሔዋን ፤ ወሶበ ፡ ፈጠራ ፡ ለሔዋን ፡ እምዐዕመ ፡ ገቦሁ ፡ ለአዳም ፡ ወይቤሎሙ ፡ ብዝኁ ፡ እምከርሠ ፡ አዳም ፡ ኢወዕአት ፡ ኀበ ፡ ቀየን ፡ ወአቤል ፡ አላ ፡ ኀበ ፡ ሣልስ ፡ ወዕአት ፡ እምከርሠ ፡ አዳም ፡ ወገብአት ፡ ውስተ ፡ ከርሡ ፡ ለሴት ፤ ወእምኔሁ ፡ እንዘ ፡ ተሐውር ፡ ይእቲ ፡ ባሕርይ ፡ ኀበ ፡ እለ ፡ ኮኑ ፡ በኵረ ፡ በጽሐት ፡ እስከ ፡ አብርሃም ፤ ወእምነ ፡ አብርሃም ፡ ኢወፅአት ፡ ውስተ ፡ በኵሩ ፡ ይስማዔል ፡ አላ ፡ ጸንሐት ፡ ወቦአት ፡ ኀበ ፡ ይስሐቅ ፡ ንጹሕ ፤ ወእምይስሐቅኒ ፡ ኢሖረት ፡ ኀበ ፡ በኵር ፡ ዕቡይ ፡ ዔሳው ፡ አላ ፡ ቦአት ፡ ኀበ ፡ ያዕቆብ ፡ ትሑት ፤ ወእምያዕቆብ ፡ ኢቦአት ፡ ኀበ ፡ ሮቤል ፡ በኵሩ ፡ ስሑት ፡ አላ ፡ ቦአት ፡ ኀበ ፡ ይሁዳ ፡ የዋህ ፤ ወእምይሁዳኒ ፡ ኢወፅአት ፡ እስከ ፡ ይትወለዱ ፡ ፬ ፡ መአብሳን ፡ አላ ፡ ቦአት ፡ ኀበ ፡ ፋሬስ ፡ መስተዐግስ ፤ ወእምኔሁ ፡ ይእቲ ፡ ባሕርይ ፡ ሖረት ፡ ኀበ ፡ በኵር ፡ እስከነ ፡ በጽሐት ፡ ውስተ ፡ ከርሠ ፡ እሴይ ፡ አበ ፡ አቡከ ፤ ወእምዝ ፡ ጸንሐት ፡ እስከ ፡ ይትወለዱ ፡ ፮ ፡ ህርቡዳን ፡ ወእምዝ ፡ ቦአት ፡ ኀበ ፡ ሳብዓይ ፡ ዳዊት ፡ አቡከ ፡ የዋህ ፡ ወትሑት ፡ እስመ ፡ እግዚኣብሔር ፡ ይጸልእ ፡ ዕቡያነ ፡ ወዝኁራነ ፡ ወያፈቅር ፡ የዋሃነ ፡ ወትሑታነ ፤ ወእምዝ ፡ ጸንሐት ፡ ውስተ ፡ ሐቌ ፡ አቡከ ፡ እስከ ፡ ይትወለዱ ፡ ፭ስሑታን ፡ ወአብዳን ፡ ወቦአት ፡ ውስተ ፡ ሐቌ ፡ ዚአከ ፡ በእንተ ፡ ጥበብከ ፡ ወልቡናከ ። ወእምዝ ፡ ጸንሐት ፡ ባሕርይ ፡ ወኢሖረት ፡ ኀበ ፡ በኵርከ ፡ እስመ ፡ ሠናያን ፡ እሙንቱ ፡ ሰብአ ፡ ሀገሩ ፡ እመ ፡ ኢክሕድዎ ፡ ወእመ ፡ ኢሰቀልዎ ፡ ከመ ፡ እስራኤል ፡ ሕዝብከ ፡ ሶበ ፡ ይሬእዩ ፡ ዘይገብር ፡ ተኣምረ ፡ ዘይትወለድ ፡ እምባሕርይ ፡ እሙንቱሰ ፡ የአምኑ ፡ ቦቱ ፡ በሰሚዐ ፡ ዜናሁ ፤ ወኀበ ፡ ዘይንእስኒ ፡ ወልድከ ፡ አድራሚ ፡ ኢሖረት ፡ እስመ ፡ እሙንቱ ፡ ሰናያን ፡ እመ ፡ ኢሰቀልዎ ፡ ወእመ ፡ ኢክሕዱ ፡ ሶበ ፡ ርእዩ ፡ ዘይገብር ፡ ተኣምረ ፡ ወመንክረ ፡ ዘይትወለድ ፡ እምባሕርይ ፡ ወበደኃሪ ፡ የአምኑ ፡ ቦቱ ፡ በአርድእቱ ። አላ ፡ ባሕቱ ፡ ወፅአት ፡ ባሕርይ ፡ እምከርሥከ ፡ እንተ ፡ ትከውን ፡ መድኀኒተክሙ ፡ ወቦአት ፡ ውስተ ፡ ከርሠ ፡ ኢዮርብዓም ፡ ወልድከ ፡ በእንተ ፡ እከዮሙ ፡ ለእስራኤል ፡ ሕዝብከ ፡ እስመ ፡ በክሕደቶሙ ፡ ወበ ፡ እከዮሙ ፡ ይሰቅልዎ ፤ ወሶበሰ ፡ ኢተሰቅለ ፡ እመ ፡ ኢኮነ ፡ መድኀኒትክሙ ፡ እስመ ፡ ይሰቀል ፡ ዘእንበለ ፡ ኀጢአት ፡ ወይትነሣእ ፡ ዘእንበለ ፡ ሙስና ፡ ወበእንተዝ ፡ ይወርድ ፡ ኀቤክሙ ፡ ውስተ ፡ ሲኦል ፡ ወይነሥት ፡ አረፋቲሃ ፡ ከመ ፡ ደድኅንክሙ ፡ ወያውፅእክሙ ፡ ወይምሐርክሙ ፡ ለኵልክሙ ፤ እለ ፡ ተጸውረት ፡ ባሕርይ ፡ ውስተ ፡ ከርሥክሙ ፡ ትድኅኑ ፡ ምስለ ፡ አንስቲያክሙ ፡ ወአልቦ ፡ ዘይትሀጐል ፡ እምኔክሙ ፡ እምአቡከ ፡ አዳም ፡ እስከ ፡ ዘይመጽእ ፡ ዘመድከ ፡ ኤያቄም ፡ ወእምሔዋን ፡ እምከ ፡ ብእሲቱ ፡ ለአዳም ፡ እስከ ፡ ኖኅ ፡ ወብእሲቱ ፡ ተርሚዛ ፡ እስከ ፡ ታራ ፡ ወብእሲቱ ፡ አሚንያ ፡ ወእስከ ፡ አብርሃም ፡ ወብእሲቱ ፡ ሳራ ፡ ወእስከ ፡ ይስሐቅ ፡ ወብእሲቱ ፡ ርብቃ ፡ ወእስከ ፡ ያዕቆብ ፡ ወብእሲቱ ፡ ልያ ፡ ወእስከ ፡ ይሁዳ ፡ ወመርዓቱ ፡ ትዕማር ፡ ወእስከ ፡ አቡከ ፡ ወብእሲቱ ፡ ቤርሳቤሕ ፡ ወእስከ ፡ ለሊከ ፡ ወተርባና ፡ ብእሲትከ ፡ ወእስከ ፡ ኢዮርብዓም ፡ ወልድከ ፡ ወአሚሳ ፡ ብእሲቱ ፡ ወእስከ ፡ ኢዮአቄም ፡ ዘይመጽእ ፡ ዘመድከ ፡ ወብእሲቱ ፡ ሐና ፤ ኵልክሙ ፡ እለ ፡ ጾርክምዋ ፡ ለባሕርይ ፡ አልቦ ፡ ዘይትሀጐል ፡ እምኔክሙ ፡ እምተባዕትክሙ ፡ ወእስከ ፡ አንስቲያክሙ ፡ ኢትትሀጐሉ ፡ እለ ፡ ጾርክምዋ ፡ ለባሕርይ ። እስመ ፡ ትጸወር ፡ ባሕርይ ፡ በተባዕት ፡ እለ ፡ ትከውኑ ፡ ጻድቃነ ፡ ወአንስትሂ ፡ እለ ፡ ጾራ ፡ ምጽዋረ ፡ ባሕርይ ፡ ኢይትሀጐላ ፡ እስመ ፡ ንጹሓተ ፡ ይከውና ፡ በይእቲ ፡ ባሕርይ ፡ እስመ ፡ ቅድስት ፡ ወንጽሕት ፡ ይእቲ ፡ ወባቲ ፡ ትትቄደሱ ፡ ወትነጽሑ ፤ እስመ ፡ በእንቲአሃ ፡ ወበእንተ ፡ ጽዮን ፡ ፈጠሮ ፡ ለኵሉ ፡ ዓለም ። ጽዮንሰ ፡ ነበረት ፡ ኀበ ፡ በኵርከ ፡ ወትከውን ፡ ድኀኒቶሙ ፡ ለሕዝበ ፡ ኢትዮጵያ ፡ እስከ ፡ ለዓለም ፡ ወባሕርይኒ ፡ ተጸውረት ፡ ውስተ ፡ ከርሠ ፡ አዮር ፡ በዓም ፡ ወልድከ ፡ ወትከውን ፡ መድኀኒት ፡ ለኵሉ ፡ ዓለም ፤ እስመ ፡ አመ ፡ በጽሐ ፡ ዕድሜሁ ፡ ትትወለድ ፡ እምዘርእከ ፡ ይእቲ ፡ ባሕርይ ፡ እስመ ፡ ንጽሕት ፡ ፈድፋደ ፡ ምስብዒተ ፡ እምነ ፡ ፀሐይ ፤ ወይመጽእ ፡ መድኅን ፡ እመንበረ ፡ መለኮቱ ፡ ወየኀድር ፡ ላዕሌሃ ፡ ወይለብስ ፡ ሥጋሃ ፤ ወአሜሃኒ ፡ ለሊከ ፡ ትዜንዋ ፡ ይቤለኒ ፡ እግዚእየ ፡ ወእግዚእከ ። አነ ፡ ገብርኤል ፡ መልአክ ፡ ዐቃቢክሙ ፡ ለእለ ፡ ትጸውርዋ ፡ ለባሕርይ ፡ እምከርሠ ፡ አዳም ፡ ወእስከ ፡ ከርሠ ፡ ሐና ፡ ከመ ፡ እክላእክሙ ፡ እምግብርናት ፡ ወርኵስ ፡ ኀበ ፡ ተኀድር ፡ ባሕርይ ፤ ወሚካኤልኒ ፡ ተአዘዘ ፡ ኀበ ፡ ጽዮን ፡ ከመ ፡ ይመግባ ፡ በኵሉ ፡ ኀበ ፡ ሖረት ፤ ወኡርያልኒ ፡ ይሜግብ ፡ ዕፀ ፡ ሳቤቅ ፡ እንተ ፡ ትከውን ፡ መስቀሎ ፡ ለመድኅን ። ወአመ ፡ ሰቀልዎበቅንአቶሙ ፡ ሕዝብከ ፡ ሀለሙ ፡ ይድብይዎ ፡ ለመስቀሉ ፡ እምብዝኀ ፡ ተኣምራት ፡ ዘይከውን ፡ ቦቱ ፡ ወየኀፍሩ ፡ ርኢዮሙ ፡ መንክራቲሁ ፡ ወበደኃሪ ፡ ይነሥኦ ፡ ለዕፀ ፡ መስቀል ፡ ዘርአ ፡ አድራሚስ ፡ ወልድከ ፡ ፫መድኀኒተ ፡ ዘተፈነወ ፡ ዲበ ፡ ምድር ። ሚካኤል ፡ መልአክ ፡ ኀበ ፡ ጽዮን ፡ ምስለ ፡ ዳዊት ፡ ወልድከ ፡ በኵርከ ፡ ዘነሥአ ፡ መንበረ ፡ ዳዊት ፡ አቡከ ፤ ወአነ ፡ ኀበ ፡ ባሕርይ ፡ ንጽሕት ፡ ለዘ ፡ ይነግሥ ፡ እስከ ፡ ለዓለም ፡ ኀበ ፡ ኢዮርብዓም ፡ ወልድከ ፡ ማእከላዊ ፤ ወኡርኤል ፡ መልአክ ፡ ኀበ ፡ አድራሚ ፡ ወልድከ ፡ ዘይንእስ ። ዘንተ ፡ ነገርኩከ ፡ ወኢታሕዝን ፡ ልበከ ፡ በእንተ ፡ መድኀኒትከ ፡ ወበእንተ ፡ መድኀኒተ ፡ ደቂቅከ ፠ ወዘንተ ፡ ሶበ ፡ ሰምዐ ፡ ተኀየለ ፡ በውስተ ፡ ምስካቡ ፡ ወሰገደ ፡ ለመልአከ ፡ እግዚኣብሔር ፡ ወይቤ ፡ ኣአኵቶ ፡ ለእግዚኣብሔር ፡ ለእግዚእየ ፡ ወለእግዚእከ ፡ ኦብርሃናዊ ፡ መንፈሳዊ ፡ ዘአስማዕከኒ ፡ ቃለ ፡ ዘያስተፈሥሐኒ ፡ ዘኢይሜቍሳ ፡ ለነፍስየ ፡ በእንተ ፡ አበሳየ ፡ እምርስተ ፡ አበውየ ፡ ዘተወክፈ ፡ ንስሓየ ፡ እምድኅረ ፡ ምንዳቤየ ፡ ዘነጸረ ፡ አንብዕየ ፡ ወሰምዐ ፡ ገዓርየ ፡ ዘርእየ ፡ ምንዳቤየ ፡ ወኢኀደገኒ ፡ ትኩዝየ ፡ እሞት ፡ አላ ፡ አስተፈሥሐኒ ፡ ዘእንበለ ፡ ትፃእ ፡ ነፍስየ ፡ እምሥጋየ ፤ እምይእዜሰ ፡ ኢያሐዝነኒ ፡ መዊት ፡ ወኣፈቅሮ ፡ ከመ ፡ ሕይወት ፡ እምይእዜሰ ፡ እሰርቦ ፡ ለጽዋዐ ፡ ሞት ፡ መሪር ፡ ከመ ፡ መዓር ፡ እምይእዜሰ ፡ ኣፈቅራ ፡ ለመቃብር ፡ ከመ ፡ ማኅደር ፡ ዘበ ፡ አፍራጽ ። ወእመኒ ፡ ወረድኩ ፡ ወተወረውኩ ፡ ውስተ ፡ ሲኦል ፡ በእንተ ፡ አበሳየ ፡ ኢያሐዝነኒ ፡ እስመ ፡ ሰማዕኩ ፡ ቃለ ፡ ዘያስተፈሥሐኒ ፤ ወእመኒ ፡ ወረድኩ ፡ ውስተ ፡ መትሕተ ፡ ታሕቲት ፡ መዓምቅተ ፡ ሲኦል ፡ ዘበእንተ ፡ አበሳየ ፡ ሚላዕሌየ ፤ ወእመኒ ፡ ጠሰየኒ ፡ ውስተ ፡ እዴሁ ፡ ወዘረወኒ ፡ እስከ ፡ አጽናፈ ፡ ምድር ፡ ወውስተ ፡ ነፋሳት ፡ በእንተ ፡ አበሳየ ፡ ኢያሐዝነኒ ፡ እስመ ፡ ሰማዕኩ ፡ ቃለ ፡ ዘያስተፈሥሐኒ ፡ ዘኢመቈሳ ፡ ለነፍስየ ፡ እምርስተ ፡ አበዊየ ፤ ወትከውን ፡ ነፍስየ ፡ ምስለ ፡ ነፍሰ ፡ ዳዊት ፡ አቡየ ፡ ወምስለ ፡ ነፍሰ ፡ አብርሃም ፡ ወይስሐቅ ፡ ወያዕቆብ ፡ አበዊየ ፡ ወይመጽእ ፡ መድኅን ፡ ወያወፅአነ ፡ እምሲኦል ፡ ምስለ ፡ ኵሎሙ ፡ አበዊየ ፡ ወአዝማድየ ፡ ቀደምት ፡ ወደኀርት ፡ ወለደቂቅየኒ ፡ በዲበ ፡ ምድር ፡ ፫መላእክት ፡ ኀያላን ፡ እለ ፡ የዐቅብዎሙ ፤ ረከብኩ ፡ መንግሥተ ፡ ሰማያት ፡ ወረከብኩ ፡ መንግሥተ ፡ ምድር ። መኑ ፡ ከመ ፡ እግዚኣብሔር ፡ መሓሪ ፡ ዘይምሕር ፡ ወይምሕክ ፡ ተግባሮ ፡ ዘይሰሪ ፡ አበሳ ፡ ለመአብሳን ፡ ወኢያጠፍእ ፡ ዝክረ ፡ ነሳሕያን ፤ እስመ ፡ ኵለንታሁ ፡ ስርየት ፡ ወኵለንታሁ ፡ ምሕረት ፡ ወሎቱ ፡ ይደሉ ፡ ስብሐት ፡ አሜን ፠ ፠ ፠