66. Concerning the prophecy of Christ
65. Concerning the sin of Solomon / Kebra Nagast / 66. Concerning the prophecy of Christ 67. Concerning the lamentation of Solomon

፷፮ ፡ በእንተ ፡ ትንቢተ ፡ ክርስቶስ ።

 

እስመ ፡ ሰሎሞን ፡ ብሂል ፡ በስዉር ፡ ነገር ፡ በፍካሬ ፡ ትንቢት ፡ ክርስቶስ ፡ ብሂል ። ወበከመ ፡ ሰሎሞን ፡ ሐነጸ ፡ ቤተ ፡ እግዚኣብሔር ፡ ከማሁ ፡ ክርስቶስኒ ፡ አንሥአ ፡ ወረሰየ ፡ ሥጋሁ ፡ ቤተ ፡ ክርስቲያን ፤ ወበከመ ፡ ይቤሎሙ ፡ ለአይሁድ ፡ ንሥትዎ ፡ ለዝንቱ ፡ ቤት ፡ ወበሠሉስ ፡ ዕለት ፡ አሐንጾ ፡ እስመ ፡ ይቤሎሙ ፡ በእንተ ፡ ቤተ ፡ ሥጋሁ ። ወበከመ ፡ ሰሎሞን ፡ አብዝኀ ፡ አንስተ ፡ እምሕዝበ ፡ ነኪር ፡ በእንተ ፡ ሥኖን ፡ ወላሕዮን ፡ ወበአምስሎ ፡ አፍቅሮ ፡ ፍትወታት ፡ ከማሁ ፡ ክርስቶስኒ ፡ አስተጋብአ ፡ እምሕዝበ ፡ ነኪር ፡ እለ ፡ አልቦሙ ፡ ሕግ ፡ እለ ፡ አምኑ ፡ ቦቱ ፡ ዘአልቦ ፡ ቈላፈ ፡ ወአልቦ ፡ አረማዌ ፡ ወአልቦ ፡ ገብረ ፡ ወአይሁዳዌ ፡ ወአልቦ ፡ ነባሬ ፡ ወአግዓዜ ፡ ኵሎሙ ፡ አስተጋብአ ፡ ውስተ ፡ መንግሥተ ፡ ሰማያት ፡ በሥጋሁ ፡ ወደሙ ። ወበመሓልየ ፡ መሓልይሂ ፡ ለሊሁ ፡ ሰሎሞን ፡ ሐለየ ፡ እንዘ ፡ ይብል ፡ ዐራቱ ፡ ለሰሎሞን ፡ ፷ ፡ ኀያላን ፡ ዐውዳ ፡ ኵሎሙ ፡ ምሁራነ ፡ ቀትል ፡ እኁዛነ ፡ አስይፍት ፡ ብእሲ ፡ ብእሲ ፡ ዲበ ፡ መንቅዕቱ ፡ ሰይፈ ፡ ያነብር ፤ ፷ ፡ ብሂል ፡ በኆልቈ ፡ አርእስተ ፡ አበው ፡ ጻድቃን ፡ ወነቢያት ፡ ወሐዋርያት ፡ ወሰማዕት ፡ ወመሀይምናን ፡ ወቅዱሳን ፡ ወመነኮሳት ፡ እለ ፡ የአብይዎ ፡ ለኅሊና ፡ እኩይ ፡ ፀብአ ፡ ሰይጣን ፤ ወሰይፍሂ ፡ ይተረጐም ፡ ቃለ ፡ መጻሕፍት ፡ ከመ ፡ መላጼ ፡ በሊኅ ፡ ዘርቱዕ ፡ ይመትር ፡ ቃለ ፡ እግዚኣብሔር ፡ ከማሁ ፡ ይመትሩ ፡ እምልቦሙ ፡ ድንጋፄ ፡ ለያልይ ፡ ዘሕልመ ፡ ሐሉት ፤ ወዐራተ ፡ ሰሎሞንሰ ፡ ምስካቡ ፡ ይተረጐም ፡ በቤተ ፡ ክርስቲያኑ ፡ ለክርስቶስ ። ወካዕበ ፡ ሐለየ ፡ እንዘ ፡ ይብል ፡ መጾረ ፡ ገብረ ፡ ለርእሱ ፡ ንጉሥ ፡ ሰሎሞን ፤ ወዝንቱሂ ፡ ተተርጐመ ፡ ከመ ፡ ክርስቶስ ፡ ለብሰ ፡ ሥጋነ ፤ ሰሎሞን ፡ ብሂል ፡ በነገረ ፡ ዕብራዊያን ፡ ክርስቶስ ፡ ብሂል ። ወአብዳንሰ ፡ አይሁድ ፡ ያመስልዎ ፡ ለቃለ ፡ ዳዊት ፡ ዘተብህለ ፡ በእንተ ፡ ሰሎሞን ፡ ወልዱ ፡ እግዚኣብሔር ፡ ይቤለኒ ፡ ወልድየ ፡ አንተ ፡ ወአነ ፡ ዮም ፡ ወለድኩከ ። እግዚኦ ፡ ኵነኔከ ፡ ሀቦ ፡ ለንጉሥ ፡ ወጽድቅከ ፡ ለወልደ ፡ ንጉሥ ፡ ከመ ፡ ይኰንኖሙ ፡ ለሕዝብከ ፡ በጽድቅ ፡ ወለነዳያኒከኒ ፡ በፍትሕ ፡ ወየሐዩ ፡ ወይሁብዎ ፡ እምወርቀ ፡ ዐረብ ፡ ወዘልፈ ፡ ይጼልዩ ፡ በእንቲአሁ ፡ ወኵሎ ፡ አሚረ ፡ ይድኅርዎ ፡ ወይከውን ፡ ምስማከ ፡ ለኵሉ ፡ ምድር ፡ ውስተ ፡ አርእስተ ፡ አድባር ፡ ወይነውኅ ፡ እምአርዝ ፡ ፍሬሁ ፡ ወይበቍል ፡ ውስተ ፡ ሀገር ፡ ከመ ፡ ሣዕረ ፡ ምድር ፡ ወይከውን ፡ ቡሩክ ፡ ስሙ ፡ ለዓለም ፡ እምቅድመ ፡ ፀሐይ ፡ ሀሎ ፡ ስሙ ፤ ወለድኩከ ፡ እምከርሥ ፡ እምቅድመ ፡ ኮከበ ፡ ጽባሕ ፡ መሐለ ፡ እግዚኣብሔር ፡ ወኢይኔስሕ ፡ አንተ ፡ ካህኑ ፡ ለዓለም ፡ በከመ ፡ ሢመቱ ፡ ለመልከ ፡ ጼዴቅ ። ወዘንተ ፡ ወዘይመስሎ ፡ ትንቢት ፡ ዘበእንተ ፡ ክርስቶስ ፡ ዘተነበየ ፡ ዳዊት ፡ ይብሉ ፡ አብዳን ፡ ዕዉራነ ፡ ልብ ፡ አይሁድ ፡ ይቤ ፡ ዳዊት ፡ ውስተ ፡ ርእሰ ፡ መጽሐፉ ፡ በእንተ ፡ ሰሎሞን ፡ ወልዱ ፡ ዘተናገረ ፤ ዘንተ ፡ ይብሉ ፡ አይሁድ ፡ ወያመስልዎ ፡ ለክርስቶስ ፡ በሰሎሞን ፡ በመኵሴ ፡ ስም ፡ በጥበብ ፡ ወበወልደ ፡ ዳዊት ፡ በሥጋ ። ወዘንተ ፡ እምድኅረ ፡ አእመሩ ፡ እለ ፡ እምድኅረ ፡ ዳዊት ፡ ወሰሎሞን ፡ ኤልያስ ፡ ወኤልሳዕ ፡ ጸሐፉ ፡ ኀጢአቶ ፡ ለሰሎሞን ፡ ውስተ ፡ መጽሐፈ ፡ ነገሥት ፡ ከመ ፡ ያስተኀፍርዎሙ ፡ ለአይሁድ ፡ ዕዉራነ ፡ ልብ ፡ ጸራ ፡ ለጽድቅ ። ወሰሎሞንሰ ፡ ንጉሥ ፡ ወልደ ፡ ዳዊት ፡ ንጉሥ ፡ ወነቢይ ፡ ወለሊሁኒ ፡ ንጉሥ ፡ ወነቢይ ፡ ውእቱ ፡ ወበጥበብ ፡ ተነበየ ፡ ዘበእንተ ፡ ክርስቶስ ፡ ብዙኀ ፡ አምሳለ ፡ ወበእንተ ፡ ቤተ ፡ ክርስቲያን ፡ ወጸሐፈ ፡ ፬ ፡ መጽሐፈ ፡ ትንቢቱ ፡ ወተኆለቈ ፡ ምስለ ፡ አብርሃም ፡ ይስሐቅ ፡ ወያዕቆብ ፡ ወዳዊት ፡ አቡሁ ፡ በመንግሥተ ፡ ሰማያት ፠