64. How the Daughter of Pharaoh Seduced Solomon
63. How the Nobles of Israel agreed [with the King] / Kebra Nagast / 64. How the Daughter of Pharaoh Seduced Solomon 65. Concerning the sin of Solomon

፷፬ ፡ ኀበ ፡ አስሐተቶ ፡ ለሰሎሞን ፡ ወለተ ፡ ፈርዖን ።

 

ወእምዝ ፡ ተግህደት ፡ በቅድሜሁ ፡ ወትቤሎ ፡ ይኄይስ ፡ ሰጊድ ፡ ለአማልክት ፡ ከመ ፡ አቡየ ፡ ወኵሎሙ ፡ ነገሥተ ፡ ግብጽ ፡ እለ ፡ እምቅድሜሁ ፡ ለአቡየ ። ወአውሥኣ ፡ ወይቤላ ፡ ሎሙሰ ፡ ይብሉ ፡ አማልክቲሆሙ ፡ ዘገብሩ ፡ በእደዊሆሙ ፡ በነሃቢ ፡ ወበጸራቢ ፡ በለሓኲ ፡ ወበሰዓሊ ፡ በወቃሪ ፡ ወበገላፊ ፡ እለ ፡ ኢኮኑ ፡ አማልክተ ፡ ግብረ ፡ እደ ፡ ሰብእ ፡ ወርቅ ፡ ወብሩር ፡ ብርት ፡ ወዐረር ፡ ኀጺን ፡ ወልሕኵት ፡ ወእብን ፤ ወትብልዎሙ ፡ አማልክቲነ ፡ ለእለ ፡ ኢኮኑ ፡ አማልክቲክሙ ፤ ወንሕነሰ ፡ ኢንሰግድ ፡ ለባዕድ ፡ ዘእንበለ ፡ ለአምላከ ፡ ቅዱሰ ፡ እስራኤል ፡ ወለእግዝእትነ ፡ ጽዮን ፡ ቅድስት ፡ ሰማያዊት ፡ ታቦተ ፡ ሕጉ ፡ ለእግዚኣብሔር ፡ ዘወሀበነ ፡ ከመ ፡ ንስግድ ፡ ላቲ ፡ ንሕነ ፡ ወዘርእነ ፡ እምድኅሬነ ። አውሥአቶ ፡ ወትቤሎ ፡ ለእግዝእትከሰ ፡ ነሥአ ፡ ወልድከ ፡ ዘወለድኮ ፡ ዘእምነኪር ፡ ሕዝብ ፡ ዘኢአዘዘክሙ ፡ ከመ ፡ ታውስቡ ፡ ኢትዮጵያዊተ ፡ እንተ ፡ ኢኮነት ፡ ሕብርከ ፡ ወቅርብተ ፡ ሀገርከ ፡ ጸሊማን ፡ ሕዝበ ፡ ባዕድ ። አውሥኣ ፡ ወይቤላ ፡ ለእመ ፡ ከመዝ ፡ ትቤሊ ፡ አንቲኒ ፡ ኢኮንኪ ፡ እምዘ ፡ አዘዘነ ፡ እግዚኣብሔር ፡ ከመ ፡ ንትዋሰብ ፡ ወዘመድክሙ ፡ ምስለ ፡ ዘመደ ፡ ዚአሃ ፡ ደቂቀ ፡ ካም ፡ ኵልክሙ ፤ ወሠሪዎ ፡ ዘርአ ፡ ካም ፡ ፯ነገሥተ ፡ አውረሰነ ፡ እግዚኣብሔር ፡ ዘሀገረ ፡ ኀበ ፡ ንነብር ፡ ውስቴታ ፡ ለዓለም ፡ ንሕነ ፡ ወዘርእነ ፡ እምድኅሬነ ፤ ወበእንተ ፡ ጽዮንሂ ፡ ፈቃደ ፡ እግዚኣብሔር ፡ ኮነ ፡ ወወሀቦሙ ፡ ከመ ፡ ያምልኩ ፡ ኪያሃ ፤ ወእንሰ ፡ ኢይሠውዕሂ ፡ ወኢይሰግድሂ ፡ ለጣዖትኪ ፡ ወኢይገብር ፡ ፈቃደኪ ፠ ወዘንተ ፡ እንዘ ፡ ትብሎ ፡ እንዘ ፡ ታስተጣዕም ፡ ሎቱ ፡ ሰርከ ፡ ወነግሀ ፡ ሌሊተ ፡ ወመዓልተ ፡ ወውእቱኒ ፡ እንዘ ፡ የአብያ ፡ አሐተ ፡ ዕለተ ፡ ተሠነየት ፡ ወተምዕዘት ፡ ሎቱ ፡ ወተከብረት ፡ ሎቱ ፡ ወተዐበየት ፡ ሎቱ ፤ ወይቤላ ፡ ምንተ ፡ እገብር ፡ እስመ ፡ አሕሠምኪ ፡ ገጽኪ ፡ ላዕሌየ ፡ ወነጽሮትኪኒ ፡ አኮ ፡ ከመ ፡ ዘትካት ፡ ወላሕይኪኒ ፡ ኢኮነ ፡ አዳም ፡ ወሰአልኒ ፡ ዘእሁበኪ ፡ ዘትፈቅዲ ፡ ወዘእገብር ፡ ለኪ ፡ ከመ ፡ ታሠንዪ ፡ ገጽኪ ፡ ኀቤየ ፡ ከመ ፡ ዘትካት ፤ ወአርመመት ፡ ወኢያውሥአቶ ፤ ወደገመ ፡ ላቲ ፡ ቃለ ፡ ከመ ፡ ይግበር ፡ ላቲ ፡ ዘፈቀደት ፡ ወትቤሎ ፡ መሐል ፡ ሊተ ፡ በአምላከ ፡ እስራኤል ፡ ከመ ፡ ኢተሐስወኒ ፡ ወመሐለ ፡ ላቲ ፡ ከመ ፡ የሀባ ፡ ዘሰአለቶ ፡ ወከመ ፡ ይግበር ፡ ላቲ ፡ ኵሎ ፡ ዘትቤሎ ። ወአሰረት ፡ ፈትለ ፡ ለይ ፡ በመንፈቀ ፡ ኆኅታ ፡ [ለቤተ ፡ ]አማልክቲሃ ፡ ወአምጽአት ፡ ሠለስተ ፡ አንበጣ ፡ ወነበረት ፡ ውስተ ፡ ቤተ ፡ አማልክቲሃ ፡ ወትቤሎ ፡ ባእ ፡ ኀቤየ ፡ ዘእንበለ ፡ ትብትክ ፡ ፈትለ ፡ ለይ ፡ ደኒነከ ፡ ወቅትሎሙ ፡ ለእሉአንበጣ ፡ በቅድሜየ ፡ ወክላዕ ፡ ክሳውዲሆሙ ፤ ወገብረ ፡ ከማሁ ። ወትቤሎ ፡ አነ ፡ እገብር ፡ እምይእዜሰ ፡ ፈቃድከ ፡ እስመ ፡ ሦዕከሂ ፡ ወሰገድከሂ ፡ ለአማልክትየ ። ወውእቱሰ ፡ በእንተ ፡ ማሕላሁ ፡ ገብረ ፡ ከመዝ ፡ ከመ ፡ ኢይብላዕ ፡ ማሕላሁ ፡ ዘአምሐለቶ ፡ እንዘ ፡ ያአምር ፡ ከመ ፡ ጌጋይ ፡ ውእቱ ፡ በዊእ ፡ ውስተ ፡ ቤተ ፡ አማልክቲሃ ፠ ወእግዚኣብሔርኒ ፡ አዘዞሙ ፡ ለደቂቀ ፡ እስራኤል ፡ እንዘ ፡ ይብል ፡ ኢታውስቡ ፡ እምአንስተ ፡ ባዕድ ፡ ከመ ፡ ኢትስሐቱ ፡ ቦቶን ፡ በአማልክቲሆን ፡ በእከየ ፡ ምግባሪሆን ፡ ወበጣዕመ ፡ ቃሎን ፤ እስመ ፡ ያደክማ ፡ ልበ ፡ ወራዙት ፡ የዋሃን ፡ በጣዕመ ፡ ቃሎን ፡ ድኩማት ፡ ወበሥነ ፡ ላሕዮን ፡ ይዘርዋ ፡ ጥበበ ፡ ብእሲ ፡ አብድ ። መኑ ፡ ይጠብብ ፡ እምሰሎሞን ፡ ወስሕተ ፡ በብእሲት ፤ ወመኑ ፡ ይጸድቅ ፡ እምነ ፡ ዳዊት ፡ ወስሕተ ፡ በብእሲት ፤ ወመኑ ፡ ይጸንዕ ፡ እምነ ፡ ሳምሶን ፡ ወስሕተ ፡ በብእሲት ፤ ወመኑ ፡ ይሤኒ ፡ በላሕይ ፡ እምነ ፡ አምኖን ፡ ወስሕተ ፡ በእኅቱ ፡ ትዕማር ፡ ወለተ ፡ ዳዊት ፡ አቡሁ ፤ ወአዳምኒ ፡ ቀዳሜ ፡ ልሕኵቱ ፡ ለእግዚኣብሔር ፡ ወስሕተ ፡ በሔዋን ፡ ብእሲቱ ፡ ወበይእቲ ፡ ስሕተት ፡ ተፈጥረ ፡ ሞት ፡ ላዕለ ፡ ኵሉ ፡ ፍጥረት ፤ ወይእቲ ፡ ስሕተተ ፡ ተባዕት ፡ እምአንስት ፡ ተፈጥረት ፡ እምሔዋን ፡ እስመ ፡ አዋልደ ፡ ሔዋን ፡ ኵሎን ፠ ፠ ፠