62. Concerning the answer which Solomon made to them
61. How Solomon Returned to Jerusalem / Kebra Nagast / 62. Concerning the answer which Solomon made to them 63. How the Nobles of Israel agreed [with the King]

፷፪ ፡ በእንተ ፡ ዘአውሥኦሙ ፡ ሰሎሞን ።

 

ወአውሥኦሙ ፡ ሰሎሞን ፡ ንጉሥ ፡ ወይቤሎሙ ፡ ስምዑኒ ፡ ዘእነግረክሙ ፡ ኪያየ ፡ ሶበ ፡ ወሰደኒ ፡ እንዘ ፡ እጸውር ፡ ኪያሃ ፡ ምንት ፡ እምተስእኖ ፡ ለእግዚኣብሔር ፡ ወኪያክሙኒ ፡ ሶበ ፡ ይወስደክሙ ፡ ጸዊረክሙ ፡ ኪያሃ ፡ ምንት ፡ እምተስእኖ ፡ ለእግዚኣብሔር ፡ ወሶበሂ ፡ ያወርሶሙ ፡ ሀገርነ ፡ ወይሤርወነ ፡ ኪያነ ፡ ምንት ፡ እምተስእኖ ፡ ለእግዚኣብሔር ፡ እስመ ፡ ኵሉ ፡ ሎቱ ፡ ወአልቦ ፡ ዘየአብያ ፡ ለፈቃዱ ፡ ወአልቦ ፡ ዘይትዐደው ፡ እምትእዛዙ ፡ በሰማይ ፡ በላዕሉ ፡ ወበምድር ፡ በታሕቱ ፡ ንጉሥ ፡ ውእቱ ፡ ዘኢይሰዐር ፡ መንግሥቱ ፡ ለዓለመ ፡ ዓለም ፡ አሜን ። ወባሕቱ ፡ ንሖር ፡ ንትጋነይ ፡ በውስተ ፡ ቤተ ፡ እግዚኣብሔር ፠ ወሖሩ ፡ ሊቃውንተ ፡ እስራኤል ፡ ምስለ ፡ ንጉሦሙ ፡ ውስተ ፡ ቤተ ፡ እግዚኣብሔር ፡ ወቦኡ ፡ ውስተ ፡ ቅድስተ ፡ ቅዱሳን ፡ ወሰአሉ ፡ ወተጋነዩ ፡ ወበፅዑ ፡ ለእግዚኣብሔር ፤ ወሰሎሞንሂ ፡ በከየ ፡ በውስተ ፡ ምንባሪሃ ፡ ለጽዮን ፡ ሰማያዊት ፡ ታቦተ ፡ ሕጉ ፡ ለእግዚኣብሔር ፡ ወበከዩ ፡ ኵሎሙ ፡ ምስሌሁ ፡ ወእምድኅረ ፡ ሕቅ ፡ አርመሙ ፠ አውሥአ ፡ ሰሎሞን ፡ ወይቤሎሙ ፡ ኅድጉኬ ፡ ከመ ፡ ኢይትመክሑ ፡ ቈላፋን ፡ ሕዝብ ፡ ላዕሌነ ፡ ወኢይበሉነ ፡ ተነሥተ ፡ ክብሮሙ ፡ ወኀደጎሙ ፡ እግዚኣብሔር ፤ ኢትክሥቱ ፡ እምዝ ፡ ዳግመ ፡ ለባዕዳን ፡ ሕዝብ ፤ ወእሉሂ ፡ አልዋሕ ፡ እለ ፡ ስሙካን ፡ ወልጹቃን ፡ ዝየ ፡ ንሢሞን ፡ ወንልብጦን ፡ በወርቅ ፡ ወናሰርግዎን ፡ በአምሳለ ፡ እግዝእትነ ፡ ጽዮን ፡ ወመጽሐፈ ፡ ሕግሂ ፡ ናንብር ፡ ውስቴታ ፤ ወሀለወት ፡ ኀቤነ ፡ ኢየሩሳሌም ፡ አግዓዚት ፡ እንተ ፡ በሰማያት ፡ መልዕልቴነ ፡ ዘርእየ ፡ ያዕቆብ ፡ አቡነ ፡ ወእምታሕቴሃ ፡ ዛቲ ፡ ይእቲ ፡ አንቀጸ ፡ ሰማይ ፡ እንተ ፡ በምድር ፡ ኢየሩሳሌም ። ለእመ ፡ ገበርነ ፡ ፈቃዶ ፡ ለእግዚኣብሔር ፡ ወሥምረቶ ፡ ይሄሉ ፡ እግዚኣብሔርኒ ፡ ምስሌነ ፡ ወያነግፈነ ፡ እምእደ ፡ ፀርነ ፡ ወእምእደ ፡ ኵሎሙ ፡ እለ ፡ ይጸልኡነ ፤ ወይኩን ፡ ፈቃዶ ፡ ለእግዚኣብሔር ፡ ወአኮ ፡ ፈቃደ ፡ ዚአነ ፡ ወይኩን ፡ ሥምረተ ፡ እግዚኣብሔር ፡ ወአኮ ፡ ሥምረተ ፡ ዚአነ ፤ ወበይእቲሰ ፡ አሕዘነነ ፡ ወባሕቱ ፡ እምይእዜሰ ፡ ያቈርር ፡ መዐቶ ፡ እምኔነ ፡ ወኢየኀድገነ ፡ ለጸላእትነ ፡ ወኢያርሕቅ ፡ ሣህሎ ፡ እምኔነ ፤ ተዘኪሮ ፡ ኪዳነ ፡ ዘምስለ ፡ አበዊነ ፡ አብርሃም ፡ ወይስሐቅ ፡ ወያዕቆብ ፡ ኢይሔሱ ፡ ቃሎ ፡ ወኢይዔምዕ ፡ ኪዳኖ ፡ ከመ ፡ ኢያማስን ፡ ዘርኦሙ ፡ ለአበዊነ ፠ ፠ ፠