61. How Solomon Returned to Jerusalem
60. How Solomon Lamented for Zion / Kebra Nagast / 61. How Solomon Returned to Jerusalem 62. Concerning the answer which Solomon made to them

፷፩ ፡ በእንተ ፡ ግብአተ ፡ ሰሎሞን ፡ ኢየሩሳሌም ።

 

ወእምዝ ፡ አተወ ፡ ሀገረ ፡ ኢየሩሳሌም ፡ ወበከየ ፡ በህየኒ ፡ ምስለ ፡ አእሩገ ፡ ኢየሩሳሌም ፡ ብካየ ፡ ዐቢየ ፡ በውስተ ፡ ቤተ ፡ እግዚኣብሔር ፡ ወእምድኅረዝ ፡ ተኣኀዙ ፡ ንጉሥ ፡ ምስለ ፡ ሳዶቅ ፡ ካህን ፡ በክሳውዲሆሙ ፡ ወበከዩ ፡ መሪረ ፡ በውስተ ፡ ምንባሪሃ ፡ ለጽዮን ፡ ወአርመሙ ፡ እምድኅረ ፡ ጕንዱይ ፡ ሰዐት ። ወተንሥኡ ፡ መላህቅት ፡ ወተናገርዎ ፡ ለንጉሥ ፡ እንዘ ፡ ይብሉ ፡ ኢትሕዝን ፡ እግዚእነ ፡ በእንተዝ ፡ ነገር ፡ እስመ ፡ ንሕነ ፡ አእመርነ ፡ ዘእንበለ ፡ ኀበ ፡ ፈቀደ ፡ እግዚኣብሔር ፡ ኢትነብር ፡ ጽዮን ፡ እምቀዳሚ ፡ እስከ ፡ ደኃሪ ፡ ወአልቦ ፡ ዘይከውን ፡ ዘእንበለ ፡ በፈቃደ ፡ እግዚኣብሔር ፤ ወዘበእንተ ፡ ጽዮንሂ ፡ ቀዲሙ ፡ በመዋዕለ ፡ ኤሊ ፡ ካህን ፡ ዘእንበለ ፡ ይስአሉ ፡ አበዊነ ፡ ንጉሠ ፡ ፄወውዋ ፡ ኢሎፍሊ ፡ በውስተ ፡ ትዕይንት ፡ ሶበ ፡ ተሀየዮሙ ፡ እግዚኣብሔር ፡ ለእስራኤል ፡ በውስተ ፡ ፀብእ ፡ ወወድቁ ፡ ካህናቲሃ ፡ አፍኒ ፡ ወፊናሐስ ፡ በአፈ ፡ ኀጺን ፡ ወነሥእዋ ፡ ኢሎፍሊ ፡ ለታቦተ ፡ ሕጉ ፡ ለእግዚኣብሔር ፡ ወአእተውዋ ፡ ውስተ ፡ ሀገሮሙ ፡ ወወደይዋ ፡ ውስተ ፡ ቤተ ፡ አምላኮሙ ፡ ዳጎን ፤ ወተሰብረ ፡ ወተሀጕለ ፡ ዳጎን ፡ ወኮነ ፡ ከመ ፡ ጸበል ፡ ወምድሮሙ ፡ ኮነት ፡ በድወ ፡ በአናጹት ፡ ወበልዐ ፡ ኵሎ ፡ ፍሬ ፡ ምድሮሙ ፡ ወነፍስቶሙኒ ፡ ኮነ ፡ ጸልዐ ፡ ወሕበጠ ፤ ወአስተጋብኡ ፡ ማርያኒሆሙ ፡ ወመሰግላኒሆሙ ፡ ወረአይተ ፡ ከዋክብቲሆሙ ፡ ወተስእልዎሙ ፡ ወይቤልዎሙ ፡ እፎ ፡ ንድኅን ፡ እምዝጸልዕ ፡ ወምንዳቤ ፡ ዘረከበነ ፡ ለነ ፡ ወለሀገርነ ፤ ኀለዩ ፡ እሙንቱ ፡ መሰግላን ፡ ተግሒሦሙ ፡ እንተ ፡ ባሕቲቶሙ ፡ ወአምጽኡ ፡ ሰገላቲሆሙ ፡ ወኀለዩ ፡ ወሐሰቡ ፡ ወመከሩ ፡ ዘከመ ፡ እፎ ፡ ይድኅኑ ፡ እምንዳቤ ፡ ሀገሮሙ ፡ ወነፍስቶሙወረከቡ ፡ ዘንተ ፡ ከመ ፡ በእንተ ፡ ጽዮን ፡ ዘረከቦሙ ፡ ዝንቱ ፡ መቅሠፍት ፡ ሎሙ ፡ ወለሀገሮሙ ። ወሖሩ ፡ ኀበ ፡ ነገሥቶሙ ፡ ወመኳንንቲሆሙ ፡ ወይቤልዎሙ ፡ ዝንቱ ፡ ኵሉ ፡ ዘረካበክሙ ፡ በእንተ ፡ ጽዮን ፡ ሰማያዊት ፡ ታቦተ ፡ ሕጉ ፡ ለእግዚኣብሔር ፤ ወይእዜኒ ፡ አእምሩ ፡ ዘከመ ፡ ታገብእዋ ፡ ውስተ ፡ ሀገራ ፡ ወብሔራ ፡ ወቤታ ፤ ወአኮ ፡ ዕራቃ ፡ ዘንፌንዋ ፡ አላ ፡ ሀብዋ ፡ ሞጻ ፡ ከመ ፡ ትስረይ ፡ ዛቲ ፡ ኀጢአተክሙ ፡ ወትሰስል ፡ ምንዳቤክሙ ፡ ሶበ ፡ ገብአት ፡ ጽዮን ፡ ውስተ ፡ ሀገራ ፡ ወሶበሰ ፡ ኢፈነውክምዋ ፡ ውስተ ፡ ሀገራ ፡ ኢኮነ ፡ ሠናየ ፡ አንብሮታ ፡ ኀቤክሙ ፡ አላ ፡ ትትቀሠፉ ፡ ኵልክሙ ፡ እስከ ፡ ተኀልቁ ። ወይቤልዎሙ ፡ ነገሥቶሙ ፡ ወመኳንንቲሆሙ ፡ ለማርያኒሆሙ ፡ ምንተኬ ፡ ዘትብሉ ፡ ዘንሁባ ፡ ሞጻ ፡ ወከመ ፡ እፎ ፡ ንፌንዋ ፡ ጠዪቀክሙ ፡ ንግሩነ ፡ ዘከመ ፡ ንሬሲ ። ወመከሩ ፡ ካዕበ ፡ ማርያነ ፡ ኢሎፍሊ ፡ ወይቤልዎሙ ፡ ለነገሥቶሙ ፡ ወለኳንንቲሆሙ ፡ ግበሩ ፡ ላቲ ፡ በርእሰ ፡ አብያቲክሙ ፡ ወርቀ ፡ ሞጻ ፡ ፷ ፡ አምሳለ ፡ አናጹት ፡ በከመ ፡ አጥፍኡ ፡ ሀገርክሙ ፡ ወአምሳለ ፡ ነፍስተ ፡ ብእሲ ፡ ፷ ፡ በከመ ፡ ሐመምክሙ ፡ ነፍስተክሙ ፡ በጸልዕ ፡ ወሕበጥ ፡ እንተ ፡ ኀበ ፡ ቍልፈትክሙ ። ወገብሩ ፡ በከመ ፡ አዘዝዎሙ ፡ ኢሎፍሊ ፡ ፻፳ ፡ ሞጻ ፡ ዘወርቅ ፡ ወወሀብዋ ፡ ለጽዮን ፤ ወካዕበ ፡ ይቤልዎሙ ፡ ዘከመ ፡ እፎ ፡ ንፌንዋ ፡ ወመኑ ፡ ትብሉ ፡ ይሰዳ ፡ ውስተ ፡ ሀገራ ። ወይቤልዎሙ ፡ ካዕበ ፡ መሰግላነ ፡ ኢሎፍሊ ፡ ያምጽኡ ፡ ክልኤ ፡ ናቃት ፡ እለ ፡ ተበኵራ ፡ በአሐቲ ፡ ጊዜ ፡ ወይርሐኑ ፡ ሰረገላተ ፡ ዲቤሆሙ ፡ ወይክልኡ ፡ እጐላቲሆሙ ፡ ወይዕጽዉ ፡ ውስተ ፡ ቤት ፡ ወይዕምድዎን ፡ ይኅድግዎን ፡ ይሖራ ፡ ኀበ ፡ ፈቀዳ ፤ ወለእመ ፡ አርትዓ ፡ ለኢየሩሳሌም ፡ ዮጊ ፡ ናአምር ፡ ከመ ፡ ተሣሀላ ፡ እግዚኣብሔር ፡ ለምድርነ ፡ ወለእመሰ ፡ አውከካ ፡ ወአንጌገያ ፡ ወፈቀዳ ፡ ገቢአ ፡ ድኅሬሆን ፡ ናአምር ፡ ከመ ፡ ተምዕዐነ ፡ እግዚኣብሔር ፡ ወኢያእተተ ፡ መቅሠፍቶ ፡ እለከ ፡ ያጠፍአነ ፡ ኪያነሂ ፡ ወሀገርነ ። ወገብሩ ፡ በከመ ፡ አዘዝዎሙ ፡ ማርያነ ፡ ኢሎፍሊ ፡ ለመኳንንቲሆሙ ፡ ወአስተፋነውዋ ፡ ወገነዩ ፡ ላቲ ፤ ወእምዝ ፡ አርትዓ ፡ እማንቱ ፡ አግማል ፡ ለፍኖተ ፡ ብሔረ ፡ ይሁዳ ፡ ወበጽሐአ ፡ ውስተ ፡ ዐውደ ፡ እክል ፡ ወተቀበልዋ ፡ ቤተ ፡ ዘመድከ ፤ ወእለሰ ፡ ኢተቀበልዋ ፡ ሰብአ ፡ ቤተ ፡ ዳን ፡ እለ ፡ ኢገነዩ ፡ ላቲ ፡ እንዘ ፡ ይሬእይዋ ፡ አኅለቆሙ ፡ እግዚኣብሔር ፡ በመዐት ፤ ወለእሙንቱሰ ፡ ዕፀወ ፡ ሰረገላ ፡ ሠፀርዎን ፡ ወለእማንቱኒ ፡ አግማል ፡ ረሰይዎን ፡ መሥዋዕተ ፡ ወገብአተ ፡ ጽዮን ፡ ውስተ ፡ መካና ። ወአሜሃ ፡ እንዘ ፡ ሀለወት ፡ ውስተ ፡ ቤት ፡ ተልእካ ፡ ሳሙኤል ፡ ነቢይ ፡ ወተከሥተ ፡ ሎቱ ፡ ራእይ ፡ ወትንቢት ፡ ወኮነ ፡ ዘያሠምሮ ፡ ለእግዚኣብሔር ፡ በኵሉ ፡ ግብሩ ፡ ወኰነኖሙ ፡ ለእስራኤል ፡ ፵ወ፰ ፡ ዓመተ ። ወእምድኅሬሁ ፡ ሰአሉ ፡ ሕዝብነ ፡ ያንግሥ ፡ ሎሙ ፡ እግዚኣብሔር ፡ ከመ ፡ አሕዛብ ፡ እለ ፡ አውዶሙ ፤ ወቀብኦ ፡ ሳሙኤል ፡ ነቢይ ፡ ለሳኦል ፡ ንጉሥ ፡ ወውእቱኒ ፡ ነግሠ ፡ ፵ ፡ ዓመተ ፤ ወለሊሁሰ ፡ እምሕዝበ ፡ ብንያሚ ፡ እንተ ፡ ትንእስ ፡ በትር ፡ እምሕዝበ ፡ እስራኤል ፤ ወቀብኦ ፡ ካዕበ ፡ ሳሙኤል ፡ ነቢይ ፡ ለአቡከ ፡ ዳዊት ። ወሶበ ፡ ተኣኀዙ ፡ ቀትለ ፡ ኢሎፍሊ ፡ ምስለ ፡ ሳኦል ፡ ንጉሥ ፡ ተመውአ ፡ ሳኦል ፡ ወሞተ ፡ ምስለ ፡ ናታን ፡ ወልዱ ። ወእለ ፡ ተርፉ ፡ ደቂቁ ፡ ፈቀዱ ፡ ከመ ፡ ይንሥእዋ ፡ ለጽዮን ፡ ሶበ ፡ አእመሩ ፡ ሞተ ፡ አቡሆሙ ፡ ወእኁሆሙ ፤ ወእምዝ ፡ ሶበ ፡ ፈቀዱ ፡ ኀቢኦታ ፡ ወአግዕዞታ ፡ እስከ ፡ ቈላተ ፡ ጌላቡሔ ፡ ከመ ፡ ኢይንሥኦሙ ፡ አቡከ ፡ ዳዊት ፡ ወአበየቶሙ ፡ ተነሥኦ ፡ እስከ ፡ ይመጽእ ፡ አቡከ ፡ ወይነሥኣ ፡ እምሀገሮሙ ፡ ኢበመሥዋዕት ፡ ወኢበዕጣን ፡ ወአጸንሕሖ ፡ እስመ ፡ ኢይትከሀል ፡ ነሢኦታ ፡ ለጽዮን ፡ ዘእንበለ ፡ ፈቃዳ ፡ ወፈቃደ ፡ እግዚኣብሔር ፤ ወካዕበ ፡ አቡከ ፡ ሶበ ፡ አርትዐ ፡ ወነግሠ ፡ ላዕለ ፡ እስራኤል ፡ ነሥኣ ፡ እምሀገረ ፡ ሰማርያ ፡ ወአብኣ ፡ ዝየ ፡ ኢየሩሳሌም ፡ እንዘ ፡ ያፅሕስ ፡ በእገሪሁ ፡ በቅድሜሃ ፡ ወይጠፍሕ ፡ በእደዊሁ ፡ በእንተ ፡ ፍሥሓሃ ፡ እስመ ፡ ተንሥአት ፡ ሎቱ ፡ ከመ ፡ ትምጻእ ፡ ሀገረ ፡ ዳዊት ፡ አቡከ ። ወዝንቱሰ ፡ ዘትብል ፡ በእንተ ፡ ዘሖረት ፡ ጽዮን ፡ ሀገሮሙ ፡ ለብሔረ ፡ ኢትዮጵያ ፡ ለእመ ፡ ፈቀደ ፡ እግዚኣብሔር ፡ ወፈቀደት ፡ ለሊሃ ፡ ኢይክል ፡ ከሊኦታ ፡ ወኢ፩ ፡ እስመ ፡ በፈቃዳ ፡ ተሐውር ፡ ወበፈቃዳ ፡ ትገብእ ፡ ለእመ ፡ ሠምረ ፡ እግዚኣብሔር ፤ ወለእመሰ ፡ ኢገብአት ፡ ይኩን ፡ ሥምረቱ ፡ ለእግዚኣብሔር ፡ ወለነሰ ፡ ለእመ ፡ ፈቀደ ፡ እግዚኣብሔር ፡ ሀለወት ፡ ኀቤነ ፡ ኢየሩሳሌም ፡ ዘሐነጽከ ፡ ለነ ፡ ቤተ ፡ እግዚኣብሔር ። ወይእዜኒ ፡ ኢታሕዝን ፡ ልበከ ፡ ወተናዘዝ ፡ በዘ ፡ ንነግረከ ፡ ወጥበብሰ ፡ እምኀቤከ ፡ ይእቲ ፡ ሠረጸት ፡ ዘወሀበከ ፡ እግዚኣብሔር ፡ አምላከ ፡ እስራኤል ፤ እስመ ፡ ነኪር ፡ ለጥበብ ፡ ከመ ፡ ማኅቶት ፡ ለፀሐይ ፡ ዘኢይበቍዕ ፡ ወከመ ፡ ብሒእ ፡ ወዕጕስታር ፡ ለመዓር ፡ ኢይበቍዕ ፡ ከማሁ ፡ ነገሮሙ ፡ ለአብዳን ፡ በላዕለ ፡ ጠቢብ ፡ ኢይበቍዕ ፡ ከመ ፡ ጢስ ፡ ለዐይን ፡ ወከመ ፡ ቆዕ ፡ ለስነን ፡ ከማሁ ፡ ኢይበቍዕ ፡ በላዕለ ፡ ጠቢብ ፡ ነገረ ፡ አብዳን ፠ ፠ ፠