60. How Solomon Lamented for Zion
59. How the King Questioned an Egyptian, the Servant of Pharaoh / Kebra Nagast / 60. How Solomon Lamented for Zion 61. How Solomon Returned to Jerusalem

፷ ፡ ኀበ ፡ ላሐዋ ፡ ሰሎሞን ፡ ለጽዮን ።

 

ወቦአ ፡ ውስተ ፡ ኀይመቱ ፡ ወበከየ ፡ ብካየ ፡ መሪረ ፡ እንዘ ፡ ይብል ፡ እግዚኦ ፡ በመዋዕልየኑ ፡ ትነሥኣ ፡ ለታቦተ ፡ ኪዳንከ ፡ እምኔነ ፤ ባሕቱ ፡ እምቀደምከ ፡ ነሢአ ፡ ነፍስየ ፡ እምኔሃ ፡ ዘበመዋዕልየ ፡ ትነሥኣ ፡ እስመ ፡ አንተሰ ፡ ኢትሔሱ ፡ ቃልከ ፡ ወኢትዔምፅ ፡ ኪዳነከ ፡ ዘተካየድከ ፡ ምስለ ፡ አበዊነ ፤ ምስለ ፡ ኖኅ ፡ ገብርከ ፡ ዘዐቀባ ፡ ለጽድቅ ፡ ወምስለ ፡ አብርሃም ፡ ዘኢተዐደወ ፡ ትእዛዝከ ፡ ወምስለ ፡ ይስሐቅ ፡ ቍልዔከ ፡ ዘአንጽሐ ፡ ሥጋሁ ፡ እምርስሐተ ፡ ኀጢአት ፡ ወምስለ ፡ እስራኤል ፡ ቅዱስከ ፡ ዘአስተባዛኅከ ፡ በመንፈስ ፡ ቅዱስ ፡ ወሰመይኮ ፡ አሠረ ፡ ዚአከ ፤ እስራኤል ፤ ወምስለ ፡ ሙሴ ፡ ወአሮን ፡ ካህናቲከ ፡ እለ ፡ በመዋዕሊሆሙ ፡ አውረድካ ፡ ለታቦተ ፡ ሕግ ፡ እምሰማይ ፡ ዲበ ፡ ምድር ፡ ለደቂቀ ፡ ያዕቆብ ፡ ርስትከ ፡ ምስለ ፡ ሕግከ ፡ ወትእዛዝከ ፡ በአርአያ ፡ ሥርዐተ ፡ መላእክት ፤ እስመ ፡ አቅደምከ ፡ ሳርሮታ ፡ ለጽዮን ፡ ለማኅደረ ፡ ስብሐቲከ ፡ ውስተ ፡ ደብረ ፡ መቅደስከ ፡ ወበዳግምሰ ፡ ወሀብኮ ፡ ለሙሴ ፡ ከመ ፡ ያሰኒ ፡ ገቢሮታ ፡ በዲበ ፡ ምድር ፡ ወያንብራ ፡ ውስተ ፡ ደብተራ ፡ ዘስምዕ ፡ ከመ ፡ አንተኒ ፡ ትምጻእ ፡ ህየ ፡ እምደብረ ፡ መቅደስከ ፡ ወታስምዖሙ ፡ ቃልከ ፡ ከመ ፡ ይሖሩ ፡ በትእዛዝከ ። አእመርኩ ፡ ይእዜ ፡ ከመ ፡ ተሀየይከ ፡ ርስተከ ፡ እምነ ፡ እስራኤል ፡ ሕዝበከ ፤ ወእስከ ፡ ይእዜ ፡ ሀለወት ፡ ምስሌነ ፡ ወኢያሠነይነ ፡ ተግባራ ፡ ወበእንተዝ ፡ ተምዐዕከነ ፡ ወሜጥከ ፡ ገጸከ ፡ እምኔነ ፤ እግዚኦ ፡ ኢትነጽር ፡ ምግባረነ ፡ እኩየ ፡ አላ ፡ ነጽር ፡ ኂሩቶሙ ፡ ለአበዊነ ፡ ቀደምት ። አቡየ ፡ ዳዊት ፡ ገብርከ ፡ ፈቀደ ፡ ይሕንጽ ፡ ቤተ ፡ ለስምከ ፡ ሰሚዖ ፡ ቃለ ፡ ነቢይከ ፡ ዘይቤ ፡ አይኑ ፡ ቤት ፡ ለማኅደርየ ፡ ወአይኑ ፡ መካን ፡ ለምዕራፍየ ፡ አኮኑ ፡ እደዊየ ፡ ዘገብራ ፡ ዘኵሎ ፡ ይቤ ፡ እግዚኣብሔር ፡ ዘኵሎ ፡ ይመልክ ፤ ወዘንተ ፡ ሶበ ፡ ኀለየ ፡ ትቤሎ ፡ ኢይትከሀለከ ፡ ዘዘንተ ፡ ሐነጽከ ፡ አላ ፡ ዘወፅአ ፡ እምሐቌከ ፡ የሐንጽ ፡ ሊተ ። ወይእዜኒ ፡ እግዚአ ፡ ኢተሐሰወ ፡ ቃልከ ፡ ወሐነጽኩ ፡ ቤተከ ፡ እንዘ ፡ አንተ ፡ ረዳእየ ፤ ወሶበ ፡ ፈጸምኩ ፡ ሐኒጾ ፡ ቤትከ ፡ አባእክዋ ፡ ለታቦተ ፡ ኪዳን ፡ ውስቴታ ፡ ወሦዕኩ ፡ መሥዋዕተ ፡ ለሥላሴ ፡ ስምከ ፡ ቅዱስ ፡ ወሐወጽከ ፡ ውስቴታ ፤ ወመልአ ፡ ቤት ፡ ስብሐቲከ ፡ እንዘ ፡ ኵሉ ፡ ዓለም ፡ ምሉእ ፡ መለኮትከ ፡ ወተፈሣሕነ ፡ ሕዝብከ ፡ በነጽሮ ፡ ስብሐቲከ ፡ ውስቴታ ። ወእምአሜሃሰ ፡ ዮም ፡ ሣልሲት ፡ ዓመታ ፡ ወመሠጥካ ፡ ለብርሃንነ ፡ እምኔነ ፡ ከመ ፡ ታብርህ ፡ ለእለ ፡ ውስተ ፡ ጽልመት ፡ ነሠትካ ፡ ለክብርነ ፡ ከመ ፡ ታክብሮሙ ፡ ለኅሱራን ፡ አጥፋእከ ፡ ግርማነ ፡ ከመ ፡ ታግርሞ ፡ ለዘ ፡ ኢኮነ ፡ ግሩመ ፡ ነሠትካ ፡ ለሕይትነ ፡ ከመ ፡ ትሕንጾ ፡ ለዘ ፡ ርሕቀ ፡ ሕይወቱ ፡ እምኔከ ። አሌሊተ ፡ አሌሊተ ፡ እበኪ ፡ በእንተ ፡ ርእስየ ፡ ተንሥእ ፡ ዳዊት ፡ አቡየ ፡ ወብኪ ፡ ምስሌየ ፡ በእንተ ፡ እግዝእትነ ፡ እስመ ፡ ተሀየየነ ፡ እግዚኣብሔር ፡ ወነሥኣ ፡ ለእግዝእትነ ፡ እምደቂቅከ ፤ አሌሊተ ፡ አሌሊተ ፡ እስመ ፡ ተሀየየኒ ፡ ፀሐየ ፡ ጽድቅ ፤ አሌሊተ ፡ በእንተ ፡ ዘተሀየይነ ፡ ትእዛዘ ፡ አምላክነ ፡ ኮነ ፡ ኅሱራነ ፡ በዲበ ፡ ምድር ፡ ካህናትኒ ፡ ኢያሠነይነ ፡ ወነገሥትኒ ፡ ኢያርታዕነ ፡ ፍትሐ ፡ ለእጓለ ፡ ማውታ ፤ አሌለነ ፡ አሌለነ ፡ እስመ ፡ ኀለፈት ፡ ርትዕ ፡ እምኔነ ፡ ወተገሠጽነ ፤ አሌለነ ፡ ፍሥሓነ ፡ ተመይጠት ፡ ኀበ ፡ ጸላእትነ ፡ ወሞገስነ ፡ ተረስዐት ፡ እምላዕሌነ ፤ አሌለነ ፡ አሌለነ ፡ ተመጠወ ፡ ዘባንነ ፡ ለኲናተ ፡ ፀርነ ፤ አሌለነ ፡ አሌለነ ፡ ኮኑ ፡ ሕብልያ ፡ ደቂቅነ ፡ ወፄዋ ፡ ለእለ ፡ ይእዜ ፡ ነሐበልዮሙ ፡ ወንፄውዎሙ ፤ አሌለነ ፡ አሌለነ ፡ በከያ ፡ አቤራቲነ ፡ ወላሐዋ ፡ ደናግሊነ ፤ አሌለነ ፡ አሌለነ ፡ አውየዉ ፡ ርሡኣኒነ ፡ ወከልሑ ፡ ሕፃናቲነ ፤ አሌለነ ፡ አሌለነ ፡ አንብዓ ፡ አንስቲያነ ፡ ወማሰነት ፡ ሀገርነ ፤ አሌ ፡ ለነ ፡ አሌ ፡ ለነ ፡ እምዮም ፡ እስከ ፡ ተፍጻሜተ ፡ መዋዕሊነ ፡ ምስለ ፡ ደቂቅነ ፤ አሌለነ ፡ አሌለነ ፡ እስመ ፡ ተነሥተ ፡ ክብራ ፡ ለወለተ ፡ ጽዮን ፡ ክብርት ፡ ወዐብየ ፡ ክብራ ፡ ለወለተ ፡ ኢትዮጵያ ፡ ኅስርት ። ተምዕዐ ፡ እግዚኣብሔር ፡ ወመኑ ፡ ይሣሀል ፤ አስተራኰሰ ፡ እግዚኣብሔር ፡ ወመኑ ፡ ያነጽሕ ፤ መከረ ፡ እግዚኣብሔር ፡ ወመኑ ፡ ይትቃወማ ፡ ለምክሩ ፤ ፈቀደ ፡ እግዚኣብሔር ፡ ወመኑ ፡ የአብያ ፡ ለኅሊናሁ ፤ ይቤ ፡ እግዚኣብሔር ፡ ወኵሉ ፡ ይከውን ፤ አኅሰረ ፡ እግዚኣብሔር ፡ ወአልቦ ፡ ዘያከብር ፤ ነሥአ ፡ እግዚኣብሔር ፡ ወአልቦ ፡ ዘያገብእ ፤ ጸልአ ፡ እግዚኣብሔር ፡ ወአልቦ ፡ ዘያፈቅር ። አሌለነ ፡ እንዘ ፡ ክቡር ፡ ስምነ ፡ ዮምሰ ፡ ተመነነ ፡ ስምነ ፤ አሌለነ ፡ እንዘ ፡ ሰብአ ፡ ቤት ፡ ንሕነ ፡ ኮነ ፡ ሰብአ ፡ አፍአ ፡ እንዘ ፡ ሰብአ ፡ ውስጥ ፡ ንሕነ ፡ ተሰደድነ ፡ በኀጢአትነ ። እስመ ፡ እግዚኣብሔር ፡ ያፈቅር ፡ ንጽሐ ፡ ካህናትኒ ፡ አበይዋ ፡ ለንጽሕ ፡ ወአፍቀርዋ ፡ ለርኵስ ፤ ወነቢያትኒ ፡ ገሠጹነ ፡ ወኢተገሠጽነ ፡ ወአስምዑነ ፡ ወኢሰማዕነ ፤ አሌለነ ፡ በኀጢአትነ ፡ ተመነነ ፡ በኀሳርነ ፡ ተቀሠፍነ ። መንግሥትኒ ፡ ኢይበቍዕ ፡ ዘእንበለ ፡ ንጽሕ ፡ ወፍትሕኒ ፡ ኢይበቍዕ ፡ ዘእንበለ ፡ ርትዕ ፡ ወብዕልኒ ፡ ኢይበቍዕ ፡ ዘእንበለ ፡ ፍርሀተ ፡ እግዚኣብሔር ፤ ካህናትኒ ፡ አፍቀሩ ፡ ነገረ ፡ ዘውዕ ፡ እምነገረ ፡ መጻሕፍት ፡ ወአፍቀሩ ፡ ቃለ ፡ መሰንቆ ፡ እምቃለ ፡ መዝሙር ፡ ወአፍቀሩ ፡ ግብረ ፡ ዓለም ፡ እምጸሎት ፡ ወአፍቀሩ ፡ ቅሥተ ፡ ዓለም ፡ እምቃለ ፡ መለኮት ፡ ወአፍቀሩ ፡ ሰሐቀ ፡ ወዝሙተ ፡ እምብካየ ፡ ሕይወት ፡ ወአፍቀሩ ፡ መብልዐ ፡ ኀላፊተ ፡ እምጸዊም ፡ ለእግዚኣብሔር ፡ ወአፍቀሩ ፡ መስቴ ፡ ወስካረ ፡ እምሠዊዕ ፡ ለእግዚኣብሔር ፡ ወአፍቀሩ ፡ ሀኬተ ፡ እምስእለት ፡ ወአፍቀሩ ፡ ንዋየ ፡ እምነ ፡ ምጽወት ፡ ወአፍቀሩ ፡ ንዋመ ፡ እምስብሐት ፡ ወአፍቀሩ ፡ ነዛህላለ ፡ እምንቃህ ። አሌለነ ፡ አሌለነ ፡ ነገሥትኒ ፡ ተሀከይነ ፡ እምነ ፡ ትእዛዘ ፡ እግዚኣብሔር ፡ ወአፍቀርነ ፡ ነገረ ፡ መስተዛውዓን ፡ እምቃለ ፡ ካህናት ፡ ወገጸ ፡ አንስቲያነ ፡ ንፈቅድ ፡ ነጽሮ ፡ እምኀሢሠ ፡ ገጸ ፡ እግዚኣብሔር ፡ በንስሓ ፡ ወአፍቀርነ ፡ ነጽሮ ፡ ሕፃናቲነ ፡ እምሰሚዐ ፡ ቃለ ፡ እግዚኣብሔር ፡ ወአፍቀርነ ፡ ተናዝዞ ፡ በእብነ ፡ ሰርድዮን ፡ እምአርትዖ ፡ ፍትሕ ፡ ለእጓለ ፡ ማውታ ፡ ወአፍቀርነ ፡ ነጽሮ ፡ ክብርነ ፡ እምሰሚዐ ፡ ቃለ ፡ እግዚኣብሔር ፡ ወአፍቀርነ ፡ ነገረ ፡ በክ ፡ እምቃለ ፡ ማእምራን ፡ ወአፍቀርነ ፡ ነገረ ፡ እቡዳን ፡ እምነ ፡ ሰሚዐ ፡ ነገረ ፡ ነቢያት ። አሌለነ ፡ በፈቃድነ ፡ አርኰስና ፡ ለሕይወትነ ፤ አሌለነ ፡ እስመ ፡ ዘያፈቅር ፡ እግዚኣብሔር ፡ ንስሓ ፡ ወምሕረተ ፡ ኢገበርነ ፤ አሌለነ ፡ ወሀበነ ፡ ክብረ ፡ ወበእበድነ ፡ ገደፍነ ፡ አጥበበነ ፡ ፈድፋደ ፡ ወበፈቃድነ ፡ አበድነ ፡ እምነ ፡ እንስሳ ፡ ወሀበነ ፡ ብዕለ ፡ ወአንደይነ ፡ ርእስነ ፡ እምጽዋት ። ነጸርነ ፡ አፍራሲነ ፡ ወረሳዕነ ፡ ምግባኢነ ፤ አፍቀርነ ፡ ኀላፊተ ፡ ወኢያእመርና ፡ ለነባሪት ፤ ረሰይነ ፡ መዋዕሊነ ፡ ተቀጽቦ ፡ ለሕይወትነ ፡ ወአብደርነ ፡ ተድላ ፡ ሲሲትነ ፡ ዘይከውን ፡ አደፈ ፡ እመብልዐ ፡ ሕይወት ፡ ዘይነብር ፡ ለዓለም ፡ ወቀጠንተ ፡ አልባስ ፡ ዘኢይበቍዕ ፡ ለነፍስ ፡ ወአእተትነ ፡ ልብሰ ፡ ግርማ ፡ ዘለዓለም ፤ ወመኳንንቲነኒ ፡ ወእሕዛብ ፡ ይገብሩ ፡ ዘይጸልእ ፡ እግዚኣብሔር ፡ ወኢያፍቀሩ ፡ ዘያፈቅር ፡ እግዚኣብሔር ፡ ፍቅረ ፡ ቢጾሙ ፡ ወትሕትና ፡ ወየውሀተ ፡ ወምሒረ ፡ ነዳይ ፡ ወትዕግሥተ ፡ ወአፍቅሮ ፡ ቤተ ፡ እግዚኣብሔር ፡ ወሰጊድ ፡ ለወልድ ፤ ወዘይጸልእሰ ፡ እግዚኣብሔር ፡ ተጠይሮ ፡ ወአጣዕዎ ፡ ወሐቲተ ፡ ማሪት ፡ ወመቃስም ፡ ወሰገል ፡ ወጽንጽንያ ፡ ወአቀሪኖ ፡ ወብትክ ፡ ወማውታ ፡ ወስርቅ ፡ ወዐመፃ ፡ ወዝሙት ፡ ወተቃንኦ ፡ ወሐቢል ፡ ወስታይ ፡ ወስካር ፡ ወማሕላ ፡ በሐሰት ፡ ለቢጾሙ ፡ ወስምዐ ፡ ሐሰት ፡ ላዕለ ፡ ቢጾሙ ፡ ዘንተ ፡ ኵሎ ፡ ይገብሩ ፡ ዘይጸልእ ፡ እግዚኣብሔር ። ወበእንተ ፡ ዝንቱኬ ፡ ዘነሥኣ ፡ እግዚኣብሔር ፡ ለታቦተ ፡ ኪዳኑ ፡ እምኔነ ፡ ወወሀባ ፡ ለሕዝብ ፡ እለ ፡ ይገብሩ ፡ ፈቃዶ ፡ ወሕጎ ፡ ወሥርዐቶ ፤ ሜጠ ፡ ገጾ ፡ እምኔነ ፡ ወአብርሀ ፡ ገጾ ፡ ላዕሌሆሙ ፡ ተሀየየ ፡ ኪያነ ፡ ወአፍቀረ ፡ ከያሆሙ ፡ መሐረ ፡ ኪያሆሙ ፡ ወአጥፍአ ፡ ኪያነ ፡ በእንተ ፡ ዘነሥኣ ፡ ለታቦተ ፡ ኪዳኑ ፡ እምኔነ ። እስመ ፡ መሐለ ፡ ማሕላ ፡ በርእሱ ፡ ከመ ፡ ኢይከልእ ፡ ክረምተ ፡ ወሐጋየ ፡ ዘርአ ፡ ወማእረረ ፡ ፍሬ ፡ ወተግባረ ፡ ፀሐየ ፡ ወወርኀ ፡ እንዘ ፡ ሀለወት ፡ ጽዮን ፡ ዲበ ፡ ምድር ፡ ወከመ ፡ ኢይትመዐዕ ፡ ለሰማይ ፡ ወምድር ፡ ኢበአይኅ ፡ ወኢበእሳት ፡ ወከመ ፡ ኢያጠፍእ ፡ ሰብአ ፡ ወእንስሳ ፡ ወአራዊተ ፡ አላ ፡ ዳእሙ ፡ ከመ ፡ ይምሐር ፡ ተግባረ ፡ እደዊሁ ፡ ወከመ ፡ ያብዝኅ ፡ ምሕረቶ ፡ ላዕለ ፡ ልሕኵቱ ፤ ወአመ ፡ ይነሥኣ ፡ እግዚኣብሔር ፡ ለታቦተ ፡ ኪዳኑ ፡ አሜሃ ፡ ያጠፍኦሙ ፡ ለሰማያት ፡ ወምድር ፡ ወለኵሉ ፡ ተግባሩ ፤ ወዮምኒ ፡ እስመ ፡ ተሀየየነ ፡ እግዚኣብሔር ፡ ወነሥኣ ፡ እምኔነ ፡ ለታቦተ ፡ ሕጉ ፠ ወዘንተ ፡ እንዘ ፡ ይብል ፡ ኢያዐርፍ ፡ ብካየ ፡ ወአንብዐ ፡ እምአዕይንቲሁ ። ወአውሥአ ፡ መንፈሰ ፡ ትንቢት ፡ እንዘ ፡ ይብሎ ፡ ለምንት ፡ ከመዝ ፡ ተሐዝን ፡ እስመ ፡ በፈቃደ ፡ እግዚኣብሔር ፡ ኮነ ፡ ዝንቱ ፡ ወይእቲኒ ፡ አኮ ፡ ለባዕድ ፡ ዘተውህበት ፡ አላ ፡ ለወልድከ ፡ ቀዳሜ ፡ በኵርከ ፡ ዘይነብር ፡ ዲበ ፡ መንበረ ፡ ዳዊት ፡ አቡከ ፤ እስመ ፡ መሐለ ፡ እግዚኣብሔር ፡ ለዳዊት ፡ በጽድቅ ፡ ወኢይኔስሕ ፡ ከመ ፡ እምፍሬ ፡ ከርሡ ፡ ያነብር ፡ ዲበ ፡ መንበሩ ፡ እስከ ፡ ለዓለም ፡ በውስተ ፡ ታቦተ ፡ ኪዳኑ ፡ ጽዮን ፡ ቅድስት ፤ ወእሬስዮ ፡ ልዑለ ፡ እምነገሥተ ፡ ምድር ፡ ወመንበሮሂ ፡ ከመ ፡ መዋዕለ ፡ ሰማይ ፡ ወከመ ፡ ሥርዐተ ፡ ወርኅ ፡ እስከ ፡ ለዓለም ፤ ወበሰማያትኒ ፡ ዘይነብር ፡ ዲበ ፡ መንበረ ፡ መለኮት ፡ በሥጋ ፡ ይኴንን ፡ ሕያዋነ ፡ ወሙታነ ፡ እስከ ፡ ለዓለም ፡ ወይገንዩ ፡ ሎቱ ፡ መላእክት ፡ ወሰብእ ፡ ወይሴብሖ ፡ ኵሉ ፡ ልሳን ፡ ወይሰግዱ ፡ ሎቱ ፡ ኵሉ ፡ ብርክ ፡ በቀላያት ፡ ወበአፍላግ ፤ ወበዝንቱ ፡ ተናዘዝ ፡ ወግባእ ፡ ቤትከ ፡ ወኢታሕዝን ፡ ልብከ ፡ ፍጹመ ። ወበዝንቱ ፡ ተናዘዘ ፡ ወይቤ ፡ ይኩን ፡ ፈቃዱ ፡ ለእግዚኣብሔር ፡ ወአኮ ፡ ፈቃደ ፡ ሰብእ ። ወካዕበ ፡ አስተርአዮ ፡ መልአከ ፡ እግዚኣብሔር ፡ ገሃደ ፡ ወይቤሎ ፡ ወአንተሰ ፡ ሐነጽከ ፡ ቤተ ፡ እግዚኣብሔር ፡ ወትከውነከ ፡ ምክሐ ፡ ይእቲ ፡ ወምስማከ ፡ ለእመ ፡ ዐቀብከ ፡ ትእዛዞ ፡ ወኢያምለከ ፡ ባዕደ ፡ አማልክተ ፡ ትትፈቀር ፡ በኀበ ፡ እግዚኣብሔር ፡ ከመ ፡ ዳዊት ፡ አቡከ ፠ ፠ ፠