59. How the King Questioned an Egyptian, the Servant of Pharaoh
58. How Solomon Rose up to Slay them / Kebra Nagast / 59. How the King Questioned an Egyptian, the Servant of Pharaoh 60. How Solomon Lamented for Zion

፶፱ ፡ ኀበ ፡ ሐተቶ ፡ ለግብጻዊ ፡ ገብረ ፡ ፈርዖን ።

 

ወኀለፈ ፡ እምህየ ፡ ወረከበ ፡ ፩ ፡ መኰንነ ፡ እመኳንንተ ፡ ግብጽ ፡ ዘንጉሥ ፡ ፈርዖን ፡ ዘለአኮ ፡ ኀቤሁ ፡ ምስለ ፡ አምኃ ፡ ወምሉእ ፡ ንዋይ ፡ ምስሌሁ ፡ ወበጽሐ ፡ ወሰገደ ፡ ለንጉሥ ። ወአፍጠኖ ፡ ሐቲተ ፡ ሰሎሞን ፡ ንጉሥ ፡ ዘእንበለ ፡ የሀብ ፡ አምኃሁ ፡ ወመልእክቶ ፡ ወይቤሎ ፡ ቦኑ ፡ ዘርኢከ ፡ ሰብአ ፡ ኢትዮጵያ ፡ እንዘ ፡ ይግዕዙ ፡ እምህየ ። ወአውሥአ ፡ ወይቤሎ ፡ መልአከ ፡ ፈርዖን ፡ ለንጉሥ ፡ ሕያው ፡ አንተ ፡ ንጉሥ ፡ ለዓለም ፤ ለአከኒ ፡ እግዚእየ ፡ ንጉሥ ፡ ፈርዖን ፡ እምእስክንድርያ ፡ ኀቤከ ፡ ወነዋ ፡ ኣየድዐከ ፡ ዘከመ ፡ መጻእኩ ፤ ወሶበ ፡ መጻእኩ ፡ እምእስክንድርያ ፡ ቦእኩ ፡ ቃህራ ፡ ውስተ ፡ ሀገሩ ፡ ለንጉሥ ፡ ወበብጽሐትየ ፡ በጽሑ ፡ ህየ ፡ እሉ ፡ ሰብአ ፡ ኢትዮጵያ ፡ ዘትብል ፤ በጽሑ ፡ እንተ ፡ ኀለፈት ፡ ሠሉስ ፡ ውስተ ፡ ተከዚ ፡ ፈለገ ፡ ምስር ፡ እንዘ ፡ ይነፍሑ ፡ በዕንዚራት ፡ ወይረውጹ ፡ በሰረገላት ፡ ከመ ፡ ኀይለ ፡ ሰማያዊያን ፤ ወእለ ፡ ርእይዎሙ ፡ ይቤልዎሙ ፡ እሉሰ ፡ እንዘ ፡ መሬታዊያን ፡ ኮኑ ፡ ሰማያዊያን ፡ መኑኬ ፡ ይጠብብ ፡ እምሰሎሞን ፡ ንጉሠ ፡ ይሁዳ ፡ ወውእቱኒ ፡ ኢሖረ ፡ በሰረገላ ፡ ነፋስ ፡ ከመዝ ፤ ወእለ ፡ ሀለዉ ፡ ውስተ ፡ አህጉር ፡ ወማኅፈድ ፡ ስምዐ ፡ ኮኑ ፡ ከመ ፡ ሶበ ፡ ቦኡ ፡ እሉ ፡ ውስተ ፡ ብሔረ ፡ ግብጽ ፡ ወድቁ ፡ ወተሰብሩ ፡ አማልክቲነ ፡ ወአማልክተ ፡ ንጉሥ ፡ ወማኅፈደ ፡ ጣዖታትኒ ፡ ከማሁ ፡ ተቀጥቀጡ ፤ ወሐተቱ ፡ ገነውተ ፡ አማልክት ፡ ማርያነ ፡ ግብጽ ፡ በእንተ ፡ ዘወድቁ ፡ አማልክቲነ ፡ ወይቤሉነ ፡ ታቦተ ፡ አምላከ ፡ እስራኤል ፡ እንተ ፡ ወረደት ፡ እምሰማይ ፡ ሀለወት ፡ ምስሌሆሙ ፡ ወትነብር ፡ ውስተ ፡ ሀገሮሙ ፡ እስከ ፡ ለዓለም ፤ ወበእንተዝኬ ፡ ሶበ ፡ ትበውእ ፡ ብሔረ ፡ ግብጽ ፡ ተቀጥቀጡ ፡ አማልክቲነ ፤ ወአንተሰ ፡ ኦንጉሥ ፡ አልቦ ፡ ዘይመስላ ፡ ለጥበብከ ፡ እምታሕተ ፡ ሰማይ ፡ ወለምንት ፡ ወሀብከ ፡ ታቦተ ፡ ሕጉ ፡ ለእግዚኣብሔር ፡ አምላክከ ፡ ዘአንጽሑ ፡ ለከ ፡ አበዊከ ፤ እስመ ፡ ንሰምዕ ፡ ከመ ፡ ይእቲ ፡ ታድኅነክሙ ፡ እምእደ ፡ ፀርክሙ ፡ ወመንፈሰ ፡ ትንቢትኒ ፡ ባቲ ፡ ይትናገረክሙ ፡ ወአምላከ ፡ ሰማይኒአ ፡ የኀድር ፡ ውስቴታ ፡ በመንፈሱ ፡ ቅዱስ ፡ ወትሰመዩ ፡ ሰብአ ፡ ቤቱ ፡ ለእግዚኣብሔር ፤ ወለምንት ፡ ዘወሀብክሙ ፡ ክብርክሙ ፡ ለባዕድ ። አውሥአ ፡ በጥበብ ፡ ሰሎሞን ፡ ወይቤ ፡ በአይቴ ፡ ይክል ፡ ነሢኦታ ፡ ለእግዝእትነ ፡ እስመ ፡ ሀለወት ፡ ኀቤነ ፠ ፠ ፠