58. How Solomon Rose up to Slay them
57. Concerning the Fall of Zadok the Priest / Kebra Nagast / 58. How Solomon Rose up to Slay them 59. How the King Questioned an Egyptian, the Servant of Pharaoh

፶፰ ፡ ኀበ ፡ ተንሥአ ፡ ሰሎሞን ፡ ይቅትሎሙ ።

 

ከመዝ ፡ ተናገረ ፡ ንጉሥ ፡ ሰሎሞን ፡ ወተንሥአ ፡ በመዐት ፡ ወሖረ ፡ ከመ ፡ ይኅሥሦሙ ፤ ወሶበ ፡ ተንሥኡ ፡ ንጉሥ ፡ ወመኳንንቲሁ ፡ ወኀያላኒሁ ፡ ተጋብኡ ፡ አእሩገ ፡ እስራኤል ፡ ውስተ ፡ ቤተ ፡ እግዚኣብሔር ፡ ምስለ ፡ አቤራት ፡ ወደናግል ፡ ወበከዩ ፡ በእንተ ፡ ጽዮን ፡ እስመ ፡ ተነሥአት ፡ እምኔሆሙ ፡ ታቦተ ፡ ሕጉ ፡ ለእግዚኣብሔር ። ወለሰዶቅኒ ፡ እስመ ፡ ገብአ ፡ ልቡ ፡ እምድኅረ ፡ ጕንዱይ ፡ ሰዐት ። ወእምዝ ፡ አዘዘ ፡ ንጉሥ ፡ ከመ ፡ ይሐሩ ፡ ይምነ ፡ ወፅግመ ፡ ከመ ፡ እመቦ ፡ ከመ ፡ ይትገሐሡ ፡ እምፍርሀተ ፡ ስርቅ ፤ ወለሊሁሰ ፡ ንጉሥ ፡ ተንሥአ ፡ በአሠረ ፡ ፍኖቶሙ ፡ ለሰብአ ፡ ኢትዮጵያ ፡ ወፈነወ ፡ መባርዲን ፤ ሰብአ ፡ አፍራስ ፤ ከመ ፡ ያእምሩ ፡ ኀበ ፡ ሀለዉ ፡ ወይግብኡ ፡ ወይንግርዎ ። ወሖሩ ፡ ወበጽሑ ፡ ሀገረ ፡ ምስር ፡ ኀበ ፡ ተዐየኑ ፡ ህየ ፡ ሰብአ ፡ ኢትዮጵያ ፡ ምስለ ፡ ንጉሦሙ ፡ ወኀበሂ ፡ ተሰለምዋ ፡ ለጽዮን ፤ ወተፈሥሑ ፡ ወሐተቱ ፡ ኪያሆሙ ፡ ሐራ ፡ ንጉሥ ፡ ወይቤልዎሙ ፡ ሰብአ ፡ ብሔረ ፡ ግብጽ ፤ እምርሑቅ ፡ መዋዕል ፡ በዝየ ፡ ኀለፉ ፡ ሰብአ ፡ ኢትዮጵያ ፡ እንዘ ፡ ይረውጹ ፡ በሰረገላ ፡ ከመ ፡ መላእክት ፡ ወይቀልሉ ፡ እምነ ፡ አንስርት ፡ በውስተ ፡ ሰማይ ፤ ወይቤልዎሙ ፡ ማእዜ ፡ ዕለት ፡ ኀለፉ ፡ እምኔክሙ ፤ ወይቤልዎሙ ፡ ዮም ፡ ተሱዕ ፡ መዋዕል ፡ በዘ ፡ ኀለፉ ፡ እምኔነ ። ወቦ ፡ እምኔሆሙ ፡ እለ ፡ ገብኡ ፡ ወነገርዎ ፡ ለንጉሥ ፡ ሰሎሞን ፡ ከመ ፡ ኀለፉ ፡ ተሱዐ ፡ መዋዕል ፡ እምዘ ፡ ኀለፉ ፡ እምስር ፤ ወአብያጺነሰ ፡ ሖሩ ፡ ከመ ፡ ይኅሥሡ ፡ እስከ ፡ ባሕረ ፡ ኢርትራ ፡ ወንሕነሰ ፡ ገባእነ ፡ ከመ ፡ ንንግርከ ፡ ዘንተ ፤ እስኩ ፡ ኀሊ ፡ ለሊከ ፡ ንጉሥ ፡ በዕለተ ፡ ሰኑይ ፡ እምከመ ፡ ወፅኡ ፡ እምኀቤከ ፡ በጽሑ ፡ በሠለስ ፡ ኀበ ፡ ፈለገ ፡ ተከዚ ፡ ሀገረ ፡ ምስር ፤ ወለነኒ ፡ ሶበ ፡ ፈነውከነ ፡ እምኢየሩሳሌም ፡ በጻሕነ ፡ በዕለተ ፡ ሰንበት ፡ ወገባእነ ፡ ኀቤከ ፡ ዮም ፡ በዕለተ ፡ ራብዕ ፤ ኀሊኬ ፡ በጥበብ ፡ መጠነ ፡ ይበጽሑ ፡ እሙንቱ ፡ ሰብእ ። ወተምዐ ፡ ንጉሥ ፡ ወይቤ ፡ አኀዝዎሙ ፡ ኀምስቲሆሙ ፡ እስከ ፡ ንረክብ ፡ ጽድቀ ፡ ቃሎሙ ፠ ወአፍጠኑ ፡ ሐዊረ ፡ ንጉሥ ፡ ወሰራዊቱ ፡ ወበጽሑ ፡ ጋዛ ፡ ወተስእሎሙ ፡ ወይቤሎሙ ፡ ማእዜ ፡ ኀለፈ ፡ ወልድየ ፡ እምኔክሙ ። አውሥኡ ፡ ወይቤሉ ፡ ኀለፈ ፡ ይእቲ ፡ ሠሉስ ፡ ዕለት ፤ ወሶበ ፡ ጸዐኑ ፡ ሰረገላቲሆሙ ፡ አልቦ ፡ ዘየሐውር ፡ መልዕልተ ፡ ምድር ፡ አላ ፡ በሰረገላ ፡ ስቁላን ፡ መልዕልተ ፡ ነፋስ ፡ ወይቀልሉ ፡ እምነ ፡ አንስርት ፡ ዘውስተ ፡ ሰማይ ፡ ወኵሉ ፡ ንዋዮሙ ፡ የሐውር ፡ ምስሌሆሙ ፡ መልዕልተ ፡ ነፋስ ፡ በሰረገላ ፤ ወለነሰ ፡ መሰለነ ፡ ዘአንተ ፡ ረሰይከ ፡ ሎሙ ፡ በጥበብከ ፡ ከመ ፡ ይሖሩ ፡ በሰረገላ ፡ መልዕልተ ፡ ነፋስ ። ወይቤሎሙ ፡ ቦኑ ፡ ዘሀለወት ፡ ጽዮን ፡ ታቦተ ፡ ሕጉ ፡ ለእግዚኣብሔር ፡ ምስሌሆሙ ፤ ወይቤልዎ ፡ አልቦ ፡ ዘርኢነ ፠