56. Of the Return of Zadok the Priest, and the giving of the Gif
55. How the People of Ethiopia Rejoiced / Kebra Nagast / 56. Of the Return of Zadok the Priest, and the giving of the Gif 57. Concerning the Fall of Zadok the Priest

፶፮ ፡ በእንተ ፡ ግብአተ ፡ ሳዶቅ ፡ ካህን ፡ ውሂቦ ፡ ሞፃ ።

 

ወሶበ ፡ ገብአ ፡ ሳዶቅ ፡ ካህን ፡ ኀበ ፡ ሰሎሞን ፡ ንጉሥ ፡ ወረከቦ ፡ እንዘ ፡ ይቴክዝ ፡ አውሥኦ ፡ ንጉሥ ፡ ለሳዶቅ ፡ ካህን ፡ ወይቤሎ ፡ አመ ፡ ትመጽእ ፡ ንግሥት ፡ አስተርአየኒ ፡ ከመዝ ፡ በሌሊት ፡ ከመ ፡ ዘእቀውም ፡ ውስተ ፡ ቀመራ ፡ ለኢየሩሳሌም ፡ ወረደ ፡ ፀሐይ ፡ እምሰማይ ፡ ውስተ ፡ ብሔረ ፡ ይሁዳ ፡ ወአብርሃ ፡ ፈድፋደ ፡ ወጐንዲያ ፡ ዐረበት ፡ ወአብርሀት ፡ ለብሔረ ፡ ኢትዮጵያ ፡ ወኢገብአት ፡ ዳግመ ፡ ውስተ ፡ ብሔረ ፡ ይሁዳ ፤ ወካዕበ ፡ ወረደ ፡ ፀሐይ ፡ እምሰማይ ፡ ውስተ ፡ ብሔረ ፡ ይሁዳ ፡ ወአብርሃ ፡ ፈድፋደ ፡ እምቀዲሙ ፡ ወተሀየይዎ ፡ እስራኤል ፡ ወፈቀዱ ፡ ይድፍኑ ፡ ብርሃኖ ፡ ወሠረቀ ፡ እንተ ፡ መትሕተ ፡ ምድር ፡ እንተ ፡ እምኀበ ፡ ኢተሐዘብዎ ፡ ወአብርሃ ፡ ለብሔረ ፡ ሮሜ ፡ ወለብሔረ ፡ ኢትዮጵያ ፡ ወእምድኅሬሁ ፡ ለኵሎሙ ፡ እለ ፡ አምኑ ፡ ቦቱ ። ወአውሥአ ፡ ሳዶቅ ፡ ካህን ፡ ወይቤ ፡ እግዚእየ ፡ ለምንት ፡ ዘኢነገርከኒ ፡ ቀዲሙ ፡ ዘከመዝ ፡ አርአያ ፡ ዘርኢከ ፤ አርዐድከኒ ፡ ለብረክየ ፡ አሌለነ ፡ ደቂቅነ ፡ ለእመ ፡ ነሥእዋ ፡ ለእግዝእትነ ፡ ጽዮን ፡ ቅድስት ፡ ሰማያዊት ፡ ታቦተ ፡ ሕጉ ፡ ለእግዚኣብሔር ። ወአውሥአ ፡ ንጉሥ ፡ ወይቤሎ ፡ ተረስዐ ፡ ጥበብነ ፡ ወተደፍነ ፡ ኅሊናነ ፤ በአማን ፡ አምሳሊሃ ፡ ለፀሐይ ፡ ጽዮን ፡ ቅድስት ፡ ዘአስተርአየኒ ፡ አሜሃ ፡ እንዘ ፡ ሀሎኩ ፡ ንዉምየ ፡ ምስለ ፡ ንግሥተ ፡ ኢትዮጵያ ፤ ወባሕቱ ፡ ንግረኒ ፡ እስኩ ፡ ትማልም ፡ ሶበ ፡ ትነሥእ ፡ ልብሳ ፡ ተውንያ ፡ ዘቃማ ፡ እምላዕሌሃ ፡ ለጽዮን ፡ ኢጠየቀኑ ፡ ህላዌሃ ። አውሥአ ፡ ሰዶቅ ፡ ወይቤ ፡ አልቦ ፡ እግዚኦ ፡ እስመ ፡ ፫ ፡ ልብስ ፡ በኀቤሃ ፡ ነሣእኩ ፡ እንተ ፡ ላዕሌሃ ፡ ወአልበስክዋ ፡ እንተ ፡ ወሀብከኒ ፡ ወአምጻእኩ ፡ ኀቤከ ። ወይቤሎ ፡ ሖርኬ ፡ እፍጥን ፡ ነጽሮታ ፡ ለእግዝእትነ ፡ ወርእያ ፡ ጥዩቀ ። ወነሥአ ፡ መራኁተ ፡ ሰዶቅ ፡ ካህን ፡ ወሖረ ፡ ወፈትሐ ፡ ኀዋኅወ ፡ ቤተ ፡ መቅደስ ፡ ወአፍጠነ ፡ ነጽሮ ፡ ወኀሢሠ ፡ ወአልቦ ፡ ዘረከበ ፡ ዘእንበለ ፡ ዕፀወ ፡ ለውሕ ፡ ጥጉዓን ፡ በአረፍተ ፡ ምንባሪሃ ፡ ለጽዮን ፡ ዘአስተማሰለ ፡ አዛርያስ ፠ ፠ ፠