55. How the People of Ethiopia Rejoiced
54. How David [the King of Ethiopia] Prophesied and Saluted Zion / Kebra Nagast / 55. How the People of Ethiopia Rejoiced 56. Of the Return of Zadok the Priest, and the giving of the Gif

፶፭ ፡ በእንተ ፡ ዘተፈሥሑ ፡ ሰብአ ፡ ኢትዮጵያ ።

 

ወአኀዙ ፡ ዕንዚራተ ፡ ወነፍኁ ፡ ቀርነ ፡ ወከበሮ ፡ ወብዕዛ ፡ ወበቃለ ፡ ማሕሌቶሙ ፡ ወፍሥሓሆሙ ፡ ተሀውከት ፡ ወደምፀት ፡ ፈለገ ፡ ግብጽ ፡ ወኀብሩ ፡ ምስሌሆሙ ፡ ውውዓ ፡ ወማሕሌት ፤ ወወድቁ ፡ ጣዖታቲሆሙ ፡ ዘገብሩ ፡ በእደዊሆሙ ፡ አምሳለ ፡ ሰብእ ፡ ወከልብ ፡ ወድመት ፡ ወዓዳ ፡ ማኅፈደ ፡ ነዋኃት ፡ ወእለ ፡ ምስሌሆሙ ፡ አምሳለ ፡ አንስርት ፡ ዘወርቅ ፡ ወብሩር ፡ ወድቁ ፡ ወተቀጥቀጡ ፤ እስመ ፡ ከመ ፡ ፀሐይ ፡ ታበርህ ፡ ወእምግርማሃ ፡ ይደነግፁ ፤ ወአልበስዋ ፡ አልባሲሃ ፡ ወጾሩ ፡ ሞጻሃ ፡ ቅድሜሃ ፡ ወአንበርዋ ፡ ዲበ ፡ ሰረገላ ፡ ነጺፎሙ ፡ ሜላተ ፡ ታሕቴሃ ፡ ወፀፊሮሙ ፡ ሜላተ ፡ በመልዕልቴሃ ፡ ወይሔልዩ ፡ ማሕሌተ ፡ በቅድሜሃ ፡ ወበድኅሬሃ ። ወተንሥኡ ፡ ሰረገላትኒ ፡ ከመ ፡ ቀዲሙ ፡ ወጌሡ ፡ በጽባሕ ፡ እንዘ ፡ ይሔልዩ ፡ ላቲ ፡ ወተላዐሉ ፡ ኵሎሙ ፡ መጠነ ፡ እመት ፤ እንዘ ፡ ያስተፋንውዎሙ ፡ ሰብአ ፡ ብሔረ ፡ ግብጽ ፡ ኀለፉ ፡ በቅድሜሆሙ ፡ ከመ ፡ ጽላሎት ፡ ወሰገዱ ፡ ሎሙ ፡ ሰብአ ፡ ብሔረ ፡ ግብጽ ፡ እስመ ፡ ርእይዋ ፡ እንዘ ፡ ትረውጽ ፡ ከመ ፡ ፀሐይ ፡ በውስተ ፡ ሰማይ ፤ ወኵሎሙ ፡ ይረውጹ ፡ በሰረገላ ፡ እንዘ ፡ ይረውጹ ፡ በቅድሜሃ ፡ ወበድኅሬሃ ። ወበጽሑ ፡ ባሕረ ፡ አልአሕመር ፡ እንተ ፡ ይእቲ ፡ ባሕረ ፡ ኢርትራ ፡ እንተ ፡ ተሠጥቀት ፡ በእደ ፡ ሙሴ ፡ ወኬዱ ፡ ደቂቀ ፡ እስራኤል ፡ ውስተ ፡ መዓምቅቲሃ ፡ ዐቀበ ፡ ወቍልቍለ ፡ እስመ ፡ ኢተውህበት ፡ አሜሃ ፡ ለሙሴ ፡ ታቦተ ፡ ሕጉ ፡ ለእግዚኣብሔር ፡ ወበእንተዝ ፡ ጠግዐ ፡ ማይ ፡ አረፍት ፡ በይምን ፡ ወአረፍት ፡ በፅግም ፡ ወአኅለፎሙ ፡ ለእስራኤል ፡ ምስለ ፡ እንስሳሆሙ ፡ ወደቂቆሙ ፡ ወአንስቲያሆሙ ፤ ወእምድኅረ ፡ ዐደዉ ፡ ባሕረ ፡ ተናገሮ ፡ እግዚኣብሔር ፡ ወወሀቦ ፡ ታቦተ ፡ ኪዳን ፡ ምስለ ፡ መጽሐፈ ፡ ሕግ ። ወሶበ ፡ ተዐዱ ፡ ጽዮን ፡ ቅድስት ፡ ምስለ ፡ እሊአሃ ፡ አሜሃ ፡ እንተ ፡ ኀቤሃ ፡ እንዘ ፡ ይሔልዩ ፡ ማሕሌተ ፡ በመሰንቆ ፡ ወበዕንዚራት ፡ ባሕርኒ ፡ ተቀበለቶሙ ፡ እንዘ ፡ ታንፈርዕጽ ፡ መዋግዲሃ ፡ ከመ ፡ ሶበ ፡ ይትበተኩ ፡ አድባር ፡ ነዋኃት ፡ ወከመ ፡ ድምፀ ፡ አንበሳ ፡ ዘይጥሕር ፡ ከማሁ ፡ በገንሕ ፡ ትደምፅ ፡ ወከመ ፡ ነጐድጓደ ፡ ክረምተ ፡ ደማስቆ ፡ ወኢትዮጵያ ፡ ሶበ ፡ ይዘብጦሙ ፡ መብረቅ ፡ ለደመናት ፡ ከማሁ ፡ ታንጐደጕድ ፡ ወኀብረ ፡ ነጐድጓድ ፡ ምስለ ፡ ዕንዚራት ፡ ወሰገደት ፡ ላቲ ፡ ባሕርኒ ፤ ወእንዘ ፡ ይትሀወክ ፡ መዋግዲሃ ፡ ከመ ፡ አድባር ፡ ተለዐለ ፡ ሰረገላቲሆሙ ፡ መልዕልተ ፡ መዋግድ ፡ መጠነ ፡ ፫ ፡ እመት ፡ ወበዜማ ፡ ማሕሌቶሙ ፡ መንክር ፡ ተላህያ ፡ ለባሕር ፤ ግሩም ፡ ፈድፋደ ፡ ወመድምም ፡ ተላህያ ፡ ለባሕር ፡ ዐዚዝ ፡ ጥቀ ፡ ወዕፁብ ፡ ተላህያ ፡ ለባሕር ፡ ወእለ ፡ ውስቴታሂ ፡ አራዊት ፡ እለ ፡ ይትዐወቁ ፡ ወእለ ፡ ኢያስተርእዩ ፡ ይወፅኡ ፡ ወይሰግዱ ፡ ላቲ ፡ ወአዕዋፍኒ ፡ እለ ፡ ውስቴታ ፡ ይጠፍሑ ፡ በክነፊሆሙ ፡ ወይጼልልዋ ፤ ወኮነ ፡ ፍሥሓ ፡ ለባሕረ ፡ ኢርትራ ፡ ወለሰብአ ፡ ኢትዮጵያ ፡ ወወፅኡ ፡ ባሕረ ፡ ወተፈሥሑ ፡ ፈድፋደ ፡ እምነ ፡ እስራኤል ፡ ሶበ ፡ ይወፅኡ ፡ እምግብጽ ፡ ወበጽሑ ፡ አንጻረ ፡ ደብረ ፡ ሲና ፡ ወኀደሩ ፡ ውስተ ፡ ቃዴስ ፡ ወበህየኒ ፡ እንዘ ፡ ይሴብሑ ፡ መላእክት ፡ ወያኀብሩ ፡ ስብሐቶሙ ፡ መንፈሳዊያን ፡ ምስለ ፡ ደቂቀ ፡ መሬታዊያን ፡ በማሕሌት ፡ ወበመዝሙር ፡ በከበሮ ፡ ወበትፍሥሕት ። ወእምሂየ ፡ ጸዐኑ ፡ ሰረገላቲሆሙ ፡ ወተንሥኡ ፡ ወሖሩ ፡ ወኀለፍዋ ፡ ለብሔረ ፡ ምድያም ፡ ወበጽሑ ፡ ሀገረ ፡ ቤሎንቶስ ፡ እንተ ፡ ሀገረ ፡ ኢትዮጵያ ፤ ወተፈሥሑ ፡ በህየኒ ፡ ወአዕረፉ ፡ እስመ ፡ ደወለ ፡ ብሔሮሙ ፡ በጽሑ ፡ በክብር ፡ ወበፍሥሓ ፡ ዘእንበለ ፡ ፃማ ፡ በፍኖት ፡ በሰረገላ ፡ ነፋስ ፡ ምስለ ፡ ኀይለ ፡ ሰማይ ፡ ወሚካኤል ፡ ሊቀ ፡ መላእክት ፤ ወተፈሥሑ ፡ ኵሎሙ ፡ አድያመ ፡ ኢትዮጵያ ፡ እስመ ፡ ታበርህ ፡ ጽዮን ፡ ኀበ ፡ በጽሐት ፡ ከመ ፡ ፀሐይ ፡ በውስተ ፡ ጽልመተ ።