54. How David [the King of Ethiopia] Prophesied and Saluted Zion
53. How the Wagon was given to Ethiopia / Kebra Nagast / 54. How David [the King of Ethiopia] Prophesied and Saluted Zion 55. How the People of Ethiopia Rejoiced

፶፬ ፡ ኀበ ፡ ተነበየ ፡ ዳዊት ፡ ወተሰለማ ፡ ለጽዮን ።

 

ወቦአ ፡ ንጉሥ ፡ ወቆመ ፡ ቅድሜሃ ፡ ወተሰለማ ፡ ወሰገደ ፡ ላቲ ፡ ወይቤ ፤ እግዚኦ ፡ አምላከ ፡ እስራኤል ፡ ለከ ፡ ስብሐት ፡ እስመ ፡ ትገብር ፡ ፈቃደከ ፡ ወአኮ ፡ ፈቃደ ፡ ሰብእ ፤ ታረስዖ ፡ ጥበቦ ፡ ለጠቢብ ፡ ወታአብዶ ፡ ምክረ ፡ ለመካሪ ፡ ወትሜጥቆ ፡ ለነዳይ ፡ እምነ ፡ ሠርም ፡ ወታቀውሞን ፡ ውስተ ፡ ኰኵሕ ፡ ጽኑዕ ፡ ለሰኰናሁ ፤ እስመ ፡ ጽዋዐ ፡ ክብር ፡ ምሉእ ፡ ውስተ ፡ እዴከ ፡ ለእለ ፡ ያፈቅሩከ ፡ ወጽዋዐ ፡ ኀሳርኒ ፡ ምሉእ ፡ ለእለ ፡ ይጸልኡ ፡ ኪያከ ፤ ወለነሰ ፡ መድኀኒትነ ፡ ይወፅእ ፡ እምጽዮን ፡ ወያአትት ፡ ኀጢአተ ፡ እምሕዝቡ ፡ ወይትከዐው ፡ ሠናይት ፡ ወምሕረት ፡ ውስተ ፡ ኵሉ ፡ ዓለም ፤ እስመ ፡ ንሕነሂ ፡ ተግባረ ፡ እደዊሁ ፡ ንሕነ ፡ መኑ ፡ ይትዔየሮ ፡ ለእመ ፡ አፍቀረነ ፡ ከመ ፡ እስረኤል ፡ ሕዝቦ ፡ ወመኑ ፡ ይግእዞ ፡ ለእመ ፡ አዕረገነ ፡ ውስተ ፡ ሰማያት ፡ መንበሩ ፤ እስመ ፡ ሞት ፡ ወሕይወት ፡ እምኀቤሁ ፡ ክብር ፡ ወኀሳር ፡ ውስተ ፡ እዴሁ ፤ ይክል ፡ ቀሢፈ ፡ ወያበዝኅ ፡ ተሣህሎ ፡ ይትመዐዕ ፡ ወያበዝኅ ፡ ምሕረቶ ፡ እስመ ፡ ፈታኔ ፡ ልብ ፡ ወኵልያት ፡ ውእቱ ፤ ይሁብ ፡ ወይነሥእ ፡ ይተክል ፡ ወይምሑ ፡ የሐንጽ ፡ ወይነሥት ፡ ያሤኒ ፡ ወይመቍስ ፤ እስመ ፡ ኵሉ ፡ ሎቱ ፡ ወኵሉ ፡ እምኀቤሁ ፡ ወኵሉ ፡ ቦቱ ፡ ኮነ ። ወአንቲኒ ፡ ታቦተ ፡ ሕጉ ፡ ለእግዚኣብሔር ፡ መድኀኒተ ፡ ኩኒ ፡ ኀበ ፡ ተሐውሪ ፡ ወእምኀበኒ ፡ ወፃእኪ ፤ መድኀኒተ ፡ ኩኒ ፡ በቤትኒ ፡ ወበገዳምኒ ፤ መድኀኒተ ፡ ኩኒ ፡ በዝየኒ ፡ ወበከሐክኒ ፤ መድኀኒተ ፡ ኩኒ ፡ በታዕካኒ ፡ ወበዕሙናኒ ፤ መድኀኒተ ፡ ኩኒ ፡ በባሕርኒ ፡ ወበየብስኒ ፤ መድኀኒተ ፡ ኩኒ ፡ በአድባርኒ ፡ ወበአውግርኒ ፤ መድኀኒተ ፡ ኩኒ ፡ በሰማያትኒ ፡ ወበምድርኒ ፤ መድኀኒተ ፡ ኩኒ ፡ በምጽናዓትኒ ፡ ወበቀላያት ፤ መድኀኒተ ፡ ኩኒ ፡ በሞትኒ ፡ ወበሕይወትኒ ፤ መድኀኒተ ፡ ኩኒ ፡ በበአትኪ ፡ ወበፀአትኪ ፡ መድኀኒተ ፡ ኩኒ ፡ ለደቂቅነሂ ፡ ወለነገደ ፡ ሕዝብኪ ፤ መድኀኒተ ፡ ኩኒ ፡ ለበሓውርትኒ ፡ ወለአህጉርኒ ፤ መድኀኒተ ፡ ኩኒ ፡ ለነገሥት ፡ ወለመኳንንት ፤ መድኀኒተ ፡ ኩኒ ፡ ለአትክልት ፡ ወለፍረያት ፤ መድኀኒተ ፡ ኩኒ ፡ ለሰብእኒ ፡ ወለእንስሳ ፤ መድኀኒተ ፡ ኩኒ ፡ ለአዕዋፍኒ ፡ ወለአራዊት ፤ መድኀኒተ ፡ ኩኒ ፡ ለሐመልማልኒ ፡ ወለጽገያት ፤ መድኀኒተ ፡ ኩኒ ፡ ጸልዪ ፡ ወመሐሪ ፡ መሐኪ ፡ ሕዝበኪ ። ኩንነ ፡ ጥቀመ ፡ ወንከውነኪ ፡ ሐጹረ ፤ ንገሢ ፡ ለነ ፡ ወንከውነኪ ፡ ሕዝበ ፤ ኩንነ ፡ መርሐ ፡ ወንተሉ ፡ ድኅሬኪ ፡ ኢትትአንተሊ ፡ ወኢትትሀየዪ ፡ ወኢትትቈጥዒ ፡ በብዝኀ ፡ አበሳነ ፡ እስመ ፡ ንሕነ ፡ ሕዝብ ፡ ዘአልቦ ፡ ሕገ ፡ ዘኢተምህረ ፡ ሰብሖተኪ ፤ ወእምይእዜሰ ፡ ምርሐነ ፡ ወመሀረነ ፡ ወአለብወነ ፡ ወአጥብበነ ፡ ከመ ፡ ንትመሀር ፡ ሰብሖተኪ ፡ ወከመ ፡ ይሰባሕ ፡ ስምኪ ፡ በላዕሌነ ፡ በኵሉ ፡ ጊዜ ፡ ወበኵሉ ፡ መዋዕል ፡ በኵሉ ፡ መዐልት ፡ ወበኵሉ ፡ ሌሊት ፡ በኵሉ ፡ ሰዐት ፡ ወበኵሉ ፡ ኑኀ ፡ አዝማን ፤ ሀብነ ፡ ኀይለ ፡ ንትቀነይ ፡ ለኪ ፤ ተንሥኢ ፡ ጽዮን ፡ ወልበሲ ፡ ኀይለኪ ፡ ወሙኢዮሙ ፡ ለጸላእትኪ ፡ ወሀብነ ፡ ጽንዐ ፡ ለነገሥትኪ ፡ ወአስተኀፍርዮሙ ፡ ለእለ ፡ ይጸልኡ ፡ ኪያኪ ፡ ወአስተፈሥሒዮሙ ፡ ለእለ ፡ ያፈቅሩኪ ፠ ወእምዝ ፡ ዖዳ ፡ ወይቤ ፡ ነያ ፡ ጽዮን ፡ ነያ ፡ መድኀኒት ፡ ነያ ፡ መስተፈሥሒት ፡ ነያ ፡ ብርህት ፡ ከመ ፡ ፀሐይ ፡ ነያ ፡ ስርጉት ፡ በስብሐት ፡ ነያ ፡ ስርጉት ፡ ከመ ፡ መርዓት ፡ አኮ ፡ በአልባሰ ፡ ክብር ፡ ኀላፊ ፡ አላ ፡ ስርጉት ፡ በክብር ፡ ወበስብሐት ፡ እምኀበ ፡ እግዚኣብሔር ፤ እንተ ፡ ይኔጽሩ ፡ መፍትው ፡ ወአኮ ፡ እንተ ፡ የኀድጉ ፡ እንተ ፡ ያበድሩ ፡ መፍትው ፡ ወአኮ ፡ እንተ ፡ ይሜንኑ ፡ እንተ ፡ ያፈቅሩ ፡ መፍትው ፡ ወአኮ ፡ እንተ ፡ ይጸልኡ ፡ እንተ ፡ ይቀርቡ ፡ መፍትው ፡ ወአኮ ፡ እንተ ፡ ይርሕቁ ፤ ንቀርበኪ ፡ ወኢትርሐቅነ ፡ ንተመረጐዘኪ ፡ ወኢታድኅዕነ ፡ ንስእለኪ ፡ ወኢትጸመምነ ፡ ንጸርኅ ፡ ኀቤኪ ፡ ወስምዒ ፡ ገዓረነ ፡ በኵሉ ፡ ዘሰአልነ ፡ ኀቤኪ ፡ ወኢትፍቅዲ ፡ ተግሕሦ ፡ እምኔነ ፡ እስከ ፡ ይመጽእ ፡ እግዚእኪ ፡ ወይነግሥ ፡ ላዕሌኪ ፤ እስመ ፡ ማኅደሩ ፡ አንቲ ፡ ለአምላከ ፡ ሰማይ ። ዘንተ ፡ ተናገረ ፡ ዳዊት ፡ ንጉሥ ፡ ወልደ ፡ ሰሎሞን ፡ ንጉሠ ፡ እስራኤል ፡ እስመ ፡ ወረደ ፡ ላዕሌሁ ፡ መንፈሰ ፡ ትንቢት ፡ በእንተ ፡ ፍሥሓሁ ፡ ወኢያአምር ፡ ዘይነብብ ፡ በከመ ፡ ጴጥሮስ ፡ ወዮሐንስ ፡ በርእሰ ፡ ደብረ ፡ ታቦር ፤ ወአንከርዎ ፡ ኵሎሙ ፡ ወይቤሉ ፡ ዝንቱ ፡ ወልደ ፡ ነቢይ ፡ ውስተ ፡ ነቢያትኑ ፡ ኍሉቅ ፠ ፠ ፠