53. How the Wagon was given to Ethiopia
52. How Zadok the Priest Departed / Kebra Nagast / 53. How the Wagon was given to Ethiopia 54. How David [the King of Ethiopia] Prophesied and Saluted Zion

፶፫ ፡ ኀበ ፡ ተውህበ ፡ ሰረገላ ፡ ለኢትዮጵያ ።

 

ወበኀበ ፡ ኀደሩሰ ፡ ጋዛ ፡ ይእቲ ፡ ሀገረ ፡ እሙ ፡ ለንጉሥ ፡ ዘወሀባ ፡ ሶበ ፡ ትመጽእ ፡ ኀቤሁ ፡ ንጉሥ ፡ ሰሎሞን ፡ ለንግሥተ ፡ ኢትዮጵያ ። ወእምህየ ፡ በጽሑ ፡ በአሐቲ ፡ ዕለት ፡ ውስተ ፡ ደወለ ፡ ግብጽ ፡ እንተ ፡ ስማ ፡ ምስሪን ፤ ወሶበ ፡ ርእዩ ፡ ደቂቀ ፡ ኀያላነ ፡ እስራኤል ፡ ከመ ፡ በአሐቲ ፡ ዕለት ፡ በጽሑ ፡ ምሕዋረ ፡ ፲ወ፫ ፡ ዕለት ፡ ወኢደክሙ ፡ ወኢርኅቡ ፡ ወኢጸምኡ ፡ ኢሰብእ ፡ ወኢእንስሳ ፡ ወኵሎሙ ፡ ከመ ፡ ዘሶቤ ፡ ጸግቡ ፡ ወሰትዩ ፡ አእመሩ ፡ ወአምኑ ፡ እሙንቱ ፡ ደቂቀ ፡ ኀይል ፡ ከመ ፡ እምኀበ ፡ እግዚኣብሔር ፡ ኮነት ፡ ዛቲ ፤ ወይቤልዎ ፡ ለንጉሦሙ ፡ ናውርድ ፡ ሰረገላተ ፡ እስመ ፡ በጻሕነ ፡ ማየ ፡ ኢትዮጵያ ፡ ዛቲ ፡ ይእቲ ፡ ተከዚ ፡ እንተ ፡ ትወርድ ፡ እምኢትዮጵያ ፡ ወትሰቂ ፡ ፈለገ ፡ ግብጽ ፤ ወአውረዱ ፡ ሰረገላቲሆሙ ፡ ህየ ፡ ወተከሉ ፡ ደባትሪሆሙ ፠ ወሖሩ ፡ ኅቡረ ፡ ደቂቀ ፡ ኀይል ፡ ወሰደዱ ፡ ኵሎ ፡ አሕዛበ ፡ ወይቤልዎ ፡ ለንጉሦሙ ፡ ንንግርከኑ ፡ ነገረ ፡ ለእመ ፡ ትክል ፡ ተዐግሦ ፤ ወይቤሎሙ ፡ እወ ፡ እክል ፡ ወለእመ ፡ ትቤሉኒ ፡ እስከ ፡ ዕለተ ፡ ሞትየ ፡ ኢያወፅእ ፡ ወኢያወሥእ ። ወይቤልዎ ፡ ወረደት ፡ ፀሐይ ፡ እምሰማይ ፡ ወተውህበት ፡ በሲና ፡ ለእስራኤል ፡ ወኮነት ፡ መድኀኒተ ፡ ለዘመደ ፡ አዳም ፡ እምነ ፡ ሙሴ ፡ እስከ ፡ ዘርአ ፡ እሴይ ፡ ወነዋ ፡ ኀቤከ ፡ በፈቃደ ፡ እግዚኣብሔር ፤ ወአኮ ፡ እምኀቤነ ፡ ዘተገብረ ፡ ዝንቱ ፡ አላ ፡ በፈቃደ ፡ እግዚኣብሔር ፡ ወአኮ ፡ እምኀቤነ ፡ ዘተገብረ ፡ ዝንቱ ፡ አላ ፡ በፈቃደ ፡ ኬንያሃ ፡ ወገባሪሃ ፡ ኮነ ፡ ከመዝ ፤ ንሕነ ፡ ፈቀድነ ፡ ወእግዚኣብሔር ፡ ፈጸመ ፡ ንሕነ ፡ ተሰናአውነ ፡ ወእግዚኣብሔር ፡ አሠነየ ፡ ንሕነ ፡ ተናገርነ ፡ ወእግዚኣብሔር ፡ ገብረ ፡ ንሕነ ፡ ኀለይነ ፡ ወእግዚኣብሔር ፡ መከረ ፡ ንሕነ ፡ ንቤ ፡ ወእግዚኣብሔር ፡ ሠምረ ፡ ንሕነ ፡ አንጸርነ ፡ ወእግዚኣብሔር ፡ አርትዐ ፡ ንሕነ ፡ ኀለይነ ፡ ወእግዚኣብሔር ፡ አጽደቀ ፤ ወይእዜኒ ፡ ኪያከ ፡ ኀረየ ፡ እግዚኣብሔር ፡ ወሀገርከ ፡ ሠምረ ፡ ከመ ፡ ትኩን ፡ ላእከ ፡ ለጽዮን ፡ ቅድስት ፡ ሰማያዊት ፡ ታቦተ ፡ ሕጉ ፡ ለእግዚኣብሔር ፡ ወይእቲ ፡ ትኩንከ ፡ መርሐ ፡ እስከ ፡ ለዓለም ፡ ለከ ፡ ወለዘርእከ ፡ እምድኅሬከ ፡ ለእመ ፡ ዐቀብከ ፡ ትእዛዞ ፡ ወገበርከ ፡ ፈቃዶ ፡ ለእግዚኣብሔር ፡ አምላክከ ፤ እስመ ፡ ኢትክል ፡ አንተ ፡ አግብአታ ፡ ለእመ ፡ ፈቀድከ ፡ ወአቡከ ፡ ነሢኦታ ፡ ለእመ ፡ ፈቀደ ፡ እስመ ፡ ለሊሃ ፡ ተሐውር ፡ ኀበ ፡ ፈቀደት ፡ ወኢትትነሣእ ፡ እመንበራ ፡ ለእመ ፡ ኢፈቀደት ፡ ለሊሃ ፤ ወነያ ፡ ይእቲ ፡ እግዝእትነ ፡ እምነ ፡ ወመድኀኒትነ ፡ ጸወንነ ፡ ወምስካይነ ፡ ክብርነ ፡ ወመርሶ ፡ መድኀኒትነ ፡ ለእለ ፡ ናሰምክ ፡ ባቲ ። ወቀጸቦ ፡ አዛርያስ ፡ ለኤልምያኖስ ፡ ወይቤሎ ፡ ሖር ፡ አሠንያ ፡ ወአልብሳ ፡ ለእግዝእትነ ፡ ከመ ፡ ይርአያ ፡ ንጉሥነ ። ወዘንተ ፡ ሶበ ፡ ተናገረ ፡ አዛርያስ ፡ ደንገፀ ፡ ንጉሥ ፡ ዳዊት ፡ ወአንበረ ፡ ክልኤሆን ፡ እደዊሁ ፡ ውስተ ፡ ልቡ ፡ ወአስተንፈሰ ፡ ሠለስተ ፡ እስትንፋሰ ፡ ወይቤ ፡ አማንኑ ፡ እግዚአ ፡ ትዜከረነ ፡ በሣህልከ ፡ ለግዱፋን ፡ እለ ፡ መነንከ ፡ ሕዝብ ፡ ከመ ፡ እርአያ ፡ ለማኅደርከ ፡ ንጽሕት ፡ እንተ ፡ በሰማያት ፡ ጽዮን ፡ ቅድስት ፡ ሰማያዊት ፤ ወምንተኑ ፡ ነዐስዮ ፡ ለእግዚኣብሔር ፡ በእንተ ፡ ኵሉ ፡ ዘገብረ ፡ ለነ ፡ ሠናያተ ፡ እንዘ ፡ ወኢምንትኒ ፡ በኀቤሁ ፡ ክብረ ፡ ወስብሐተ ፤ ከለለነ ፡ በጸጋሁ ፡ ከመ ፡ ናእምር ፡ በምድር ፡ ስብሐቲሁ ፡ ወንግነይ ፡ ኵልነ ፡ ለዕበየ ፡ ዚአሁ ፤ እስመ ፡ ኄር ፡ ውእቱ ፡ ለኅሩያኒሁ ፡ ወሎቱ ፡ ስብሐት ፡ እስከ ፡ ለዓለም ። ወተንሥአ ፡ ንጉሥ ፡ እንዘ ፡ ያንፈርዕፅ ፡ ከመ ፡ ማሕስአ ፡ በግዕ ፡ ወከመ ፡ ሐርጌ ፡ ጽጉበ ፡ ሐሊበ ፡ እሙ ፤ በከመ ፡ ፍሥሓ ፡ ዳዊት ፡ አበ ፡ አቡሁ ፡ በቅድመ ፡ ታቦተ ፡ ሕጉ ፡ ለእግዚኣብሔር ፤ አጽሐሰ ፡ በእገሪሁ ፡ ወተሐሠየ ፡ በልቡ ፡ ወተሀለለ ፡ በአፉሁ ። ወምንተ ፡ እብል ፡ ሚመጠነ ፡ ፍሥሓ ፡ ወሐሤት ፡ በውስተ ፡ ትዕይንተ ፡ ንጉሠ ፡ ኢትዮጵያ ፤ ይነግሮ ፡ ፩ ፡ ለካልኡ ፡ ወያንፈርዕፁ ፡ ኵሎሙ ፡ ከመ ፡ ጣዕዋ ፡ ላህም ፡ ወይጠፍሑ ፡ እደዊሆሙ ፡ ወያነክሩ ፡ ወይሰፍሑ ፡ እደዊሆሙ ፡ ውስተ ፡ ሰማይ ፡ ወይሰግዱ ፡ በገጾሙ ፡ ውስተ ፡ ምድር ፡ ወያአኵትዎ ፡ ለእግዚኣብሔር ፡ በአልባቢሆሙ ፠ ፠ ፠