52. How Zadok the Priest Departed
51. How he said unto Zadok the Priest, ''Go and bring the Coveri / Kebra Nagast / 52. How Zadok the Priest Departed 53. How the Wagon was given to Ethiopia

፶፪ ፡ ኀበ ፡ ዘሖረ ፡ ሳዶቅ ፡ ካህን ።

 

ወሖረ ፡ ሳዶቅ ፡ ካህን ፡ ወወሀቦ ፡ ልብሳ ፡ ለጽዮን ፡ ወአዘዘ ፡ ኵሎ ፡ ዘነገሮ ፡ ሰሎሞን ። ወተፈሥሐ ፡ ዳዊት ፡ ወልደ ፡ ሰሎሞን ፡ በእንተዝ ፡ ወአንከረ ፡ ወአስተብፅዐ ፡ ፈድፋደ ፡ ወይቤ ፡ ዛቲ ፡ ትኩነኒ ፡ እግዝእትየ ፡ በተአምኖታ ፡ ለታቦተ ፡ ሕጉ ፡ ለእግዚኣብሔር ። ወአውሥአ ፡ አዛርያስ ፡ ወይቤ ፡ በቅድመ ፡ አቡሁ ፡ ተፈሣሕከ ፡ በልብስ ፡ ወእፎ ፡ ፈድፋደ ፡ እምተፈሣሕከ ፡ በእግዝእተ ፡ ልብስ ። ወይቤሎ ፡ አቡሁ ፡ በአማን ፡ እምተፈሥሐ ፡ በእግዝእተ ፡ ልብስ ፡ ወእምቀነየነ ፡ ለኵልነ ፡ ሶበ ፡ ኢየሐውር ፡ ብሔሮ ። ወይቤሎ ፡ ለንጉሥ ፡ ሀበኒኬ ፡ ኪዳነ ፡ ከመ ፡ ተሀቦ ፡ ለዝንቱ ፡ ወልድየ ፡ ዘንተ ፡ ንዋየ ፡ እግዝእቱ ፡ ለትሕቢቱ ፡ ወምዕቅብናሁ ፡ ከመ ፡ ይትመሐፀን ፡ ኵሎ ፡ መዋዕለ ፡ ሕይወቱ ፡ ሎቱ ፡ ወለዘርኡ ፡ እምድኅሬሁ ፤ ወዓሥራትኒ ፡ ከመ ፡ ተሀቦ ፡ ወሀገረ ፡ ምስካይኒ ፡ ከመ ፡ የሀቦ ፡ በውስተ ፡ መንግሥትከ ፡ ወለዐሥራተ ፡ አህጉርኒ ፡ በኵሉ ፡ መንገሥቱ ፤ ወውእቱኒ ፡ ከመ ፡ ይኩንከ ፡ ካህነ ፡ ወራእየ ፡ ወነቢየ ፡ ወመሃሬ ፡ ለከ ፡ ወለዘርእከ ፡ እምድኅሬከ ፡ ወቀባኤ ፡ ቅብአ ፡ መንግሥትኒ ፡ ለደቂቅከ ፡ ወለደቂቀ ፡ ደቂቅከ ። ወይቤ ፡ ኦሆ ። ወተካየዱ ፡ ወነሥአ ፡ እምኀበ ፡ አቡሁ ፡ ሞጻ ፡ ወልብሳ ፡ ለጽዮን ፡ ወቃማ ፡ ዘወርቅ ፠ ወጸዐኑ ፡ ከመ ፡ ይሓሩ ፡ ሰረገላተ ፡ ወአፍራሰ ፡ ወአብቅልተ ፡ ወተሠርሐ ፡ ፍኖቶሙ ። ወእምዝ ፡ አርትዑ ፡ ሐዊረ ፡ እንዘ ፡ ሚካኤል ፡ መልአክ ፡ የሐውር ፡ ቅድመ ፤ በባሕርኒ ፡ ስፊሖ ፡ አኬዶሙ ፡ ከመ ፡ የብስ ፡ ወበየብስኒ ፡ ሠጢቆ ፡ ደመና ፡ አንጦሊዖ ፡ ሰወሮሙ ፡ ላህበ ፡ ፀሐይ ፤ ሰረገላቲሆሙኒ ፡ አልቦ ፡ ዘይስሕቦ ፡ አላ ፡ የሐውር ፡ ለሊሁ ፡ በሰረገላ ፡ ተልዒሎ ፡ እምድር ፡ መጠነ ፡ እመት ፡ እመሂ ፡ ሰብእ ፡ ወእመሂ ፡ አፍራስ ፡ ወእመሂ ፡ አብቅልት ፡ ወእመሂ ፡ ራኵባት ፡ ወኵሎሙ ፡ እለ ፡ ጽዑናን ፡ ይትሌዐል ፡ እምዘባናቲሆሙ ፡ መጠነ ፡ ስዝረ ፡ ብእሲ ፤ ኵሉ ፡ ንዋየ ፡ ቍስቋሶሙ ፡ ዘጽዑን ፡ ወእለ ፡ ይጼዐኑ ፡ ይትሌዐሉ ፡ መጠነ ፡ ስዝረ ፡ ብእሲ ፡ ወእንስሳኒ ፡ ይትሌዐሉ ፡ መጠነ ፡ ስዝረ ፡ ብእሲ ፤ ወኵሉ ፡ ይረውጽ ፡ በሰረገላ ፡ ከመ ፡ ሐመር ፡ በውስተ ፡ ባሕር ፡ ሶበ ፡ ያነውኃ ፡ ነፋስ ፡ ወከመ ፡ ጽግነት ፡ በውስተ ፡ አየር ፡ ሶበ ፡ ያሰርሖ ፡ ፍትወተ ፡ ከርሡ ፡ ለበሊዕ ፡ እምአብያጺሁ ፡ ወከመ ፡ ንስር ፡ ሶበ ፡ ያቀልል ፡ ሥጋሁ ፡ በመልዕልተ ፡ ነፋስ ፤ ከማሁ ፡ ይረውጹ ፡ በሰረገላ ፡ ዘአልቦ ፡ ቅድመ ፡ ወድኅረ ፡ ዘእንበለ ፡ ተሀውኮ ፡ ይምነ ፡ ወፅግመ ፠ ፠ ፠