50. How they bade farewell to his Father and how the city mourne
49. How his Father blessed his Son / Kebra Nagast / 50. How they bade farewell to his Father and how the city mourne 51. How he said unto Zadok the Priest, ''Go and bring the Coveri

፶ ፡ ኀበ ፡ ተፋነዉ ፡ ምስለ ፡ አቡሁ ፡ ወላሐወት ፡ ሀገር ።

 

ወተፋነዉ ፡ ወሖሩ ፤ ወአቅደሙ ፡ ጽዒኖታ ፡ ለጽዮን ፡ በሌሊት ፡ ውስተ ፡ ሰረገላ ፡ በኅሱራት ፡ ንዋያት ፡ ወርሱሓት ፡ አልባስ ፡ ምስለ ፡ ንዋየ ፡ ቍስቋሳት ፤ ወተጽዕኑ ፡ ኵሉ ፡ ሰረገላት ። ወተንሥኡ ፡ ሊቃናት ፡ ወተነፍሐ ፡ ቀርን ፡ ወደምፀት ፡ ሀገር ፡ ወወውዑ ፡ መሐዛት ፡ ወከለላ ፡ ግርማ ፡ ወዖዳ ፡ ጸጋ ፤ አውየዉ ፡ ርሡኣን ፡ ወከልሑ ፡ ሕፃናት ፡ ወበከያ ፡ አቤራት ፡ ወላሐዋ ፡ ደናግል ፡ በእንተ ፡ ዘተንሥኡ ፡ ደቂቀ ፡ መኳንንቲሆሙ ፡ ለኀያላነ ፡ እስራኤል ። ወአኮ ፡ ባሕቲቶሙ ፡ በእንቲአሆሙ ፡ ዘትበኪ ፡ ሀገር ፡ አላ ፡ እስመ ፡ ተሀይደ ፡ ግርማሃ ፡ ለሀገር ፡ ምስሌሆሙ ፤ ወሶበኒ ፡ ኢያእመሩ ፡ ገሃደ ፡ ከመ ፡ ተነሥአት ፡ ጽዮን ፡ እምኔሆሙ ፡ በልቦሙሰ ፡ ኢስሕቱ ፡ ወይበክዩ ፡ መሪረ ፡ ከመ ፡ አመ ፡ ቀተለ ፡ እግዚኣብሔር ፡ በኵሮሙ ፡ ለግብጽ ፡ ከማሁ ፡ ኮኑ ፡ ወአልቦ ፡ ቤተ ፡ ኀበ ፡ አልቦ ፡ አውያተ ፡ እምሰብእ ፡ እስከ ፡ እንስሳ ፡ ከለባትኒ ፡ የአወይዉ ፡ ወአእዱግኒ ፡ ይንህቁ ፡ ወኵሎሙ ፡ ኅቡረ ፡ ያውሕዙ ፡ አንብዖሙ ፡ እለ ፡ ተረፉ ፡ ህየ ፤ ከመ ፡ ዘዐገትዋ ፡ መላእክተ ፡ ፀር ፡ ጽኑዓን ፡ ለዐባይ ፡ ሀገር ፡ ወሮድዋ ፡ ወማህረክዋ ፡ ወፄወውዋ ፡ ወቀተልዋ ፡ በአፈ ፡ ኀጺን ፡ ከማሁ ፡ ኮነት ፡ ሀገረ ፡ ጽዮን ፡ ይእቲ ፡ ኢየሩሳሌም ፠ ወደንገፀ ፡ ንጉሥኒ ፡ ሰሎሞን ፡ በእንተ ፡ ብካይ ፡ ወጽራኀ ፡ ሀገር ፡ ወሐወጸ ፡ እንተ ፡ ታዕካ ፡ ቤተ ፡ መንግሥት ፡ ቀልዐ ፡ ዘቤተ ፡ ንጉሥ ፡ ወርእየ ፡ ኵላ ፡ ሀገር ፡ እንዘ ፡ ትበኪ ፡ ትተልዎሙ ፤ ከመ ፡ ሕፃን ፡ ዘአኅደገቶ ፡ ጥበ ፡ እሙ ፡ ወጐየት ፡ እምኔሁ ፡ ወይተሉ ፡ አሠረ ፡ እሙ ፡ እንዘ ፡ ይጸርኅ ፡ ወይበኪ ፡ ከማሁ ፡ ኮኑ ፡ ይጸርኁ ፡ ወይበክዩ ፡ ወይወድዩ ፡ ሐመደ ፡ ዲበ ፡ ርእሶሙ ፡ ወያውሕዙ ፡ አንብዐ ፡ እምአዕይንቲሆሙ ። ወሰሎሞንሂ ፡ ተሀውከ ፡ ወርዕደ ፡ ሶበ ፡ ርእየ ፡ ግርማሆሙ ፡ ለእለ ፡ ሖሩ ፡ ወተሀውከ ፡ አማዕዋቲሁ ፡ ወአንብዑ ፡ ታንጠበጥብ ፡ ዲበ ፡ ልብሱ ፤ ወይቤ ፡ ሴልየ ፡ እስመ ፡ ኀለፈት ፡ ክብርየ ፡ ወወድቀት ፡ አክሊለ ፡ ምክሕየ ፡ ወውፅየት ፡ ከርሥየ ፡ በእንተ ፡ ዘሖረ ፡ ዝንቱ ፡ ወልድየ ፡ ወነሠተ ፡ ግርማሃ ፡ ለሀገርየ ፡ ወግዕዙ ፡ ደቂቀ ፡ ኀይልየ ፤ ወእምይእዜሰ ፡ ኀለፈት ፡ ክብርነ ፡ ወተሀይደት ፡ መንግሥትነ ፡ ውስተ ፡ ሕዝብ ፡ ነኪር ፡ እለ ፡ ኢያአምርዎ ፡ ለእግዚኣብሔር ፤ በከመ ፡ ይቤ ፡ ነቢይ ፡ ሕዝብ ፡ እለ ፡ ኢኀሠሡኒ ፡ ረከቡኒ ፡ እምይእዜሰ ፡ ይትወሀቦሙ ፡ ሕግ ፡ ወጥበብ ፡ ወአእምሮ ፤ ወአቡየኒ ፡ ተነበየ ፡ በእንቲአሆሙ ፡ እንዘ ፡ ይብል ፡ ይገንዩ ፡ ቅድሜሁ ፡ ኢትዮጵያ ፡ ወጸላእቱሂ ፡ ሐመደ ፡ ይቀምሑ ፤ ወበካልእኒ ፡ ይብል ፡ ኢትዮጵያ ፡ ትሜጥዎ ፡ እደዊሃ ፡ ለእግዚኣብሔር ፡ ወውእቱኒ ፡ ይትሜጠዋ ፡ በክብር ፡ ወነገሥተ ፡ ምድርኒ ፡ ይሴብሕዎ ፡ ለእግዚኣብሔር ፤ ወበሣልስኒ ፡ ይቤ ፡ ናሁ ፡ ኢሎፍሊ ፡ ወጢሮስ ፡ ወሕዝበ ፡ ኢትዮጵያ ፡ እለ ፡ ተወልዱ ፡ ዘእንበለ ፡ ሕግ ፡ ይትወሀቦሙ ፡ ሕግ ፡ ወይብልዋ ፡ ለጽዮን ፡ እምነ ፡ በእንተ ፡ ብእሲ ፡ ዘተወልደ ፤ በእንተ ፡ ዝንቱኑ ፡ ወልድየ ፡ እንጋ ፡ ዘተወልደ ፡ እምኔየ ፠ ፠ ፠