48. How they carried away Zion
47. Concerning the offering of Azariah and the King / Kebra Nagast / 48. How they carried away Zion 49. How his Father blessed his Son

፵፰ ፡ ኀበ ፡ አንሥእዋ ፡ ለጽዮን ።

 

ወናሁ ፡ ካዕበ ፡ አስተርአዮ ፡ መልአከ ፡ እግዚኣብሔር ፡ ለአዛርያስ ፡ ወሠረቀ ፡ ላዕሌሁ ፡ ከመ ፡ ዐምደ ፡ እሳት ፡ ወመልአ ፡ ቤት ፡ በብርሃኑ ፡ ወአንሥኦ ፡ ለአዛርያስ ፡ ወይቤሎ ፤ ቁም ፡ ወጽናዕ ፡ ወአንቅሆ ፡ ለኤልምያኖስ ፡ እኁከ ፡ ለአብሳ ፡ ወለማከሪ ፡ ወንሥኡ ፡ እሙንቱ ፡ ዕፀወ ፡ አልዋሕ ፡ ወአነ ፡ አርኁ ፡ ለከ ፡ አናቅጺሃ ፡ ለቤተ ፡ መቅደስ ፡ ወንሥኣ ፡ ለታቦተ ፡ ሕጉ ፡ ለእግዚኣብሔር ፡ ወትወስዳ ፡ ዘእንበለ ፡ ደዌ ፡ ወሕማም ፡ ወአነሂ ፡ እስመ ፡ ተአዘዝኩ ፡ እምኀበ ፡ እግዚኣብሔር ፡ ከመ ፡ አሀሉ ፡ ዘልፈ ፡ ምስሌሃ ፡ ወእኩንከ ፡ መርሐ ፡ በነሢኦታ ። ወተንሥአ ፡ ሶቤሃ ፡ ወአንቅሆሙ ፡ ለሠለስቲሆሙ ፡ አኀዊሁ ፡ ወነሥኡ ፡ እሙንቱ ፡ አልዋሐ ፡ ወሖሩ ፡ ውስተ ፡ ቤተ ፡ እግዚኣብሔር ፤ ወረከቡ ፡ ርኅወ ፡ ኵሎ ፡ አናቅጸ ፡ እምአፍአ ፡ እስከ ፡ ውሥጥ ፡ ርኅዋተ ፡ አናቅጸ ፡ እስከ ፡ ውእደ ፡ ይበጽሕ ፡ ኀበ ፡ ጽዮን ፡ ታቦተ ፡ ሕጉ ፡ ለእግዚኣብሔር ፡ ወተንሥአት ፡ ሶቤሃ ፡ ከመ ፡ ቅጽበተ ፡ ዐይን ፡ እስመ ፡ መልአከ ፡ እግዚኣብሔር ፡ ይሜግባ ፤ ወሶበሰ ፡ ኢፈቀደ ፡ እግዚኣብሔር ፡ እመ ፡ ኢተንሥአት ፡ ሶቤሃ ። ወነሥእዋ ፡ አርባዕቲሆሙ ፡ ወአእተውዋ ፡ ውስተ ፡ ቤተ ፡ አዛርያስ ፡ ወገብኡ ፡ ውስተ ፡ ቤተ ፡ እግዚኣብሔር ፡ ወአስተላጸቁ ፡ ውስተ ፡ ምንባሪሃ ፡ ለጽዮን ፡ ወከደንዎን ፡ ለዕፀው ፡ በአልባሲሃ ፡ ለጽዮን ፡ ወዐጸዉ ፡ አናቅጸ ፤ ወገብኡ ፡ ውስተ ፡ ቤቶሙ ፡ ወነሥኡ ፡ መኃትወ ፡ ወአንበርዋ ፡ ውስተ ፡ ምኅባኢሃ ፡ ወሦዑ ፡ ላቲ ፡ በግዐ ፡ ወአጸንሕሑ ፡ ስኂነ ፡ ወነጸፉ ፡ ላቲ ፡ ሜላተ ፡ ወአንበርዋ ፡ ውስተ ፡ ምስዋር ፡ ፯ ፡ ዕለተ ፡ ወ፯ ፡ ሌሊተ ፠ ፠ ፠