43. How the men of the Army of Israel received [their] orders
42. Concerning the Ten Commandments / Kebra Nagast / 43. How the men of the Army of Israel received [their] orders 44. How it is not a seemly thing to revile the King

፵፫ ፡ ኀበ ፡ ተአዘዙ ፡ ደቂቀ ፡ ኀይለ ፡ እስራኤል ።

 

ሀገርሰ ፡ ተፈሥሐት ፡ በእንተ ፡ ዘአንገሠ ፡ ወልዶ ፡ ንጉሥ ፡ ወረሰዮ ፡ ንጉሠ ፡ እምደወሉ ፡ እስከ ፡ ደወለ ፡ ባዕድ ፤ ወዓዲ ፡ ሐዘነት ፡ ሀገር ፡ እስመ ፡ አዘዘ ፡ ንጉሥ ፡ ከመ ፡ የሀቡ ፡ ደቂቆሙ ፡ እለ ፡ ተሰምዩ ፡ በኵረ ፤ ወእለኒ ፡ እምየማን ፡ ከማሁ ፡ ይንበሩ ፡ በከመ ፡ አበዊሆሙ ፡ ይነብሩ ፡ ምስለ ፡ ንጉሥ ፡ ሰሎሞን ፡ ከማሁ ፡ ይንበሩ ፡ በየማነ ፡ ወልዱ ፡ ዳዊት ፡ ንጉሠ ፡ ኢትዮጵያ ፡ ወእለኒ ፡ እምፀጋም ፡ ከማሁ ፡ ይንበሩ ፡ በከመ ፡ አበዊሆሙ ፡ ይነብሩ ፡ ምስለ ፡ ንጉሥ ፡ ሰሎሞን ፡ ከማሁ ፡ ይንበሩ ፡ በፀጋሙ ፡ ለወልዱ ፡ ዳዊት ፡ ንጉሠ ፡ ኢትዮጵያ ፤ ወሢመቶሙኒ ፡ በከመ ፡ አበዊሆሙ ፡ ወአስማቲሆሙኒ ፡ በከመ ፡ አበዊሆሙ ፤ ወኵሉ ፡ በከመ ፡ በበሥርዐቱ ፡ ወበበ ፡ በከመ ፡ ዕበዩ ፡ ወበበ ፡ በከመ ፡ ምልክናሁ ፡ ወበበ ፡ በከመ ፡ ምርካቡ ፡ ወበበ ፡ በከመ ፡ ምኵናኑ ፤ ከማሁ ፡ ይኩኑ ፡ በከመ ፡ ገብረ ፡ ሰሎሞን ፡ ለመኳንንቲሁ ፡ ከማሁ ፡ ይግበር ፡ ሎሙ ፡ ዳዊትሂ ፡ ለመኳንንቲሁ ፡ ወበከመ ፡ ሠርዖሙ ፡ ሰሎሞን ፡ ለመገብቱ ፡ ወከማሁ ፡ ዳዊትሂ ፡ ይሥራዕ ፡ ሥርዐተ ፡ ቤቱ ። ወከመዝ ፡ አስማቲሆሙ ፡ ለእለ ፡ ተሠይሙ ፡ ይትፈነዉ ። አዛርያስ ፡ ወልደ ፡ ሳዶቅ ፡ ካህን ፡ ዝውእቱ ፡ ሊቀ ፡ ካህናት ፤ ወኤልያስ ፡ ወልደ ፡ አርኒ ፡ ሊቀ ፡ ዲያቆናት ፡ ወአቡሁሰ ፡ ለአርኒ ፡ ሊቀ ፡ ዲያቆናት ፡ ናታን ፡ ነቢይ ፤ ወአድራም ፡ ወልደ ፡ አርድሮንስ ፡ መልአከ ፡ አሕዛብ ፤ ወፈንቄራ ፡ ወልደ ፡ ሶበ ፡ ጸሓፌ ፡ ላህም ፤ ወአኮንሔል ፡ ወልደ ፡ ጦፌል ፡ እንዘ ፡ ሕፃን ፤ ወሳምንያስ ፡ ወልደ ፡ አኪታለም ፡ መዘክር ፤ ወፈቃሮስ ፡ ወልደ ፡ ንያ ፡ መልአከ ፡ ሰርዌ ፡ ዝውእቱ ፡ ሊቀ ፡ ሐራ ፤ ወሌዋንዶስ ፡ ወልደ ፡ አኪሬ ፡ መልአከ ፡ አንገቦት ፤ ወፋቁጤን ፡ ወልደ ፡ አድራይ ፡ መልአካዊ ፡ ለባሕር ፤ ወማታን ፡ ወልደ ፡ ብንያስ ፡ መልህቀ ፡ ቤት ፤ ወአድዐረዝ ፡ ወልደ ፡ ኪሬም ፡ ደቀ ፡ ሰርጕ ፤ ወደለክም ፡ ወልደ ፡ ማትሬም ፡ ሊቀ ፡ ሐራ ፡ ለአፍራስ ፤ ወአደርዮስ ፡ ወልደ ፡ ኔድሮስ ፡ ሊቀ ፡ ሐራ ፡ ለአጋር ፤ ወአውስጥራን ፡ ወልደ ፡ ዮዳድ ፡ ጸዋሬ ፡ ክብር ፤ ወአስተርአዮን ፡ ወልደ ፡ አሳ ፡ ቃለ ፡ ታዕካ ፤ ወኢሚ ፡ ወልደ ፡ መታትያስ ፡ ሊቀ ፡ መጽብእት ፤ ወማክሪ ፡ ወልደ ፡ አቢሳ ፡ ፈታሔ ፡ ታዕካ ፤ ወአቢስ ፡ ወልደ ፡ ካርዮስ ፡ መአስሪ ፤ ሊቀ ፡ ውንድዮስ ፡ ወልደ ፡ ኔልንትዮስ ፡ መስፍነ ፡ ዐውድ ፤ ወካርሚ ፡ ወልደ ፡ ሐፃንያስ ፡ ሊቀ ፡ ገባር ፡ ዘቤተ ፡ ንጉሥ ፤ ወስራንያስ ፡ ወልደ ፡ አካዝኤል ፡ መጋቢ ፡ ዘቤተ ፡ ንጉሥ ፤ እሉ ፡ ኵሎሙ ፡ እለ ፡ ተውህቡ ፡ ለዳዊት ፡ ንጉሠ ፡ ኢትዮጵያ ፡ ወልደ ፡ ሰሎሞን ፡ ንጉሠ ፡ እስራኤል ፠ ወዓዲ ፡ ወሀቦ ፡ አፍራሰ ፡ ወሰረገላተ ፡ ራኵባተ ፡ ወአብቅልተ ፡ ወጽዑነ ፡ ሰረገላተ ፡ ወርቀ ፡ ወብሩረ ፡ ወአልባሰ ፡ ክቡረ ፡ ቢሶሰ ፡ ወሜላተ ፡ ዕንቈ ፡ ባሕርያተ ፡ ወአፍራጸ ፡ ወኵሎ ፡ ዘይትፈቀድ ፡ ለብሔረ ፡ ኢትዮጵያ ፡ ወሀቦ ፡ ለወልዱ ፠ ወእምዝ ፡ ተደለዉ ፡ ከመ ፡ ይሖሩ ፤ ወኮነ ፡ ፍሥሓ ፡ ለመኳንንተ ፡ ንጉሠ ፡ ኢትዮጵያ ። ወኮነ ፡ ሐዘነ ፡ ለመኳንንተ ፡ ንጉሠ ፡ እስራኤል ፤ እስመ ፡ በእንተ ፡ በኵሩ ፡ ለሰሎሞን ፡ ንጉሠ ፡ እስራኤል ፡ ዝውእቱ ፡ ንጉሠ ፡ ኢትዮጵያ ፡ ተውህበ ፡ በኵሮሙ ፡ ለመኳንንተ ፡ እስራኤል ፡ ከመ ፡ ይንግሡ ፡ ለብሔረ ፡ ኢትዮጵያ ፡ ምስለ ፡ ወልደ ፡ ሰሎሞን ፡ ንጉሥ ። ወእምዝ ፡ ተጋብኡ ፡ ወበከዩ ፡ ምስለ ፡ አበዊሆሙ ፡ ወእማቲሆሙ ፡ ወአዝማዲሆሙ ፡ ወአንጋዳሆሙ ፡ ምስለ ፡ ሕዘቢሆሙ ፡ ወበሓውርቲሆሙ ፡ ወይረግምዎ ፡ በኅቡእ ፡ ለንጉሥ ፡ ወየሐምይዎ ፡ በእንተ ፡ ዘሄደ ፡ ደቂቆሙ ፡ ዘእንበለ ፡ ፈቃዶሙ ፤ ወለንጉሥሰ ፡ ይብልዎ ፡ ሠናየ ፡ ገበርከ ፡ በእንተዝ ፡ እስመ ፡ ኀየሰ ፡ ጥበብከ ፡ ከመ ፡ መንግሥተ ፡ እስራኤል ፡ ኮነት ፡ ለብሔረ ፡ ኢትዮጵያ ፡ በፈቃደ ፡ እግዚኣብሔር ፡ ወበጥበበ ፡ ዚአከ ፡ ወካልኣንኒ ፡ መንግሥታት ፡ ያገብኦን ፡ እግዚኣብሔር ፡ ውስተ ፡ እዴከ ፡ እስመ ፡ ሠናየ ፡ ትኄሊ ፡ ለእግዚኣብሔር ፡ ወትፈቅድ ፡ ከመ ፡ ያምልክዎ ፡ ለአምላከ ፡ እስራኤል ፡ ወከመ ፡ ይሠረዉ ፡ ጣዖታት ፡ እምዓለም ። ወይዌድስዎ ፡ ወይብልዎ ፡ ይእዜ ፡ አእመርነ ፡ ከመ ፡ በእንቲአከ ፡ ይቤሎ ፡ እግዚኣብሔር ፡ ለአቡነ ፡ አብርሃም ፡ በዘርእከ ፡ ይትባረኩ ፡ ኵሎሙ ፡ አሕዛበ ፡ ምድር ፤ ወያሤንዩ ፡ ገጾሙ ፡ ወይስሕቁ ፡ በቅድሜሁ ፡ ወይዌድስዎ ፡ ፈድፋደ ፡ በእንተ ፡ ጥበቡ ፤ ወሶበ ፡ ዘንተ ፡ ይብልዎ ፡ ያአምሮሙ ፡ በጥበብ ፡ ወይትዔገሶሙ ፤ እስመ ፡ እግዚኣብሔር ፡ ይትዔገሰነ ፡ እንዘ ፡ ያአምር ፡ ኵሎ ፡ ኀጢአተነ ፤ መንግሥትሰ ፡ ለእግዚኣብሔር ፡ ኵላ ፡ ምድር ፡ ወሰማያትኒ ፡ ወአጽናፈ ፡ ዓለም ፡ ወባሕር ፡ ወየብስ ፡ ውእቱ ፡ ይኴንን ፤ ወለንጉሠ ፡ ምድርሂ ፡ ወሀቦ ፡ እምታሕቴሁ ፡ ከመ ፡ ይኴንን ፡ ከማሁ ፡ ለእለ ፡ ይገብርዋ ፡ ለእኪት ፡ ከመ ፡ ይፍድዮሙ ፡ እኩየ ፡ ወለእለ ፡ ይገብርዋ ፡ ለሠናይት ፡ ከመ ፡ ይዕስዮሙ ፡ ሠናየ ፤ እስመ ፡ መንፈሰ ፡ እግዚኣብሔር ፡ ያዐርፍ ፡ ውስተ ፡ ልቡ ፡ ለንጉሥ ፡ ወእደዊሁ ፡ ውስተ ፡ ኅሊናሁ ፡ ወአእምሮቱ ፡ ውስተ ፡ ልቡናሁ ፠ ፠ ፠