42. Concerning the Ten Commandments
41. Concerning the blessing of Kings / Kebra Nagast / 42. Concerning the Ten Commandments 43. How the men of the Army of Israel received [their] orders

፵፪ ፡ በእንተ ፡ ፲ ፡ ቃላት ።

 

ወስምዑ ፡ እስራኤል ፡ ዘተአዘዘ ፡ እምእግዚኣብሔር ፡ ከመ ፡ ትዕቀቡ ፡ ኪያሁ ። ወይቤ ፡ አነ ፡ ውእቱ ፡ እግዚኣብሔር ፡ አምላክከ ፡ ዘአውፃእኩከ ፡ እምነ ፡ ምድረ ፡ ግብጽ ፡ ወእምነ ፡ ቤተ ፡ ቅኔ ፤ ወኢይኩን ፡ ባዕደ ፡ አማልክተ ፡ ዘእንበሌየ ፡ ወኢትግበር ፡ አምላከ ፡ ዘግልፎ ፡ ወኢበኵሉ ፡ አምሳል ፡ ዘውስተ ፡ ሰማይ ፡ ዘላዕሉ ፡ ወኢበኵሉ ፡ ዘበ ፡ ምድር ፡ በታሕቱ ፡ ወኢዘውስተ ፡ ማይ ፡ ዘመትሕተ ፡ ምድር ፤ ወኢትስግድ ፡ ሎሙ ፡ ወኢታምልኮሙ ፤ እስመ ፡ አነ ፡ እግዚኣብሔር ፡ አምላክከ ፡ አምላክ ፡ ቀናኢ ፡ ዘእትፈደይ ፡ ኀጢአተ ፡ ወላዲ ፡ ላዕለ ፡ ውሉድ ፡ እስከ ፡ ሣልስ ፡ ወራብዕ ፡ ትውልድ ፡ ለእለ ፡ ይጸልኡኒ ፤ ወእገብር ፡ ምሕረተ ፡ እስከ ፡ ፼ትውልድ ፡ ለእለ ፡ ያፈቅሩኒ ፡ ወየዐቅቡ ፡ ትእዛዝየ ። ወኢትምሐል ፡ ስመ ፡ እግዚኣብሔር ፡ አምላክከ ፡ በሐሰት ፡ እስመ ፡ ኢያነጽሕ ፡ እግዚኣብሔር ፡ ለዘ ፡ ይምሕል ፡ ስሞ ፡ በሐሰት ። ወዕቀብ ፡ ዕለተ ፡ ሰንበት ፡ ከመ ፡ ትቀድሳ ፡ በከመ ፡ አዘዘ ፡ እግዚኣብሔር ፡ አምላክከ ፤ ሰዱሰ ፡ መዋዕለ ፡ ትገብር ፡ ግብረከ ፡ ወበሳብዕት ፡ ዕለት ፡ ሰንበቱ ፡ ለእግዚኣብሔር ፡ አምላክከ ፡ ኢትግበር ፡ ባቲ ፡ ግብረ ፡ ቅኔ ፡ ኢአንተ ፡ ወኢወልድከ ፡ ወኢወለትከ ፡ ወኢገብርከ ፡ ወኢአድግከ ፡ ወኢኵሉ ፡ እንስሳከ ፡ ወኢፈላሲ ፡ ዘይነብር ፡ ኀቤከ ፤ እስመ ፡ በሰዱስ ፡ መዋዕል ፡ ገብረ ፡ እግዚኣብሔር ፡ ሰማየ ፡ ወምድረ ፡ ወባሕረ ፡ ወኵሎ ፡ ዘውስቴታ ፡ ወአዕረፈ ፡ አመ ፡ ዕለተ ፡ ሳብዕት ፡ ወበበይነዝ ፡ ባረካ ፡ እግዚኣብሔር ፡ ለሳብዕት ፡ ዕለት ፡ ወአጽደቃ ። አክብር ፡ አባከ ፡ ወእምከ ፡ ከመ ፡ ይኩንከ ፡ ጽድቀ ፡ ብዙኀ ፡ ዕለተ ፡ ትረክብ ፡ በውስተ ፡ ምድር ፡ ዘወሀበከ ፡ እግዚኣብሔር ፡ አምላክከ ። ኢትሖር ፡ ብእሲተ ፡ ብእሲ ። ኢትቅትል ፡ ነፍሰ ። ኢትዘሙ ። ኢትስርቅ ። ስምዐ ፡ በሐሰት ፡ ኢትስማዕ ፡ ላዕለ ፡ ቢጽከ ። ወኢትፍትው ፡ ብእሲተ ፡ ካልእከ ፡ ኢቤቶ ፡ ወኢገራህቶ ፡ ወኢገብሮ ፡ ወኢአመቶ ፡ ወኢላህሞ ፡ ወኢብዕራዮ ፡ ወኢአድጎ ፡ ወኢእምኵሉ ፡ እንስሳሁ ፡ ዘአጥረየ ፡ አጥርዮ ፡ ካልእከ ፤ ዝነገር ፡ ዘነገረ ፡ እግዚኣብሔር ፡ ሕጎ ፡ ወሥርዐቶ ፡ ወለእለኒ ፡ ይኤብሱ ፡ ገሥጾሙ ፡ ከመ ፡ ኢይጽንዑ ፡ ውስተ ፡ ስሒት ፡ ወይትዐገሱ ፡ እምርኵስ ፡ ዘኢሠምረ ፡ እግዚኣብሔር ፤ ወዝንቱ ፡ ውእቱ ፡ ነገር ፡ ዘኢሠምረ ፡ እግዚኣብሔር ፡ ወርቱዕ ፡ ይትገሐሱ ፡ እምኔሁ ፡ ብእሲ ፡ ብእሲ ፡ ኀበ ፡ ይከውኖ ፡ ዘመዱ ፡ ኢይባእ ፡ ይክሥት ፡ ኀፍረቶ ፤ እስመ ፡ አነ ፡ ውእቱ ፡ እግዚኣብሔር ፡ አምላክክሙ ። ኀፍረተ ፡ አቡከ ፡ ወእምከ ፡ ኢትክሥት ፡ እስመ ፡ እምከ ፡ ይእቲ ፤ ኢትክሥት ፡ ኀፍረተ ፡ ብእሲተ ፡ አቡከ ፡ እስመ ፡ ኀፍረተ ፡ እምከ ፡ ይእቲ ፤ ኀፍረተ ፡ እኅትከ ፡ እንተ ፡ እምነ ፡ አቡከ ፡ አው ፡ እንተ ፡ እምነ ፡ እምከ ፡ ኢትክሥት ፤ እመኒ ፡ እንተ ፡ እምነ ፡ አፍአ ፡ ተወልደት ፡ ሎቱ ፡ ወእመኒ ፡ እንተ ፡ እምአዝማዲከ ፡ ይእቲ ፡ ኢትክሥት ፡ ኀፍረታ ፤ ኀፍረተ ፡ ወለተ ፡ ወልድከ ፡ ኢትክሥት ፡ አው ፡ ኀፍረተ ፡ ወለተ ፡ ወለትከ ፡ ኢትክሥት ፡ እስመ ፡ ኀፍረትከ ፡ ይእቲ ፤ ኀፍረተ ፡ ወለተ ፡ ብእሲተ ፡ አቡከ ፡ ኢትክሥት ፡ እስመ ፡ እኅትከ ፡ ወለተ ፡ እምከ ፡ ይእቲ ፡ ወኢትክሥት ፡ ኀፍረታ ፤ ኀፍረተ ፡ እኅተ ፡ አቡከ ፡ ኢትክሥት ፡ እስመ ፡ ቤተ ፡ አቡከ ፡ ይእቲ ፤ ኀፍረተ ፡ እኅተ ፡ እምከ ፡ ኢትክሥት ፡ እስመ ፡ ቤተ ፡ እምከ ፡ ይእቲ ፤ ኀፍረተ ፡ ብእሲተ ፡ እኁሁ ፡ ለአቡከ ፡ ኢትክሥት ፡ እስመ ፡ ዘመድከ ፡ ይእቲ ፤ ኀፍረተ ፡ ብእሲተ ፡ ወልድከ ፡ ኢትክሥት ፡ እስመ ፡ ብእሲተ ፡ ወልድከ ፡ ይእቲ ፤ ኀፍረተ ፡ ወለትከ ፡ ወብእሲተ ፡ ወልደ ፡ እኁከ ፡ ኢትክሥት ፡ እስመ ፡ ኀፍረትከ ፡ ውእቱ ፤ ኀፍረተ ፡ ብእሲተ ፡ እኁከ ፡ ኢትክሥት ፡ እስመ ፡ ኀፍረተ ፡ እኁከ ፡ ይእቲ ፡ አምጣነ ፡ ሀሎ ፡ ሕያው ፡ እኁከ ፤ ኀፍረተ ፡ ብእሲት ፡ ምስለ ፡ ወለታ ፡ ኢትክሥት ፡ ወኢዘወለተ ፡ ወልዳ ፡ ወኢዘወለተ ፡ ወለታ ፡ ኢትግበር ፡ ከመ ፡ ትክሥት ፡ ኀፍረቶን ፡ ቤትከ ፡ ውእቱ ፡ ወኀጢአት ፡ ውእቱ ፤ ወብእሲተ ፡ ምስለ ፡ እኅታ ፡ ኢታውስብ ፡ ከመ ፡ ታስተቃንዖን ፡ ወከመ ፡ ትክሥት ፡ ኀፍረቶን ፡ ለዛቲኒ ፡ ወዘእንታክቲኒ ፡ እንዘ ፡ ዓዲሃ ፡ ቀዳሚት ፡ ሕያውት ፡ ይእቲ ፤ ወኀበ ፡ ብእሲት ፡ ትክት ፡ ኢትባእ ፡ እንበለ ፡ ትንጻሕ ፡ ከመ ፡ ትክሥት ፡ ኀፍረታ ፡ እንዘ ፡ ዓዲ ፡ ርኵስት ፡ ይእቲ ፤ ወኢትባእ ፡ ኀበ ፡ ብእሲተ ፡ ካልእከ ፡ ከመ ፡ ትስክብ ፡ ምስሌሃ ፡ ወኢትዝራእ ፡ ዘርእከ ፡ ውስቴታ ፤ ወኢታስተፃምድ ፡ ኀበ ፡ መልአከ ፡ ውሉድከ ፡ ከመ ፡ ኢታርኵስ ፡ ስሞ ፡ ለቅዱስ ፡ ስመ ፡ እግዚኣብሔር ፤ ወምስለ ፡ ተባዕት ፡ ኢትስክብ ፡ ከመ ፡ ምስለ ፡ አንስት ፡ እስመ ፡ ርኩስ ፡ ውእቱ ፤ ወኢትሖር ፡ ኀበ ፡ እንስሳ ፡ ወኢትስክብ ፡ ከመ ፡ ታውፅእ ፡ ዘርአከ ፡ ላዕሌሁ ፡ ከመ ፡ ኢትርኰስ ፡ ቦቱ ፡ ወብእሲትኒ ፡ ኢትሖር ፡ ኀበ ፡ እንስሳ ፡ ከመ ፡ ይስክባ ፡ እስመ ፡ ርኵስ ፡ ውእቱ ። ወኢታርኵሱ ፡ ርእሰክሙ ፡ በኵሉ ፡ ዝንቱ ፡ እስመ ፡ ቦቱ ፡ ረኵሱ ፡ አሕዛብ ፡ እለ ፡ አነ ፡ አውፃእክዎሙ ፡ እምቅድሜክሙ ፡ ወበዝንቱ ፡ ኢታርኵሱ ፡ ሥጋክሙ ፤ ወቀድሱ ፡ ነፍሰክሙ ፡ ወሥጋክሙ ፡ ለእግዚኣብሔር ፡ እስመ ፡ ቅዱስ ፡ ውእቱ ፡ ወያፈቅሮሙ ፡ ለእለ ፡ ይቄድሱ ፡ ነፍሶሙ ፡ ወሥጋሆሙ ፡ ሎቱ ፤ እስመ ፡ ቅዱስ ፡ ወግሩም ፡ ወልዑል ፡ ውእቱ ፡ ወመሓሪ ፡ ወመስተሣህል ፡ ውእቱ ፡ ወሎቱ ፡ ይደሉ ፡ ስብሐት ፡ ለዓለመ ፡ ዓለም ፡ አሜን ፠ ፠ ፠