41. Concerning the blessing of Kings
40. How Zadok the priest gave commands to David the King / Kebra Nagast / 41. Concerning the blessing of Kings 42. Concerning the Ten Commandments

፵፩ ፡ በእንተ ፡ በረከተ ፡ ነገሥት ።

 

ወስማዕሂ ፡ ዘይረክበከ ፡ ቡራኬ ፡ ለእመ ፡ ገበርከ ፡ ፈቃዶ ፡ ለእግዚኣብሔር ። ቡሩከ ፡ ትከውን ፡ በኵሉ ፡ ፍናዊከ ፡ ቡሩከ ፡ ትከውን ፡ በሀገር ፡ ቡሩከ ፡ ትከውን ፡ በሐቅል ፤ ቡሩከ ፡ ትከውን ፡ በቤትከ ፡ ቡሩከ ፡ ትከውን ፡ በአፍአከ ፤ ቡሩከ ፡ ይከውን ፡ ፍሬ ፡ ከርሥከ ። ይቤሉ ፡ ጉቡኣን ፡ አሜን ። ቡሩከ ፡ ይከውን ፡ ፍሬ ፡ ምድርከ ። አሜን ። ቡሩከ ፡ ይከውን ፡ አንቅዕተ ፡ ማያቲከ ። አሜን ። ቡሩከ ፡ ይከውን ፡ ፍሬ ፡ አትክልቲከ ። አሜን ። ቡሩከ ፡ ይከውን ፡ ዐጸደ ፡ ላህምከ ፡ ወመራዕየ ፡ አባግዒከ ። አሜን ። ቡሩከ ፡ ይከውን ፡ መዛግብቲከ ፡ ወተረፋቲከ ። አሜን ። ቡሩከ ፡ ትከውን ፡ በበአትከ ። አሜን ። ቡሩከ ፡ ትከውን ፡ በፀአትከ ። አሜን ። ወያገብኦሙ ፡ እግዚኣብሔር ፡ ለፀርከ ፡ ለእለ ፡ ይትቃወሙከ ፡ ይትቀጥቀጡ ፡ በታሕተ ፡ እገሪከ ። አሜን ። ወይፌኑ ፡ እግዚኣብሔር ፡ ውስተ ፡ አብያቲከ ፡ በረከቶ ፡ ወውስተ ፡ ኵሉ ፡ ዘወደይከ ፡ እዴከ ። አሜን ። ወያበዝኀከ ፡ እግዚኣብሔር ፡ ውስተ ፡ ሠናይት ፡ በውሉደ ፡ ከርሥከ ፡ ወበእክለ ፡ ምድርከ ፡ ወበተዋልዶ ፡ እንስሳከ ። አሜን ። ወበምድር ፡ እንተ ፡ መሐለ ፡ ለአበዊከ ፡ ይሁበከ ፡ ከመ ፡ መዋዕለ ፡ ሰማይ ። አሜን ። ወይፈትሕ ፡ ለከ ፡ እግዚኣብሔር ፡ መዝገበ ፡ በረከተ ፡ ሰማያት ፡ ወይሁበከ ፡ ዝናመ ፡ ቡሩከ ፡ ወይባርክ ፡ ለከ ፡ ፍሬ ፡ ተግባርከ ። አሜን ። ወትሌቅሕ ፡ አንተ ፡ ለብዙኃን ፡ አሕዛብ ፡ ወአንተሰ ፡ ኢትትሌቃሕ ። አሜን ። ወትኴንን ፡ አንተ ፡ ለብዙኃን ፡ አሕዛብ ፡ ወለከሰ ፡ ኢይኴንኑከ ፡ አሜን ፡ ወይሠይመከ ፡ እግዚኣብሔር ፡ ውስተ ፡ ርእስ ፡ ወአኮ ፡ ውስተ ፡ ዘነብ ፡ ወትከውን ፡ መልዕልተ ፡ ወአኮ ፡ መትሕተ ። አሜን ። ወታስተጋብእ ፡ እምነ ፡ ኵሉ ፡ በረከተ ፡ ምድር ፡ ለእንስሳከ ፤ ወትነሥእ ፡ በርባረ ፡ እሕዛብ ፡ ለትዕይንትከ ፡ ወይሰግዱ ፡ ለከ ፡ ውስተ ፡ ገጸ ፡ ምድር ፡ ለመንግሥትከ ፡ በእንተ ፡ ዕበየ ፡ ክብርከ ፤ ወይትሌዐል ፡ ክብርከ ፡ ከመ ፡ እርዝ ፡ ወከመ ፡ ኮከበ ፡ ጽባሕ ፡ ብርሃነ ፡ ክብርከ ፡ በቅድመ ፡ ኵሉ ፡ አሕዛበ ፡ ምድር ፡ ወበቅድመ ፡ ኵሉ ፡ ነገደ ፡ ሕዝብከ ፡ እስራኤል ፤ እስመ ፡ እግዚኣብሔርኒ ፡ ይሄሉ ፡ ምስሌከ ፡ በኵሉ ፡ ፍኖትከ ፡ ወይገብር ፡ ፈቃደከ ፡ በኵሉ ፡ ዘኀለይከ ። ወትወርስ ፡ አህጉረ ፡ ፀርከ ፡ ወይትዌደስ ፡ ዕበየ ፡ ሕዝብከ ፡ በብዝኀ ፡ ግርማከ ፡ ወበብዝኀ ፡ ሰራዊትከ ፤ ወይፈርሁከ ፡ ኵሉ ፡ እለ ፡ ኢይገብሩ ፡ ፈቃዶ ፡ ለእግዚኣብሔር ፡ እስመ ፡ አንተ ፡ ትገብር ፡ ፈቃዶ ፡ ወትትለአክ ፡ ሎቱ ፡ ወበእንተዝ ፡ ይሁበከ ፡ ግርማ ፡ ዐቢየ ፡ በቅድመ ፡ እለ ፡ ይሬእዩከ ፤ በአልጕሞ ፡ አፍራሲከ ፡ ወበምጕንጳ ፡ ቀስትከ ፡ ወበአንጸብርቆ ፡ ወልታከ ፡ ይርዕድ ፡ ልቦሙ ፡ ወይሰግዱ ፡ ለከ ፡ ውስተ ፡ ገጸ ፡ ምድር ፡ እስመ ፡ ይደነግፅ ፡ ልቦሙ ፡ በርእየ ፡ ግርማከ ። ወሶበ ፡ ይሬእዩከ ፡ እምርሑቅ ፡ እለ ፡ ውስተ ፡ አድባር ፡ ይወርዱ ፡ ምድረ ፡ ወእለ ፡ ውስተ ፡ አብሕርት ፡ ወቈላት ፡ ይወፅኡ ፡ አፍአ ፡ ከመ ፡ ያግብኦሙ ፡ እግዚኣብሔር ፡ ውስተ ፡ እዴከ ፡ በእንተ ፡ ዘዐለዉ ፡ ትእዛዘ ፡ እግዚኣብሔር ። ወአንተሰ ፡ ሶበ ፡ ትገብር ፡ ፈቃዶ ፡ ኵሎ ፡ ዘሰአልከ ፡ ትነሥእ ፡ በኀቤሁ ፤ እስመ ፡ ለእመ ፡ አፍቀርኮ ፡ ያፈቅረከ ፡ ወለእመ ፡ ዐቀብከ ፡ ትእዛዞ ፡ ይሁበከ ፡ ስእለተ ፡ ልብከ ፡ ወኵሎ ፡ ዘኀሠሥከ ፡ ትነሥእ ፡ በኀቤሁ ። እስመ ፡ ኄር ፡ ለኄራን ፡ ወየዋህ ፡ ለየዋሃን ፡ ውእቱ ፡ ወይገብር ፡ ፈቃዶሙ ፡ ለእለ ፡ ይፈርህዎ ፡ ወይሁቦሙ ፡ ዐስበ ፡ ለእለ ፡ ይትዔገሥዎ ፤ ተዐገሳ ፡ ለመዐት ፡ ወድኅረ ፡ ታስተፌሥሐከ ፡ ወአፍቅራ ፡ ለጽድቅ ፡ ወትፈሪ ፡ ለከ ፡ ሕይወት ፤ ኩን ፡ ኄረ ፡ ለኄራን ፡ ወመገሥጸ ፡ ለመአብሳን ፡ ወአኅድጎ ፡ እኪት ፡ ለእኩይ ፡ በገሥጾ ፡ ወበአርትዖ ፡ ወበአርስሖ ፡ ወበአኅስሮ ፡ ለዘ ፡ ይዔምፅ ፡ ቢጾ ፡ በእኩይ ፡ በውስተ ፡ ዐውደ ፡ ቅሥት ፤ ወፍታሕ ፡ ለነዳይ ፡ ወለእጓለ ፡ ማውታ ፡ ወአንግፎ ፡ እምእደ ፡ ዘይዔምፆ ፤ ወአድኅን ፡ ባሕታዌ ፡ ወጽኑሰ ፡ ወአንግፎ ፡ እምእደ ፡ ዘይትዔገሎ ። ወኢትፍታሕ ፡ በአድልዎ ፡ ወበነሢአ ፡ ገጽ ፡ አላ ፡ በጽድቅ ፡ ፍታሕ ፤ ወኢታፍቅር ፡ ሕልያነ ፡ በነሢአ ፡ ፍትሕ ፡ በአድልዎ ፡ ለገጽ ፤ ወለመኳንንቲከኒ ፡ ገሥጾሙ ፡ ከመ ፡ ይኩኑ ፡ ንጹሓነ ፡ እምሕልያን ፡ ወኢያድልዉ ፡ ፍትሐ ፡ ለገጸ ፡ ፍቁራኒሆሙ ፡ ወኢለጸላኢሆሙ ፤ ወኢለአብዕልቲሆሙ ፡ ወኢለነዳያኒሆሙ ፤ አላ ፡ በጽድቅ ፡ ኵነኔ ፡ ይኴንኑ ፡ ቢጾሙ ፡ በርቱዕ ፡ ፍትሕ ፠ ፠ ፠