37. How Solomon asked His Son Questions
36. How King Solomon held intercourse with his son / Kebra Nagast / 37. How Solomon asked His Son Questions 38. How the King planned to send away his son with the children

፴፯ ፡ ኀበ ፡ ተስእሎ ፡ ሰሎሞን ፡ ለወልዱ ።

 

ወካዕበ ፡ ነገሮ ፡ እንተ ፡ ባሕቲቱ ፡ ሰሎሞን ፡ ወይቤሎ ፡ ለወልዱ ፡ ለምንት ፡ ትፈቅድ ፡ ከመ ፡ ትርሐቅ ፡ እምኔየ ፡ ምንተ ፡ ኀጣእከ ፡ ከመ ፡ ትሖር ፡ ብሔር ፡ አረሚ ፡ ወምንት ፡ አጽሀቀከ ፡ ከመ ፡ ትኅድግ ፡ መንግሥተ ፡ እስራኤል ። አውሥአ ፡ ወልዱ ፡ ወይቤሎ ፡ ኢይከውነኒ ፡ እንበር ፡ ዝየ ፡ አላ ፡ እሖርኀበ ፡ እምየ ፡ እንዘ ፡ አንተ ፡ ትድኅረኒ ፤ እስመ ፡ ብከ ፡ ወልደ ፡ ዘይኄይስ ፡ እምኔየ ፡ ኢዮርብዓም ፡ ዘተወልደ ፡ በሕግ ፡ እምብእሲትከ ፡ ወእምየሰ ፡ ኢኮነት ፡ እንቲአከ ፡ ብእሲተ ፡ ዘበሕግ ። አውሥአ ፡ ንጉሥ ፡ ወይቤሎ ፡ ወለእመ ፡ ትቤ ፡ ከመዝ ፡ አነሂ ፡ ኢኮንኩ ፡ ዘበሕግ ፡ ውሉዶ ፡ ለአቡየ ፡ ዳዊት ፡ እስመ ፡ ነሥአ ፡ ብእሲተ ፡ ባዕድ ፡ ወአቅተሎ ፡ ኪያሁኒ ፡ በውስተ ፡ ፀብእ ፡ ወወለደኒ ፡ ኪያየ ፡ እምኔሃ ፡ እስመ ፡ እግዚኣብሔር ፡ መሓሪ ፡ ሰረየ ፡ ሎቱ ፤ ወመኑ ፡ ዘየአኪ ፡ ወየአብድ ፡ እምነ ፡ እጓለ ፡ እመሕያው ፡ ወመኑ ፡ ዘይምሕር ፡ ወይጠብብ ፡ ከመ ፡ እግዚኣብሔር ፤ ሊተኒ ፡ እምአቡየ ፡ ወለከኒ ፡ እምኔየ ፡ ገብረ ፡ እግዚኣብሔር ፡ በከመ ፡ ፈቀደ ። ወአንተሰ ፡ አወልድየ ፡ ፍርሆ ፡ ለእግዚኣብሔር ፡ አምላክነ ፡ ኢትግፋዕ ፡ ገጸ ፡ አቡከ ፡ ከመ ፡ ኢትርከብከ ፡ በደኃሪ ፡ ግፍዕ ፡ እምነ ፡ ዘይወፅእ ፡ እምነ ፡ ሐቌከ ፡ ወከመ ፡ ይሠኒ ፡ ዘርእከ ፡ በዲበ ፡ ምድር ። ወውእቱሰ ፡ ኢዮርብዓም ፡ ሕፃን ፡ ዘ፮ ፡ ዓም ፡ ወአንተ ፡ ቀዳሜ ፡ በኵርየ ፡ ወበጻሕከ ፡ ለነጊሥ ፡ ወአንሥአ ፡ ኲናቶ ፡ ለዘ ፡ ወለደከ ። ወአንሰ ፡ ነዋ ፡ ፳ወ፱ ፡ ዓመት ፡ እምዘ ፡ ነገሥኩ ፡ ወበሳብዕ ፡ ዓመተ ፡ መንግሥትየ ፡ መጽአት ፡ እምከ ፡ ኀቤየ ፡ ወለእመ ፡ ፈቀደ ፡ እግዚኣብሔር ፡ ያበጽሐኒ ፡ ኀበ ፡ አምጣነ ፡ መዋዕለ ፡ አቡየ ፤ ወእምከመ ፡ ተወሰኩ ፡ ኀበ ፡ አበዊየ ፡ ወትነብር ፡ አንተ ፡ ዲበ ፡ መንበርየ ፡ ውትነግሥ ፡ አንተ ፡ ህየንቴየ ፡ ወሊቃውንተ ፡ እስራኤልኒ ፡ ፈድፋደ ፡ ያፈቅሩከ ፤ ወእገብር ፡ ለከ ፡ ከብካበ ፡ ወእሁበከ ፡ ንግሥታተ ፡ ወዕቁባተ ፡ መጠነ ፡ ፈቀድከ ፤ ወትትባረክ ፡ በዛቲ ፡ ምድረ ፡ ርስት ፡ ቡርክት ፡ እንተ ፡ ወሀበ ፡ እግዚኣብሔር ፡ ለአበዊነ ፡ በከመ ፡ ተካየደ ፡ ምለለ ፡ ኖሕ ፡ ገብሩ ፡ ወምስለ ፡ አብርሃም ፡ ፍቁሩ ፡ ወጻድቃን ፡ ደቂቆሙ ፡ እምድኅሬሆሙ ፡ እለከ ፡ ዳዊት ፡ አቡየ ፤ ወትሬእየኒ ፡ አነ ፡ ድኩም ፡ ዲበ ፡ መንበሮሙ ፡ ለአበዊየ ፡ ወትከውን ፡ ከማየ ፡ እምድኅሬየ ፡ ወትኴንን ፡ አሕዛበ ፡ ዘአልቦ ፡ ኆልቈ ፡ ወአንጋደ ፡ ዘአልቦ ፡ መስፈርተ ፤ ወታቦተ ፡ አምላከ ፡ እለራኤልኒ ፡ ለከ ፡ ወለዘርእከ ፡ ውእቱ ፡ ኀበ ፡ ትገብር ፡ ምሥዋዐ ፡ ወታዐርግ ፡ ጸሎተ ፡ ወእግዚኣብሔር ፡ የኀድር ፡ ውለቴታ ፡ ለዝሉፉ ፡ ወይሰምዕ ፡ ጸሎትከ ፡ በውለቴታ ፡ ወትገብር ፡ ሥምረቶ ፡ ለእግዚኣብሔር ፡ በውለቴታ ፡ ወዝክርከኒ ፡ ለትውልደ ፡ ትውልድ ፡ በማእከላ ፠ ወአውሥአ ፡ ወልዱ ፡ ወይቤሎ ፡ ኦእግዚእየ ፡ ኢይከውነኒ ፡ እኅድግ ፡ ብሔርየ ፡ ወእምየ ፡ እስመ ፡ አምሕሎ ፡ አምሐለተኒ ፡ እምየ ፡ በአጥባቲሃ ፡ ከመ ፡ ኢይቁም ፡ ዝየ ፡ አላ ፡ እግባእ ፡ ኀቤሃ ፡ ፍጡነ ፡ ወበዝየኒ ፡ ኢያውለብ ፡ ብእሲተ ፤ ወታቦተ ፡ አምላከ ፡ እለራኤልሂ ፡ ትባርከኒ ፡ በኀበ ፡ ሀለውኩ ፡ ወጸሎትከኒ ፡ ትትልወኒ ፡ በኀበ ፡ ሖርኩ ፡ እስመ ፡ ፈተውኩ ፡ እርአይ ፡ ገጸከ ፡ ወእለማዕ ፡ ቃለከ ፡ ወእንሣእ ፡ በረከትከ ፡ ወእሖር ፡ ኀበ ፡ እምየ ፡ በዳኅን ፠ ፠ ፠