36. How King Solomon held intercourse with his son
35. How King Solomon sent to his son the commander of his army / Kebra Nagast / 36. How King Solomon held intercourse with his son 37. How Solomon asked His Son Questions

፴፮ ፡ ኀበ ፡ ተራከበ ፡ ምስለ ፡ ወልዱ ፡ ንጉሥ ፡ ሰሎሞን ።

 

ወወፅአ ፡ ኢዮአስ ፡ ወልደ ፡ ዮዳሔ ፡ ወአብኦ ። ወሶበ ፡ ርእዮ ፡ ንጉሥ ፡ ሰሎሞን ፡ ተንሥአ ፡ ወተቀበሎ ፡ ወፈትሐ ፡ መዝግሐ ፡ ልብሱ ፡ እመትከፍቱ ፡ ወሐቀፎ ፡ በእደዊሁ ፡ ዲበ ፡ እንግድዓሁ ፡ ወሰዐሞ ፡ አፉሁ ፡ ወፍጽሞ ፡ ወአዕይንቲሁ ፡ ወይቤሎ ፡ ናሁ ፡ አቡየ ፡ ዳዊት ፡ ተሐዲሶ ፡ በውርዙቱ ፡ ተንሥአ ፡ እምነ ፡ ሙታን ፤ ወተመይጠ ፡ ኀበ ፡ እለ ፡ ዜነውዎ ፡ ወይቤሎሙ ፡ ትቤሉኒ ፡ ይመስል ፡ ኪያከ ፡ ወዝንቱ ፡ አኮ ፡ ማኅፈድየ ፡ አላ ፡ ማኅፈደ ፡ ዳዊት ፡ አቡየ ፡ እመ ፡ መዋዕለ ፡ ውርዙቱ ፡ ወፈድፋደ ፡ ይሤኒ ፡ እምኔየ ። ወተንሥአ ፡ ሶቤሃ ፡ ወቦአ ፡ ውስተ ፡ ማኅደሩ ፡ ወአልበሶ ፡ ዲባጋተ ፡ ዘወርቅ ፡ ወቅናተ ፡ ዘወርቅ ፡ ወአክሊለ ፡ ዲበ ፡ ርእሱ ፡ ወሕልቀተ ፡ ውስተ ፡ አጽባዕቱ ፡ ወአልበሶ ፡ አልባሰ ፡ ክብር ፡ ዘየሀይድ ፡ አዕይንተ ፡ ወአንበሮ ፡ ዲበ ፡ መንበሩ ፡ ዘይትዐረይ ፡ ምስሌሁ ፤ ወይቤሎሙ ፡ ለመኳንንተ ፡ እስራኤል ፡ ዘትትሐመዩ ፡ በበይናቲክሙ ፡ ወትብሉኒ ፡ ከመ ፡ አልብየ ፡ ውሉደ ፡ ርእዩ ፡ ዝንቱ ፡ ውሉድየ ፡ ፍሬ ፡ ዘወፅአ ፡ እምከርሥየ ፡ ዘወሀበኒ ፡ እግዚኣብሔር ፡ አምላከ ፡ እስራኤል ፡ እምዘ ፡ ኢተሐዘብኩ ። አውሥእዎ ፡ መኳንንቲሁ ፡ ወይብልዎ ፡ ትኩን ፡ ቡርክት ፡ እም ፡ እንተ ፡ ወለደቶ ፡ ለዝንቱ ፡ ወሬዛ ፡ ወትኩን ፡ ቡርክት ፡ ዕለት ፡ እንተ ፡ ተደመርከ ፡ ምስሌሃ ፡ ለእመ ፡ ዝንቱ ፡ ወሬዛ ፤ እስመ ፡ ሠረቀ ፡ ላዕሌነ ፡ እምሥርወ ፡ እሴይ ፡ ብእሲ ፡ ብሩህ ፡ ዘይከውን ፡ ንጉሠ ፡ ለዘመደ ፡ ዘመድነ ፤ እምዘርኡ ፡ ዘኢየሐትቱ ፡ እቡሁ ፡ ወኢይብሉ ፡ እምአይቴ ፡ ምጽአቱ ፡ ዘበአማን ፡ እስራኤላዊ ፡ እምዘርአ ፡ ዳዊት ፡ በአምሳለ ፡ መልክአ ፡ ራእዩ ፡ ለእቡሁ ፡ ተልሕኰ ፡ ፍጹመ ፤ ወንሕነኒ ፡ አግብርቲሁ ፡ ይኩነነ ፡ ንጉሠ ፤ ወአብኡ ፡ ሎቱ ፡ አምኃ ፡ በበ ፡ ዕበዮሙ ። ወወሰደ ፡ ለአቡሁ ፡ ይእተ ፡ ሕልቀተ ፡ እንተ ፡ ወሀበቶ ፡ እሙ ፡ በባሕቲቶሙ ፡ ወይቤሎ ፡ ለአቡሁ ፡ ንሣእአ ፡ ዘንተ ፡ ሕልቀተ ፡ ወተዘከር ፡ ዘንተ ፡ ነገረ ፡ ዘተናገርከ ፡ ምስለ ፡ ንግሥት ፤ ወሀበነአ ፡ እምዘፈረ ፡ ልብሳ ፡ ለታቦተ ፡ ሕጉ ፡ ለእግዚኣብሔር ፡ ከመ ፡ ንስግድ ፡ ላቲ ፡ በኵሉ ፡ መዋዕሊነ ፡ ኵሎሙ ፡ እለ ፡ እምታሕቴነ ፡ ወእለ ፡ እምውስተ ፡ መንግሥተ ፡ ንግሥት ። አውሥኦ ፡ ንጉሥ ፡ ወይቤሎ ፡ ለምንት ፡ ትሁበኒ ፡ ሕልቀተ ፡ ትእምርተ ፤ ዘእንበለ ፡ ተሀበኒ ፡ ትእምርተ ፡ ረከብኩ ፡ እምሳልየ ፡ መልክእከ ፡ እስመ ፡ እንተ ፡ ወልድየ ፡ በእማን ፠ ወካዕበ ፡ ይቤሎ ፡ ነጋዲ ፡ ተምሪን ፡ ስማዕ ፡ ኦንጉሥ ፡ ዘለአከተኒ ፡ እመትከ ፡ ንግሥት ፡ እግዝእትየ ፡ ለዝንቱ ፡ ሕፃን ፡ ቅብኦ ፡ ወቀድሶ ፡ ወባርኮ ፡ ወእንግሦእ ፡ ለብሔርነ ፡ ወአዝዝአ ፡ ከመ ፡ ኢትንገሥ ፡ ብእሲት ፡ ለዓለመ ፡ ዓለም ፡ ወፈንዎእ ፡ በሰላም ፤ ወሰላም ፡ ለዕዘዘ ፡ መንግሥትከ ፡ ወለጥበብከ ፡ ብርህት ፤ ወአንሰው ፡ ኢፈቀድኩ ፡ ከመ ፡ ይምጻእ ፡ ዝየ ፡ አላ ፡ አጽሐበኒ ፡ ፈድፋደ ፡ ከመ ፡ ይምጻእ ፡ ኀቤከ ፤ ወአንሰ ፡ ፈራህኩ ፡ ሎቱ ፡ ከመ ፡ እመቦ ፡ ኢይድወይ ፡ በፍኖት ፡ አው ፡ በጽምአ ፡ ማይ ፡ አው ፡ በሐሩረ ፡ ፀሐይ ፡ ወኢያውርድ ፡ ርሥኣንየ ፡ ውስተ ፡ መቃብር ፡ በሐዘን ፤ ወተማሕፀንኩ ፡ በጽዮን ፡ ቅድስት ፡ ሰማያዊት ፡ ታቦተ ፡ ሕጉ ፡ ለእግዚኣብሔር ፡ ከመ ፡ ኢትክልኦ ፡ በጥበብከ ፤ እስመ ፡ መኳንንቲከ ፡ ኢይክሉ ፡ አቲወ ፡ ቤቶሙ ፡ ወነጽሮ ፡ ውሉዶሙ ፡ እምብዝኀ ፡ ጥበብ ፡ ወመባልዕት ፡ ዘትሁቦሙ ፡ መፍቅዶሙ ፡ እንዘ ፡ ይብሉ ፡ ይኄይሰነ ፡ ማእደ ፡ ሰሎሞን ፡ እምንትፈሣሕ ፡ ወንደለው ፡ በውስተ ፡ አብያቲነ ፤ ወበእንተዝ ፡ አነ ፡ ፈሪህየ ፡ ተማሕፀንኩ ፡ ከመ ፡ ኢታቅሞ ፡ ኀቤከ ፡ አላ ፡ ከመ ፡ ትፈንዎ ፡ ኀቤየ ፡ በሰላም ፡ ዘእንበለ ፡ ደዌ ፡ ወሕማም ፡ በፍቅር ፡ ወበሰላም ፡ ከመ ፡ ይትፈሣሕ ፡ ልብየ ፡ በረኪቦትከ ፠ እውሥአ ፡ ንጉሥ ፡ ወይቤሎ ፡ ምንተ ፡ ባቲ ፡ ላዕለ ፡ ወልድ ፡ ለብእሲት ፡ ዘእንበለ ፡ ዘተሐምም ፡ ወተሐዕን ፡ ወለት ፡ ለእም ፡ ወወልድ ፡ ለአብ ፤ ወእግዚኣብሔር ፡ ረገማ ፡ ለሔዋን ፡ እንዘ ፡ ይብል ፡ ለዲ ፡ በጻዕር ፡ ወበሐዘነ ፡ ልብ ፡ ወወሊደኪ ፡ ምግባኢኪ ፡ ኀበ ፡ ምትኪ ፤ በማሕላ ፡ ለዲ ፡ ወምሒለኪ ፡ ምግባኢኪ ፡ ኀበ ፡ ምትኪ ፤ ወዝንቱሰ ፡ ወልድየ ፡ ኢይሁባ ፡ ለንግሥት ፡ አላ ፡ ኣነግሦ ፡ ላዕለ ፡ እስራኤል ፡ እስመ ፡ ዝንቱ ፡ በኵርየ ፡ ቀዳሜ ፡ በትርየ ፡ ዘወሀበኒ ፡ እግዚኣብሔር ። ወእምዝ ፡ ይልእክ ፡ ሎቱ ፡ ሰርከ ፡ ወነግሀ ፡ ሠናየመባልዕተ ፡ ወአልባሰ ፡ ክቡረ ፡ ወርቀ ፡ ወብሩረ ፡ ወይብሎ ፡ እስመ ፡ ይኄይስ ፡ ዝየ ፡ ንብረት ፡ ውስተ ፡ ብሔርነ ፡ ኀበ ፡ ሀለወ ፡ ቤተ ፡ እግዚኣብሔር ፡ ወኀበ ፡ ሀለወት ፡ ታቦተ ፡ ሕጉ ፡ ለእግዚኣብሔር ፡ ወኀበ ፡ የኀድር ፡ እግዚኣብሔር ፡ ምስሌነ ፤ ወውእቱኒ ፡ ይልእክ ፡ ወልዱ ፡ እንዘ ፡ ይብል ፡ ወርቅሰአ ፡ ወብሩር ፡ ወአልባስ ፡ ኢተኀጥአ ፡ እምብሔርነ ፡ ወባሕቱ ፡ አነ ፡ መጻእኩ ፡ ከመ ፡ እስማዕ ፡ ጥበብከ ፡ ወእርአይ ፡ ገጸከ ፡ ወአአምኅ ፡ ኪያከ ፡ ወእግነይ ፡ ለመንግሥትከ ፡ ወእስግድ ፡ ለከ ፡ ወሊተኒ ፡ ትፈንወኒ ፡ ኀበ ፡ እምየ ፡ ወብሔርየ ፤ እስመ ፡ አልቦ ፡ ዘይጸልእ ፡ ኀበ ፡ ተወልደ ፡ ወነገረ ፡ ብሔሩ ፡ ያፈቅር ፡ ኵሉ ፤ ወአንሰአ ፡ ለእመኒ ፡ ወሀብከኒ ፡ ጥዑመ ፡ መባልዕተ ፡ ኢያፈቅር ፡ ወኢይኤድሞ ፡ ለሥጋየ ፡ አላ ፡ ይኤድመኒ ፡ በዘ ፡ ተመሀርኩ ፡ ወልህቁ ፡ መባልዕት ፤ ወእመኒ ፡ አደመኒ ፡ ብሔር ፡ በአምሳለ ፡ ገነት ፡ ኢይኤድሞ ፡ ለልብየ ፡ ይኄይሰኒ ፡ አድባረ ፡ ምድራ ፡ ለእምየ ፡ ኀበ ፡ ተወለድኩ ፤ ወታቦተ ፡ አምላከ ፡ እስራኤልሂ ፡ ለእመ ፡ ገነይኩ ፡ ላቲ ፡ በኀበ ፡ ሀለውኩ ፡ ታከብረኒ ፡ ወቤተ ፡ እግዚኣብሔር ፡ ዘሐነጽከ ፡ ኣነጽር ፡ ላቲ ፡ ወእሠውዕ ፡ ወእትጋነይ ፡ በኀበ ፡ ሀለውኩ ፤ ወለጽዮንሂ ፡ ታቦተ ፡ ሕጉ ፡ ለእግዚኣብሔር ፡ ሀበኒ ፡ ዘፈረ ፡ ልብሳ ፡ ወእሰግድ ፡ ላቲ ፡ ምስለ ፡ እምየ ፡ ወኵሉ ፡ ዘእምታሕተ ፡ መንግሥትነ ። እስመ ፡ ቀዲሙኒ ፡ እግዝእትየ ፡ ንግሥት ፡ ሠረወቶሙ ፡ ለኵሎሙ ፡ እለ ፡ ያመልኩ ፡ ጣዖታተ ፡ ወእለ ፡ ይሰግዱ ፡ ለባዕድ ፡ ወለአእባን ፡ ወለአዕዋም ፡ ወሠረወቶሙ ፡ ወአግብአቶሙ ፡ ኀበ ፡ ጽዮን ፡ ታቦተ ፡ ሕጉ ፡ ለእግዚኣብሔር ፤ እስመ ፡ ሰምዐት ፡ በኀቤከ ፡ ወተምህረት ፡ ወገብረት ፡ በከመ ፡ ነገርከ ፡ ወአምላክናሁ ፡ ለእግዚኣብሔር ። ወበዝ ፡ ኵሉ ፡ ስእነ ፡ ኦሆ ፡ አብሎቶ ፡ ለወልዱ ፠ ፠ ፠