34. How the young man arrived in his mother's country
33. How the King of Ethiopia travelled / Kebra Nagast / 34. How the young man arrived in his mother's country 35. How King Solomon sent to his son the commander of his army

፴፬ ፡ ዘከመ ፡ በጽሐ ፡ ብሔረ ፡ እሙ ።

 

ወሶበ ፡ በጽሐ ፡ ሀገረ ፡ እሙ ፡ ተፈሥሐ ፡ በህየ ፡ በክብር ፡ ወበአምኃ ፤ ወሶበ ፡ ርእይዎ ፡ መሰሎሙ ፡ ፍጹመ ፡ ሰሎሞን ፡ ንጉሥ ፡ ወሰገዱ ፡ ሎቱ ፡ ወይቤልዎ ፡ ባሐ ፡ ሕየው ፡ አበ ፡ ነጋሣ ፡ ወያበውኡ ፡ ሎቱ ፡ አምኃ ፡ ወጋዳ ፡ ወመጋዝአ ፡ ወምሳሓተ ፡ ከመ ፡ ንጉሦሙ ፤ ወተሀውከት ፡ ኵላ ፡ ብሔረ ፡ ጋዛ ፡ እስከ ፡ ደወለ ፡ ይሁዳ ፡ እንዘ ፡ ይብሉ ፡ ዝንቱ ፡ ውእቱ ፡ ንጉሥ ፡ ሰሎሞን ። ወቦ ፡ ዘይቤ ፡ ንጉሥሰ ፡ ሀለወ ፡ በኢየሩሳሌም ፡ የሐንጽ ፡ ቤቶ ፤ እስመ ፡ ፈጸመ ፡ ሐኒጸ ፡ ቤተ ፡ እግዚኣብሔር ፤ ወቦ ፡ እለ ፡ ይቤሉ ፡ ዝንቱ ፡ ውእቱ ፡ ሰሎሞን ፡ ንጉሥ ፡ ወልደ ፡ ዳዊት ። ወተሀውኩ ፡ ወተጋአዙ ፡ ወፈነዉ ፡ መባርዲን ፤ ሰብአ ፡ አፍራስ ፤ እለ ፡ የኀሥሥዎ ፡ ለንጉሥ ፡ ሰሎሞን ፡ እመ ፡ ጥዩቀ ፡ ህየ ፡ ሀሎ ፡ ወእመ ፡ ሀሎ ፡ ምስሌሆሙ ። ወበጽሑ ፡ መባርዲን ፡ ዐቀብተ ፡ ሀገረ ፡ ኢየሩሳሌም ፡ ወረከብዎ ፡ ለሰሎሞን ፡ ንጉሥ ፡ ህየ ፡ ወሰገዱ ፡ ሎቱ ፡ ወይቤል ፤ ባሕ ፡ ሕየው ፡ አበ ፡ ነጋሢ ፡ ሀገርሰ ፡ ተሀውከት ፡ በእንተ ፡ ዘመጽአ ፡ ፩ ፡ ነጋዲ ፡ ዘይመስል ፡ አርአያከ ፡ ወአምሳሊከ ፡ ዘእንበለ ፡ ሕፀት ፡ ወብዕድና ፤ ኪያከ ፡ ይመስል ፡ በጸዳል ፡ ወበሥን ፡ በቆም ፡ ወበኅይስና ፡ ዘእንበለ ፡ ጥልቀት ፡ ወተባዕዶ ፤ አዕይንቲሁ ፡ ፍሡሓት ፡ ከመዘ ፡ ሰክረ ፡ ወይነ ፡ ወአቍያጺሁኒ ፡ ቈጢጣን ፡ ወማኅፈደ ፡ ክሳዱኒ ፡ ከመ ፡ ማኅፈደ ፡ ዳዊት ፡ አቡከ ፡ ወኪያከ ፡ ይመስል ፡ በኵሉ ፡ ፍጹም ፡ አባል ፡ ዘይትማሰለከ ፠ አውሥአ ፡ ንጉሥ ፡ ወይቤሎሙ ፡ አይቴኬ ፡ ውእቱ ፡ ይፈቅድ ፡ ሐዊረ ። አውሥኡ ፡ ወይቤል ፡ ለሊሁሰ ፡ ኢሐተትናሁ ፡ እስመ ፡ ግሩም ፡ ከማከ ፤ ወእሊአሁሰ ፡ ይቤሉ ፡ ሶበ ፡ ተስእልናሆሙ ፡ ወንቤሎሙ ፡ እምአይቴ ፡ መጻእክሙ ፡ ወአይቴ ፡ ተሐውሩ ፡ ወይቤሉነ ፡ መጻእነ ፡ እምአድያመ ፡ ህንደኬ ፡ ወኢትዮጵያ ፡ ወነሐውር ፡ ብሔረ ፡ ይሁዳ ፡ ኀበ ፡ ሰሎሞን ፡ ንጉሥ ። ወሶበ ፡ ሰምዐ ፡ ዘንተ ፡ ንጉሥ ፡ ሰሎሞን ፡ ተሀውከ ፡ ልቡ ፡ ወተሐሠየ ፡ በመንፈሱ ፡ እስመ ፡ አልቦ ፡ ውሉደ ፡ በውእቱ ፡ መዋዕል ፡ ዘእንበለ ፡ ሕፃን ፡ ዘ፯ ፡ ዓም ፡ ዘስሙ ፡ ኢዮርብዓም ፤ በከመ ፡ ዘከረ ፡ ጳውሎስ ፡ ወይቤ ፡ እስመ ፡ አእበዳ ፡ እግዚኣብሔር ፡ ለጥበበ ፡ ዝዓለም ፡ ዘመከረ ፡ በጥበቡ ። ወይቤ ፡ እም፲፻ ፡ አንስት ፡ እወልድ ፡ ፲፻ ፡ ተባዕተ ፡ ወእወርስ ፡ አህጉረ ፡ ፀር ፡ ወኣመዘብር ፡ ጣዖታተ ፤ ወኢወሀቦ ፡ ዘእንበለ ፡ ፫ ፡ ደቂቅ ፤ ዘይልህቅ ፡ ወልዱ ፡ ንጉሠ ፡ ኢትዮጵያ ፡ ወልዳ ፡ ለንግሥተ ፡ ኢትዮጵያ ፡ በኵር ፡ ውእቱ ፡ ዘይቤ ፡ በትንቢት ፡ መሐለ ፡ እግዚኣብሔር ፡ ለዳዊት ፡ በጽድቅ ፡ ወኢይኔስሕ ፡ ከመ ፡ እምፍሬ ፡ ከርሥከ ፡ ኣነብር ፡ ዲበ ፡ መንበርከ ፤ ወወሀቦ ፡ እግዚኣብሔር ፡ ሞገሰ ፡ በቅድሜሁ ፡ ለዳዊት ፡ ገብሩ ፡ ወወሀቦ ፡ ዘይነብር ፡ ዲበ ፡ መንበረ ፡ መለኮት ፡ እምዘርኡ ፡ በሥጋ ፡ እምድንግል ፡ ወይኴንን ፡ ሕያዋነ ፡ ወሙታነ ፡ ወይፈድዮ ፡ ለኵሉ ፡ በከመ ፡ ምግባሩ ፡ ዘሎቱ ፡ ይደሉ ፡ ስብሐት ፡ ለእግዚእነ ፡ ኢየሱስ ፡ ክርስቶስ ፡ ለዓለመ ፡ ዓለም ፡ አሜን ፤ ወበምድርኒ ፡ ወሀቦ ፡ ዘይከውን ፡ ንጉሠ ፡ ዲበ ፡ ታቦተ ፡ ሕጉ ፡ ጽዮን ፡ ቅድስት ፡ ሰማያዊት ፡ ዘውእቱ ፡ ንጉሠ ፡ ኢትዮጵያ ፤ ወእለሰ ፡ ይነግሡ ፡ እለ ፡ ኢኮኑ ፡ እስራኤል ፡ ተዐድዎ ፡ ሕግ ፡ ወትእዛዝ ፡ ዘኢሠምረ ፡ እግዚኣብሔር ፠ ፠ ፠