33. How the King of Ethiopia travelled
32. How the Queen brought forth and came to her own Country / Kebra Nagast / 33. How the King of Ethiopia travelled 34. How the young man arrived in his mother's country

፴፫ ፡ ዘከመ ፡ ወረደ ፡ ንጉሠ ፡ ኢትዮጵያ ።

 

ወጸውዐቶ ፡ ለተምሪን ፡ ሊቀ ፡ ነጋድያኒሃ ፡ ወትቤሎ ፡ ተደለው ፡ ለመንግድከ ፡ ወውስዶ ፡ ለዝንቱ ፡ ወልድ ፡ እስመ ፡ አጽሐበኒ ፡ ሌሊተ ፡ ወመዐልተ ፡ ፈድፋደ ፡ በሕቁ ፤ ወታበጽሖ ፡ ኀበ ፡ ንጉሥ ፡ ወታገብኦ ፡ በዳኅን ፡ ዝየ ፡ ለእመ ፡ ሠምረ ፡ እግዚኣብሔር ፡ አምላከ ፡ እስራኤል ። ወተደለወት ፡ ሥንቀ ፡ በከመ ፡ ብዕሎሙ ፡ ወክብሮሙ ፡ ወኵሎ ፡ ንዋየ ፡ ዘይትፈቀድ ፡ ለፍኖት ፡ ወዘይትወሀብ ፡ አምኃ ፡ ለንጉሥ ፡ ወዘይከውን ፡ ዕረፍተ ፡ ለፍኖት ፤ ወአስተዳለወት ፡ ኵሎ ፡ ከመ ፡ ትፈንዎ ፡ ወወሀበት ፡ ለኳንንትኒ ፡ እለ ፡ የሐውሩ ፡ ምስሌሁ ፡ ወወሀበቶሙ ፡ ብዙኀ ፡ ንዋየ ፡ ዘይትፈቀድ ፡ ለፍኖት ። ወአዘዘቶሙ ፡ ከመ ፡ ኢይኅድግዎ ፡ ህየ ፡ ለወልዳ ፡ አላ ፡ ባሕቱ ፡ ያገብርዎ ፡ ለንጉሥ ፡ ወያግብእዎ ፡ ኀቤሃ ፡ ወከመ ፡ ይሢም ፡ መንግሥተኒ ፡ ለብሔራ ፠ እስመ ፡ ኮነ ፡ ሥርዐታ ፡ ለብሔረ ፡ ኢትዮጵያ ፡ ትነግሥ ፡ ብእሲት ፡ ድንግል ፡ እንተ ፡ ኢያውሰበት ፡ ብእሴ ፤ ወትቤ ፡ እምይእዜሰአ ፡ ይንገሥአ ፡ ተባዕትአ ፡ እምዘመድከአ ፡ ወኢትንገሥአ ፡ ብእሲትአ ፡ ለዓለምአ ፡ ዘእንበለ ፡ ዝንቱ ፡ ዘመድከአ ፡ ወዘርኡ ፡ ለትውልደ ፡ ትውልድ ፤ ወትልክኣ ፡ ኀበ ፡ መጽሐፈ ፡ ጦማር ፡ ውስተ ፡ መጽሐፈ ፡ ነቢያቲሆሙ ፡ ዘብርት ፡ ወታነብራ ፡ ውስተ ፡ ቤተ ፡ እግዚኣብሔር ፡ ዘተሐንጽ ፡ ለተዝካር ፡ ወለትንቢት ፡ ለደኃሪ ፡ መዋዕል ፤ ወከመ ፡ ኢይስግዱ ፡ ለፀሐይ ፡ ወለሰርጐ ፡ ሰማይ ፡ ወኢለአድባር ፡ ወአዕዋም ፡ ወኢለአእባን ፡ ወለዕፀወ ፡ ገዳም ፡ ወኢለቀላያት ፡ ወለዘ ፡ ውስተ ፡ ማይ ፡ ወኢለግልፈዋት ፡ ወአምሳለ ፡ ወርቅ ፡ ወኢለአዕዋፍ ፡ ዘይሰርር ፡ ወኢይጠየሩ ፡ ቦሙ ፡ ወኢያምልክዎሙ ፤ ወትንበርአ ፡ ዛቲ ፡ ሥርዐት ፡ ለዓለም ፡ ወለእመቦ ፡ ዘተዐደወ ፡ እምዛቲ ፡ ሥርዐት ፡ ለይኰንኖ ፡ ዘርእከ ፡ ለዝሉፉ ። ወባሕቱ ፡ ሀበነ ፡ እምዘፈረ ፡ ልብሳ ፡ ዘንኤምኃ ፡ ለጽዮን ፡ ቅድስት ፡ ሰማያዊት ፡ ታቦተ ፡ ሕጉ ፡ ለእግዚኣብሔር ፤ ሰላም ፡ ለጽንዐ ፡ መንግሥትከ ፡ ወለጥበብከ ፡ ብርህት ፡ ዘወሀበከ ፡ እግዚኣብሔር ፡ አምላከ ፡ እስራኤል ፡ ፈጣሪነ ፠ ወአግሐሠቶ ፡ እንተ ፡ ባሕቲቱ ፡ ወወሀበቶ ፡ ይእቲ ፡ ትእምርተ ፡ ዘወሀባ ፡ ሰሎሞን ፡ ዘውስተ ፡ አጽባዕቱ ፡ ሕልቀተ ፡ ከመ ፡ ያእምሮ ፡ ለወልዱ ፡ ወከመ ፡ ይዘከር ፡ ነገራ ፡ ወኪዳና ፡ ዘተካየደት ፡ በኵሉ ፡ መዋዕለ ፡ ሕይወታ ፡ ከመ ፡ ታምልኮ ፡ ለእግዚኣብሔር ፡ ይእቲ ፡ ወእለ ፡ እምታሕተ ፡ መንግሥታ ፡ በኵሉ ፡ ዘወሀባ ፡ እግዚኣብሔር ። ወእምዝ ፡ ፈነወቶ ፡ በሰላም ፤ ወአርትዑ ፡ ፍኖተ ፡ ወሖሩ ፡ ወበጽሑ ፡ ውስተ ፡ ብሔረ ፡ ደወለ ፡ ጋዛ ፤ ወይእቲ ፡ ሀገር ፡ ዘወሀባ ፡ ሰሎሞን ፡ ንጉሥ ፡ ለንግሥተ ፡ ኢትዮጵያ ፤ ወበውስተ ፡ ግብረ ፡ ሐዋርያትሂ ፡ ጸሐፈ ፡ ሉቃስ ፡ ወንጌላዊ ፡ እንዘ ፡ ይብል ፡ መጋቢሃ ፡ ውእቱ ፡ ለኵሉ ፡ ብሔረ ፡ ጋዛ ፡ ኅጽዋ ፡ ለንግሥተ ፡ ህንደኬ ፡ ውእቱ ፡ ዘአምነ ፡ በቃለ ፡ ሉቃስ ፡ ሐዋርያ ፠ ፠ ፠