32. How the Queen brought forth and came to her own Country
31. Concerning the sign which Solomon gave the Queen / Kebra Nagast / 32. How the Queen brought forth and came to her own Country 33. How the King of Ethiopia travelled

፴፪ ፡ ዘከመ ፡ ወለደት ፡ ወበጽሐት ፡ ብሔራ ።

 

ወሖረት ፡ ወበጽሐት ፡ ውስተ ፡ ሀገረ ፡ ባላ ፡ ዘዲሳርያ ፡ በ፱ ፡ አውራኅ ፡ ወበ፭ ፡ ዕለታት ፡ እምዘ ፡ ተፈነወት ፡ በኀቤሁ ፤ ወአኀዛ ፡ ማሕምም ፡ ወወለደት ፡ ሕፃነ ፡ ተባዕተ ፡ ወወሀበቶ ፡ ለሐፃኒት ፡ በብዙኅ ፡ ክብር ፡ ወተድላ ፤ ወይእቲሰ ፡ ነበረት ፡ እስከ ፡ ይትፌጸም ፡ መዋዕለ ፡ ንጽሓ ፡ ወእምዝ ፡ አተወት ፡ ሀገራ ፡ በብዙኅ ፡ ግርማ ። አብኡ ፡ መኳንንቲሃ ፡ አምኃ ፡ ለእግዝእቶሙ ፡ እለ ፡ ነበሩ ፡ ህየ ፡ ወሰገዱ ፡ ወገነዩ ፡ ላቲ ፡ ወተፈሥሑ ፡ በእትወታ ፡ ኵሉ ፡ አድያም ፡ ወአልበሰቶሙ ፡ ሠናየ ፡ አልባሰ ፡ ለክቡራኒሆሙ ፡ ወቦ ፡ ለዘ ፡ ወሀበት ፡ ወርቀ ፡ ወብሩረ ፡ ወያክንተ ፡ ወሜላተ ፡ ወኵሎ ፡ ንዋየ ፡ ወሀበት ፡ ዘይትፈቀድ ። ወአርትዐት ፡ መንግሥታ ፤ ወአልቦ ፡ ዘተዐደወ ፡ እምቃላ ፡ እስመ ፡ አፍቀረታ ፡ ለጥበብ ፡ ወእግዚኣብሔር ፡ አጽንዐ ፡ መንግሥታ ፠ ወልህቀ ፡ ውእቱ ፡ ሕፃን ፡ ወሰመየቶ ፡ ስሞ ፡ በይነ ፡ ልሕክም ። ወኮነ ፡ ሎቱ ፡ ፲ወ፪ ፡ ዓመት ፡ ወየሐትቶሙ ፡ ለመሐዛሁ ፡ ሐፃንያኒሁ ፡ ወይብሎሙ ፡ መኑ ፡ አቡየ ፤ ወይብልዎ ፡ ሰሎሞን ፡ ንጉሥ ፤ ወሖረ ፡ ኀበ ፡ እሙ ፡ ንግሥት ፡ ወይቤላ ፡ ኦንግሥት ፡ አይድዕኒ ፡ መኑ ፡ አቡየ ፡ ወትቤሎ ፡ ንግሥት ፡ በቍጥዓ ፡ እንዘ ፡ ትጌርሞ ፡ ከመ ፡ ኢይፍቅድ ፡ ሐዊረ ፤ ለምንት ፡ ትሴአለኒ ፡ በእንተ ፡ አብ ፤ አነ ፡ ይእቲ ፡ አቡከ ፡ ወእምከ ፡ ወባዕደ ፡ ኢትኅሥሥ ። ወወፅአ ፡ እምኔሃ ፡ ወነበረ ፡ ወካዕበ ፡ ወሥልሰ ፡ ይሴአላ ፡ ወያጽሕባ ፡ ከመ ፡ ትንግሮ ። ወአሐተ ፡ ዕለተ ፡ ነገረቶ ፡ እንዘ ፡ ትብል ፡ ርሑቅ ፡ ብሔሩ ፡ ወዕፁብ ፡ ፍኖቱ ፡ ወኢትፍቅድ ፡ ህየ ። ወውእቱሰ ፡ ወልድ ፡ በይነ ፡ ልሕክም ፡ ኮነ ፡ ላሕየ ፡ ወኵሉ ፡ ማኅፈዱ ፡ ወአባሉ ፡ ወንብረተ ፡ ክሳዱ ፡ ይመስል ፡ ሰሎሞን ፡ ንጉሠ ፡ አቡሁ ፡ ወአዕይንቲሁ ፡ ወአቍያጺሁ ፡ ወኵሉ ፡ ፍኖቱ ፡ ይመስል ፡ ሰሎሞን ፡ ንጉሠ ፠ ወሶበ ፡ ኮነ ፡ ሎቱ ፡ ፳ወ፪ዓመተ ፡ ተምህረ ፡ ኵሎ ፡ ፀብአ ፡ ወፈረሰ ፡ ወንዒወ ፡ አራዊት ፡ ወኵሎ ፡ ዘበሕገ ፡ ውርዙት ። ወይቤላ ፡ ለንግሥት ፡ አሐውር ፡ እነጽር ፡ ገጸ ፡ አቡየ ፡ ወእገብእ ፡ ዝየ ፡ በፈቃደ ፡ እግዚኣብሔር ፡ አምላከ ፡ እስራኤል ፠ ፠ ፠