31. Concerning the sign which Solomon gave the Queen
30. Concerning how King Solomon swore to the Queen / Kebra Nagast / 31. Concerning the sign which Solomon gave the Queen 32. How the Queen brought forth and came to her own Country

፴፩ ፡ በእንተ ፡ ዘወሀባ ፡ ትእምርተ ፡ ለንግሥት ።

 

ወተፈሥሐት ፡ ወወፅአት ፡ ከመ ፡ ትሖር ፡ ወአስተፋነዋ ፡ በብዙኅ ፡ ግርማ ። ወአግሐሣ ፡ እንተ ፡ ባሕቲቶሙ ፡ ወአውፅአ ፡ ሕልቀተ ፡ እምአጽባዕቱ ፡ እንተ ፡ ትንእስ ፡ ወወሀባ ፡ ለንግሥት ፡ ወይቤላ ፡ ንሥኢ ፡ ከመ ፡ ኢትርስዕኒ ፡ ወለእመቦ ፡ ዘረከብኩ ፡ እምውስቴትኪ ፡ ዘርአ ፡ ዝንቱ ፡ ይኩኖ ፡ ትእምርተ ፤ ወለእመ ፡ ኮነ ፡ ተባዕተ ፡ ይምጻእ ፡ ኀቤየ ፤ ወሰላመ ፡ እግዚኣብሔር ፡ የሀሉ ፡ ምስሌኪ ፡ ወእንዘ ፡ እነውም ፡ ምስሌኪ ፡ ርኢኩ ፡ ራእየ ፡ ብዙኀ ፡ በሕልም ፡ ከመ ፡ ሠሪቃ ፡ ፀሐይ ፡ በውስተ ፡ እስራኤል ፡ ተመሥጠት ፡ ወሰረረት ፡ ወአብርሀት ፡ ለብሔረ ፡ ኢትዮጵያ ፤ እንዳዒ ፡ ለእመ ፡ ብኪ ፡ ትትባረክ ፡ ሀገርኪ ፡ እግዚኣብሔር ፡ ያአምር ። ወአንቲሰ ፡ ዕቀቢ ፡ ዘነገርኩኪ ፡ ከመ ፡ ታምልኪዮ ፡ ለእግዚኣብሔር ፡ በኵሉ ፡ ልብኪ ፡ ወትግበሪ ፡ ፈቃዶ ፤ እስመ ፡ ውእቱ ፡ ይቀሥፎሙ ፡ ለዕቡያን ፡ ወይሣሀሎሙ ፡ ለትሑታን ፡ ወይነሥት ፡ መናብርቲሆሙ ፡ ለኀያላን ፡ ወያከብሮሙ ፡ ለነዳያን ፤ እስመ ፡ ሞት ፡ ወሕይወት ፡ እምኀቤሁ ፡ ወብዕል ፡ ወንዴት ፡ በፈቃዱ ፡ ይትወሀብ ፡ እስመ ፡ ኵሉ ፡ ሎቱ ፡ ወእልቦ ፡ ዘየአቢዮ ፡ ለትእዛዙ ፡ ወለኵነኔሁ ፡ በሰማይ ፡ ወበምድር ፡ በባሕር ፡ ወበቀላያት ፡ ወእግዚኣብሔር ፡ የሀሉ ፡ ምስሌኪ ፡ ወሖሪ ፡ በሰላም ። ወተፋነዉ ፠ ፠ ፠