30. Concerning how King Solomon swore to the Queen
29. Concerning the Three Hundred and Eighteen [Patriarchs] / Kebra Nagast / 30. Concerning how King Solomon swore to the Queen 31. Concerning the sign which Solomon gave the Queen

፴ ፡ በእንተ ፡ ዘመሐለ ፡ ላቲ ፡ ንጉሥ ፡ ሰሎሞን ።

 

አውሥኣ ፡ ወይቤላ ፡ እምሕል ፡ ለኪ ፡ ከመ ፡ ኢይትኀየልኪ ፡ ወባሕቱ ፡ አንቲኒ ፡ መሐሊ ፡ ከመ ፡ ኢትትኀየሊ ፡ ኵሎ ፡ ዘውስተ ፡ ቤትየ ፤ ወሰሐቀት ፡ ንግሥት ፡ ወትቤሎ ፡ እንዘ ፡ ጠቢብ ፡ አንተ ፡ ለምንት ፡ ከመ ፡ አብድ ፡ ትትናገር ፤ እሰርቅኑ ፡ ወሚመ ፡ አሀይድ ፡ ቤተ ፡ ንጉሥ ፡ ዘኢወሀበኒ ፡ ንጉሥ ፤ ኢይምሰልከ ፡ እግዚእየ ፡ በፍቅረ ፡ ንዋይ ፡ ዘመጻእኩ ፡ ዝየ ፡ ወመንግሥትየኒ ፡ ብዕልት ፡ በጸጋከ ፡ ወአልቦ ፡ ዘይትኀጥአኒ ፡ እምዘ ፡ ፈቀድኩ ፤ አላ ፡ ዳእሙ ፡ መጻእኩ ፡ በኀሢሠ ፡ ጥበብከ ። ወይቤላ ፡ ለእመ ፡ አንቲ ፡ አምሐልክኒ ፡ መሐሊ ፡ ሊተ ፡ ወማሕላሰ ፡ ይደሉ ፡ ለ፪ ፡ ከመ ፡ ኢይትንመፁ ፤ ወለእመ ፡ ኢያምሐልክኒ ፡ ኢያምሕለኪ ፡ አነሂ ። ወትቤሎ ፡ መሐል ፡ ሊተ ፡ ከመ ፡ ኢትትኀየለኒ ፡ ወአነሂ ፡ እምሕል ፡ ከመ ፡ ኢይትኀየል ፡ ንዋየከ ፤ ወመሐለ ፡ ላቲ ፡ ወእምሐላ ፠ ወዐርገ ፡ ንጉሥ ፡ ዲበ ፡ ምስካቡ ፡ በ፩ ፡ ገጽ ፡ ወላቲኒ ፡ አስተዳለዉ ፡ ላቲ ፡ ምስካበ ፡ በ፩ ፡ ገጽ ። ወይቤሎ ፡ ለሕፃን ፡ ገብር ፡ ኅፅብ ፡ መቃልደ ፡ ወደይ ፡ ጻሕበ ፡ ማይ ፡ እንዘ ፡ ትሬኢ ፡ ንግሥት ፡ ወዕጸው ፡ ኀዋኅወ ፡ ወኑም ፤ ወዘንተ ፡ ዘይቤሎ ፡ በካልእ ፡ ልሳን ፡ ዘኢታአምር ፡ ንግሥት ፤ ወገብረ ፡ ከማሁ ፡ ውኖመ ። ወንጉሥሰ ፡ ዓዳሁ ፡ ኢኖመ ፡ ወይሬሲ ፡ ርእሶ ፡ ከመ ፡ ንዉም ፡ ወያስተሓይጽ ፤ ወቤቱሰ ፡ ለሰሎሞን ፡ ንጉሥ ፡ ሌሊተኒ ፡ ብርህት ፡ ከመ ፡ መዐልት ፡ እስመ ፡ ገብረ ፡ በጥበብ ፡ ባሕርያተ ፡ ብሩሃተ ፡ አምሳለ ፡ ፀሐይ ፡ ወወርኅ ፡ ወከዋክብት ፡ ውስተ ፡ ጠፈረ ፡ ቤቱ ፠ ወንግሥትኒ ፡ ኖመት ፡ ንስቲተ ፡ ወሶበ ፡ ነቅሀት ፡ የብሰ ፡ አፉሃ ፡ በጽምእ ፡ እስመ ፡ በጥበቡ ፡ ዘወሀባ ፡ መጻምአ ፡ ወፈድፋደ ፡ ጸምአት ፡ ወየብሰ ፡ አፉሃ ፡ ወአርመስመሰት ፡ አፉሃ ፡ ወኢረከበት ፡ ጠለ ፤ ወኀለየት ፡ ሰቲየ ፡ ማይ ፡ ዘርእየት ፡ ወእስተሓየጸት ፡ ወነጸረት ፡ ኀበ ፡ ንጉሥ ፡ ሰሎሞን ፡ ወመሰላ ፡ ዘኖመ ፡ ጽኑዐ ፡ ንዋ ፤ ወውእቱሰ ፡ ኢኖመ ፡ አላ ፡ ይጸንሕ ፡ እስከ ፡ ትትነሣእ ፡ ከመ ፡ ትስርቅ ፡ ማየ ፡ ለጽምኣ ። ወተንሥአት ፡ እንዘ ፡ ኢታደምፅ ፡ በእገሪሃ ፡ ወሖረት ፡ ኀበ ፡ ውእቱ ፡ ማየ ፡ መቅለድ ፡ ወአንሥአት ፡ ከመ ፡ ትስተይ ፡ ማየ ፤ ወአኀዛ ፡ እዴሃ ፡ ዘእንበለ ፡ ትስተይ ፡ ማየ ፡ ወይቤላ ፡ ለምንት ፡ ተዐደውኪ ፡ ማሕላ ፡ ዘመሐልኪ ፡ ከመ ፡ ኢትትኀየሊ ፡ ኵሎ ፡ ዘውስተ ፡ ቤትየ ። ወአውሥአት ፡ በፍርሀት ፡ ወትቤ ፡ ቦኑ ፡ ተዐድዎ ፡ ማሕላ ፡ በሰቲየ ፡ ማይ ፤ ወይቤላ ፡ ንጉሥ ፡ ቦኑ ፡ ዘርኢኪ ፡ ዘይኄይስ ፡ እምነ ፡ ማይ ፡ በታሕተ ፡ ሰማይ ፤ ወትቤ ፡ አበስኩ ፡ ለርእስየ ፡ ወአንተሰ ፡ ንጹሕ ፡ እምነ ፡ ማሕላ ፡ ወኅድገኒ ፡ እስተይ ፡ ማየ ፡ ለጽምእየ ፤ ወይቤላ ፡ ዮጊኬ ፡ ኮንኩኑ ፡ ንጹሐ ፡ እማሕላኪ ፡ ዘአምሐልክኒ ፤ ወትቤሎ ፡ ንግሥት ፡ ኩን ፡ ንጹሐ ፡ እማሕላ ፡ ወባሕቱ ፡ ኅድገኒ ፡ እስተይ ፡ ማየ ። ወኀደጋ ፡ ትስተይ ፡ ማየ ፡ ወእምድኅረ ፡ ሰትየት ፡ ማየ ፡ ገብረ ፡ ፈቃዶ ፡ ወኖሙ ፡ ኅቡረ ፠ ወእምድኅረ ፡ ኖመ ፡ አስተርአዮ ፡ ለሰሎሞን ፡ ንጉሥ ፡ ፀሐይ ፡ ብሩህ ፡ ወረደት ፡ እምሰማያት ፡ ወአብርሀት ፡ ላዕለ ፡ እስራኤል ፡ ፈድፋደ ፤ ወእምዝ ፡ ጐንዲያ ፡ ግብተ ፡ ተመሥጠት ፡ ወሰረረት ፡ እስከ ፡ ብሔረ ፡ ኢትዮጵያ ፡ ወአብርሀት ፡ በህየኒ ፡ ፈድፋደ ፡ እስከ ፡ ለዓለም ፡ እስመ ፡ አፍቀረት ፡ ነቢረ ፡ ህየ ፤ ወጐንደይኩ ፡ እመ ፡ ትገብእ ፡ ውስተ ፡ እስራኤል ፡ ወኢገብአት ፤ ወካዕበ ፡ ጐንዲዮ ፡ ሠረቀ ፡ ብርሃን ፡ ወወረደ ፡ ፀሐይ ፡ እምሰማያት ፡ ውስተ ፡ ብሔረ ፡ ይሁዳ ፡ ወእብርሀ ፡ ፈድፋደ ፡ እምቀዲሙ ፤ ወእስራኤልሰ ፡ አስተአከይዎ ፡ ለፀሐይ ፡ እምላህቡ ፡ ወኢሖሩ ፡ በብርሃኑ ፡ ወውእቱኒ ፡ ፀሐይ ፡ ተሀየዮሙ ፡ ለእስራኤል ፡ ወእሙንቱሂ ፡ ቀንኡ ፡ ላዕሌሁ ፡ ወተስእነ ፡ ሰላም ፡ ማእከሌሆሙ ፡ ወማእከለ ፡ ፀሐይ ፤ ወአንሥኡ ፡ እደዊሆሙ ፡ ላዕሌሁ ፡ ምስለ ፡ አብትር ፡ ወመጣብሕ ፡ ወፈቀዱ ፡ ከመ ፡ ያጥፍእዎ ፡ ለፀሐይ ፡ ወአጽለምዋ ፡ ለኵሉ ፡ ዓለም ፡ በድልቅልቅ ፡ ወጊሜ ፡ ወመሰሎሙ ፡ ዘኢይሠርቅ ፡ ሎሙ ፡ ዳግመ ፤ ወአማሰኑ ፡ ብርሃኖ ፡ ወደበይዎ ፡ ወዐቀቡ ፡ ዝኅሮ ፡ ኀበ ፡ ወደይዎ ፤ ወወፅአ ፡ እምኀበ ፡ ኢተሐዘብዎ ፡ ወአብርሀ ፡ ኵሎ ፡ ዓለመ ፡ ወፈድፋድሰ ፡ በቀዳሚ ፡ ባሕር ፡ ወበደኃሪ ፡ ባሕር ፡ ለኢትዮጵያ ፡ ወለሮም ፤ ወለእስራኤልሰ ፡ ተሀየዮሙ ፡ ፈድፋደ ፡ ወዐርገ ፡ ዲበ ፡ መንበሩ ፡ ዘትካት ። ወዘንተ ፡ ራእየ ፡ ሶበ ፡ ርእየ ፡ እንዘ ፡ ንዉም ፡ ሰሎሞን ፡ ንጉሥ ፡ ደንገፀት ፡ ነፍሱ ፡ ወተመሥጠት ፡ ኅሊናሁ ፡ ከመ ፡ መብረቅ ፡ ወነቅሀ ፡ ድንጉፁ ፠ ወካዕበ ፡ አንከረ ፡ በእንተ ፡ ንግሥት ፡ እስመ ፡ ጽኑዕ ፡ ኀይላ ፡ ወሠናይ ፡ ላሕያ ፡ ወንጽሕት ፡ በድንግልናሃ ፤ ወነግሠት ፡ ፮ዓመተ ፡ በብሔራ ፡ ወእንዘ ፡ ከመዝ ፡ ተድላሃ ፡ ወክብራ ፡ አንጽሐት ፡ ሥጋሃ ፠ ወትቤሎ ፡ ፈንወኒ ፡ እሖር ፡ ብሔርየ ፤ ወቦአ ፡ ኀበ ፡ ማኅደሩ ፡ ወወሀባ ፡ ኵሎ ፡ ዘይትፈቀድ ፡ ክብረ ፡ ወብዕለ ፡ ወሠናያነ ፡ አልባሰ ፡ ዘየሀይድ ፡ አዕይንተ ፡ ወኵሎ ፡ ዘይትፈቀድ ፡ ክብረ ፡ ለብሔረ ፡ ኢትዮጵያ ፡ ወራኩባተ ፡ ወሰረገላተ ፡ መጠነ ፡ ፮ ፡ ሲሕ ፡ ዘጽዑን ፡ ምስለ ፡ ንዋየ ፡ ክብር ፡ ዘይትፈቀድ ፡ ወሰረገላተ ፡ እለ ፡ ይጼዐኑ ፡ ዲበ ፡ ኆጻ ፡ ወሰረገላ ፡ ዘየሐውር ፡ ዲበ ፡ ባሕር ፡ ወሰረገላ ፡ ዘይረውጽ ፡ በነፋሳት ፡ ዘገብረ ፡ በከመ ፡ ጥበብ ፡ ዘወሀቦ ፡ እግዚኣብሔር ፠