29. Concerning the Three Hundred and Eighteen [Patriarchs]
28. How Solomon gave Commandments to the Queen / Kebra Nagast / 29. Concerning the Three Hundred and Eighteen [Patriarchs] 30. Concerning how King Solomon swore to the Queen


፳፱ ፡ በእንተ ፡ ፫፻፲ወ፰ ።

 

ወንሕነኒ ፡ ሠራዕነ ፡ ምስሌሆሙ ፡ ጠዪቀነ ፡ ዘነበቡ ፡ እለ ፡ እምቅድሜነ ፡ ሐዋርያት ፤ ንሕነ ፡ ፫፻፲ወ፰ ፡ አርታዕነ ፡ ወአስተራታዕነ ፡ ሃይማኖተ ፡ እንዘ ፡ እግዚእነ ፡ ኢየሱስ ፡ ክርስቶስ ፡ ምስሌነ ፤ ወውእቱ ፡ ሠርዐ ፡ ለነ ፡ ዘከመ ፡ ንሜህር ፡ ወዘከመ ፡ ንገብር ፡ ሃይማኖተ ፠ ወውእቱሰ ፡ ንጉሥ ፡ ሰሎሞን ፡ ለአከ ፡ ላቲ ፡ ለንግሥት ፡ እንዘ ፡ ይብል ፤ እምድኅረ ፡ መጻእኪሰ ፡ ዝየአ ፡ ለምንት ፡ ተሐውሪ ፡ ዘእንበለ ፡ ትርአዪ ፡ ሕገ ፡ መንግሥት ፤ ወዘከመ ፡ ይትገበር ፡ ድራር ፡ ለኅሩያነ ፡ መንግሥትነ ፡ በአምሳለ ፡ ጻድቃን ፡ ወዘከመ ፡ ይሰደዱ ፡ አሕዛብ ፡ በአምሳለ ፡ ኃጥኣን ፤ ወእምኔሁ ፡ ትረክቢ ፡ ጥበበ ። ንዒ ፡ በድኅሬየ ፡ ወትነብሪ ፡ በጸዳልየ ፡ በደባትር ፡ ወእፌጽም ፡ ለኪ ፡ ወታአምሪ ፡ ሕገ ፡ መንግሥትኒ ፤ እስመ ፡ አፍቀርኪያ ፡ ለጥበብ ፡ ወትነብር ፡ ምስሌኪ ፡ እስከ ፡ ደኃሪትኪ ፡ ወለንለምኒ ። እስመ ፡ ትንቢት ፡ ያስተርኢ ፡ በኀበ ፡ ልሳን ። ወካዕበ ፡ ይእቲኒ ፡ ለአከት ፡ እንዘ ፡ ትብል ፤ እንዘ ፡ አብድ ፡ አነ ፡ ኮንኩ ፡ ጠባበ ፡ በተሊወ ፡ ጥበብከ ፡ ወእንዘ ፡ ምንንት ፡ እምአምላከ ፡ እስራኤል ፡ ኮንኩ ፡ ኅሪት ፡ በእንተ ፡ ዛቲ ፡ አሚኖት ፡ እንተ ፡ ውስተ ፡ ልብየ ፡ ወእምይእዜሰ ፡ ኢያመልክ ፡ ባዕደ ፡ ዘእንበሌሁ ፤ ወበዝንቱሰ ፡ ዘትቤ ፡ ፈቀድከ ፡ ከመ ፡ ትወስከኒ ፡ ጥበበ ፡ ወክብረ ፡ ወእመጽእ ፡ በከመ ፡ ፈቀድከ ፠ ወተፈሥሐ ፡ ሰሎሞን ፡ በእንተዝ ፡ ወአልበሶሙ ፡ ለኅሩያኒሃ ፡ ወወሰከ ፡ ካዕበተ ፡ ዲበ ፡ ማእዱ ፡ ወአዘዘ ፡ በአስተጠአጥኦ ፡ ኵሎ ፡ ሥርዐተ ፡ ቤቱ ፡ ወኵሎ ፡ ዕለተ ፡ እንዘ ፡ ድሉት ፡ ቤቱ ፡ ለሰሎሞን ፡ ንጉሥ ፤ ወአሜሃ ፡ አስተዳለዋ ፡ በክብር ፡ ፈድፋደ ፡ በፍሥሓ ፡ ወበሰላም ፡ በጥበብ ፡ ወበምሕረት ፡ ምስለ ፡ ኵሉ ፡ ትሕትና ፡ ወየውሀት ። ወእምዝ ፡ ተሠርዐ ፡ ማእድ ፡ ዘንጉሥ ፡ በከመ ፡ ሕገ ፡ መንግሥት ፤ ወንግሥትኒ ፡ ቦአት ፡ እንተ ፡ መፍልስት ፡ በጸዳል ፡ ወበክብር ፡ ወነበረት ፡ አንጻረ ፡ ድኅሬሁ ፡ ኀበ ፡ ትሬኢ ፡ ወትትኤመር ፡ ወትጤይቅ ፡ ኵሎ ፤ ወታነክር ፡ ፈድፋደ ፡ በዘ ፡ ርእየት ፡ ወበዘ ፡ ሰምዐት ፡ ወትሴብሖ ፡ በልባ ፡ ለአምላከ ፡ እስራኤል ፡ ወታስተዐጽብ ፡ ክብረ ፡ ቤተ ፡ መንግሥት ፡ ዘርእየት ። እስመ ፡ ትሬኢ ፡ ለሊሃ ፡ ወላቲሰ ፡ አልቦ ፡ ዘይሬኢያ ፡ በከመ ፡ ገብረ ፡ ላቲ ፡ በጥበብ ፡ ዘአሠነየ ፡ ምንባራ ፡ ነጺፎ ፡ ሜላተ ፡ ወረቢቦ ፡ ቢሳጣተ ፡ ወገቢሮ ፡ ምስካተ ፡ ወአብላቀ ፡ ወአፍራጸ ፡ ነዚኆ ፡ ዕፍረታተ ፡ ወረቢቦ ፡ ሚንተ ፡ ወሰሊካተ ፡ መሪጎ ፡ ቀንአተ ፡ ወስኂናተ ። ወሶበ ፡ ይበውእዎ ፡ ለውእቱ ፡ ማኅደር ፡ ፈድፋደ ፡ ሠናይ ፤ መዐዛሁ ፡ ወያጸግብ ፡ ዘእንበለ ፡ ይብልዑ ፡ መባልዕተ ፡ ጣዕመ ፡ ጼናሁ ። ወይፌኑ ፡ ላቲ ፡ መባልዐ ፡ መጻምአ ፡ በምክር ፡ ወበጥበብ ፡ ወመሳትየ ፡ መፂፃነ ፡ ሰመከ ፡ ወፍልፍለ ፡ ጠቢቃተ ፡ ወዘንተ ፡ ይገብር ፡ ወይሁባ ፡ ለንግሥት ፡ ከመ ፡ ትብላዕ ፡ እምኔሁ ፠ ወሶበ ፡ ተፈጸመ ፡ ሥልሰ ፡ ወስብዐ ፡ ማእደ ፡ ንጉሥ ፡ ወአተዉ ፡ መገብት ፡ ወመማክርት ፡ ወመሐዛት ፡ ወአግብርት ፡ ተንሥአ ፡ ንጉሥ ፡ ወሖረ ፡ ኀበ ፡ ንግሥት ፡ ወይቤላ ፡ በባሕቲቶሙ ፡ ተናዘዚ ፡ ዝየ ፡ በእንተ ፡ ፍቅር ፡ እስከ ፡ ነግህ ። ወትቤሎ ፡ መሐል ፡ ሊተ ፡ በአምላክከ ፡ አምላከ ፡ እስራኤል ፡ ከመ ፡ ኢትትኀየለኒ ፤ እመቦ ፡ ለእመ ፡ ተስሕትኩ ፡ ሕገ ፡ ሰብእ ፡ ነኣስ ፡ እወርድ ፡ ውስተ ፡ ጻማ ፡ ወሕማም ፡ ወምንዳቤ ፡ በፍኖት ፠ ፠ ፠