28. How Solomon gave Commandments to the Queen
27. Concerning the Labourer / Kebra Nagast / 28. How Solomon gave Commandments to the Queen 29. Concerning the Three Hundred and Eighteen [Patriarchs]

፳፰ ፡ በእንተ ፡ ዘከመ ፡ አዘዛ ፡ ለንግሥት ።

 

ወአውሥአ ፡ ንጉሥ ፡ ወይቤላ ፡ በአማን ፡ ርቱዕ ፡ ይሰግዱ ፡ ለእግዚኣብሔር ፡ ለዘ ፡ ገብረ ፡ ኵሎ ፤ ሰማየ ፡ ወምድረ ፤ ወባሕረ ፡ ወየብሰ ፤ ፀሐየ ፡ ወወርኀ ፤ ከዋክብተ ፡ ወጸዳላተ ፤ ዕፀወ ፡ ወአእባነ ፤ እንስሳ ፡ ወአዕዋፈ ፤ አራዊተ ፡ ወሐርገጻተ ፤ ዓሣተ ፡ ወዐናብርተ ፤ ቢሐተ ፡ ወዐንጐጓተ ፤ መባርቅተ ፡ ወፀዓዓተ ፤ ደመናተ ፡ ወነጐድጓደ ፤ ሠናያነ ፡ ወእኩያነ ። ሎቱ ፡ ለባሕቲቱ ፡ ንስግድ ፡ ይደሉ ፡ በፍርሀት ፡ ወበረዓድ ፡ በፍሥሓ ፡ ወበሐሤት ፤ እስመ ፡ ውእቱ ፡ እግዚአ ፡ ኵሉ ፡ ፈጣሬ ፡ መላእክት ፡ ወሰብእ ፡ ወውእቱ ፡ ይቀትል ፡ ወያሐዩ ፡ ወውእቱ ፡ ይቀሥፍ ፡ ወይሣሀል ፡ ዘያነሥኦ ፡ ለነዳይ ፡ እምድር ፡ ወያሌዕሎ ፡ እመሬት ፡ ለምስኪን ፡ ወያሐዝን ፡ ወያስተፌሥሕ ፡ ያዐርግ ፡ ወያወርድ ፤ አልቦ ፡ ዘይግእዞ ፡ እስመ ፡ እግዚእ ፡ ውእቱ ፡ ለኵሉ ፡ ወአልቦ ፡ ዘይብሎ ፡ ምንተ ፡ ገበርከ ፤ ወሎቱ ፡ ይደሉ ፡ ስብሐት ፡ ወአኰቴት ፡ እምኀበ ፡ መላእክት ፡ ወሰብእ ። ወበእንተ ፡ ዘትብሊሰ ፡ ወሀበክሙ ፡ ታቦተ ፡ ሐግ ፡ በአማን ፡ ተውህበት ፡ ለነ ፡ ታቦተ ፡ አምላከ ፡ እስራኤል ፡ እንተ ፡ ተፈጥረት ፡ እምቅድመ ፡ ኵሉ ፡ ፍጥረት ፡ በምክረ ፡ ስብሐቲሁ ፤ ወትእዛዞሂ ፡ አውረደ ፡ ለነ ፡ ጽሒፎ ፡ ከመ ፡ ናእምር ፡ ፍትሖ ፡ ወኵነኔሁ ፡ ዘሠርዐ ፡ በደብረ ፡ መቅደሱ ፠ ወትቤ ፡ ንግሥት ፡ እምይእዜሰ ፡ ኢይሰግድ ፡ ለፀሐይ ፡ አላ ፡ እሰግድ ፡ ለፈጣሬ ፡ ፀሐይ ፡ አምላከ ፡ እስራኤል ፤ ወይእቲ ፡ ታቦተ ፡ አምላከ ፡ እስራኤል ፡ ትኩነኒ ፡ እግዝእትየ ፡ ሊተ ፡ ወለዘርእየ ፡ እምድኅሬየ ፡ ወለኵሉ ፡ መንግሥትየ ፡ እለ ፡ እምታሕቴየ ። ወበእንተዝ ፡ አነ ፡ ረከብኩ ፡ ሞገሰ ፡ በቅድሜከ ፡ ወበቅድመ ፡ አምላከ ፡ እስራኤል ፡ ፈጣሪየ ፡ ዘአብጽሐኒ ፡ ኀቤከ ፡ ወአስምዐኒ ፡ ቃልከ ፡ ወአርአየኒ ፡ ገጽከ ፡ ወአለበወኒ ፡ ትእዛዝከ ፠ ወአተወት ፡ ቤተ ፡ ወወትረ ፡ ተሐውር ፡ ወትገብእ ፡ ወትሰምዕ ፡ ጥበቢሁ ፡ ወተዐቅብ ፡ በልባ ፤ ወውእቱኒ ፡ የሐውር ፡ ኀቤሃ ፡ ወይነግራ ፡ ኵሎ ፡ ዘተስእለቶ ፡ ወይእቲኒ ፡ ተሐውር ፡ ኀቤሁ ፡ ወትሴአሎ ፡ ወያየድዓ ፡ ኵሎ ፡ ዘፈተወት ። ወእምድኅረ ፡ ነበረት ፡ ፮አውራኀ ፡ ፈቀደት ፡ ገቢአ ፡ ብሔራ ፡ ወለአከት ፡ ኀቤሁ ፡ እንዘ ፡ ትብል ፤ ወአንሰአ ፡ እምፈተውኩ ፡ እንበር ፡ ምስሌከ ፡ ወይእዜሰ ፡ በእንተ ፡ ኵሉ ፡ ሕዝብ ፡ እፈቅድ ፡ ገቢአ ፡ ብሔርየ ፤ ወዘንተ ፡ ዘሰማዕኩ ፡ ይረስዮ ፡ እግዚኣብሔር ፡ ዘይፈሪ ፡ በውስተ ፡ ልብየ ፡ ወውስተ ፡ ልበ ፡ ኵሎሙ ፡ እለ ፡ ሰምዑ ፡ ምስሌየ ፤ እስመ ፡ ኢይመልእ ፡ እዝን ፡ በአፅምኦ ፡ ወኢይመልእ ፡ ዐይን ፡ በነጽሮ ፡ ጥበብከ ። ወአኮ ፡ ይእቲ ፡ ባሕቲታ ፡ ዘትመጽእ ፡ አላ ፡ ብዙኃን ፡ ይመጽኡ ፡ እምአህጉር ፡ ወበሓውርት ፡ እምቅሩብ ፡ ወእምርሑቅ ፡ እስመ ፡ አልቦ ፡ ዘተረክበ ፡ ከማሁ ፡ በጥበብ ፡ በውእቱ ፡ መዋዕል ፤ ወአኮ ፡ ሰብእ ፡ ባሕቲቶሙ ፡ ዘይመጽኡ ፡ ኀቤሁ ፡ ወዓዲ ፡ አራዊትኒ ፡ ወአዕዋፍ ፡ ይመጽኡ ፡ ኀቤሁ ፡ ወይሰምዑ ፡ ቃሎ ፡ ወያነክሩ ፡ ጥበቦ ፡ ወይትናገሩ ፡ ምስሌሁ ፡ ወይገብኡ ፡ ብሔሮሙ ፡ ወኵሉ ፡ ያነክር ፡ ጥበቢሁ ፡ ወያነክር ፡ በዘ ፡ ርእየ ፡ ወሰምዐ ፠ ወሶበ ፡ ለአከት ፡ ኀቤሁ ፡ ከመ ፡ ትሖር ፡ ብሔራ ፡ ኀለየ ፡ በልቡ ፡ ወይቤ ፡ ዘመጠነዝ ፡ ላሕይት ፡ ብእሲት ፡ መጽአት ፡ ኀቤየ ፡ እምአጽናፈ ፡ ምድር ፡ ምንተ ፡ ኣአምር ፡ እመ ፡ ይሁበኒ ፡ እግዚኣብሔር ፡ ዘርአ ፡ በውስቴታ ። በከመ ፡ ተብህለ ፡ ውስተ ፡ መጽሐፈ ፡ ነገሥት ፤ ወሰሎሞንሰ ፡ ንጉሥ ፡ መፍቀሬ ፡ አንስት ፡ ውእቱ ፡ ወአውሰበ ፡ እምነ ፡ ዕብራዊያን ፡ ወግብጻዊያን ፡ ወከነናዊያን ፡ ወኢዶማዊያን ፡ ወኢዮባዊያን ፤ ወእምሪፍ ፡ ወኵርጕ ፡ ወድሚሲቅ ፡ ወሱርስት ፤ ወእምእለ ፡ ነገርዎ ፡ እለ ፡ ሠናይ ፡ ላሕዮን ፤ ወኮና ፡ ንግሥታት ፡ ፬፻ ፡ ወዕቁቡት ፤ ፮፻ ፡ ወዘንተሰ ፡ ዘገብረ ፡ አኮ ፡ በዘምዎ ፡ አላ ፡ በኀልዮ ፡ ጥበብ ፡ ዘወሀቦ ፡ እግዚኣብሔር ፡ ወተዘኪሮ ፡ ዘይቤሎ ፡ ለአብርሃም ፡ ኣበዝኅ ፡ ዘርእከ ፡ ከመ ፡ ኮከበ ፡ ሰማይ ፡ ወከመ ፡ ኆጻ ፡ ባሕር ። ወይቤ ፡ በልቡ ፡ ምንተ ፡ ኣአምር ፡ እመ ፡ ይሁበኒ ፡ እግዚኣብሔር ፡ ተባዕተ ፡ ውሉደ ፡ በበ ፡ ፩ ፡ ለለ ፡ አሐቲ ፡ እምኔሆን ፤ ወበእንተዝ ፡ ተጠቢቦ ፡ ገብረ ፡ ከመዝ ፡ እንዘ ፡ ይብል ፡ ደቂቅየ ፡ ይረሱ ፡ አህጉረ ፡ ፀር ፡ ወይሠርውዎሙ ፡ ለእለ ፡ ያመልኩ ፡ ጣዖተ ። ወእሙንቱሰ ፡ ቀዳሚ ፡ ሕዝብ ፡ ነበሩ ፡ በሕግ ፡ ዘሥጋ ፡ እስመ ፡ ኢተውህቦሙ ፡ ጸጋ ፡ ዘመንፈስ ፡ ቅዱስ ፤ ወለእለ ፡ እምድኅረ ፡ ክርስቶስሰ ፡ ተውህቦሙ ፡ ይንበሩ ፡ በአሐቲ ፡ ብእሲት ፡ በሕገ ፡ ሰብሳብ ፤ ወሠርዑ ፡ ሎሙ ፡ ሐዋርያት ፡ እንዘ ፡ ይብሉ ፡ እለ ፡ ነሥኡ ፡ ሥጋሁ ፡ ወደሞ ፡ ኵሎሙ ፡ አኀው ፡ እሙንቱ ፡ እሞሙ ፡ ቤተ ፡ ክርስቲያን ፡ ወአቡሆሙ ፡ እግዚኣብሔር ፤ ወይጸርኁ ፡ ምስለ ፡ ክርስቶስ ፡ ዘተመጠዉ ፡ እንዘ ፡ ይብሉ ፡ አቡነ ፡ ዘበሰማያት ። ወለሰሎሞንሰ ፡ ኢተሠርዐ ፡ ሎቱ ፡ በአንስት ፡ ወኢኮኖ ፡ ጌጋየ ፡ በአውስቦ ፤ ወለመሀይምናንሰ ፡ ተውህቦሙ ፡ ሕገ ፡ ወትእዛዘ ፡ ከመ ፡ ኢያብዝኁ ፡ አንስተ ፡ በከመ ፡ ይቤ ፡ ጳውሎስ ፡ እለሰ ፡ ብዙኀ ፡ አንስተ ፡ አውሰቡ ፡ መቅሠፍተ ፡ ኀሠሡ ፡ ለርእሶሙ ፡ ወዘሰ ፡ አውሰበ ፡ አሐተ ፡ ብእሲተ ፡ አልቦ ፡ ኀጢአተ ። ወሕገ ፡ እኅት ፡ ከላእነ ፡ ዘበእንተ ፡ ወሊድ ፡ ይቤሉ ፡ ሐዋርያት ፡ በውስተ ፡ ሲኖዶስ ፠ ፠ ፠