27. Concerning the Labourer
26. How the King held converse with the Queen / Kebra Nagast / 27. Concerning the Labourer 28. How Solomon gave Commandments to the Queen

፳፯ ፡ በእንተ ፡ ገባራዊ ።

 

ወእንዘ ፡ ዘንተ ፡ ይትናገራ ፡ ለንግሥት ፡ ርእዮ ፡ ለ፩ ፡ ገባር ፡ እንዘ ፡ ይጸውር ፡ እብነ ፡ ዲበ ፡ ርእሱ ፡ ወሳእረ ፡ ማይ ፡ ዲበ ፡ ክሳዱ ፡ ወስንቁ ፡ ወአሣእኒሁ ፡ ውስተ ፡ ሐቌሁ ፡ ወለዕፀውኒ ፡ ደመሮን ፡ ውስተ ፡ እደዊሁ ፡ ወብሉያት ፡ ወሥጡጣት ፡ አልባሲሁ ፡ ወሃፉ ፡ ያንጠበጥብ ፡ እምነ ፡ ገጹ ፡ ወማየ ፡ ሳእርኒ ፡ ይውኅዝ ፡ ውስተ ፡ ሰኰናሁ ። ወኀለፈ ፡ እንተ ፡ ቅድሜሁ ። ወእንዘ ፡ የሐውር ፡ ይቤሎ ፡ ቁም ፡ ወቆመ ፤ ወተመይጠ ፡ ኀበ ፡ ንግሥት ፡ ወይቤላ ፡ ርእዪ ፡ ዘንተ ፡ ምንት ፡ ፍድፍድናየ ፡ እምነ ፡ ዝንቱ ፡ ወምንት ፡ ኅይስናየ ፡ እምነዝ ፡ ወምንት ፡ ክብርየ ፡ እምነ ፡ ከመዝ ፤ እስመ ፡ አነሂ ፡ ሰብእ ፡ ወሐመድ ፡ ዘጌሠመ ፡ እከውን ፡ ዕፄ ፡ ወጺአት ፡ ወይእዜ ፡ እንከ ፡ ኣስተርኢ ፡ ከመ ፡ ዘኢይመውት ፡ ለዓለም ። መኑ ፡ እምአግአዞ ፡ ለአግዚኣብሔር ፡ እመ ፡ ወሀቦ ፡ ለዝንቱ ፡ ከማየ ፡ ወሊተኒ ፡ ሶበ ፡ አገበረኒ ፡ ከማሁ ፤ አኮኑ ፡ ክልኤነ ፡ ሰንቡእ ፤ ሰብእ ፡ ብሂል ፤ ወከመ ፡ ሞተዝ ፡ ሞትየ ፡ ወከመ ፡ ሕይወተዝ ፡ ሕይወትየ ፡ ወዝንቱ ፡ ይጸንዕ ፡ በግብር ፡ እምኔየ ፡ እስመ ፡ ይሁቦሙ ፡ ኀይለ ፡ ለድኩማን ፡ በከመ ፡ ፈቀደ ፡ ለሊሁ ፤ ወይቤሎ ፡ ሖር ፡ ኀበ ፡ ግብርከ ፨ ወካዕበ ፡ ይቤላ ፡ ለንግሥት ፡ ምንት ፡ በቍዔትነ ፡ ለእጓለ ፡ እመሕያው ፡ ለእመ ፡ ኢገበርነ ፡ ንስሐ ፡ ወምሕረተ ፡ በዲበ ፡ ምድር ፤ አኮኑ ፡ ኵልነ ፡ ከንቱ ፡ ሣዕረ ፡ ገዳም ፡ ዘበጊዜሃ ፡ ይየብስ ፡ ወያውዕዮ ፡ እሳት ፤ በዲበ ፡ ምድር ፡ ንትረሰይ ፡ በመባልዕት ፡ ጥዑማት ፡ ወበአልባስ ፡ ክቡራት ፤ እንዘ ፡ ሕያዋን ፡ ጽዩኣን ፤ ወንትረሰይ ፡ በመዐዛት ፡ ወበዕፍረታት ፤ እንዘ ፡ ሕያዋን ፡ ምዉታን ፡ በኀጢአት ፡ ወበአበሳት ፤ እንዘ ፡ ጠቢባን ፡ ኮነ ፡ አብዳነ ፡ በኢሰሚዕ ፡ ወበዕልወታት ፤ እንዘ ፡ ክቡራን ፡ ኮነ ፡ ኅሱራነ ፡ በተጠይሮ ፡ ወበሰጊድ ፡ ለጣዖት ። ሰብእሰ ፡ ክቡር ፡ ዘተፈጥረ ፡ በአምሳለ ፡ እግዚኣብሔር ፡ ወለእመኒ ፡ ገብረ ፡ ሠናየ ፡ ይከውን ፡ ከመ ፡ እግዚኣብሔር ፤ ሰብእሰ ፡ ከንቱ ፡ ወለእመኒ ፡ ገብረ ፡ ኀጢአተ ፡ ይከውን ፡ ከመ ፡ ዲያብሎስ ፤ ዲያብሎስሰ ፡ ዕቡይ ፡ ዘአበየ ፡ ተአዝዞ ፡ ለፈጣሪሁ ፡ ወኵሎሙ ፡ ዕቡያን ፡ እምሰብእ ፡ የሐውሩ ፡ በፍኖቱ ፡ ወይትኴነኑ ፡ ምስሌሁ ፤ ወእግዚኣብሔር ፡ ያፈቅሮሙ ፡ ለትሑታን ፡ ወእለ ፡ ይገብሩ ፡ ትሕትና ፡ የሐውሩ ፡ በፍኖቱ ፡ ወይትፌሥሑ ፡ በውስተ ፡ መንግሥቱ ፤ ወብፁዕሰ ፡ ዘአእመረ ፡ ጥበበ ፡ ዝውእቱ ፡ ንስሐ ፡ ወፈሪሀ ፡ እግዚኣብሔር ፠ ወዘንተ ፡ ሰሚዓ ፡ ንግሥት ፡ ትቤ ፡ ምንተ ፡ ሠነየኒ ፡ ቃልከ ፡ ወእፎ ፡ ሐወዘኒ ፡ ነገርከ ፡ ወመክሥተ ፡ አፉከ ። ንግረኒኬ ፡ ለዘ ፡ ይረትዕ ፡ ለዘ ፡ እሰግድ ፡ ሎቱ ፤ ወንሕነሰ ፡ ንሰግድ ፡ ለፀሐይ ፡ በከመ ፡ መሀሩነ ፡ አበዊነ ፡ እስመ ፡ ንብል ፡ ውእቱ ፡ ፀሐይ ፡ ንጉሦሙ ፡ ለአማልክት ፤ ወባዕዳንሂ ፡ እለ ፡ እምታሕቴነ ፡ ቦእለ ፡ ይሰግዱ ፡ ለአእባን ፡ ወቦ ፡ እለ ፡ ይሰግዱ ፡ ለአዕዋም ፡ ወቦእለ ፡ ይሰግዱ ፡ ለግልፈዋት ፡ ወቦ ፡ እለ ፡ ይሰግዱ ፡ ለአምሳለ ፡ ወርቅ ፡ ወብሩር ፤ ወንሕነሰ ፡ ንሰግድ ፡ ለፀሐይ ፡ እስመ ፡ ውእቱ ፡ ያበስል ፡ ሲሳየ ፡ ወካዕበ ፡ ውእቱ ፡ ያበርህ ፡ ጽልመተ ፡ ወያአትት ፡ ፍርሀተ ፤ ንብሎ ፡ ንጉሥነ ፡ ወንብሎ ፡ ፈጣሪነ ፡ ወንሰግድ ፡ ሎቱ ፡ ከመ ፡ አምላክነ ፤ እስመ ፡ አልቦ ፡ ዘነገረነ ፡ ባዕደ ፡ አምላከ ፡ ዘእንበሌሁ ። ወባሕቱ ፡ ሰማዕነ ፡ ከመ ፡ ብክሙአ ፡ ለእስራኤል ፡ ካልአ ፡ አምላከ ፡ ዘኢናአምሮ ፡ ንሕነ ፡ ወዜነዉነ ፡ ከመ ፡ አውረደ ፡ ለክሙ ፡ ታቦት ፡ እምሰማያት ፡ ወወሀበክሙ ፡ ጽላተ ፡ ሥርዐተ ፡ መላእክት ፡ በእደ ፡ ሙሴ ፡ ነቢዩ ፡ ሰማዕነ ፡ ዘንተ ፡ ፤ ወይወርድ ፡ አ ፡ ኀቤክሙ ፡ ለሊሁ ፡ ወይትናገረክሙ ፡ ወይኤምረክሙ ፡ ፍትሖ ፡ ወትእዛዞ ፠ ፠ ፠