26. How the King held converse with the Queen
25. How the Queen came to Solomon the King / Kebra Nagast / 26. How the King held converse with the Queen 27. Concerning the Labourer

፳፮ ፡ ኀበ ፡ ተናገረ ፡ ንጉሥ ፡ ምስለ ፡ ንግሥት ።

 

ወትቤ ፡ ንግሥት ፡ ማክዳ ፡ ለንጉሥ ፡ ሰሎሞን ፡ ብፁዕ ፡ አንተ ፡ እግዚእየ ፡ ዘከመዝ ፡ ለከ ፡ ተውህበ ፡ ጥበብ ፡ ወአእምሮ ፤ አንሰ ፡ እምፈተውኩ ፡ እኩን ፡ ከመ ፡ አሐቲ ፡ እንተ ፡ ትንእስ ፡ እምአእማቲከ ፡ ከመ ፡ እኅዕብ ፡ እገሪከ ፡ ወእስማዕ ፡ ጥበበከ ፡ ወእለቡ ፡ አእምሮተከ ፡ ወእግነይ ፡ ለመንግሥትከ ፡ ወእትሐሠይ ፡ በጥበብከ ። ሚመጠነ ፡ አደመኒ ፡ አውሥኦትከ ፡ ወጣዕመ ፡ ቃልከ ፡ ወሠናየ ፡ ሑረትከ ፡ ወአዳም ፡ ንባብከ ፡ ወሣእሣአ ፡ ጣዕመ ፡ ቃልከ ፡ ወያስተፈሥሕ ፡ ልበ ፡ ወያጠልል ፡ አዕፅምተ ፡ ወይሜግብ ፡ አልባበ ፡ ወያጠአጥእ ፡ ወያሞግስ ፡ ከናፍረ ፡ ወያጸንዕ ፡ መከይደ ። ወእሬእየከ ፡ ከመ ፡ ጥበብከ ፡ ዘእንበለ ፡ መስፈርት ፡ ወልቡናከ ፡ ዘእንበለ ፡ ሕጸት ፡ ከመ ፡ ማኅቶት ፡ በውስተ ፡ ጽልመት ፡ ወከመ ፡ ሮማን ፡ በውስተ ፡ ገነት ፡ ወከመ ፡ ባሕርይ ፡ በውስተ ፡ በሕር ፡ ወከመ ፡ ኮከበ ፡ ጽባሕ ፡ በውስተ ፡ ከዋክብት ፡ ወከመ ፡ ብርሃነ ፡ ወርኅ ፡ በውስት ፡ ጊሜ ፡ ወከመ ፡ ጎሐ ፡ ጽባሕ ፡ ወሠርቀ ፡ ፀሐይ ፡ በውስተ ፡ ሰማይ ። ወአንሰ ፡ ኣአኵቶ ፡ ለዘ ፡ አብጽሐኒ ፡ ወአርአየኒ ፡ ኪያከ ፡ ወዘአኬደኒ ፡ ውስተ ፡ መድረከ ፡ ኆኃቲከ ፡ ወአስምዐኒ ፡ ቃለከ ፨ አውሥአ ፡ ንጉሥ ፡ ሰሎሞን ፡ ወይቤላ ፡ ጥበብሰ ፡ ወልቡና ፡ እምኔኪ ፡ ሠረጸት ፤ ሊተሰ ፡ በዘ ፡ ወሀበኒ ፡ አምላከ ፡ እስራኤል ፡ ዘሰአልኩ ፡ ወኀሠሥኩ ፡ በኀቤሁ ፡ ወአንቲሰ ፡ እንዘ ፡ ኢታአምሪ ፡ አምላከ ፡ እስራኤል ፡ ዘንተ ፡ ጥበበ ፡ ዘአሥረጽኪ ፡ እምልብኪ ፡ ከመ ፡ ትርአዪ ፡ ኪያየ ፡ ትሑተ ፡ ገብሩ ፡ ለአምላኪየ ፡ ወቀዋሚሃ ፡ ለደብተራሁ ፡ ዘእቀውም ፡ ወእትለአክ ፡ ወኣንሶሱ ፡ ለእግዝእትየ ፡ ታቦተ ፡ ሕጉ ፡ ለአምላከ ፡ እስራኤል ፡ ጽዮን ፡ ቅድስት ፡ ሰማያዊት ። አንሰ ፡ ገብሩ ፡ ለአምላኪየ ፡ ወኢኮንኩ ፡ አግዓዜ ፡ ወኢኮንኩ ፡ ዘእትለአክ ፡ በፈቃድየ ፡ አላ ፡ በፈቃዱ ፤ ወአኮ ፡ ዘንተ ፡ ቃለ ፡ እምኀቤየ ፡ አላ ፡ ውእቱ ፡ ዘአንበበኒ ፡ እነብብ ፤ ውእቱ ፡ ዘአዘዘኒ ፡ እገብር ፤ ውእቱ ፡ ዘሠርሐኒ ፡ አሐውር ፤ ውእቱ ፡ ዘመሀረኒ ፡ እትናገር ፤ ውእቱ ፡ ዘአጥበበኒ ፡ እሌቡ ፤ እስመ ፡ እንዘ ፡ መሬት ፡ አነ ፡ ሥጋ ፡ ረሰየኒ ፡ ወእንዘ ፡ ማይ ፡ አነ ፡ ሰብአ ፡ ርጉዐ ፡ ረሰየኒ ፡ ወእንዘ ፡ ነጠብጣብ ፡ ንስቲት ፡ ምራቅ ፡ እንተ ፡ ትተፋእ ፡ ዲበ ፡ ምድር ፡ ወትየብስ ፡ መልዕልተ ፡ ምድር ፡ በአርአያሁ ፡ ለሐኰኒ ፡ ወበአምሳሊሁ ፡ ገብረኒ ፨  ፨  ፨