25. How the Queen came to Solomon the King
24. How the Queen made ready to set out on her Journey / Kebra Nagast / 25. How the Queen came to Solomon the King 26. How the King held converse with the Queen

፳፭ ፡ ዘከመ ፡ በጽሐት ፡ ኀበ ፡ ሰሎሞን ፡ ንጉሥ ።

 

ወበጽሐት ፡ ኢየሩሳሌም ፡ ወአብአት ፡ አምኃ ፡ ለንጉሥ ፡ ብዙኀ ፡ ክብረ ፡ ዘይትፈቀድ ፡ ሎቱ ፤ ወውእቱኒ ፡ አክበራ ፡ ወተፈሥሐ ፡ ወወሀባ ፡ ማኅደረ ፡ በታዕካ ፡ መንግሥት ፡ ዘቅሩብ ፡ ኀቤሁ ። ወይፌኑ ፡ ላቲ ፡ ድራረ ፡ ወምሳሐ ፡ ለለ ፡ አሐቲ ፡ ጊዜ ፡ ፲ወ፭ ፡ በመስፈርተ ፡ ቆሪ ፡ ስንዳሌ ፡ ስሉቀ ፡ ብሱለ ፡ ምስለ ፡ ቅብእ ፡ ወመጣብቅ ፡ ብዙኅ ፡ ወ፴ ፡ በመስፈርተ ፡ ቆሪ ፡ ስንዳሌ ፡ ልቱመ ፤ በዘ ፡ ተገብረ ፡ ኅብስተ ፡ ፫፻ወ፶ ፡ ምስለ ፡ ጠቢቁ ፡ በዘባድው ፤ ወ፲ ፡ መግዝአ ፡ ላህም ፡ ወ፭ ፡ አስዋር ፡ ወ፶ ፡ አባግዕ ፡ ዘእንበለ ፡ ወይጠል ፡ ወሀየል ፡ ወቶራ ፡ ወመግዝአ ፡ ዶርሆ ፡ ወጻሕበ ፡ ወይን ፡ ፷ ፡ መሳፍረ ፡ ግረት ፡ ወከራሚ ፡ ፴ ፡ ወእምነ ፡ መዛርያን ፡ ወመዛርያት ፡ በበ ፡ ፳ወ፭ ፡ ወጸቃውዐ ፡ ወመዓንጠ ፡ ወእምነ ፡ ሲሳዩ ፡ ዘይበልዕ ፡ ወእምነ ፡ ስታይ ፡ ዘይሰቲ ። ወለለ ፡ ዕለት ፡ ያለብስ ፡ በበ ፡ ፲ወ፩ ፡ ዘየሀይድ ፡ አዕይንተ ፤ ወየሐውር ፡ ኀቤሃ ፡ ወይትናዘዝ ፡ ወይእቲኒ ፡ ተሐውር ፡ ኀቤሁወትትናዘዝ ፡ ወትሬኢ ፡ ጥበቦ ፡ ወፍትሖ ፡ ወክብሮ ፡ ወሞገሶ ፡ ወጣዕመ ፡ ነገሩ ፤ ወታነክር ፡ በልባ ፡ ወታስተአድም ፡ በኅሊናሃ ፡ ወትጤይቅ ፡ በአእምሮ ፡ ወታስተሓይጽ ፡ በአዕይንቲሃ ፡ ዘከመ ፡ መፍትው ፡ ወታስተዐጽብ ፡ ፈድፋደ ፡ በእንተ ፡ ዘርእየት ፡ ወሰምዐት ፡ በኀቤሁ ፤ ከመ ፡ ፍጹም ፡ በስንኣ ፡ ወጠቢብ ፡ በኅሊና ፡ ወፍሡሕ ፡ በጸጋ ፡ ወላሕይ ፡ በግርማ ፡ ወቃሉኒ ፡ በጥይቅና ፡ ወከናፍሪሁኒ ፡ በሥእሥእና ፡ ወትእዛዙኒ ፡ በግርማ ፡ ወዘበሰላም ፡ ምስለ ፡ ፍርሀተ ፡ እግዚኣብሔር ፡ አውሥአቶ ። ወዘንተ ፡ ኵሎ ፡ ትሬኢ ፡ ወታስተዐጽብ ፡ እምብዝኀ ፡ ጥበቡ ፡ ወአልቦ ፡ ወኢምንትኒ ፡ ንቱገ ፡ እምቃሉ ፡ ወእምነገሩ ፡ አላ ፡ ፍጹም ፡ ኵሉ ፡ ዘተናገረ ፨ ወይትጌበር ፡ ለሕንጻ ፡ ቤተ ፡ እግዚኣብሔር ፡ ወይትነሣእ ፡ ወየሐውር ፡ ይምነ ፡ ወፅግመ ፡ ቅድመ ፡ ወድኅረ ፡ ወያርእዮሙ ፡ መሳፍረ ፡ ወመዳልወ ፡ ወመሳውረ ፤ ወለኬነተ ፡ ነሀብትኒ ፡ ይነግሮሙ ፡ መሳፍለ ፡ ወመዋቅረ ፡ ወመጓንጵት ፡ ወለወቀርተ ፡ እብንኒ ፡ ያርእዮሙ ፡ መኣዝነ ፡ ወመንኰራኵረ ፡ ወመሳፍሐ ። ወኵሉ ፡ ይትገበር ፡ በቃሉ ፡ ወአልቦ ፡ ዘይትዐደው ፡ እምቃሉ ፤ እስመ ፡ ከመ ፡ ማኅቶት ፡ በውስተ ፡ ጽልመት ፡ ብርሃነ ፡ ልቡ ፡ ወከመ ፡ ኆጻ ፡ ብዝኀ ፡ ጥበቡ ፡ አልቦ ፡ ዘይሰወሮ ፡ እምቃለ ፡ አራዊት ፡ ወአዕዋፍ ፡ ወለአጋንንትኒ ፡ ቀነዮሙ ፡ በጥበቡ ። ወኵሎ ፡ ይገብር ፡ በኪን ፡ ዘወሀቦ ፡ እግዚኣብሔር ፡ ሶበ ፡ ሰአለ ፡ ኀቤሁ ፤ እስመ ፡ ኢሰአለ ፡ መዊአ ፡ ፀሩ ፡ ወኢሰአለ ፡ ብዕለ ፡ ወክብረ ፡ አላ ፡ ሰአለ ፡ ጥበበ ፡ ወአእምሮ ፡ ከመ ፡ የሀቦ ፡ በዘ ፡ ይኴንን ፡ ሕዝቦ ፡ ወበዘ ፡ የሐንጽ ፡ ቤቶ ፡ ወበዘ ፡ ያሤኒ ፡ ተግባሮ ፡ ለእግዚኣብሔር ፡ በኵሉ ፡ ዘወሀቦ ፡ ጥበበ ፡ ወአእምሮ ፨  ፨