24. How the Queen made ready to set out on her Journey
23. How the Merchant returned to Ethiopia / Kebra Nagast / 24. How the Queen made ready to set out on her Journey 25. How the Queen came to Solomon the King

፳፬ ፡ ኀበ ፡ ተደለወት ፡ ለሐዊር ።

 

ወትቤሎሙ ፡ ስምዑ ፡ ቃልየ ፡ እሊአየ ፡ ወአፅምኡኒ ፡ ነገርየ ፤ እስመ ፡ አንሰ ፡ እፈቅድ ፡ ጥበበ ፡ ወልብየኒ ፡ ተኀሥሣ ፡ ለአእምሮ ፤ እስመ ፡ ተነደፍኩ ፡ በፍቅረ ፡ ጥበብ ፡ ወተስሕብኩ ፡ በአሕባለ ፡ አእምሮ ፤ እስመ ፡ ትኄይስ ፡ ጥበብ ፡ እመዝገበ ፡ ወርቅ ፡ ወብሩር ፤ ጥበብሰ ፡ ትኄይስ ፡ እምነ ፡ ኵሉ ፡ ዘተፈጥረ ፡ ዲበ ፡ ምድር ። በምንትኬ ፡ ያስተማስልዋ ፡ ለጥበብ ፡ በታሕተ ፡ ሰማይ ፤ ትጥዕም ፡ እምነ ፡ መዓር ፡ ወታስተፌሥሕ ፡ እምነ ፡ ወይን ፡ ወታበርህ ፡ እምነ ፡ ፀሐይ ፡ ወትትፈቀር ፡ እምነ ፡ ዕንቍ ፡ ክቡር ፡ ወታጠልል ፡ እምነ ፡ ቅብእ ፡ ወታጸግብ ፡ እምነ ፡ መባልዕት ፡ ጥዑማት ፡ ወታከብር ፡ እምነ ፡ አእላፍ ፡ ወርቅ ፡ ወብሩር ፤ መስተፈሥሒት ፡ ለልብ ፡ ወመብርሂት ፡ ለአዕይንት ፡ ወከዋው ፡ ለእግር ፡ ወድርዕ ፡ ለእንግድኣ ፡ ወጌራ ፡ ለርእስ ፡ ወብዝጋና ፡ ለክሳድ ፡ ወመቀነቲ ፡ ለሐቌያት ፡ ወመስምዒ ፡ ለአእዛን ፡ ወመጥበቢ ፡ ለአልባብ ፡ ወትምህርት ፡ ለማእምራን ፡ ወመናዘዚ ፡ ለልቡባን ፡ ወወሃቤ ፡ ክብር ፡ ለኀሣሥያን ። ወመንግሥትኒ ፡ ኢይቀውም ፡ ዘእንበለ ፡ ጥበብ ፡ ወብዕልኒ ፡ ኢይትዐቀብ ፡ ዘእንበለ ፡ ጥበብ ፡ ወእግርኒ ፡ ኢይጸንዕ ፡ ኀበ ፡ ኬደ ፡ ዘእንበለ ፡ ጥበብ ፡ ወልሳንኒ ፡ ኢይትፈቀር ፡ ዘተናገረ ፡ ዘእንበለ ፡ ጥበብ ። ጥበብሰ ፡ ትኄይስ ፡ እምነ ፡ ኵሉ ፡ መዛግብት ፤ ዘዘገበ ፡ ወርቀ ፡ ወብሩረ ፡ ኢይበቍዕ ፡ ዘእንበለ ፡ ጥበብ ፤ ወዘዘገበ ፡ ጥበበ ፡ አልቦ ፡ ዘየሀይዶ ፡ እምነ ፡ ልቡ ፤ ወዘዘገቡ ፡ አብዳን ፡ ይበልዑ ፡ ጠቢባን ፡ ወበእንተ ፡ እከዮሙ ፡ ለዐማፅያን ፡ ይትዌደሱ ፡ ጻድቃን ፡ ወበእንተ ፡ ስሐተቶሙ ፡ ለአብዳን ፡ ይትፈቀሩ ፡ ጠቢባን ። ጥበብሰ ፡ ልዕልት ፡ ይእቲ ፡ ወብዕልት ፡ አነ፡ ኣፈቅራ ፡ ከመ ፡ እም ፡ ወይእቲ ፡ ተሐቅፈኒ ፡ ከመ ፡ ሕፃና ፡ አነ ፡ እተሉ ፡ አሠራ ፡ ለጥበብ ፡ ወይእቲ ፡ ተዐቅበኒ ፡ እስከ ፡ ለዓለም ፡ አነ ፡ አኀሥሣ ፡ ለጥበብ ፡ ወይእቲ ፡ ትከውነኒ ፡ ለዝሉፉ ፡ እተሉ ፡ አሠራ ፡ ወኢይትገደፍ ፡ እምኔሃ ፡ ኣሰምክ ፡ ባቲ ፡ ወትከውነኒ ፡ ጥቅመ ፡ አድማስ ፡ እጸወን ፡ ባቲ ፡ ወትከውነኒ ፡ ኀይለ ፡ ወጽንዐ ፡ እትፌሣሕ ፡ ባቲ ፡ ወትከውነኒ ፡ ሞገሰ ፡ ብዙኀ ። እስመ ፡ ርቱዕ ፡ ንትሉ ፡ አሠራ ፡ ለጥበብ ፡ ወይልካእ ፡ ሰኰናነ ፡ ውስተ ፡ መድረከ ፡ ኆኃቲሃ ፡ ለጥበብ ፤ ንኅሥሣ ፡ ወንረክባ ፡ ናፍቅራ ፡ ወኢትርሕቅ ፡ እምኔነ ፡ ንዴግና ፡ ወንረክባ ፡ ንስአላ ፡ ወንነሥኣ ፤ ንሚጥ ፡ ልበነ ፡ ኀቤሃ ፡ ከመ ፡ ኢንርስዓ ፡ በኵሉ ፡ ጊዜ ፡ እስመ ፡ ለእመ ፡ ዘከርዋ ፡ ትዜክር ፡ ለሊሃ ፡ ወበኀበ ፡ አብዳንሰ ፡ ኢትዘክር ፡ ጥበበ ፡ እስመ ፡ ኢያከብርዋ ፡ ወኢታፈቅሮሙ ። ወክብራሰ ፡ ለጥበብ ፡ አክብሮ ፡ ጠቢብ ፡ ወፍቅራኒ ፡ ለጥበብ ፡ አፍቅሮቱ ፡ ለጠቢብ ፤ አፍቅሮ ፡ ለጠቢብ ፡ ወኢትርሐቅ ፡ እምኔሁ ፡ ወበራእየ ፡ ዚአሁ ፡ ትከውን ፡ ጠቢብ ፤ ስማዕ ፡ መክሥተ ፡ አፉሁ ፡ ከመ ፡ ትኩን ፡ ከማሁ ፡ ወርኢ ፡ መከይደ ፡ እገሪሁ ፡ ከመ ፡ ታንብር ፡ ኀበ ፡ ኬደ ፡ ውእቱ ፡ ወኢትሰስል ፡ እምኔሁ ፡ ከመ ፡ ትንሣእ ፡ ተረፋተ ፡ ጥበቡ ። ወአንሰ ፡ በሰሚዕኒ ፡ አፍቀርክዎ ፡ ዘእንበለ ፡ እርአዮ ፤ እስመ ፡ ኵሉ ፡ ዜና ፡ ነገሩ ፡ በኀቤየ ፡ ኮነ ፡ ፍትወ ፡ ለልብየ ፡ ከመ ፡ ማይ ፡ ለጽሙእ ፨ አውሥኡ ፡ ወይቤልዋ ፡ መኳንንቲሃ ፡ ወአግብርቲሃ ፡ ወአእማቲሃ ፡ ወመማክርቲሃ ፡ እግዝእትነ ፡ ጥበብሰ ፡ ኢተኀጥአ ፡ እምኔኪ ፡ ወበጥበብኪ ፡ ዘታፈቅሪ ፡ ጥበበ ፤ ወንሕነሰ ፡ እመኒ ፡ ሖርኪ ፡ ነሐውር ፡ ምስሌኪ ፡ ወእመኒ ፡ ነበርኪ ፡ ንነብር ፡ ምስሌኪ ፡ ወትኩን ፡ ሞትነ ፡ ምስለ ፡ ሞትኪ ፡ ወሕይወትነ ፡ ምስለ ፡ ሕይወትኪ ፨ ወእምዝ ፡ ተደለወት ፡ ለሐዊር ፡ በብዙኅ ፡ ክብር ፡ ወግርማ ፡ በዐቢይ ፡ ሥንቅ ፡ ወተድላ ፤ እስመ ፡ ፈተወ ፡ ልባ ፡ በፈቃደ ፡ እግዚኣብሔር ፡ ከመ ፡ ትሖር ፡ ኢየሩሳሌም ፡ ከመ ፡ ትስማዕ ፡ ጥበቢሁ ፡ ለሰሎሞን ፤ እስመ ፡ ሰምዐት ፡ ወጽህቀት ። ተደለወት ፡ ለሐዊር ፤ ወተጽዕነ ፡ ራኩብ ፡ ፯፻ወ፺ ፡ ወ፯ ፡ ወበቅልሰ ፡ ወአድግ ፡ ዘአልቦ ፡ ኆልቈ ፡ ተጽዕነ ፤ ወሖረት ፡ ወአርትዐት ፡ ፍኖታ ፡ እንዘ ፡ ይትዌከል ፡ ልባ ፡ በእግዚኣብሔር ፨  ፨  ፨