23. How the Merchant returned to Ethiopia
22. Concerning Tamrin, the Merchant / Kebra Nagast / 23. How the Merchant returned to Ethiopia 24. How the Queen made ready to set out on her Journey

፳፫ ፡ ኀበ ፡ ገብአ ፡ ነጋዲ ፡ ኢትዮጵያ ።

ወእምዝ ፡ ፈተወ ፡ ነጋዲ ፡ ተምሪን ፡ ከመ ፡ ይግባእ ፡ ብሔሮ ፡ ወሖረ ፡ ኀቤሁ ፡ ለሰሎሞን ፡ ወሰገደ ፡ ሎቱ ፡ ወአምኆ ፡ ወይቤሎ ፤ ሰላም ፡ ለዕበይከ ፡ ፈንወኒ ፡ እሖር ፡ ብሔርየ ፡ ኀበ ፡ እግዝእትየ ፡ እስመ ፡ ጐንደይኩ ፡ በርኢየ ፡ ክብርከ ፡ ወጥበብከ ፡ ወበብዙኅ ፡ መባልዕት ፡ ዘትጼግወኒ ፡ ወይእዜሰ ፡ አሐውር ፡ ኀበ ፡ እግዝእትየ ፤ እስመ ፡ እምፈተውኩ ፡ እንበር ፡ ምስሌከ ፡ ከመ ፡ ፩ ፡ እምአግብርቲከ ፡ እምእለ ፡ ይቴሐቱ ፤ ብፁዓንሰ ፡ እለ ፡ ይሰምዑ ፡ ቃለከ ፡ ወይገብሩ ፡ ትእዛዘከ ፤ እስመ ፡ እምፈተውኩ ፡ እንበር ፡ ዝየ ፡ ወኢይትፈለጥ ፡ እምኔከ ፤ አላ ፡ ባሕቱ ፡ ፈንወኒ ፡ ኀበ ፡ እግዝእትየ ፡ በእንተ ፡ ምዕቅብና ፡ ዘላዕሌየ ፡ ከመ ፡ አሀባ ፡ ንዋያ ፡ ወለሊየኒ ፡ ገብር ፡ ላቲ ። ወቦአ ፡ ሰሎሞን ፡ ቤቶ ፡ ወወሀቦ ፡ ኵሎ ፡ ዘይትፈቀድ ፡ ክብረ ፡ ለብሔረ ፡ ኢትዮጵያ ፡ ወፈነዎ ፡ በሰላም ፤ ወሰገደ ፡ ወወፅአ ፡ ወሖረ ፡ ፍኖቶ ፡ ወበጽሐ ፡ ኀበ ፡ እግዝእቱ ፡ ወአወፈያ ፡ ኵሎ ፡ ንዋየ ፡ ዘአእተወ ። ወነገራ ፡ ዘከመ ፡ በጽሐ ፡ ሀገረ ፡ ይሁዳ ፡ ኢየሩሳሌም ፡ ኀበ ፡ ሰሎሞን ፡ ንጉሥ ፡ ወኵሎ ፡ ዘሰምዐ ፡ ወዘርእየ ፡ ነገራ ፡ ዘከመ ፡ ይገብር ፡ ፍትሐ ፡ ወዘከመ ፡ ይትናገር ፡ ንጽሐ ፡ ወዘከመ ፡ ይኤዝዝ ፡ ርትዐ ፡ በኵሉ ፡ ዘሐተቶ ፡ ያወሥእ ፡ በየውሀት ፡ ወአልቦ ፡ ሐሰት ፡ በኀቤሁ ፡ ወዘከመኒ ፡ ሤመ ፡ ነዳእተ ፡ ገባር ፡ እለ ፡ ይጸውሩ ፡ ዕፀ ፡ ኣርሶን ፡ በበ፯፻ወወቀርተ ፡ እብን ፡ ፰፻ ፡ እምነ ፡ ኵሉ ፡ ነጋድያን ፡ ወሠያጥያን ፡ ዘከመ ፡ የኀሥሥ ፡ ለኪነ ፡ ጥበብ ፡ ወምግባር ፡ ወዘከመ ፡ ይነሥእ ፡ ወይሁብ ፡ በካዕበት ፡ ወኵሉ ፡ ኪኑ ፡ ወግብሩ ፡ በጥበብ ። ወይነግራ ፡ ለለጸብሐት ፡ ኵሎ ፡ ጥበበ ፡ ሰሎሞን ፡ ከመ ፡ ይገብር ፡ ፍትሐ ፡ ወዘከመ ፡ ይገብር ፡ ርትዐ ፡ ወዘከመ ፡ ይሠርዕ ፡ ማእደ ፡ ወዘከመ ፡ ይገብር ፡ ምሳሐ ፡ ወዘከመ ፡ ይሜህር ፡ ጥበበ ፡ ወዘከመ ፡ ይኤዝዝ ፡ አግብርቲሁ ፡ ወኵሎ ፡ ሥሩዕ ፡ በምክር ፡ ወየሐውሩ ፡ በቃሉ ፡ ወአልቦ ፡ ዘይትዔገል ፡ ካልኡ ፡ ወአልቦ ፡ ዘይዔምዕ ፡ ንዋየ ፡ ቢጹ ፡ ወአልቦ ፡ ሀያዲ ፡ ወኢሰራቂ ፡ በመዋዕሊሁ ፤ እስመ ፡ በጥበብ ፡ ያአምር ፡ ለእለ ፡ ስሕቱ ፡ ወይቀሥፎሙ ፡ ወያፈርሆሙ ፡ ወኢይደግሙ ፡ እኩየ ፡ አላ ፡ በሰላም ፡ ይነብሩ ፡ ምስለ ፡ ፍርሀተ ፡ ንጉሥ ። ወዘንተ ፡ ኵሎ ፡ ይነግራ ፡ ወለለ ፡ ጸብሐት ፡ ይዜክር ፡ ዘርእየ ፡ በኀበ ፡ ንጉሥ ፡ ወይነግራ ፤ ወታስተደምም ፡ በዘ ፡ ሰምዐት ፡ እምኀበ ፡ ነጋዲ ፡ ገብራ ፡ ወትኄሊ ፡ በልባ ፡ ከመ ፡ ትሖር ፡ ኀቤሁ ፡ ወትበኪ ፡ እምብዝኀ ፡ ፍቅራ ፡ በዘ ፡ ነገራ ፡ ወታፈቅር ፡ ፈድፋደ ፡ ሐዊረ ፡ ኀቤሁ ፡ ወትኄሊ ፡ ኅሊና ፡ ሐዊረ ፡ ኀቤሁ ፡ ወታስተራሕቅ ፡ ወታስተዐጽብ ። ወካዕበ ፡ ተሐትት ፡ ወይነግራ ፡ ካዕበ ፡ ትፈቱ ፡ ወታስተአድም ፡ ሐዊረ ፡ ከመ ፡ ትስማዕ ፡ ጥበቢሁ ፡ ወትርአይ ፡ ገጾ ፡ ወተአምኅ ፡ ከያሁ ፡ ወትግነይ ፡ ለመንግሥቱ ፤ ወአጥብዐት ፡ ልባ ፡ ከመ ፡ ትሖር ፡ ኀቤሁ ፡ ወእግዚኣብሔርኒ ፡ አጥብዐ ፡ ልባ ፡ ከመ ፡ ትሖር ፡ ወአፍተዋ ፨ ወእምዝ ፡ አኀዘት ፡ ትሥራዕ ፡ ቤታ ፡ ወተአዝዝ ፡ አግብርቲሃ ፡ ወትምዐድ ፡ አእማቲሃ ፡ ወታስተሣኒ ፡ ንዋያ ፤ ወተኀሥሥ ፡ ዘይትፈቀድ ፡ ለፍኖት ፡ ወለአምኃ ፡ ለንጉሥ ፡ ወለውሂብ ፡ ለመኳንንቲሃ ፡ ወለዕሴተ ፡ አእማቲሃ ። ወአስተጋብአት ፡ ራኩባተ ፡ ወአብቅልተ ፡ ወአፍራሰ ፡ ወአእዱገ ፡ ወአሕማረ ፡ ወአርማሰ ፡ ወመጻፍነ ፡ ወአሕስለ ፡ ወመሣንቀ ፡ ወመሳትየ ፡ ወመጻውረ ፤ ወተደለወት ፡ ከመ ፡ ትሖር ፡ ወአዘዘት ፡ ለኵሉ ፡ መኳንንቲሃ ፡ እለ ፡ እምታሕቴሃ ፡ ከመ ፡ ይደለዉ ፡ ለፍኖት ፡ እስከ ፡ ፮አውራኅ ፡ ወይንሥኡ ፡ መሣንቀ ፡ ወይሥርዑ ፡ አብያቲሆሙ ፡ እስመ ፡ ርሑቅ ፡ ብሔር ፡ ኀበ ፡ የሐውሩ ፨  ፨