21. Concerning the Queen of the South
20. Concerning the Division of the Earth / Kebra Nagast / 21. Concerning the Queen of the South 22. Concerning Tamrin, the Merchant

፳፩ ፡ በእንተ ፡ ንግሥተ ፡ አዜብ ።

 

ወዘከመ ፡ ተወልደሂ ፡ ውእቱ ፡ ረከብኩ ፡ ጽሑፍ ፡ ውስቴቱ ፡ ለውእቱ ፡ መጽሐፍ ፤ እስመ ፡ ከመዝ ፡ ዘከርዋ ፡ ወንጌላዊያን ፡ ለይእቲ ፡ ብእሲት ፤ ወእግዚእነሂ ፡ ኢየሱስ ፡ ክርስቶስ ፡ ይቤ ፡ እንዘ ፡ ይወቅሦሙ ፡ ለሕዝበ ፡ አይሁድ ፡ ሰቃልያን ፡ እለ ፡ አሜሃ ፡ ትውልድ ፡ እንዘ ፡ ይብል ፤ ንግሥተ ፡ አዜብ ፡ ትትነሣእ ፡ አመ ፡ ዕለተ ፡ ኵነኔ ፡ ውትትዋቀሦሙ ፡ ወትትፋትሖሙ ፡ ወትመውኦሙ ፡ ለዛቲ ፡ ትውልድ ፡ እለ ፡ ኢሰምዑ ፡ ስብከተ ፡ ቃልየ ፤ እስመ ፡ ለሊሃ ፡ መጽአት ፡ እምአጽናፈ ፡ ምድር ፡ ከመ ፡ ትስማዕ ፡ ጥበቢሁ ፡ ለሰሎሞን ፡ ወዘይቤ ፡ ንግሥተ ፡ አዜብ ፡ ንግሥተ ፡ ኢትዮጵያ ፡ ይእቲ ፡ ወአጽናፈ ፡ ምድርሰ ፡ ዘተብህለ ፡ በእንተ ፡ ድካመ ፡ ፍጥረት ፡ ዘአንስት ፡ ወበእንተ ፡ ርሕቀ ፡ ፍኖት ፡ ወላህበ ፡ ፀሐይ ፡ ወበእንተ ፡ ረኃበ ፡ ፍኖት ፡ ወጽምአ ፡ ማይ ፨ ወይእቲሰ ፡ ንግሥተ ፡ አዜብ ፡ ሠናይት ፡ ጥቀ ፡ በራእያኒ ፡ በላሕያኒ ፡ ወበአእምሮ ፡ ወልቡና ፡ ዘወሀባ ፡ እግዚኣብሔር ፡ ከመ ፡ ትሖር ፡ ኢየሩሳሌም ፡ ከመ ፡ ትስማዕ ፡ ጥበቢሁ ፡ ለሰሎሞን ፤ እስመ ፡ በፈቃደ ፡ እግዚኣብሔር ፡ ተገብረ ፡ ዝንቱ ፡ ወኮነ ፡ ሥምረቱ ። ወይእቲሰ ፡ ባዕልት ፡ ጥቀ ፡ በዘ ፡ ወሀባ ፡ እግዚኣብሔር ፡ ክብረ ፡ ወብዕለ ፡ ወርቀ ፡ ወብሩረ ፡ ወአልባሰ ፡ ክቡረ ፡ ወአግማለ ፡ ወአግብርተ ፡ ወነጋድያነ ፡ ወይነግዱ ፡ ላቲ ፡ ባሕረ ፡ ወየብሰ ፡ ወህንደኬ ፡ ወአስዋነ ፨  ፨  ፨