14. Concerning the Covenant of Abraham
13. Concerning Abraham / Kebra Nagast / 14. Concerning the Covenant of Abraham 15. Concerning Isaac and Jacob

፲ወ፬ ፡ በእንተ ፡ ኪዳነ ፡ አብርሃም ።

 

ወተናገሮ ፡ እግዚኣብሔር ፡ ወይቤሎ ፤ ኢትፍራህ ፡ እምዮም ፡ ገብርየ ፡ አንተ ፡ ወኣቀውም ፡ ኪዳንየ ፡ ምስሌከ ፡ ወምስለ ፡ ዘርእከ ፡ እምድኅሬከ ፡ ወኣበዝኅ ፡ ዘርአከ ፡ ወኣዐቢ ፡ ስምከ ፡ ፈድፋደ ፡ ወኣወርዳ ፡ ለታቦተ ፡ ኪዳንየ ፡ ዲበ ፡ ምድር ፡ በ፯ትውልድ ፡ እምድኅሬከ ፡ ወታንሶሱ ፡ ምስለ ፡ ዘርእከ ፡ ወትከውን ፡ መድኀኒተ ፡ ለዘመድከ ፤ ወእምድኅሬሁ ፡ እፌኑ ፡ ቃልየ ፡ ለመድኀኒተ ፡ አዳም ፡ ወደቂቁ ፡ እስከ ፡ ለዓለም ። ወይእዜኒ ፡ እሉ ፡ አዝማዲከ ፡ ዐላዊያን ፡ ወአበዩ ፡ አምልኮትየ ፡ በርትዕ ፤ ወአንተሰ ፡ ዕለት ፡ እምዕለት ፡ ከመ ፡ ኢያስሕቱከ ፡ ነዓ ፡ ፃእ ፡ እምዛቲ ፡ ምድር ፡ ምድረ ፡ አበዊከ ፡ ውስተ ፡ ምድር ፡ ዘኣርእየከ ፡ አነ ፡ ወእሁቦሙ ፡ ለዘርእከ ፡ እምድኅሬከ ። ወሰገደ ፡ አብራም ፡ ለእግዚኣብሔር ፡ ወተአዘዘ ፡ ለአምላኩ ፤ ወይቤሎ ፡ ይኩን ፡ ስምከ ፡ አብርሃም ፡ ወወሀቦ ፡ ሰላመ ፡ ወዐርገ ፡ ውስተ ፡ ሰማያት ፨ ወአብርሃምኒ ፡ አተወ ፡ ውስተ ፡ ማኅደሩ ፡ ወነሥኣ ፡ ለሳራ ፡ ብእሲቱ ፡ ወወፅአ ፡ እንዘ ፡ ኢይትመየጥ ፡ አቡሁ ፡ ወእሞ ፡ ወቤቶ ፡ ወአዝማዲሁ ፡ ወመነነ ፡ በእንተ ፡ እግዚኣብሔር ፤ ወበጽሐ ፡ ውስተ ፡ ሀገረ ፡ ሳሌም ፡ ወኀደረ ፡ ህየ ፡ ወነግሠ ፡ በጽድቅ ፡ ወኢተዐደወ ፡ እምትእዛዙ ፡ ለእግዚኣብሔር ፤ ወእግዚኣብሔር ፡ ባረኮ ፡ ፈድፋደ ፡ እስከ ፡ አጥረየ ፡ ዐሠርተ ፡ ወሰመንተ ፡ አግብርቲሁ ፡ እለ ፡ ይቀውሙ ፡ ቅድሜሁ ፡ ጽኑዓን ፡ ወምሁራነ ፡ ፀብእ ፡ እለ ፡ ይገብሩ ፡ ፈቃዶ ፡ እለ ፡ ይለብሱ ፡ ዲባጋተ ፡ ዘወርቅ ፡ ወየዐንቁ ፡ በዝጋናተ ፡ ዘወርቅ ፡ ወይቀንቱ ፡ ቅናታተ ፡ ዘወርቅ ፡ ወይትቄጸሉ ፡ አክሊላተ ፡ ዘወርቅ ፤ ወቦሙ ፡ ይመውእ ፡ ፀሮ ። ወአዕረፈ ፡ በክብር ፡ በእግዚኣብሔር ፡ ወኀየሰ ፡ ወተሞገሰ ፡ እምእለ ፡ ቅድሜሁ ፤ ኀየሰ ፡ ወከብረ ፡ ወተለዐለ ፨  ፨  ፨