9. Concerning the Covenant of Noah
8. Concerning the Flood / Kebra Nagast / 9. Concerning the Covenant of Noah 10. Concerning Zion

፱ ፡ በእንተ ፡ ኪዳነ ፡ ኖሕ ።

 

ወእምዝ ፡ አዕረፈ ፡ ኖሕ ፡ ጻድቅ ፡ ወነግሠ ፡ ሴም ፡ በጥበብ ፡ ወበጽድቅ ፡ እስመ ፡ ተባረከ ፡ በኀበ ፡ ኖሕ ፡ እንዘ ፡ ይብል ፡ ኩን ፡ እግዚአ ፡ ለእኁከ ፤ ወለካምኒ ፡ ይቤሎ ፡ ኩን ፡ ገብረ ፡ ለእኁከ ፤ ወለያፌትኒ ፡ ይቤሎ ፡ ተገበር ፡ ወተኦዛዜ ፡ ኩን ፡ ለሴም ፡ ዋርስየ ። ወካዕበ ፡ እምድኅረ ፡ አይኅኒ ፡ ኢኀደገ ፡ ተፃርሮቶሙ ፡ ዲያብሎስ ፡ ፀርነ ፡ ለደቂቀ ፡ ኖሕ ፡ አላ ፡ አንሥኦ ፡ ለከናኦን ፡ ወልደ ፡ ካም ፡ ወኮነ ፡ መማዕልይ ፡ ዘይነፍቅ ፡ መንግሥተ ፡ እምደቂቀ ፡ ሴም ። እስመ ፡ ተካፈሉ ፡ ምድረ ፤ ወአምሐሎሙ ፡ በስመ ፡ አምላኩ ፡ ከመ ፡ ኢይትዐደዉ ፡ ደወለ ፡ ቢጾሙ ፡ ወከመ ፡ ኢይብልዑ ፡ ማውታ ፡ ወብትከ ፡ ወከመ ፡ ኢይዘምዉ ፡ ዘእንበለ ፡ ሕግ ፡ ከመ ፡ ኢይትመዐዖሙ ፡ ዳግመ ፡ በአይኅ ፡ ፡ ወኖሕኒ ፡ ተጋነየ ፡ ወሦዐ ፡ ወጸውዐ ፡ ወገዐረ ፡ ወበከየ ፤ ወተናገሮ ፡ እግዚኣብሔር ፤ ወይቤ ፡ ኖሕ ፡ እመሰ ፡ ዳግመ ፡ ታማስና ፡ ለምድር ፡ በአይኅ ፡ ጥስየኒ ፡ ምስሌሆሙ ፡ ለእለ ፡ ኀልቁ ። ወይቤሎ ፡ እግዚኣብሔር ፡ አነ ፡ እትካየድ ፡ ምስሌከ ፡ ከመ ፡ ትንግሮሙ ፡ ለደቂቅከ ፡ ከመ ፡ ኢይብልዑ ፡ ማውታ ፡ ወብትከ ፡ ወከመ ፡ ኢይዘምዉ ፡ ዘእንበለ ፡ ሕግ ፡ ወአነሂ ፡ ከመ ፡ ኢያማስና ፡ ለምድር ፡ ዳግመ ፡ በአይኅ ፡ ወከመ ፡ እሁቦሙ ፡ ለደቂቅከ ፡ ክረምተ ፡ ወሐጋየ ፡ ዘርአ ፡ ወማእረረ ፡ ጸደየ ፡ ወመጸወ ፨  ፨  ፨