4. Concerning Envy
3. Concerning the Kingdom of Adam / Kebra Nagast / 4. Concerning Envy 5. Concerning the Kingdom of Seth

፬ ፡ በእንተ ፡ ቅንአት ።

 

ወሶበ ፡ ልህቁ ፡ ኅቡረ ፡ ቀንአ ፡ ላዕሌሁ ፡ ሰይጣን ፡ ወወደየ ፡ ይእተ ፡ ቅንአተ ፡ ውስተ ፡ ልበ ፡ ቃየን ፤ ቀዳሚ ፡ ቅንአቱ ፡ በእንተ ፡ ቃለ ፡ አቡነ ፡ አዳም ፡ ዘይቤ ፡ ዝውእቱ ፡ ብሩሀ ፡ ገጽ ፡ ይኩን ፡ ወራሴ ፡ መንግሥትየ ፤ ወበዳግምሰ ፡ ቅንአቱ ፡ በእንተ ፡ እኅቱ ፡ ሠናይ ፡ ራእያ ፡ እንተ ፡ ተወልደት ፡ ምስለ ፡ ቃየን ፡ ወተውህበት ፡ ለአቤል ፡ በከመ ፡ አዘዘ ፡ እግዚኣብሔር ፡ ይብዝኁ ፡ ወይምልእዋ ፡ ለምድር ፤ ወእንተ ፡ ተወልደትሰ ፡ ምስለ ፡ አቤል ፡ ትመስል ፡ ርእየተ ፡ ገጹ ፡ ለቃየን ፡ ወአስተኃለፈ ፡ አቡሆሙ ፡ ወወሀቦሙ ፤ ወሣልስ ፡ ቅንአቱ ፡ በእንተ ፡ ዘሦዑ ፡ ክልኤሆሙ ፡ ወተወክፈ ፡ እግዚኣብሔር ፡ መሥዋዕተ ፡ አቤል ፡ ወአስቆረረ ፡ መሥዋዕቶ ፡ ለቃየን ። ወበእንተዝ ፡ ቅንአት ፡ ቀተሎ ፤ እስመ ፡ ቀትለ ፡ አኀው ፡ እምቀዳሚ ፡ ተፈጥረ ፡ በቅንአተ ፡ ሰይጣን ፡ ላዕለ ፡ ደቂቀ ፡ አዳም ። ወሶበ ፡ ቀተለ ፡ እኁሁ ፡ ኮነ ፡ ርዑደ ፡ ወድንጉፀ ፡ ወምኑነ ፡ በኀበ ፡ አቡሁ ፡ ወበኀበ ፡ እግዚኡ ። ወተወልደ ፡ ሴት ፡ ወርእዮ ፡ አዳም ፡ ይቤ ፤ ይእዜኬ ፡ ተሣሀለኒ ፡ እግዚኣብሔር ፡ ወወሀበኒ ፡ ብርሃነ ፡ ገጽየ ፡ በንስሓ ፡ ኣቀርቦ ፡ ዋርስየ ፡ ዝንቱ ፡ ወውእቱሰ ፡ ቀታሌ ፡ ዋርስየ ፡ በ፱ትውልዱ ፡ ትደመሰስ ፡ ስሙ ፨  ፨  ፨  ፨