Chapter 7
Chapter 6 / Old Testament / Micah / Chapter 7 Bibliography

Chapter 7

1 አሌሊተ ፡ እስመ ፡ ኮንኩ ፡ ከመ ፡ ዘያስተጋብእ ፡ ቀሪመ ፡ በማእረር ፡ ወከመ ፡ ትቅራም ፡ አመ ፡ ቀሥም ፡ ዘአልቦ ፡ አስካል ፡ ዘይበልዑ ፡ ደቂቅ፤አሌላ ፡ ለነፍስ ፡

2 እስመ ፡ ኀልቀ ፡ ኄር ፡ እምድር ፡ ወአልቦ ፡ ሰብእ ፡ ዘያረትዕ፤ኵሉ ፡ ለነፍሱ ፡ ይሴነን ፡ ወኵሉ ፡ ያጠውቅ ፡ ቢጾ ፡ ወያመነድብ ።

3 ወያነሥኡ ፡ እደዊሆሙ ፡ ለእኩይ ፡ መልአክኒ ፡ ይስእል ፡ ወመኰንንኒ ፡ ይየውህ ፡ ይርከብ ፡ ፍትወተ ፡ ነፍሱ፤ወአጠፍኦ ፡

4 ለበረከቶሙ ፡ ከመ ፡ ፃፄ ፡ ዘይበልዕ ፡ ወየዐርግ ፡ ዲበ ፡ ንዋይ ፡ በዕለተ ፡ ጽልመት፤አሌለኪ ፡ በጽሐኪ ፡ ፍዳኪ ፡ ይአዜ ፡ ይበጽሖሙ ፡ ገዐር ።

5 ኢትትአመንዎሙ ፡ እንከ ፡ ለአዕርክቲክሙ ፡ ወኢትትወከልዎሙ ፡ ለመላእክት ፡ <ወእምብእሲትከ  ፡ >በውስተ ፡ ምስከብከ ፡ ተዐቀብ ፡ ከመ ፡ ትዕበያ ።

6 እስመ ፡ ወልድኒ ፡ ያኀስር ፡ አባሁ ፡ ወወለትኒ ፡ ትትነሣእ ፡ ዲበ ፡ እማ ፡ ወመርዓትኒ ፡ ላዕለ ፡ ሐማታ ፡ ወኵሉ ፡ ሰብአ ፡ ቤቱ ፡ ይፃረሮ ፡ ለሰብአ ።

7 ወአንሰ ፡ ዲበ ፡ እግዚአብሔር ፡ አዐርፍ ፡ ወእሴፈዎ ፡ ለአምላኪየ ፡ ወመድኀንየ ፡ ወይሰምዐኒ ፡ አምላኪየ ።

8 ወኢይከውን ፡ ስላተ ፡ ጸላኢየ ፡ እመኒ ፡ ድኅፅኩ ፡ እትነሣእ ፡ ወእመኒ ፡ ነበርኩ ፡ ውስተ ፡ ጽልመት ፡ እግዚአብሔር ፡ ያበርህ ፡ ሊተ ።

9 ተግሣጸ ፡ እግዚአብሔር ፡ አንሰ ፡ ተዐገስኩ ፡ እስመ ፡ አበስኩ ፡ ሎቱ ፡ እስከ ፡ ያጸድቀኒ ፡ ፍትሕየ ፡ ወይገብር ፡ ሊተ ፡ ቅሥትየ ፡ ወያገብአኒ ፡ ውስተ ፡ ብርሃን ፡ ወእሬእያ ፡ ለጸድቁ ።

10 ወትሬኢ ፡ ጸላእትየ ፡ ወትለብስ ፡ ኀፍረተ ፡ እንተ ፡ ትብለኒ ፡ አይቴ ፡ ውእቱ ፡ እግዚአብሔር ፡ አምላክከ ፡ ወይሬእየሃ ፡ አዕይንቲየ ፡ ይእዜ ፡ ትከውን ፡ ከመ ፡ ጽንጕን ፡ ዘይከይዱ ፡ ውስተ ፡ ፍኖት ።

11 ወታጠፍአኪ ፡ ይእቲ ፡ ዕለት ፡ ወትማስን ፡ ሕግኪ ፡ ይእተ ፡ ዕለተ ።

12 ወይትዐጸዋ ፡ አህጉሪኪ ፡ ወይትካፈልዎን ፡ ፋርስ ፡ ወይትካፈሉ ፡ አህጉሪኪ ፡ ጽኑዓተ ፡ እምጢሮስ ፡ እስከ ፡ ፈለገ ፡ ሶርያ ፡ ወእምባሕር ፡ እስከ ፡ ባሕር ፡ ወእምአድባር ፡ እስከ ፡ አድባር ።

13 ወትማስን ፡ <ምድር  ፡ >ምስለ ፡ ኵሉ ፡ ዘይነብራ ፡ እምፍሬ ፡ እከየ ፡ ምግባሮሙ ።

14 ረዐይ ፡ ሕዝበከ ፡ በበትርከ ፡ ወነገደ ፡ አባግዐ ፡ ርስትከ ፡ ወይኀድሩ ፡ ባሕቲቶሙ ፡ ወይትረዐዩ ፡ ውስተ ፡ ዖም ፡ ዘማእከለ ፡ ቀርሜሎስ ፡ ዘባሳን ፡ ወገለአድ ፡ በከመ ፡ መዋዕለ ፡ ዓለም ።

15 ወበከመ ፡ መዋዕል ፡ ዘአመ ፡ ዐርጉ ፡ እምግብጽ ፡ ወትሬእዩ ፡ መንክረ ።

16 ወይሬእዩ ፡ አሕዛብ ፡ ወይትዌሐኩ ፡ በኵሉ ፡ ኀይሎሙ ፡ ወይወድዩ ፡ እደዊሆሙ ፡ ዲበ ፡ አፉሆሙ ፡ ወይጠይኡ ፡ እዘኒሆሙ ።

17 ወይልሕሱ ፡ መሬተ ፡ ከመ ፡ አርዌ ፡ ምድር ፡ ወይጠፍሑ ፡ በምድር ፡ ወይትከወሱ ፡ በውስተ ፡ ማዕገቶሙ  ፡ ወይደነግፁ ፡ እምእግዚአብሔር ፡ አምላክነ ፡ ወይፈርሁ ፡ እምኔሁ ።

18 መኑ ፡ አምላክ ፡ ከማከ ፡ ዘያአትት ፡ ኀጢአተ ፡ ወይትዐዶ ፡ አበሳሆሙ ፡ ለርስቱ ፡ ለእለ ፡ ተርፉ ፡ ወኢያጸንዕ ፡ ስምዐ ፡ መዐቱ ፡ እስመ ፡ ፈቃዴ ፡ ምሕረት ፡ ውእቱ ።

19 ወይትመየጠነ ፡ ወይሣሀለነ ፡ ወያሰጥሞን ፡ ለኀጣውኢነ ፡ ወይዌርዎን ፡ ውስተ ፡ ቀላየ ፡ ባሕር ፡ ለአበሳነ ።

20 ወትሁቦ ፡ ጽድቀ ፡ ለያዕቆብ ፡ ወሣህለ ፡ ለአብርሃም ፡ በከመ ፡ መሐልከ ፡ ለአበዊነ ፡ በመዋዕለ ፡ ትካት ።