Chapter 6
Chapter 5 / Old Testament / Micah / Chapter 6 Chapter 7

Chapter 6

1 ስምዑ ፡ ቃለ ፡ እግዚአብሔር ፡ ዘይቤ ፡ እግዚአብሔር ፡ ተንሥእ ፡ ተዋቀሦሙ ፡ ለአድባር ፡ ወይስምዑ ፡ አውግር ፡ ቃለከ ።

2 ስምዑ ፡ አሕዛብ ፡ [ወአጽምኡ ፡ ]ቅሥተ ፡ እግዚአብሔር ፡ ወቈላተ ፡ መሠረተ ፡ ምድር ፡ እስመ ፡ ይትዋቀሦሙ ፡ እግዚአብሔር ፡ ለሕዝቡ ፡ ወይዛለፎሙ ፡ ለእስራኤል ።

3 እንዘ ፡ ይብል ፡ ሕዝብየ ፡ ምንተ ፡ ረሰይኩከ ፡ ወምንተ ፡ አተከዝኩከ ፡ ወምንተ ፡ አጽሐብኩከ ፡ ንግረኒ ።

4 ናሁ ፡ አውፃእኩከ ፡ እምድረ ፡ ግብጽ ፡ ወባላሕኩከ ፡ እምቤተ ፡ ቅኔ ፡ ወፈነውኩ ፡ ቅድሜከ ፡ ሙሴሃ ፡ ወአሮንሃ ፡ ወማርያሃ ።

5 ተዘከር ፡ ሕዝብየ ፡ ዘመከረ ፡ (ባለቅ ፡ )ንጉሠ ፡ ሞአብ ፡ ወምንተ ፡ አውሥአ ፡ በላዐም ፡ ወልደ ፡ ቤዖር ፡ እምነ ፡ ሰኪኖን ፡ እስከ ፡ ገልጋላ ፡ ከመ ፡ ይትዐወቅ ፡ ጽድቁ ፡ ለእግዚአብሔር ።

6 በምንትኑ ፡ እንጋ ፡ እረክቦ ፡ ለእግዚአብሔር ፡ ወእትወከፎ ፡ ለአምላኪየ ፡ ልዑል፤እረክቦኑ ፡ እንጋ ፡ በመሥዋዕተ ፡ አልህምት ፡ ዘዓመት ።

7 ይትወከፍኑ ፡ እንጋ ፡ እግዚአብሔር ፡ በአእላፍ ፡ አባግዕ ፡ ወእመአኮ ፡ በአእላፍ ፡ ሐራጊት ፡ ስቡሓን ፡ ወእመአኮ ፡ በበኵርየ ፡ በፍሬ ፡ ከርሥየ ፡ በእንተ ፡ ኀጢአትየ ፡ በጌጋየ ፡ ነፍስየ ።

8 እመቦ ፡ ዘነገረከ ፡ ሰብእ ፡ ምንት ፡ ሠናይ ፡ ወምንተ ፡ ይፈቅድ ፡ እግዚአብሔር ፡ እምኔከ ፡ ዘእንበለ ፡ ከመ ፡ ትግበር ፡ ጽድቀ ፡ ወታፍቅር ፡ ምጽዋተ ፡ ወትኩን ፡ ጥቡዐ ፡ ከመ ፡ ትትልዎ ፡ ለእግዚአብሔር ፡ አምላክከ ።

9 ቃለ ፡ እግዚአብሔር ፡ ትሰሚ ፡ በሀገርከ ፡ ከመ ፡ ያድኀኖሙ ፡ ለእለ ፡ ይፈርሁ ፡ ስሞ ፡ ስማዕ ፡ ሕዝብየ ፡ መኑ ፡ ያስተሬሲ ፡ ሀገረ ።

10 እሳትኑ ፡ ለቤተ ፡ ዐማፅያን ፡ እለ ፡ ይዘግቡ ፡ መዛግብተ ፡ ዓመፃ ፡ ወይገፍዑ ፡ ወየኀስሩ ፡

11 እለ ፡ ይጸድቁ ፡ በመዳልወ ፡ ዓመፃ ፡ ወቍናማተ ፡ መዳልወ ፡ ተምያን ፡

12 እለ ፡ መልእዎ ፡ ለብዕሎሙ ፡ በዓመፃ ፡ ወእለሂ ፡ ይነብሩ ፡ ውስቴታ ፡ ሐሰተ ፡ ይትናገሩ ፡ ወልስኖሙኒ ፡ ዘጕሕሉት ፡ ውስተ ፡ አፉሆሙ ።

13 ወአነሂ ፡ እእኅዝ ፡ እቅትልኪ ፡ ወአጥፍእኪ ፡ በእንተ ፡ ኀጢአትኪ ።

14 ወብልዒ ፡ ወኢትጸግቢ ፡ ወይጽለምኪ ፡ ወትመውቲ ፡ ወኢትሕየዊ ፡ ወኵሎሙ ፡ እለ ፡ ድኀኑ ፡ በኵናት ፡ ይወድቁ ።

15 ትዘርኢ ፡ ወኢተአርሪ ፡ ወትተክሊ ፡ ዘይተ ፡ ወኢትትቀብኢ ፡ ቅብአ ፡ ወኢትሰትዪ ፡ ወይነኪ ፡ ወይማስን ፡ ሥርዐቶሙ ፡ ለሕዝብየ ።

16 ወዐቀብኪ ፡ ሕጎ ፡ ለዘንበሪ ፡ ወኵሎ ፡ ምግባረ ፡ ቤተ ፡ አከኣብ ፡ ወሖርክሙ ፡ በምግባሮሙ ፡ ከመ ፡ ያብእኪ ፡ ውስተ ፡ ሙስና ፡ ወእለሂ ፡ ይነብሩ ፡ ውስቴታ ፡ ምስሌሆሙ ፡ ውስተ ፡ ኀሳር ፡ ወጽዕለተ ፡ አሕዛብ ፡ ይረክቦሙ ።