Chapter 4
Chapter 3 / Old Testament / Micah / Chapter 4 Chapter 5

Chapter 4

1 ወይከውን ፡ በደኃሪ ፡ መዋዕል ፡ ያስቲርኢ ፡ ደብረ ፡ እግዚአብሔር ፡ ድልወ ፡ ውስተ ፡ አርእስተ ፡ አድባር ፡ ወይትሌዐል ፡ መልዕልተ ፡ አውግር ፡ ወይረውጹ ፡ ኀቤሁ ፡ አሕዛብ ።

2 ወይሐውሩ ፡ ብዙኃን ፡ አሕዛብ ፡ ወይቤሉ ፡ ንዑ ፡ ንዕርግ ፡ ደብረ ፡ እግዚአብሔር ፡ ወውስተ ፡ ቤተ ፡ አምላከ ፡ ያዕቆብ፤ያርእዩነ ፡ ፍኖቶ ፡ ወንሖር ፡ በአሠሩ ፡ እስመ ፡ እምጽዮን ፡ ይወፅእ ፡ ሕግ ፡ ወቃለ ፡ እግዚአብሔር ፡ አምኢየሩሳሌም ።

3 ወይኴንን ፡ ማእከለ ፡ ብዙኃን ፡ አሕዛብ ፡ ወይዛለፎሙ ፡ ለአሕዛብ ፡ ጽኑዓን ፡ እስከ ፡ ነዋኀ ፡ ብሔር ፡ ወይመትሩ ፡ ኰያንዊሆሙ ፡ ለማሕረስ ፡ ወአስይፍቲሆሙ ፡ ለማዕፀድ ፡ ወኢያነሥኡ ፡ እንከ ፡ ኲናተ ፡ ሕዝብ ፡ ላዕለ ፡ ሕዝብ ፡ ወኢይትሜሀሩ ፡ እንከ ፡ ቀትለ ።

4 ወይዐርፉ ፡ ኵሎሙ ፡ ታሕተ ፡ ወይኖሙ ፡ ወታሕተ ፡ በለሶሙ ፡ ወአልቦ ፡ ዘይጌርሞሙ ፡ እስመ ፡ አፉሁ ፡ ለእግዚአብሔር ፡ ዘኵሎ ፡ ይመልክ ፡ ነበበ ፡ ከመዝ ።

5 እስመ ፡ ኵሎሙ ፡ አሕዛብ ፡ የሐውሩ ፡ በፍኖቶሙ ፡ ወንሕነሰ ፡ ነሐውር ፡ በስመ ፡ እግዚአብሔር ፡ አምላክነ ፡ ለዓለም ፡ ወዓዲ ።

6 ይእተ ፡ አሚረ ፡ ይቤ ፡ እግዚአብሔር ፡ አስተጋብኣ ፡ ለቅጥቅጥ ፡ ወእትዌከፋ ፡ ለግድፍት ፡ ለእንተ ፡ አርሐቅዋ ።

7 ወኢሬስያ ፡ ለቅጥቅጥ ፡ ትርፍተ ፡ ወለግድፍት ፡ ሕዝበ ፡ ጽንዕተ ፡ ወይነግሥ ፡ ሎሙ ፡ እግዚአብሔር ፡ በደብረ ፡ ጽዮን ፡ አምይእዜ ፡ ወእስከ ፡ ለዓለም ።

8 ወአንቲሂ ፡ ማኀፈደ ፡ ኖሎት ፡ ከመ ፡ ጸበል ፡ ወትመጽእ ፡ ወለተ ፡ ጽዮን ፡ ውስቴትኪ ፡ ወትቀድም ፡ በዊአ ፡ ቀዳሚት ፡ መንግሥት ፡ እምባቢሎን ፡ ወለተ ፡ ኢየሩሳሌም ።

9 ወይእዜኒ ፡ ለምንት ፡ መከርኪ ፡ እኩየ ፡ ንጉሥኑ ፡ አልብኪ ፡ ጠፍአኑ ፡ ልብኪ ፡ ከመ ፡ የአኀዝኪ ፡ ማሕምም ፡ ከመ ፡ እንተ ፡ ትወልድ ።

10 ሐመምኪሂ ፡ ወተዐገስኪ ፡ (ወቅረቢ ፡ ) ወለተ ፡ ጽዮን ፡ ከመ ፡ እንተ ፡ ትወልድ ፡ እስመ ፡ ናሁ ፡ ይእዜ ፡ ትወፅኢ ፡ እምሀገር ፡ ወተኀድሪ ፡ ውስተ ፡ ገዳም ፡ ወትበጽሒ ፡ እስከ ፡ ባቢሎን ፡ ወበህየ ፡ ያድኀነኪ ፡ ወበህየ ፡ ያነግፈኪ ፡ እግዚአብሔር ፡ አምላክኪ ፡ እምእደ ፡ ፀርኪ ።

11 ወናሁ ፡ ይእዜ ፡ ይትጋብኡ ፡ ብዙኃን ፡ አሕዛብ ፡ ላዕሌኪ ፡ እለ ፡ ይቤሉ ፡ ንትፈሣሕ ፡ ላዕሌኪ ፡ ወይሬእያ[ኪ] ፡ አዕይንቲነ ፡ ጽዮን ።

12 ወእሙንቱሰ ፡ ኢያእመሩ ፡ ዘመከረ ፡ እግዚአብሔር ፡ ወኢያእመሩ ፡ ዘኀለየ ፡ እስመ ፡ አስተጋብኦሙ ፡ ከመ ፡ ክልስስት ፡ ውስተ ፡ ዐውደ ፡ እክል ።

13 ተንሥኢ ፡ አኪድዮሙ ፡ ወለተ ፡ ጽዮን ፡ እስመ ፡ እሬስዮ ፡ ዘኀጺን ፡ ለአቅርንትኪ ፡ ወእሬስዮ ፡ ዘብርት ፡ ለወላትውኪ ፡ ወትመውእዮሙ ፡ ለብዙኃን ፡ አሕዛብ ፡ ወተሐርምዮሙ ፡ ለእግዚአብሔር ፡ ብዝኆሙ ፡ ወኀይሎሙኒ ፡ ለእግዚአብሔር ፡ በኵሎ ፡ ምድር ።

14 ናሁ ፡ ይእዜ ፡ የዐግትዋ ፡ ለወለተ ፡ ጽዮን ፡ ወየሐርስዋ ፡ በበትር ፡ ይዘብጡክሙ ፡ ውስተ ፡ መላትሒክሙ ፡ ሕዝበ ፡ እስራኤል ።