Chapter 2
Chapter 1 / Old Testament / Micah / Chapter 2 Chapter 3

Chapter 2

1 እስመ፡መከሩ፡ኀጢአተ፡ወገብሩ፡እኩየ፡በውስተ፡ምስካቦሙ፡ወበአሒቲ፡ዕለት፡ፈጸምዋ፡ወኢያንሥኡ፡እደዊሆሙ፡ኀበ፡እግዚአብሔር።

2 ወፈተዉ፡ገራውህ፡ወሄዱ፡አብያተ፡ወተዐገሉ፡እጓለ፡ማውታ፡ወበርበርዎ፡ለብእሲ፡ምስሰ፡ቤቱ፡ወመሠጡ፡ብእሴ፡ምስለ፡ርስቱ።

3 በእንተ፡ዝንቱ፡ከመዝ፡ይቤ፡እግዚአብሔር፡ናሁ፡አነ፡እመክር፡እኩየ፡ላዕለ፡ዝንቱ፡ሕዝብ፡በዘ፡ኢያነሥኡ፡እንከ፡ክሳዶሙ፡ወኢየሐውሩ፡እንከ፡ርቱዐ፡ፍኖተ፡እስመ፡ታወግቦሙ፡ዕለት፡እኪት።

4 ውእተ፡አሚረ፡ይሜስሉ፡ላዕሌክሙ፡ምሳሌ።ወታስቆቅዉ፡ሰቆቃወ፡ወትብሉ፡ኀሰርነ፡ወሐርተምነ፡ወይሰፍርዋ፡በሐብል፡ለምድረ፡ሕዝብየ፡ወአልቦ፡ዘይከልእ፡ወዘየኀድግ፡ወይትካፈሉ፡ገራውሂክሙ።

5 በእንተ፡ዝንቱ፡ኢትረክቢ፡ዘያዐውድ፡ለኪ፡ሐብለ፡ዲበ፡መክፈልትኪ፡ውስተ፡ማኀበረ፡እግዚአብሔር።

6 ኢትብክዩ፡ወኢታንብዑ፡በእንተ፡ዝንቱ፡እስመ፡ኢየኀድግ፡ኀሳርክሙ።

7 ዘይቤ፡ቤተ፡ያዕቆብ፡አምዕዑ፡መንፈሰ፡እግዚአብሔር፡በዝንቱ፡ጌጋዮሙ፡እንዘ፡ነገሩ፡ሠናይ፡በኀቤሁ፡ወራትዓን፡የሐውሩ፡ቦቱ፡ወያሜልኡ፡ቅድመ።

8 ወሕዝብየሰ፡ተቃወምዋ፡ቅድሜሃ፡ለሰላሞሙ፡ወይፃረርዋ፡ወሰለብዎ፡ኲናቶ፡ወአኀደግዎ፡ትውክልቶ፡ወይቀጠቅጥዎ፡ውስተ፡ቀትል።

9 ወበበይነ፡ዝንቱ፡ይገድፍዎሙ፡ለመላእክተ፡ሕዝብየ፡አምውስተ፡ትርሲተ፡አብያቲሆሙ፡ወሰደድዎሙ፡እስመ፡እኩይ፡ምግባሮሙ፡ቅረቡ፡አድባር፡እለ፡እምፍጥረተ፡ዓለም።

10 ወተንሥእ፡ወሖር፡እስመ፡ኢኮነት፡እንቲአከ፡ዛቲ፡ዕረፍት፡በእንተ፡ርኩስክሙ፡ጠፋእክሙ፡ወኀለቅሙ፡

11 ወጐየይክሙ፡ዘአልቦ፡ዘይዴግነክሙ፡ጋኔን፡ዐቀመ፡ለከ፡ሐስተ፡ወአውጸሕከ፡ሎቱ፡ወይነ፡ወጼተሎ፡ወይከውን፡በንፍኒፎሙ፡ለዝንቱ፡ሕዝብ።

12 ይትጋባእ፡ያዕቆብ፡ምስለ፡ኵሎሙ፡እለ፡ይጸንሑ፡እምጽንሖሙ፡ለተረፈ፡እለራኤል፡ወእፊሲያ፡ኀቡረ፡ለሚጠቶሙ፡ከመ፡አባግዕ፡ውስተ፡መጽብብ፡ወከመ፡መርዔት፡ውስተ፡ምብያቲሃ፡ወይትባልሑ፡እምሰብእ።

13 በእንተ፡ቅትለቶሙ፡ዘተቃተሉ፡በቅድመ፡ገጾሙ፡ወኀለፉ፡እምአናቅጽ፡ወወፅኡ፡እንተ፡ውስቴታ፡ወሖረ፡ንጉሦሙ፡ቅድመ፡ገጾሙ፡ወእግዚአብሔር፡ይመርሖሙ።