Chapter 20
Chapter 19 / Book of Jubilees / Dillmann's Edition / Chapter 20

1 ወበ፵ወ፪ ፡ ኢዮቤልዉ ፡ በዓመት ፡ ቀዳሚ ፡ ዘሱባዔ ፡ ሳብዕ ፡ ጸውዐ ፡ አብርሃም ፡ ይስማዔልሃ ፡ ወ፲ወ፪ደቂቆ ፡ ወይስሐቅሃ ፡ ወክልኤ ፡ ደቂቆ ፡ ወ፯ደቂቀ ፡ ኬጡራ ፡ ወውሉዶሙ ።

2 ወአዘዞሙ ፡ ከመ ፡ ይዕቀቡ ፡ ፍኖተ ፡ እግዚአብሔር ፡ ከመ ፡ ይግበሩ ፡ ጽድቀ ፡ ወያፍቅር ፡ ፩፩ቢጾ ፡ ወከመ ፡ ይኩኑ ፡ ከማሁ ፡ በውስተ ፡ ኵሉ ፡ ፀብእ ፡ ከመ ፡ ይሑሩ ፡ ዲበ ፡ ፩፩ላዕሌሆሙ ፡ ወለገቢረ ፡ ፍትሕ ፡ ወጽድቅ ፡ በዲበ ፡ ምድር ፡

3 ከመ ፡ ይክስቡ ፡ ውሉዶሙ ፡ በኪዳን ፡ እንተ ፡ ተካየደ ፡ ምስሌሆሙ ፡ ወከመ ፡ ኢይትዐደዉ ፡ የማነ ፡ ወፀጋመ ፡ እምኵሎሙ ፡ ፍናው ፡ ዘአዘዞሙ ፡ እግዚአብሔር ፡ ወከመ ፡ ይትዐቀቡ ፡ እምኵሉ ፡ ርኵስ ፡ ወከመ ፡ ንኅድግ ፡ ማእከሌነ ፡ ኵሎ ፡ ርኵሰ ፡ ወዝሙተ ።

4 ወእመ ፡ ዘመወት ፡ ለክሙ ፡ ኵላ ፡ ብእሲት ፡ ወእመኒ ፡ ወለት ፡ አውዕይዋ ፡ በእሳት ፡ ወኢይዘምዋ ፡ ድኅረ ፡ አዕይንቲሆን ፡ ወልቦንሂ ፡ ወከመ ፡ ኢይንሥኡ ፡ ሎሙ ፡ ብእሲተ ፡ እምነ ፡ አዋልደ ፡ ከነዓን ፡ እስመ ፡ ይሤረው ፡ ዘርአ ፡ ከነዓን ፡ እምነ ፡ ምድር ።

5 ወነገሮሙ ፡ ኵነኔሆሙ ፡ ለረዓይት ፡ ወኵነኔ ፡ ሰዶም ፡ ከመ ፡ ተኰነኑ ፡ በእንተ ፡ እከዮሙ ፡ ወበእንተ ፡ ዝሙት ፡ ወርኵስ ፡ ወሙስና ፡ በበይናቲሆሙ ።

6 ወአንትሙኒ ፡ ተዐቀቡ ፡ እምኵሉ ፡ ዝሙት ፡ ወርኵስ ፡ ወእምኵሉ ፡ ግማኔ ፡ ኀጢአት ፡ ከመ ፡ ኢተሀቡ ፡ ስመነ ፡ ለመርገም ፡ ወኵሉ ፡ ሕይወትክሙ ፡ ለትምክሕት ፡ ውሉድክሙ ፡ ለሙስና ፡ በሰይፍ ፡ ወትከውኑ ፡ ርጉማነ ፡ ከመ ፡ ሰዶም ፡ ወኵሉ ፡ ተረፍክሙ ፡ ከመ ፡ ውሉደ ፡ ገሞራ ።

7 አነ ፡ ኣሰምዕ ፡ ለክሙ ፡ ውሉድየ ፡ አፍቅርዎ ፡ ለአምላከ ፡ ሰማይ ፡ ወተጸመዱ ፡ ኵሎ ፡ ትእዛዞ ፡ ወኢትሖሩ ፡ ድኅረ ፡ ጣዖቶሙ ፡ ወድኅረ ፡ ርኵሶሙ ፡

8 ወአማልክተ ፡ ስብኮ ፡ ኢትግበሩ ፡ ለክሙ ፡ ወግልፍዋተ ። እስመ ፡ ከንቱ ፡ ውእቱ ፡ ወኢምንተኒ ፡ መንፈሰ ፡ አልቦሙ ፡ እስመ ፡ ግብረ ፡ እደው ፡ እሙንቱ ፡ ወኵሎሙ ፡ እለ ፡ ይትዌከሉ ፡ ቦሙ ፡ ...ኢታምልክዎሙ ፡ ወኢትስግዱ ፡ ሎሙ ።

9 ወአንትሙሰ ፡ አምልኩ ፡ አምላከ ፡ ልዑለ ፡ ወስግዱ ፡ ሎቱ ፡ ወትረ ፡ ወተሰፈዉ ፡ ገጸ ፡ ዚአሁ ፡ በኵሉ ፡ ጊዜ ፡ ወግብሩ ፡ ርትዐ ፡ ወጽድቀ ፡ በቅድሜሁ ፡ ከመ ፡ ይፍተው ፡ ላዕሌክሙ ፡ ወየሀብክሙ ፡ ምሕረቶ ፡ ወያውርድ ፡ ለክሙ ፡ ዝናመ ፡ ነግሀ ፡ ወሰርከ ፡ ወይባርክ ፡ ኵሎ ፡ ተግባረክሙ ፡ ዘተገበርክሙ ፡ በዲበ ፡ ምድር ፡ ወይባርክ ፡ እክለከ ፡ ወማየከ ፡ ወይባርክ ፡ ዘርአ ፡ ከርሥከ ፡ ወዘርአ ፡ ምድርከ ፡ ወመራዕየ ፡ አልህምቲከ ፡ ወመራዕየ ፡ አባግዒከ ።

10 ወትከውን ፡ ለበረከት ፡ በዲበ ፡ ምድር ፡ ወይፈትዉክሙ ፡ ኵሎሙ ፡ አሕዛበ ፡ ምድር ፡ ወይባርኩ ፡ ውሉድክሙ ፡ በስምየ ፡ ከመ ፡ ይኩኑ ፡ ቡሩካነ ፡ በከመ ፡ አነ ።

11 ወወሀቦ ፡ ለይስማዔል ፡ ወልዱ ፡ ወለውሉደ ፡ ኬጡራ ፡ ሀብተ ፡ ወፈነዎሙ ፡ እምይስሐቅ ፡ ወልዱ ።

12 ወሖረ ፡ ይስማዔል ፡ ወውሉዱ ፡ ወውሉደ ፡ ኬጡራ ፡ ወውሉዶሙ ፡ ኅቡረ ፡ ወኀደሩ ፡ እምፋርሞን ፡ እስከ ፡ ሙባአ ፡ ባቢሎን ፡ ውስተ ፡ ኵሉ ፡ ምድር ፡ እንተ ፡ ገጸ ፡ ጽባሕ ፡ አንጻረ ፡ ገዳም ፡

13 ወተደመሩ ፡ እሉ ፡ ምስለ ፡ እሉ ፡ ወተጸውዐ ፡ ስሞሙ ፡ ዓረብ ፡ ወእስማዔላዊያን ።