Chapter 19
Chapter 18 / Book of Jubilees / Dillmann's Edition / Chapter 19 Chapter 20

1 ወበዓመት ፡ ፩ ፡ ዘሱባዔ ፡ ቀዳሚ ፡ በዘ ፡ ፵ወ፪ ፡ ኢዮቤልዉ ፡ ተመይጠ ፡ አብርሃም ፡ ወኀደረ ፡ አንጻረ ፡ ኬብሮን ፡ ዛቲ ፡ ይእቲ ፡ ቀርያታርቦቅ ፡ ክልኤ ፡ ሱባዔ ፡ ዓመት ።

2 ወበዓመት ፡ ቀዳሚ ፡ ዘሱባዔ ፡ ሣልስ ፡ ዘዝኢዮቤልዉ ፡ ተፈጸመ ፡ መዋዕለ ፡ ሕይወተ ፡ ሳራ ፡ ወሞተት ፡ በኬብሮን ።

3 ወሖረ ፡ አብርሃም ፡ ከመ ፡ ይብክያ ፡ ወይቅብራ ፡ ወናሜክሮ ፡ እመ ፡ ይትዔገሥ ፡ መንፈሱ ፡ ወኢይትአነተል ፡ በቃለ ፡ አፉሁ ፡ ወተረክበ ፡ ዕጉሠ ፡ በዝኒ ፡ ወኢተሀውከ ።

4 እስመ ፡ በትዕግሥተ ፡ መንፈስ ፡ ተናገረ ፡ ምስለ ፡ ውሉደ ፡ ኬጢ ፡ ከመ ፡ የሀብዎ ፡ መካነ ፡ ከመ ፡ ይቅበር ፡ በድኖ ፡ ውስቴቱ ።

5 ወእግዚአብሔር ፡ ወሀቦ ፡ ሞገሰ ፡ ሎቱ ፡ በቅድመ ፡ ኵሎሙ ፡ እለ ፡ ይሬእይዎ ። ወአስተብቍዐ ፡ በየውሀት ፡ እምኀበ ፡ ውሉደ ፡ ኬጢ ፡ ወወሀብዎ ፡ ምድረ ፡ በአት ፡ ዘካዕበት ፡ ዘአንጻረ ፡ መምሬ ፡ እንተ ፡ ይእቲ ፡ ኬብሮን ፡ በ፵ብሩር ፡

6 ወእሙንቱሰ ፡ ያስተበቍዕዎ ፡ እንዘ ፡ ይብሉ ፡ ነሀብከ ፡ በከ ፡ ወኢነሥአ ፡ እምኔሆሙ ፡ እንከ ፡ በከ ፡ እስመ ፡ ወሀበ ፡ ሤጦ ፡ ለመካን ፡ ብሩረ ፡ ፍጹመ ፡ ወሰገደ ፡ ሎሙ ፡ ካዕበ ፡ ወእምዝ ፡ ቀበረ ፡ በድኖ ፡ ውስተ ፡ በአት ፡ ዘካዕበት ።

7 ወኮነ ፡ ኵሉ ፡ መዋዕለ ፡ ሕይወታ ፡ ለሳራ ፡ ፻ወ፳ወ፯ ፡ ወዝ ፡ ኢዮቤልዉ ፡ ፪ወሱባዔ ፡ ፬ወ፩ዓመት ፡ ዝንቱ ፡ መዋዕለ ፡ ዓመታተ ፡ ሕይወታ ፡ ለሳራ ።

8 ወዝ ፡ መከራ ፡ ዓሥር ፡ ዘተመከረ ፡ ቦቱ ፡ አብርሃም ፡ ወተረክበ ፡ ምእመነ ፡ ዕጉሠ ፡ መንፈስ ።

9 ወኢይቤ ፡ ቃለ ፡ በእንተ ፡ ንባብ ፡ ዘምድር ፡ ዘይቤ ፡ እግዚአብሔር ፡ የሀቦ ፡ ኪያሃ ፡ ሎቱ ፡ ወለዘርኡ ፡ እምድኅሬሁ ፡ ወአመ ፡ አስተብቍዐ ፡ በህየ ፡ ከመ ፡ ይቅበር ፡ በድኖ ፡ እስመ ፡ ተረክበ ፡ መሃይምነ ፡ ወዕጉሠ ፡ ወተጽሕፈ ፡ ዐርከ ፡ እግዚአብሔር ፡ ውስተ ፡ ጽላተ ፡ ሰማይ ።

10 ወበዓመት ፡ ራብዕ ፡ ሎቱ ፡ ነሥአ ፡ ለይስሐቅ ፡ ወልዱ ፡ ብእሲተ ፡ ወስማ ፡ ርብቃ ፡ ወለተ ፡ ባቱኤል ፡ ወልደ ፡ ናኮር ፡ እኅወ ፡ አብርሃም ።

11 ወአብርሃም ፡ ነሥአ ፡ ሎቱ ፡ ብእሲተ ፡ ፫ ፡ ወስማ ፡ ኬጡራ ፡ እምነ ፡ ውሉደ ፡ ቤቱ ፡ እስመ ፡ ሞተት ፡ አጋር ፡ እምቅድመ ፡ ሳራ ።

12 ወወለደት ፡ ሎቱ ፡ ውሉደ ፡ ፯ዘንበሪሃ ፤ ወዮክሰንሃ ፤ ወማዳይሃ ፤ ወኢያዝቦቅሃ ፤ ወሳሐይሃ ፤ በክልኤ ፡ ሱባዔ ፡ ዓመት ።

13 ወበሱባዔ ፡ ሳድስ ፡ በካልእ ፡ ዓመት ፡ ወለደት ፡ ርብቃ ፡ ለይስሐቅ ፡ ፪ደቂቀ ፡ ያዕቆብሃ ፡ ወኤሳውሃ ፡ ወያዕቆብሰ ፡ ኅሱም ፡ ወራትዕ ፡ ወኤሳው ፡ ውእቱ ፡ ብእሲ ፡ ድሩክ ፡ ወሐቃላዊ ፡ ወጸጓር ፤ ያዕቆብ ፡ የኀድር ፡ ውስተ ፡ ምጽላላት ።

14 ወልህቁ ፡ ወራዙት ፡ ወተምሀረ ፡ ያዕቆብ ፡ መጽሐፈ ፡ ወኤሳውሰ ፡ ኢተምህረ ፡ እስመ ፡ ብእሲ ፡ ሐቃላዊ ፡ ውእቱ ፡ ወነዓዊ ፡ ወተምህረ ፡ ፀብአ ፡ ወኵሉ ፡ ግብሩ ፡ ድሩክ ።

15 ወያፈቅሩ ፡ ያዕቆብሃ ፡ አብርሃም ፡ ወይስሐቅኒ ፡ ኤሳውሃ ።

16 ወርእየ ፡ አብርሃም ፡ ግብሮ ፡ ለኤሳው ፡ ወአእመረ ፡ ከመ ፡ በያዕቆብ ፡ ይጼዋዕ ፡ ሎቱ ፡ ስም ፡ ወዘርእ ፡ ወጸውዓ ፡ ለርብቃ ፡ ወአዘዘ ፡ በእንተ ፡ ያዕቆብ ፡ እስመ ፡ ርእየ ፡ ከመ ፡ ይእቲኒ ፡ ታፈቅሮ ፡ ለያዕቆብ ፡ ፈድፋደ ፡ እምነ ፡ ኤሳው ።

17 ወይቤላ ፡ ወለትየ ፡ ዕቀቢ ፡ ወልድየ ፡ ያዕቆብሃ ፡ እስመ ፡ ውእቱ ፡ ይከውን ፡ ህየንቴየ ፡ ዲበ ፡ ምድር ፡ ወለበረከት ፡ በማእከለ ፡ ውሉደ ፡ ሰብእ ፡ ወለኵሉ ፡ ዘርአ ፡ ሴም ፡ ለትምክሕት ፡

18 እስመ ፡ ኣአምር ፡ ከመ ፡ ኪያሁ ፡ የኀሪ ፡ እግዚአብሔር ፡ ሎቱ ፡ ሕዝበ ፡ ዘዕቁም ፡ እምኵሎሙ ፡ እለ ፡ ዲበ ፡ ገጸ ፡ ምድር ።

19 ወናሁ ፡ ይስሐቅ ፡ ወልድየ ፡ ያፈቅሮ ፡ ለኤሳው ፡ እምነ ፡ ያዕቆብ ፡ ወአነ ፡ እሬእየኪ ፡ መፍቀሪተ ፡ ጽድቅ ፡ ለያዕቆብ ፤

20 ወስኪ ፡ ዓዲ ፡ አሠንዮ ፡ ላዕሌሁ ፡ ወይኩን ፡ አዕይንቲኪ ፡ ላዕሌሁ ፡ ለፍቁር ፡ እስመ ፡ ውእቱ ፡ ይከውነኒ ፡ ለበረከት ፡ ዲበ ፡ ምድር ፡ እምይእዜ ፡ ወእስከ ፡ ኵሉ ፡ ትውልደ ፡ ዓለም ።

21 ይጽንዓ ፡ እደዊኪ ፡ ወትትፈሥሒ ፡ በወልድኪ ፡ ያዕቆብ ፡ እስመ ፡ ኪያሁ ፡ አፍቀርኩ ፡ ፈድፋደ ፡ እምኵሎሙ ፡ ውሉድየ ፤ እስከ ፡ ለዓለም ፡ ይትባረክ ፡ እግዚአብሔር ፡ ቦቱ ፡ ወዘርኡ ፡ ይኩን ፡ ዘይመልእ ፡ ኵላ ፡ ምድረ ፤

22 እመ ፡ ይክል ፡ ሰብእ ፡ ኈልቆ ፡ ኆፃ ፡ ምድር ፡ ይትኌለቍ ፡ ዘርኡሂ ።

23 ወኵሉሂ ፡ በረከት ፡ እለ ፡ ባረከኒ ፡ እግዚአብሔር ፡ ኪያየ ፡ ወዘርእየ ፡ ለያዕቆብ ፡ ወለዘርኡ ፡ ይኩን ፡ ኵሎ ፡ መዋዕለ ፡

24 ወበዘርኡ ፡ ይትባረክ ፡ ስምየ ፡ ወስመ ፡ አበዊየ ፡ ሴም ፡ ወኖኅ ፡ ወሄኖክ ፡ ወመላልኤል ፤ ወሴት ፤ ወአዳም ፤

25 ወእሙንቱ ፡ ይከውኑ ፡ ለሳርሮ ፡ ሰማይ ፡ ወለአጽንዖ ፡ ምድር ፡ ወለሐድሶ ፡ ኵሉ ፡ ብርሃናት ፡ ዘዲበ ፡ ምጽናዓት ።

26 ወጸውዖ ፡ ለያዕቆብ ፡ በቅድመ ፡ አዕይንቲሃ ፡ ለርብቃ ፡ እሙ ፡ ወሰዐሞ ፡ ወባረኮ ፡ ወይቤሎ ፡

27 ወልድየ ፡ ያዕቆብ ፡ ፍቁር ፡ ዘአፍቀረት ፡ ነፍስየ ፡ ይባርከ ፡ አምላክ ፡ እመልዕልተ ፡ ምጽንዓት ፡ ወየሀብከ ፡ ኵሎን ፡ በረከታተ ፡ እለ ፡ ባረከ ፡ አዳም ፤ ወሄኖክሃ ፤ ወኖኅሃ ፤ ወሴምሃ ፡ ወኵሎ ፡ ዘመጠነ ፡ ተናገረኒ ፡ ወኵሎ ፡ ዘመጠነ ፡ ይቤ ፡ የሀበኒ ፡ ያጥግእ ፡ ላዕሌከ ፡ ወላዕለ ፡ ዘርእከ ፡ እስከ ፡ ለዓለም ፡ በከመ ፡ መዋዕለ ፡ ሰማይ ፡ ዲበ ፡ ምድር ።

28 ወኢይመብሉ ፡ ላዕሌከ ፡ ወላዕለ ፡ ዘርእከ ፡ መናፍስተ ፡ መስቴማ ፡ ከመ ፡ ያርኅቁከ ፡ እምድኅረ ፡ እግዚአብሔር ፡ ዘውእቱ ፡ አምላክከ ፡ እምይእዜ ፡ ወእስከ ፡ ለዓለም ።

29 ወይኩንከ ፡ እግዚአብሔር ፡ አምላክ ፡ አበ ፡ ወአንተሂ ፡ ወልዶ ፡ በኵረ ፡ ወሕዝቦ ፡ ለኵሉ ፡ መዋዕል ፤ ሑር ፡ ወልድየ ፡ በሰላም ።

30 ወወፅኡ ፡ ክልኤሆሙ ፡ ኅቡረ ፡ እምኀበ ፡ አብርሃም ።

31 ወአፍቀረቶ ፡ ርብቃ ፡ ለያዕቆብ ፡ በኵሉ ፡ ልባ ፡ ወበኵሉ ፡ ነፍሳ ፡ ብዙኀ ፡ ፈድፋደ ፡ እምኤሳው ፡ ወይስሐቅ ፡ ያፈቅሮ ፡ ለኤሳው ፡ እምነ ፡ ያዕቆብ ፡ ፈድፋደ ።