Chapter 18
Chapter 17 / Book of Jubilees / Dillmann's Edition / Chapter 18 Chapter 19

1 ወይቤሎ ፡ እግዚአብሔር ፡ ለአብርሃም ፡ አብርሃም ፡ ወይቤሎ ፡ ነየ ፡ እግዚኦ ፡

2 ወይቤሎ ፡ ንሣእ ፡ ወልደከ ፡ ዘታፈቅር ፡ ይስሐቅሃ ፡ ወሑር ፡ ውስተ ፡ ምድር ፡ ልዕልት ፡ ወአዕርጎ ፡ ውስተ ፡ ፩ ፡ እምአድባር ፡ ዘአነ ፡ ኣየድዐከ ።

3 ወአሌለየ ፡ እምህየ ፡ በነግህ ፡ ወጸዐነ ፡ አድግቶ ፡ ወ፪ ፡ ደቂቆ ፡ ነሥአ ፡ ምስሌሁ ፡ ወይስሐቅሃ ፡ ወልዶ ፡ ወዕፀወ ፡ መሥዋዕት ፡ ሰፀረ ፡ ወሖረ ፡ ውስተ ፡ መካን ፡ በሠሉስ ፡ ዕለት ፡ ወርእየ ፡ መካነ ፡ እምርሑቅ ።

4 ወበጽሐ ፡ እስከ ፡ ዐዘቅተ ፡ ማይ ፡ ወይቤሎሙ ፡ ለደቁ ፡ ንበሩ ፡ ዝየ ፡ ምስለ ፡ አድግት ፡ ወአነ ፡ ወሕፃን ፡ ነሐውር ፡ ወንሰግድ ፡ ወሰጊደነ ፡ ንገብእ ፡ ኀቤክሙ ።

5 ወነሥአ ፡ ዕፀወ ፡ መሥዋዕት ፡ ወአስከሞ ፡ ለይስሐቅ ፡ ወልዱ ፡ ወነሥአ ፡ በእደዊሁ ፡ እሳተኒ ፡ መጥባሕተኒ ፡ ወሖሩ ፡ ክልኤሆሙ ፡ እስከ ፡ ውእቱ ፡ መካን ።

6 ወይቤ ፡ ይስሐቅ ፡ ለአቡሁ ፡ አባ ፡ ወይቤሎ ፡ ነየ ፡ አነ ፡ ወልድየ ፤ ናሁ ፡ እሳት ፡ ወመጥባሕት ፡ ወዕፀው ፡ ወአይቴ ፡ በግዕ ፡ ዘለጽንሓሕ ፡ አባ ።

7 ወይቤ ፡ እግዚአብሔር ፡ ይሬኢ ፡ ሎቱ ፡ በግዐ ፡ ለጽንሓሕ ፡ ወልድየ ፡ ወቀርበ ፡ ኀበ ፡ መካን ፡ ዘደብረ ፡ እግዚአብሔር ፡

8 ወሐነጸ ፡ ምሥዋዐ ፡ ወአንበረ ፡ ዕፀወ ፡ ዲበ ፡ ምሥዋዕ ፡ ወአሰረ ፡ ይስሐቅሃ ፡ ወልዶ ፡ ወአንበሮ ፡ ዲበ ፡ ዕፀው ፡ ዘመልዕልተ ፡ ምሥዋዕ ፡ ወሰፍሐ ፡ እዴሁ ፡ ይንሣእ ፡ መጥባሕተ ፡ ከመ ፡ ይጥብሖ ፡ ለይስሐቅ ።

9 ወአነ ፡ ቆምኩ ፡ ቅድሜሁ ፡ ወቅድመ ፡ መኰንነ ፡ መስቴማ ፡ ወይቤ ፡ እግዚአብሔር ፡ በሎ ፡ ኢያውርድ ፡ እዴሁ ፡ ላዕለ ፡ ሕፃን ፡ ወኢይግበር ፡ ምንተኒ ፡ ላዕሌሁ ፡ እስመ ፡ አእመርኩ ፡ ከመ ፡ ፈራሄ ፡ እግዚአብሔር ፡ ውእቱ ።

10 ወጸውዖ ፡ እግዚአብሔር ፡ እምሰማይ ፡ ወእቤሎ ፡ አብርሃም ፡ አብርሃም ፡ ወደንገፀ ፡ ወይቤ ፡ ነየ ፡ አነ ፡

11 ወይቤሎ ፡ ኢትፈኑ ፡ እዴከ ፡ ዲበ ፡ ሕፃን ፡ ወኢትግበረ ፡ ምንተኒ ፡ ዲቤሁ ፡ እስመ ፡ ይእዜ ፡ አእመርኩ ፡ ከመ ፡ ፈራሄ ፡ እግዚአብሔር ፡ አንተ ፡ ወኢመሐከ ፡ ወልዶከ ፡ በኵረከ ፡ እምኔየ ።

12 ወተኀፍረ ፡ መኰንን ፡ መስቴማ ። ወአንሥአ ፡ አዕይንቲሁ ፡ አብርሃም ፡ ወርእየ ፡ ወናሁ ፡ ፩ ፡ በሐኵ ፡ እኁዝ ፡ ወይመጽእ ፡ በአቅርንቲሁ ፡ ወሖረ ፡ አብርሃም ፡ ወነሥኦ ፡ ለበሐኵ ፡ ወአዕረጎ ፡ ለጽንሓሕ ፡ ህየንተ ፡ ወልዱ ።

13 ወሰመዮ ፡ አብርሃም ፡ ለውእቱ ፡ መካን ፡ ርእየ ፡ እግዚአብሔር ፡ ከመ ፡ ይትበሀል ፡ እግዚአብሔር ፡ ርእየ ፡ ውእቱ ፡ ደብሩ ፡ ለጽዮን ።

14 ወጸውዖ ፡ እግዚአብሔር ፡ ለአብርሃም ፡ በስሙ ፡ ዳግመ ፡ እምሰማይ ፡ በከመ ፡ አስተርአይነ ፡ ከመ ፡ ንትናገሮ ፡ በስመ ፡ እግዚአብሔር ።

15 ወይቤ ፡ በርእስየ ፡ መሐልኩ ፡ ይቤ ፡ እግዚአብሔር ፡ እግዚእ ፡ እስመ ፡ ገበርከ ፡ ዘንተ ፡ ቃለ ፡ ወኢመሐከ ፡ ወልደከ ፡ በኵረከ ፡ እምኔየ ፡ ዘአፍቀርከ ፡ እስመ ፡ ባርኮ ፡ እባርከከ ፡ ወአብዝኆ ፡ ኣበዝኆሙ ፡ ለዘርእከ ፡ ከመ ፡ ከዋክብተ ፡ ሰማይ ፡ ወከመ ፡ ኆፃ ፡ ዘድንጋገ ፡ ባሕር ። ወይወርሱ ፡ ዘርእከ ፡ አህጉረ ፡ ፀሮሙ ፡

16 ወይትባረኩ ፡ በዘርእከ ፡ ኵሎሙ ፡ አሕዛበ ፡ ምድር ፡ ህየንተ ፡ ዘሰማዕከ ፡ ቃልየ ፡ ወአይዳዕከ ፡ ለኵሉ ፡ ከመ ፡ ምእመን ፡ አንተ ፡ ሊተ ፡ በኵሉ ፡ ዘእቤለከ ፡ ሑር ፡ በሰላም ።

17 ወሖረ ፡ አብርሃም ፡ ኀበ ፡ ደቁ ፡ ወተንሥኡ ፡ ወሖሩ ፡ ቤርሳቤሕ ፡ ኅቡረ ፡ ወኀደረ ፡ አብርሃም ፡ ኀበ ፡ ዐዘቅተ ፡ መሐላ ፡

18 ወገብረ ፡ ዛተ ፡ በዓለ ፡ በኵሉ ፡ ዓመታት ፡ ሰቡዐ ፡ መዋዕለ ፡ በፍሥሓ ፡ ወሰመያ ፡ በዓለ ፡ እግዚአብሔር ፡ በከመ ፡ ሰቡዕ ፡ ዕለት ፡ እለ ፡ ሖረ ፡ ወተመይጠ ፡ በሰላም ።

19 ወከመዝ ፡ ውእቱ ፡ ወሥሩዕ ፡ ወጽሑፍ ፡ ውስተ ፡ ጽላተ ፡ ሰማይ ፡ በእንተ ፡ እስራኤል ፡ ወዲበ ፡ ዘርኡ ፡ ለገቢረ ፡ ዛቲ ፡ በዓል ፡ ሰቡዐ ፡ መዋዕለ ፡ በፍሥሓ ።