Chapter 17
Chapter 16 / Book of Jubilees / Dillmann's Edition / Chapter 17 Chapter 18

1 ወበ፩ ፡ ዓመት ፡ ዘሱባዔ ፡ ኃምስ ፡ ኀደገ ፡ ጥበ ፡ ይስሐቅ ፡ ጥበ ፡ በዝንቱ ፡ ኢዮቤልው ፡ ወገብረ ፡ አብርሃም ፡ ግዝአ ፡ ዐቢየ ፡ በወርኅ ፡ ሣልስ ፡ በዕለተ ፡ ኀደገ ፡ ጥበ ፡ ወልዱ ፡ ደስሐቅ ።

2 ወይስማኤል ፡ ወልዳ ፡ ለአጋር ፡ ግብጻዊት ፡ በቅድመ ፡ ገጹ ፡ ለአብርሃም ፡ አቡሁ ፡ በመካኑ ፡ ወተፈሥሐ ፡ አብርሃም ፡ ወባረኮ ፡ ለእግዚአብሔር ፡ እስመ ፡ ርእየ ፡ ሎቱ ፡ ውሉደ ፡ ወኢሞተ ፡ ዘእንበለ ፡ ውሉድ ።

3 ወተዘከረ ፡ ቃሎ ፡ ዘተናገሮ ፡ በዕለተ ፡ ተፈልጠ ፡ ሎጥ ፡ እምኔሁ ፡ ወተፈሥሐ ፡ እስመ ፡ ወሀቦ ፡ እግዚአብሔር ፡ ዘርአ ፡ በዲበ ፡ ምድር ፡ ከመ ፡ ይረሳ ፡ ለምድር ፡ ወባረኮ ፡ በኵሉ ፡ አፉሁ ፡ ለፈጣሬ ፡ ኵሉ ።

4 ወርእየቶ ፡ ለይስማኤል ፡ ሳራ ፡ እንዘ ፡ ይትዋነይ ፡ ወይዘፍን ፡ ወአብርሃምኒ ፡ እንዘ ፡ ይትፌሣሕ ፡ ፍሥሓ ፡ ዐቢየ ፡ ወቀንአት ፡ በይስማኤል ፡ ወትቤሎ ፡ ለአብርሃም ፡ ስድዳ ፡ ዛተ ፡ ወለተ ፡ ወወልዳ ፡ እስመ ፡ ኢይወርስ ፡ ወልዳ ፡ ለዛቲ ፡ ምስለ ፡ ወልድየ ፡ ይስሐቅ ።

5 ወማኅዘነ ፡ ኮኖ ፡ ዝቃል ፡ በቅድመ ፡ አዕይንተ ፡ አብርሃም ፡ በእንተ ፡ አመቱ ፡ ወበእንተ ፡ ወልዱ ፡ ከመ ፡ ይስድዶሙ ፡ እምኀቤሁ ።

6 ወይቤሎ ፡ እግዚአብሔር ፡ ለአብርሃም ፡ ኢይኩን ፡ ሐዘን ፡ ቅድመ ፡ አዕይንቲከ ፡ በእንተ ፡ ሕፃን ፡ ወበእንተ ፡ ወለት ፤ ኵሎ ፡ ዘትቤለከ ፡ ሳራ ፡ ስማዕ ፡ ንባባ ፡ ወግበር ፡ እስመ ፡ በይስሐቅ ፡ ይጼዋዕ ፡ ለከ ፡ ስም ፡ ወዘርእ ፡

7 ወበእንተ ፡ ወልዳሰ ፡ ለዛቲ ፡ ውስተ ፡ ዐቢይ ፡ ሕዝብ ፡ እሬስዮ ፡ እስመ ፡ እምዘርእከ ፡ ውእቱ ።

8 ወጌሰ ፡ አብርሃም ፡ በነግህ ፡ ወነሥአ ፡ ሐባውዘ ፡ ወዝቀ ፡ ማይ ፡ ወአስከማ ፡ ለአጋር ፡ ወለሕፃን ፡ ወፈነዋ ።

9 ወሖረት ፡ እንዘ ፡ ታንጌጊ ፡ በገዳመ ፡ ቤርሳቤ ፡ ወተፈጸመ ፡ ማይ ፡ እምዝቃ ፡ ወጸምአ ፡ ሕፃን ፡ ወስእነ ፡ ሐዊረ ፡ ወወድቀ ።

10 ወነሥአቶ ፡ እሙ ፡ ወሐዊራ ፡ ገደፈቶ ፡ ታሕተ ፡ አሐቲ ፡ ኤልያስ ፡ ወሖረት ፡ ወነበረት ፡ አንጻሮ ፡ መጠነ ፡ አሐቲ ፡ ምንዳፈ ፡ ሐፅ ፡ እስመ ፡ ትቤ ፡ ኢይርአይ ፡ ሞቶ ፡ ለሕፃንየ ፡ ወነቢራ ፡ በከየት ።

11 ወይቤላ ፡ መልአከ ፡ አምላክ ፡ ፩ ፡ እምቅዱሳን ፡ ምንት ፡ ያበክየኪ ፡ አንቲ ፡ አጋር ፡ ተንሢአኪ ፡ ንሥእዮ ፡ ለሕፃን ፡ ወአኀዝዮ ፡ በእደዊኪ ፡ እስመ ፡ ሰምዐ ፡ እግዚአብሔር ፡ ቃለኪ ፡ ወርእየቶ ፡ ለሕፃን ፡

12 ወከሠተት ፡ አዕይንቲሃ ፡ ወርእየት ፡ ዐዘቅተ ፡ ማይ ፡ ወሖረት ፡ ወመልአት ፡ ዝቃ ፡ ማየ ፡ ወአስተየት ፡ ለሕፃና ፡ ወተንሥአት ፡ ወሖረት ፡ መንገለ ፡ በድው ፡ ፋራም ።

13 ወልህቀ ፡ ሕፃን ፡ ወኮነ ፡ ነዳፌ ፡ ወሀሎ ፡ እግዚአብሔር ፡ ምስሌሁ ፡ ወነሥአት ፡ ሎቱ ፡ እሙ ፡ ብእሲተ ፡ እምአዋልደ ፡ ግብጽ ፡

14 ወወለደት ፡ ሎቱ ፡ ወልደ ፡ ወጸውዖ ፡ ስሞ ፡ ናቤዎት ፡ እስመ ፡ ትቤ ፡ ቅሩብ ፡ እግዚአብሔር ፡ ሊተ ፡ ሶበ ፡ ጸዋዕክዎ ፡

15 ወኮነ ፡ በሱባዔ ፡ ሳብዕ ፡ በቀዳሚ ፡ ዓመት ፡ በወርኅ ፡ ቀዳሚ ፡ በዝ ፡ ኢዮቤልው ፡ አመ ፡ ዐሡሩ ፡ ወሰኑዩ ፡ ለዝ ፡ ወርኅ ፡ ኮነ ፡ ቃል ፡ በሰማያት ፡ በእንተ ፡ አብርሃም ፡ ከመ ፡ መሃይምን ፡ ውእቱ ፡ በኵሉ ፡ ዘይነግሮ ፡ ወያፈቅሮ ፡ እግዚአብሔር ፡ እስመ ፡ በኵሉ ፡ ምንዳቤ ፡ ኮነ ፡ ምእመነ ።

16 ወመጽአ ፡ መኰንን ፡ መስቴማ ፡ ወይቤ ፡ ቅድሜሁ ፡ ለአምላክ ፡ ናሁ ፡ አብርሃም ፡ ያፈቅሮ ፡ ለይስሐቅ ፡ ወልዱ ፡ ወያስተአድሞ ፡ ኪያሁ ፡ እምኵሉ ፤ በሎ ፡ ያዕርጎ ፡ ጽንሓሐ ፡ ዲበ ፡ ምሥዋዕ ፡ ወአንተ ፡ ትሬኢ ፡ ለእመ ፡ ይገብር ፡ ዘንተ ፡ ቃለ ፡ ወታአምር ፡ ለእመ ፡ መሃይምን ፡ ውእቱ ፡ በኵሉ ፡ ዘታሜክሮ ።

17 ወእግዚአብሔር ፡ ያአምር ፡ ከመ ፡ መሃይምን ፡ ውእቱ ፡ አብርሃም ፡ በኵሉ ፡ ምንዳቤ ፡ ዘይቤሎ ፡ እስመ ፡ አመከሮ ፡ በምድሩ ፡ ወበዐባር ፡ ወአመከሮ ፡ በብዕለ ፡ ነገሥት ። ወአመከሮ ፡ ካዕበ ፡ በብእሲቱ ፡ እንዘ ፡ ትትሀየድ ፡ ወበክስበት ፡ ወአመከሮ ፡ በይስማዔል ፡ ወበአጋር ፡ አመቱ ፡ አመ ፡ ፈነዎሙ ፡

18 ወበኵሉ ፡ በዘአመከሮ ፡ ተረክበ ፡ ምእመነ ፡ ወኢተአንተለት ፡ ሎቱ ፡ ነፍሱ ፡ ወኢጐንደየ ፡ ገቢሮቶ ፡ እስመ ፡ ምእመን ፡ ውእቱ ፡ ወመፍቀሬ ፡ እግዚአብሔር ።