Chapter 16
Chapter 15 / Book of Jubilees / Dillmann's Edition / Chapter 16 Chapter 17

1 ወበሠርቀ ፡ ወርኅ ፡ ራብዕ ፡ አስተርአይናሁ ፡ ለአብርሃም ፡ በኀበ ፡ ድርስ ፡ ዘማምሪም ፡ ወተናገርነ ፡ ምስሌሁ ፡ ወንሕነኒ ፡ አይዳዕናሁ ፡ ከመ ፡ ይትወሀቦ ፡ ወልድ ፡ እምሳራ ፡ ብእሲቱ ።

2 ወሰሐቀት ፡ ሳራ ፡ እስመ ፡ ሰምዐት ፡ ከመ ፡ ተናገርነ ፡ ዘንተ ፡ ቃለ ፡ ምስለ ፡ አብርሃም ። ወዘለፍናሃ ፡ ወፈርሀት ፡ ወሐሰወት ፡ ከመ ፡ ሰሐቀት ፡ በእንተ ፡ ቃል ።

3 ወነገርናሃ ፡ ስሞ ፡ ለወልዳ ፡ በከመ ፡ ጽሑፍ ፡ ውስተ ፡ ጽላተ ፡ ሰማይ ፡ ይስሐቅ ፡ ለስሙ ።

4 ወአመ ፡ ገባእነ ፡ ኀቤሃ ፡ በጊዜ ፡ ሰዓት ፡ ወይእቲ ፡ ፀንሰት ፡ ወልደ ።

5 ወበዝ ፡ ወርኅ ፡ ገብረ ፡ እግዚአብሔር ፡ ኵነኔሆሙ ፡ ለሰዶም ፡ ወለገሞራ ፡ ወስቡኤም ፡ ወለኵሉ ፡ አድያመ ፡ ዮርዳኖስ ፡ ወአውዐዮሙ ፡ በእሳት ፡ ወበተይ ፡ ወአጥፍኦሙ ፡ እስከ ፡ ዛቲ ፡ ዕለት ፡ በከመ ፡ ናሁ ፡ አይዳዕኩከ ፡ ኵሎ ፡ ምግባሮሙ ፡ ከመ ፡ ጸዋጋን ፡ ወኃጥኣን ፡ ጥቀ ፡ ወይትራኰሱ ፡ ወይዜምዉ ፡ ወይገብሩ ፡ ርኵሰ ፡ በዲበ ፡ ምድር ።

6 ወከማሁ ፡ ይገብር ፡ እግዚአብሔር ፡ ኵነኔ ፡ በኵሉ ፡ መካናት ፡ በእደ ፡ ገብሩ ፡ በከመ ፡ ርኵሶሙ ፡ ለሰዶም ፡ ከመ ፡ ኵነኔሆሙ ፡ ለሰዶም ።

7 ወለሎጥሰ ፡ አድኅኖ ፡ እስመ ፡ ተዘከሮ ፡ እግዚአብሔር ፡ ለአብርሃም ፡ ወአውፅኦ ፡ እማእከለ ፡ ግፍታኤ ።

8 ወገብረ ፡ ውእቱ ፡ ወአዋልዲሁ ፡ ኀጢአተ ፡ ዲበ ፡ ምድር ፡ ዘኢኮነ ፡ ከማሁ ፡ እመዋዕሊሁ ፡ ለአዳም ፡ እስከ ፡ አሜሁ ፡ እስመ ፡ ሰከበ ፡ ብእሲ ፡ ምስለ ፡ አዋልዲሁ ።

9 ወናሁ ፡ ተአዘዘ ፡ ወተቈርጸ ፡ ላዕለ ፡ ኵሉ ፡ ዘርኡ ፡ ውስተ ፡ ጽላተ ፡ ሰማይ ፡ ከመ ፡ ያእትቶሙ ፡ ወከመ ፡ ይሠርዎሙ ፡ ወከመ ፡ ይግበር ፡ ኵነኔሆሙ ፡ በከመ ፡ ኵነኔ ፡ ሰዶም ፡ ወከመ ፡ ኢያትርፍ ፡ ሎቱ ፡ ኵሎ ፡ ዘርአ ፡ ውስተ ፡ ምድር ፡ ዘሰብእ ፡ በዕለተ ፡ ደይን ።

10 ወበዝንቱ ፡ ወርኅ ፡ ግዕዘ ፡ አብርሃም ፡ እምነ ፡ ኬብሮን ፡ ወኀደረ ፡ ማእከለ ፡ ቃዴስ ፡ ወሶር ፡ ውስተ ፡ አድባረ ፡ ጌራሮን ።

11 ወበመንፈቀ ፡ ወርኅ ፡ ኃምስ ፡ ግዕዘ ፡ እምህየ ፡ ወኀደረ ፡ ኀበ ፡ ዐዘቅተ ፡ መሐላ ።

12 ወበመንፈቀ ፡ ወርኅ ፡ ሳድስ ፡ ሐወጻ ፡ እግዚአብሔር ፡ ለሳራ ፡ ወገብረ ፡ ላቲ ፡ በከመ ፡ ይቤላ ፡

13 ወፀንሰት ፡ ወወለደት ፡ ወልደ ። በወርኅ ፡ ሣልስ ፡ ወበመንፈቀ ፡ ወርኅ ፡ በመዋዕል ፡ ዘይቤሎ ፡ እግዚአብሔር ፡ ለአብርሃም ፡ በበዓለ ፡ ቀዳሚ ፡ ማዕረር ፡ ተወልደ ፡ ይስሐቅ ፡

14 ወገዘሮ ፡ ለወልዱ ፡ አብርሃም ፡ አመ ፡ ሳምንት ፡ ውእቱ ፡ ቀዳሚ ፡ ተገዝረ ፡ በኪዳን ፡ በከመ ፡ ተሠርዐ ፡ ለዓለም ።

15 ወበዓመት ፡ ሳድስ ፡ በዝ ፡ ወርኅ ፡ ዘሱባዔ ፡ ራብዕ ፡ መጻእነ ፡ ኀበ ፡ አብርሃም ፡ ኀበ ፡ ዐዘቅተ ፡ መሐላ ፡ ወአስተርአይናሁ ፡ በከመ ፡ ንቤላ ፡ ለሳራ ፡ ከመ ፡ ንግባእ ፡ ኀቤሃ ፡ ወይእቲሰ ፡ ፀንሰት ፡ ወልደ ፡

16 ወተመየጥነ ፡ በወርኅ ፡ ሳብዕ ፡ ወረከብናሃ ፡ ለሳራ ፡ ፅንስታ ፡ ቅድሜነ ፡ ወባረክናሃ ፡ ወዜነውናሃ ፡ ኵሎ ፡ ዘተአዘዝነ ፡ ሎቱ ፡ ከመ ፡ ኢይመውት ፡ ዓዲ ፡ እስከ ፡ ይትወለድ ፡ ፯ ፡ ውሉድ ፡ ወይሬኢ ፡ ዘእንበለ ፡ ይሙት ፡ ወበይስሐቅ ፡ ይጼዋዕ ፡ ሎቱ ፡ ስም ፡ ወዘርእ ፡

17 ወኵሉ ፡ ዘርአ ፡ ውሉዱ ፡ አሕዛበ ፡ ይከውኑ ፡ ወምስለ ፡ አሕዛብ ፡ ይትኌለቍ ፡ ወእምነ ፡ ውሉዱ ፡ ይስሐቅሂ ፡ ፩ ፡ ይከውን ፡ ለዘርእ ፡ ቅዱስ ፡ ወውስተ ፡ አሕዛብ ፡ ኢይትኌለቍ ።

18 እስመ ፡ ለመክፈልተ ፡ ልዑል ፡ ይከውን ፡ ወውስተ ፡ ዘይመልክ ፡ አምላክ ፡ ወሪዶ ፡ ወኵሉ ፡ ዘርኡ ፡ ከመ ፡ ይኩን ፡ ዘርኡ ፡ ለእግዚአብሔር ፡ ሕዝበ ፡ ርስት ፡ እምኵሉ ፡ ሕዝብ ፡ ወከመ ፡ ይኩን ፡ መንግሥተ ፡ ወክህነተ ፡ ወሕዝበ ፡ ቅዱሰ ።

19 ወሖርነ ፡ ፍኖተነ ፡ ወዜነውናሃ ፡ ለሳራ ፡ ኵሎ ፡ ዘነገርናሁ ፡ ወተፈሥሑ ፡ ክልኤሆሙ ፡ ፍሥሓ ፡ ዐቢየ ፡ ጥቀ ።

20 ወሐነጸ ፡ ህየ ፡ ምሥዋዐ ፡ ለእግዚአብሔር ፡ ዘባልሆ ፡ ወለዘያስተፌሥሖ ፡ በምድረ ፡ ፍልሰቱ ፡ ወገብረ ፡ በዓለ ፡ ፍሥሓ ፡ ዐቢየ ፡ በዝ ፡ ወርኅ ፡ ሰቡዐ ፡ መዋዕለ ፡ በቅሩበ ፡ ምሥዋዕ ፡ ዘሐነጸ ፡ ኀበ ፡ ዐዘቅተ ፡ መሐላ ።

21 ወሐነጸ ፡ ምጽላላተ ፡ ሎቱ ፡ ወለአግብርቲሁ ፡ በዛቲ ፡ በዓል ፡ ወውእቱ ፡ መቅድመ ፡ ገብረ ፡ በዓለ ፡ መጸለት ፡ በዲበ ፡ ምድር ።

22 ወበዝ ፡ ሰቡዕ ፡ መዋዕል ፡ ሀሎ ፡ ይቄርብ ፡ ኵሎ ፡ ዕለተ ፡ በበ ፡ ዕለት ፡ ውስተ ፡ ምሥዋዕ ፡ ጽንሓሐ ፡ ለእግዚአብሔር ፡ አልህምተ ፡ ፪ ፡ ወአባግዐ ፡ ፯ ፡ መሐስአ ፡ ጠሊ ፡ ፩ ፡ በእንተ ፡ ኀጢአት ፡ ከመ ፡ ያስተስሪ ፡ ቦቱ ፡ በእንቲአሁ ፡ ወበእንተ ፡ ዘርኡ ፡

23 ወለመሥዋዕተ ፡ መድኀኒት ፡ አብሐኰ ፡ ፯ ፡ ወደቤላተ ፡ ፯ ፡ ወመሥዋዕቶሙሂ ፡ ወሞጻሕቶሙሂ ፡ ላዕለ ፡ ኵሉ ፡ ሥብሖሙ ፡ የዐጥን ፡ በዲበ ፡ ምሥዋዕ ፡ ጽንሓሐ ፡ ኅሩየ ፡ ለእግዚአብሔር ፡ ለመዓዛ ፡ ሠናይ ።

24 በጽባሕ ፡ ወሰርክሂ ፡ የዐጥን ፡ አፈዋተ ፡ ስኂነ ፤ ወቀንዐተ ፤ ወማየ ፡ ልብን ፡ ወናርዶስ ፤ ወከርቤ ፤ ወሰንበልተ ፤ ወቈስጤ ፡ ሰብዐቲሆሙ ፡ ዘንተ ፡ ኵሎ ፡ ይቄርብ ፡ ውጉዐ ፡ ዕሩየ ፡ ተዐርዮ ፡ ድሙረ ፡ ንጹሐ ።

25 ወገብረ ፡ ከመዝ ፡ በዓለ ፡ ሰቡዐ ፡ መዋዕለ ፡ እንዘ ፡ ይትፌሣሕ ፡ በኵሉ ፡ ልቡ ፡ ወበኵሉ ፡ ነፍሱ ፡ ውእቱ ፡ ወኵሎሙ ፡ እለ ፡ ቤቱ ፡ ወአልቦ ፡ መነሂ ፡ ነኪረ ፡ ምስሌሁ ፡ ወኵሉ ፡ ዘኢኮነ ፡ ክሱበ ።

26 ወባረኮ ፡ ለፈጣሪሁ ፡ ዘፈጠሮ ፡ በትዝምዱ ፡ እስመ ፡ በሥምረቱ ፡ ፈጠሮ ፡ እስመ ፡ አእመረ ፡ ወጠየቀ ፡ ከመ ፡ እምኔሁ ፡ ይከውን ፡ ተክለ ፡ ጽድቅ ፡ ለትውልድ ፡ ዘለዓለም ፡ ወእምኔሁ ፡ ዘርእ ፡ ቅዱስ ፡ ከመ ፡ ይኩን ፡ ከማሁ ፡ ለዘ ፡ ለዘገብረ ፡ ኵሎ ።

27 ወባረኮ ፡ ለፈጣሪሁ ፡ ወተፈሥሐ ፡ ወጸውዐ ፡ ስማ ፡ ለዛቲ ፡ በዓል ፡ በዓለ ፡ እግዚአብሔር ፡ ፍሥሓ ፡ ስጥወት ፡ ለአምላክ ፡ ልዑል ።

28 ወባረክናሁ ፡ ለዓለም ፡ ወኵሉ ፡ ዘርአ ፡ ዘእምድኅሬሁ ፡ በኵሉ ፡ ትውልድ ፡ ዘለዓለም ፡ ዘበምድር ፡ እስመ ፡ ገብረ ፡ ዛተ ፡ በዓለ ፡ በጊዜሃ ፡ በከመ ፡ ስምዐ ፡ ጽላተ ፡ ሰማይ ።

29 በእንተዝ ፡ ተሠርዐ ፡ ውስተ ፡ ጽላተ ፡ ሰማይ ፡ ላዕለ ፡ እስራኤል ፡ ከመ ፡ ይኩኑ ፡ ገባርያነ ፡ በዓለ ፡ መጸለት ፡ ሰቡዐ ፡ መዋዕለ ፡ በፍሥሓ ፡ በወርኅ ፡ ሳብዕ ፡ ዘይትወከፍ ፡ በቅድመ ፡ እግዚአብሔር ፡ ሕገ ፡ ለዓለም ፡ በትውልዶሙ ፡ በኵሉ ፡ ዓመት ፡ ወዓመት ።

30 ወአልቦ ፡ ለዝንቱ ፡ ወሰነ ፡ መዋዕል ፡ እስመ ፡ ለዓለም ፡ ውእቱ ፡ ሥሩዕ ፡ ላዕለ ፡ እስራኤል ፡ ከመ ፡ ይግበርዋ ፡ ወይንበሩ ፡ ውስተ ፡ ምጽለት ፡ ወከመ ፡ ያንብሩ ፡ አክሊላተ ፡ ውስተ ፡ ርእሶሙ ፡ ወከመ ፡ ይንሥኡ ፡ ዐጽቀ ፡ ቈጽለ ፡ ኵሓ ፡ እሙሐዝ ።

31 ወነሥአ ፡ አብርሃም ፡ ልበ ፡ ፀበርት ፡ ወፍሬ ፡ ዕፅ ፡ ሠናይ ፡ ወበኵሉ ፡ ዕለት ፡ እምዕለት ፡ ሀሎ ፡ እንዘ ፡ የዐውድ ፡ ምሥዋዐ ፡ በአዕፁቅ ፡ ስብዕ ፡ ለዕለት ፡ ወበጽባሕ ፡ ይሴብሕ ፡ ወይገኒ ፡ ለአምላኩ ፡ ኵሎ ፡ ዘበፍሥሓ ።