1
/ New Testament / 1 Peter / 1 2

1 ጴጥሮስ ፡ ልኡከ ፡ እግዚእኒ ፡ ኢየሱስ ፡ ክርስቶስ ፡ ለኅሩያን ፡ ለእለ ፡ ሀለዉ ፡ ውስተ ፡ በሐውርተ ፡ ጶንጦስ ፡ ወገላትያ ፡ ወቀጰዶቅያ ። ወእስያ ፡ ወቢታንያ ።

2 ለእለ ፡ ቀደሙ ፡ አእምሮቶ ፡ ለእግዚአብሔር ፡ አብ ፡ በመንፈስ ፡ ቅዱስ ፡ ከመ ፡ ይስምዑ ። በንዝኀተ ፡ ደሙ ፡ ለኢየሱስ ፡ ክርስቶስ ። ሞገስ ፡ ወሰላም ፡ ይብዛኅ ፡ ለክሙ ።

3 ይትባረክ ፡ እግዚአብሔር ፡ አቡሁ ፡ ለእግዚእነ ፡ ኢየሱስ ፡ ክርስቶስ ፡ ዘወለደነ ፡ በብዝኀ ፡ ምሕረቱ ፡ ለተስፋ ፡ እንተ ፡ ባቲ ፡ ነሐዩ ፡ በተንሥኦቱ ፡ ለእግዚእኒ ፡ ኢየሱስ ፡ ክርስቶስ ፡ እምነ ፡ ምውታን ።

4 ለተዋርሶ ፡ ዘኢይበሊ ፡ ወዘኢይረኵስ ፡ ወዘኢይጸመሂ ፡ ዘዕቁብ ፡ ለነ ፡ ወለክሙ ፡ በሰማያት ።

5 ለእለ ፡ በኀይለ ፡ እግዚአብሔር ፡ ዕቁባን ፡ በሃይማኖት ፡ ለመድኃኒት ፡ እንተ ፡ ድሉት ፡ ከመ ፡ ታስተርኢ ፡ በደኃሪ ፡ መዋዕል ።

6 ወትትፌሥሑ ፡ እስከ ፡ ለዓለም ። ወባሕቱ ፡ ኅዳጠ ፡ ይእዜ ፡ ሀለወክሙ ፡ ትተክዙ ፡ በዘይመጽአክሙ ፡ መከራ ፡ ዘዘዚአሁ ።

7 ከመ ፡ መከራሃ ፡ ለሃይማኖትክሙ ፡ ዘይትበደር ፡ ፈድፋደ ፡ እምነ ፡ ወርቅ ፡ ዘይማስን ፡ ዘበእሳት ፡ አመከርዎ ፡ ወትትረከብ ፡ ሀለዋ ፡ በክብር ፡ ወበውዳሴ ፡ ወበስብሐት ፡ አመ ፡ ያስተርኢ ፡ ኢየሱስ ፡ ክርሰቶስ ።

8 ውእቱኬ ፡ ዘታፈቅርዎ ፡ እንዘ ፡ ኢትሬእይዎ ። ወእስከ ፡ ይእዜ ፡ ኢርኢክምዎ ። ወባሕቱ ፡ ተአምኑ ፡ ቦቱ ። ወይእዜኒ ፡ ትትፌሥሑ ፡ በፍሥሐ ፡ እንተ ፡ አልባቲ ፡ ማኅለቅት ፡ ወስብሕት ።

9 እንዘ ፡ ትነሥኡ ፡ ፍጻሜሃ ፡ ለሃይማኖትክሙ ፡ መድኀኒተ ፡ ነፍስክሙ ።

10 ይእቲኬ ፡ መደኀኒት ፡ እንተ ፡ ኀሠሥዋ ፡ ወዖድዋ ፡ ነቢያት ፡ እለ ፡ ተነበዩ ፡ በእንተ ፡ ክብርክመ ።

11 እንዘ ፡ የኀሥሡ ፡ ለአይ ፡ ወለማእዜ ፡ መዋዕል ፡ ዘነገረ ፡ በላዕሌሆሙ ፡ መንፈሱ ፡ ለኢየሱስ ፡ ክርስቶስ ፡ ወአቅደመ ፡ ስምዐ ፡ ከዊነ ፡ በእንተ ፡ ዘሀለዎ ፡ ይሕምም ፡ ክርስቶስ ፡ ወበእንተ ፡ ስብሐቲሁ ፡ ዘእምድኅሬሁ ።

12 ለእለ ፡ አስተርአዮሙ ፡ ወአኮ ፡ ለርእሶሙ ፡ አላ ፡ በእንቲአክሙ ፡ ተልእኩ ፡ ዘንተ ፡ ዘይእዜ ፡ ንዜንወክሙ ፡ እለ ፡ አይድዑክሙ ፡ በመንፈስ ፡ ቅዱስ ፡ ዘተፈነወ ፡ እምሰማይ ፡ እምኀበ ፡ ያፈትዎሙ ፡ ለመላእክት ፡ ከመ ፡ የሐውጽዎ ።

13 ወይእዜኒ ፡ ቅንቱ ፡ ሐቌ ፡ ልብክሙ ፡ ጥዩቀ ፡ ወንቁሀ ፡ ተሰፈውዋ ፡ ለእንተ ፡ ትመጽእ ፡ ለክሙ ፡ ትፍሥሕት ፡ በአስተርእዮቱ ፡ ለኢየሱስ ፡ ክርስቶስ ።

14 ከመ ፡ ውሉድ ፡ ዘይትኤዘዙ ፡ እንዘ ፡ ኢትትመየጡ ፡ ለእንተ ፡ ቀዳሚ ፡ ጌጋይክሙ ፡ በኢያእምሮ ፡ ዘፈተውክሙ ።

15 ወባሕቱ ፡ በከመ ፡ ጸውዐክሙ ፡ ቅድስ ፡ ውእቱ ፡ ወአንትሙኒ ፡ ኩኑ ፡ ቅዱሳነ ፡ በኵሉ ፡ ግዕዝክሙ ።

16 እስመ ፡ ጽሑፍ ፡ ዘይብል ፡ ኩኑ ፡ ቅዱሳነ ፡ እስመ ፡ ቅዱስ ፡ አነ ።

17 ወእመሰ ፡ ለአብ ፡ ትጼውዕዎ ፡ ለዘይኴንን ፡ እንዘ ፡ ገጸ ፡ ኢይነሥእ ፡ በበምግባሪሁ ፡ ለለአሐዱ ፡ እንዘ ፡ ትፈርሁ ፡ በመዋዕለ ፡ ሕይወትክሙ ፡ ሑሩ ፡ ባቲ ።

18 እንዘ ፡ ታአምሩ ፡ ከመ ፡ አኮ ፡ በዘይማስን ፡ ብሩር ፡ ወወርቅ ፡ ዘተቤዘወክሙ ፡ እምውስተ ፡ ዘኢይቡቍዕ ፡ ምግባሪክሙ ፡ ዘተመጠውክሙ ፡ እምአበዊክሙ ።

19 አላ ፡ በክቡር ፡ ደሙ ፡ ለክርስቶስ ፡ ከመ ፡ ዘበግዕ ፡ ቅድው ፡ ወንጹሕ ።

20 ዘተአምረ ፡ እምቅድመ ፡ ይትፈጠር ፡ ዓለም ፡ ወአስተርአየ ፡ በደኃሪ ፡ መዋዕል ፡ በእንቲአነ ።

21 እለ ፡ ላዕለ ፡ እዴሁ ፡ አመነ ፡ በእግዚአብሔር ፡ ዘአንሥኦ ፡ እምውታን ፡ ወስብሐተ ፡ ወሀቦ ። ወይእዜኒ ፡ ሃይማኖትክሙ ፡ ወተስፋክሙ ፡ ይኩን ፡ በእግዚአብሔር ።

22 አንጽሑ ፡ ነፍሳቲክሙ ፡ በትእዛዙ ፡ ለጽድቅ ፡ ከመ ፡ ታፍቅሩ ፡ ካልኣኒክሙ ፡ እንዘ ፡ ኢትናፍቁ ፡ በምልአ ፡ ልብክሙ ። ተፋቀሩ ፡ ዘበጽድቅ ፡ በበይናቲክሙ ፡ ጽፉቀ ።

23 ከመ ፡ ሰብእ ፡ እለ ፡ ተወልዱ ፡ ፍጹመ ፡ አኮ ፡ እምዘርዕ ፡ ዘይደመሰስ ፡ አላ ፡ እምዘ ፡ ኢይጠፍእ ፡ በትእዛዙ ፡ ለእግዚአብሔር ፡ ዘሀለወ ፡ ለዝሉፉ ።

24 እስመ ፡ ኵሉ ፡ ዘሥጋ ፡ ከመ ፡ ሣዕር ፡ ወኵሉ ፡ ክብሩ ፡ ከመ ፡ ፍሬ ፡ ሣዕር ፡ ዘእምከመ ፡ የብሰ ፡ ሣዕር ፡ ይትነገፍ ፡ ፍሬሁ ።

25 ወቃሉሰ ፡ ለእግዚአብሔር ፡ ይነብር ፡ ለዓለም ። ወዝንቱ ፡ ውእቱ ፡ ቃሉ ፡ ዘነገርናክሙ ።